Mədəni sərvətimizə, sənətkara verilən dəyər - Fotolar
Birinci vitse-prezident
Mehriban Əliyevanın ağsaqqal xanəndəmizə hörmət və ehtiram nümayiş etdirməsi cəmiyyətimiz
üçün nümunədir
Müasir Azərbaycan
dövlətinin qurucusu və memarı, ulu öndər Heydər Əliyev siyasi hakimiyyətdə
olduğu müddətdə mədəniyyət və incəsənət işçilərinə xüsusi diqqətlə yanaşıb,
onlara maddi və mənəvi dəstək göstərib. Ulu öndərin siyasi kursunun layiqli
davamçısı, Prezident İlham Əliyev bu ənənəni ləyaqətlə davam etdirərək, ölkənin
mədəni həyatının daha yüksək səviyyədə olması üçün köməyini əsirgəməyib. Hər
bir xalq özünün mədəni və milli-mənəvi xəzinəsi - ziyalıları, mədəniyyət və
incəsənət xadimləri, yazıçıları, şairləri ilə dünya miqyasında tanınır və bəşər
sivilizasiyasına töhfələr verir, - söyləyən ölkə başçısı vurğulayıb ki, onlar
cəmiyyətin aparıcı təbəqəsi, elitasıdır. Prezident İlham Əliyev qeyd edib ki,
istər siyasi müstəvidə, istərsə də mədəniyyət, incəsənət sahəsində bütün
cəmiyyətlərin və ölkələrin inkişafı müəyyən bir qrup insanın fəaliyyəti ilə
bağlıdır. Dövlət başçısının ən yaxın silahdaşı, Birinci vitse-prezident, Heydər
Əliyev Fondunun prezidenti Mehriban Əliyeva da ziyalılarımıza, o cümlədən
xalqın mənəvi sərvəti, toxunulmaz xəzinəsi sayılan şəxslərə daim hörmət və
ehtiram nümayiş etdirib, onlara xüsusi qayğı ilə yanaşıb.
Məhz bu diqqət və qayğıdan,
hörmət və ehtiramdan irəli gələrək Birinci vitse-prezident Mehriban Əliyeva
dekabrın 4-də milli musiqi mədəniyyətimizin görkəmli nümayəndəsi, xalq
mahnılarının, muğam ifaçılığının təşəkkülündə özünəməxsus dəstxətti, xidmətləri
olan ustad xanəndələrimizdən biri, Xalq artisti Əlibaba Məmmədovun evində qonaq
olub. Xalq artisti Əlibaba Məmmədov Mehriban xanım Əliyevanı səmimiyyətlə
qarşılayaraq, ona "xalqımızın sevimlisi” deyə, - xitab edib, bu adı qazanmağın böyük
bir şərəf olduğunu vurğulayıb: "Siz təkcə mənə yox, xalqa böyük xidmət etdiniz.
Xalqımızın musiqisi zənginləşdi, yüz dənə mahnı var, hamısı xalq mahnısıdır.
Özü də orada yad nəfəslər heç vaxt olmayıb, yenə də olmayacaq. O yaxşılığı mən
necə unudum, kim unuda bilər? Xalqımız da unutmayacaq. Bilirsiniz, Siz çox
işlər görmüsünüz, danışmaqla qurtarmır. Amma mən bu sözü deyirəm ki, Siz xalqın
sevimlisisiniz, bu, böyük şərəfdir. Xalq sevsə sənətkarı, ona dağ bata bilməz”.
Birinci vitse-prezident
Mehriban Əliyeva xalq artisti Əlibaba Məmmədovun yaradıcılığını Azərbaycan
xalqının mədəni irsi kimi qiymətləndirərək, bu irsi saxlamağın, qorumağın
vacibliyinin əhəmiyyətindən söhbət açıb. O, Prezident İlham Əliyevin də
salamlarını çatdıraraq, xalq artisti ilə səmimi söhbət edib: "Mən ilk dəfə
sizinlə tanış olmağımızı yaxşı xatırlayıram. O zaman Heydər Əliyev Fondunun
böyük bir layihəsinə start verdik. Siz böyük yardım göstərdiniz və bu illər
ərzində sizin dəstəyinizlə, iştirakınızla birlikdə böyük işlər gördük. Siz
Azərbaycanın görkəmli xanəndələrindən birisiniz. Sizin özünüzə məxsus
dəstxəttiniz var, çox gözəl səsə malik olan ustadsınız və bütün Azərbaycan
xalqının sevimlisisiniz. Sizi hamı sevir. Siz Azərbaycanın milli-mənəvi
ənənələrinin daşıyıcısısınız. Ona görə də böyük hörmətə malik olan bir
insansınız. Mən sizinlə ünsiyyətdə olanda özüm üçün hər dəfə nə isə yeni bir
şey aşkar etmişəm, öyrənmişəm. Siz böyük müəllimsiniz, siz 50 ildən çoxdur ki,
musiqi kollecində dərs deyirsiniz və yeni gənc xanəndələr nəslinin yetişməsində
sizin misilsiz xidmətləriniz olub”.
Birinci vitse-prezident
Mehriban Əliyeva milli musiqi mədəniyyətimizin görkəmli nümayəndəsi, Xalq
artisti, muğam, təsnif və xalq mahnılarının mahir ifaçısı Əlibaba Məmmədova
cansağlığı və gələcək fəaliyyətində uğurlar arzulayıb.
Bu görüşlə bağlı
fikirlərini "Kaspi” qəzetinə açıqlayan millət
vəkili Pərvin Kərimzadə bildirib ki, Birinci vitse-prezident Mehriban
Əliyevanın dekabrın 4-də milli musiqi mədəniyyətimizin görkəmli nümayəndəsi,
Xalq artisti Əlibaba Məmmədovun evində qonaq olması, ustad xanəndə ilə səmimi
söhbəti ölkəmizdə dövlət səviyyəsində mədəniyyətin və incəsənətin inkişafında
xidmətləri olan şəxslərə olan böyük hörmətin nümunəsidir. Onun sözlərinə görə,
mədəniyyətimizin, xalq musiqilərimizin, bənzərsiz muğamlarımızın inkişafı,
mənəvi sərvətlərimizin qorunması, beynəlxalq aləmdə daha yaxından tanınması
kimi şərəfli və məsuliyyəti missiyanı üzərinə götürən Mehriban xanımın
humanist, nəcib addımı ağsaqqala, ağbirçəyə, ədəbiyyata, incəsənətə, şeirə,
sənətə, musiqiyə, bir sözlə, sənətkara hörmətin təsdiqidir.
P.Kərimzadə deyib ki,
dövlət xadiminin musiqi mədəniyyətimizin görkəmli nümayəndəsini evində ziyarət
etməsi təkcə musiqisevərlər tərəfindən deyil, ictimaiyyət tərəfindən də
rəğbətlə qarşılanıb: "Birinci vitse-prezident Mehriban Əliyevanın Prezident
İlham Əliyevlə regionlara səfər edərkən vətəndaşlara göstərdiyi diqqət və
qayğı, onlara müraciət edən hər kəslə çox mehriban davranmağı, xüsusən
yaşlılara, körpələrə olan münasibəti göz önündədir. Valideyn himayəsindən
məhrum olmuş və uşaq evlərində tərbiyə alan uşaqlarla görüşlərində bu nəcib
xanımın səmimiyyəti, içdən gələn rəftarı insanı heyran etməyə bilməz. Birinci
vitse-prezident təyin olunmasından keçən müddət ərzində Mehriban xanım
Əliyevanın Vətən və xalqı qarşısında xidmətləri birə-beş artıb, təhsilin,
səhiyyənin, mədəniyyətin, idmanın inkişafı, həqiqətlərimizin təbliği,
milli-mənəvi dəyərlərimizin qorunması, dünya xalqlarının mədəniyyətinə
inteqrasiyası istiqamətində gördüyü işlər, atdığı addımlar xalq tərəfindən daim
böyük razılıqla qarşılanıb. Bu gün Mehriban xanım Əliyeva özünəməxsus nəcib,
humanist və insanpərvər xarakteri ilə tarixə Azərbaycan qadınının ictimai
fəaliyyətinin yeni səhifəsini yazır. Mehriban xanım Əliyevanın elm, təhsil,
mədəniyyət və idman sahələrinin inkişafına yönəlmiş fəaliyyəti, ölkədəki
quruculuq proseslərində yaxından iştirakı Azərbaycan qadınının modern tələblərə
uyğun obrazı bu nəcib xanımın timsalında dünyaya nümayiş etdirilir”.
Milli
Məclisin deputatı Nəsib MəhəməliyevBirinci vitse-prezident
Mehriban xanım Əliyevanın Xalq artisti Əlibaba Məmmədovun evinə qonaq getməsini
ən yüksək əxlaqi, insani keyfiyyətlərin təcəssümü kimi dəyərləndirib. O,
qəzetimizə açıqlamasında bildirib ki, bu hərəkət, mədəniyyətə, sənətkara, ağsaqqala
verilən ali qiymətlə yanaşı, bütövlükdə cəmiyyətimiz üçün gözəl nümunədir: "Həmişə
olduğu kimi bu dəfə də hörmətli Mehriban xanım, bir çox köhnəlmiş stereotipləri
sındıraraq, müsbət mənada xalqımızı təəccübləndirdi və bununla xalq-iqtidar
birliyini növbəti dəfə nümayiş etdirdi. Düşünürəm ki, hörmətli birinci xanımın
bu addımı hər bir vətəndaşımızın ürəyincə oldu. Sadə bir vətəndaş olaraq, yeri
gəlmişkən bir məsələni də xatırlatmaq istərdim. Ötən əsrin yetmişinci illərində
xalqın sevimli müğənnisi Əlibaba Məmmədov tez-tez ölkəmizin bir çox
regionlarında, o cümlədən Balakən rayonunda böyük anşlaqlarla konsertlər verib,
ictimaiyyət qarşısında çıxış edib. Bizlər daim həvəslə onu dinləmişik və bu gün
də dinləyirik. Sadəcə mən deyil, bütün ölkə ictimaiyyəti xalq artisti Əlibaba
Məmmədova dəyər verir, onu milli-mədəni sərvətimiz kimi qəbul edirik. Bu
baxımdan hörmətli Mehriban xanımın, xalqın sevimlisi, el ağsaqqalı Əlibaba
Məmmədovun evinə qonaq getməsi, onunla səmimi söhbət etməsi, ağsaqqal
xanəndəmizə hörmət və ehtiram nümayiş etdirməsi hər bir Azərbaycan vətəndaşında
ikiqat xoş təəssürat yaradır”.
Millət
vəkili Tahir Rzayev də Birinci vitse-prezident Mehriban xanım
Əliyevanın Xalq artisti, böyük sənətkar Əlibaba Məmmədova baş çəkməsini,
səhhəti ilə yaxından maraqlanmasını sənətimizə, sənətkara verilən qiymətin
ifadəsi kimi xarakterizə edib. Azərbaycanın Birinci vitse-prezidentinin ölkənin
mədəniyyət xadimlərinə böyük diqqət və qayğı göstərdiyini xatırladan deputat qeyd
edib ki, Mehriban xanım Əliyevanın bu sahədəki xidmətləri əvəzsiz və
unudulmazdır: "Mehriban xanımın, onun rəhbərlik etdiyi Heydər Əliyev Fondunun
həyata keçirdiyi layihələr sayəsində Azərbaycan muğamına ikinci nəfəs verildi.
Bu istiqamətdə atılan addımlar nəticəsində Azərbaycan muğamı, muğam sənəti
ikinci inkişaf-intibah dövrünə qədəm qoydu. Hazırda Azərbaycan muğamının səsi
dünyanın ən böyük, ən möhtəşəm salonlarından gəlir. Sənətkarlarımıza sonsuz
qayğı və diqqət isə tarixin yeni səhifələridir. Bununla hər birimiz qürur
duyuruq”.
Alpər
TURAN