Mavi Xəzərin də turizm potensialından yararlanacağıq
Bu günlərdə Azərbaycan Respublikasında çimərlik
turizminin inkişafına dair 2017-2020-ci illər üçün Tədbirlər Planı”nın
icrasının müzakirə edilməsi məqsədilə mədəniyyət və turizm naziri Əbülfəs
Qarayevin sədrliyi və aidiyyəti qurumların nümayəndələrinin iştirakı ilə görüş
keçirilib. Tədbirdə Ekologiya və Təbii Sərvətlər, Ədliyyə, Səhiyyə, Fövqəladə
Hallar nazirlikləri, Bakı Şəhər İcra Hakimiyyəti, Əmlak Məsələləri, Dövlət Şəhərsalma
və Arxitektura, Standartlaşdırma, Metrologiya və Patent üzrə dövlət komitələri,
"Azərsu”, "Azərenerji”, "Azəravtoyol” ASC-lərin nümayəndələri iştirak ediblər.
Mədəniyyət və Turizm NazirliyindənAZƏRTAC-a bildirilib ki, görüşdə Əbülfəs
Qarayev çıxış edərək son illər ölkəmizdə turizmin inkişafı üçün atılan
addımlardan danışıb. Bildirib ki, digər turizm növləri kimi çimərlik turizminin
inkişafı üçün də Azərbaycanın böyük turizm potensialı var. Nazir ölkə başçısının
Xəzər dənizinin Azərbaycana mənsub olan bölməsindən turizm məqsədləri üçün daha
səmərəli istifadənin təmin edilməsi məqsədilə "Azərbaycan Respublikasında çimərlik
turizminin inkişafına dair 2017-2020-ci illər üçün Tədbirlər Planı”nın təsdiq
edilməsi haqqında imzaladığı Sərəncamı diqqətə çatdırıb. Bildirib ki, Tədbirlər
Planında çimərliklərə dair hüquqi bazanın təkmilləşdirilməsi, çimərliklərdə
infrastrukturun yaradılması və təkmilləşdirilməsi, çimərlik operatorlarının fəaliyyətinin
tənzimlənməsi, təhlükəsizlik, ətraf mühitin mühafizə tədbirləri, çimərliklərə
dair informasiya bazasının yaradılması və çimərlik turizminin təşviqi ilə bağlı
görüləcək işlər öz əksini tapıb.
Nazir ölkəmizdə mövcud olan çimərliklərin indiki vəziyyətindən
söz açaraq, bəzi çimərliklərin standartlara cavab vermədiyini, aşağı səviyyədə
xidmət göstərdiyini, eyni zamanda, təhlükəsizlik tədbirlərinə yetərincə əməl
olunmadığını vurğulayıb. Bu cür qanunsuz fəaliyyət göstərən çimərliklərin aqibətinin
müəyyən olunması məqsədilə bu sahədə müvafiq qaydaların təsdiq olunmasının
vacibliyini qeyd edib.
Əbülfəs Qarayev çimərlik turizmi ilə bağlı müvafiq
standartın hazırlandığını və təsdiq olunması üçün Standartlaşdırma, Metrologiya
və Patent üzrə Dövlət Komitəsinə təqdim olunduğunu bildirib. Tədbirlər Planının
icrası çərçivəsində cari ildə çimərlik mövsümünün açılışına qədər Bakıda 6 özəl,
6 ictimai, Xaçmazda 2 özəl, 2 ictimai, Lənkəranda 2 özəl, 1 ictimai, Astarada 1
özəl, 1 ictimai çimərliklərin yaradılmasının planlaşdırıldığını deyib. Eyni zamanda,
vahid çimərlik mövsümünün müəyyən olunmasının zəruriliyini də vurğulayıb. Nazir
ölkəmizdə çimərlik turizminin inkişaf etdirilməsi üçün mövcud vəziyyətin
yaxşılaşdırılması, eləcə də Tədbirlər Planının icrası məqsədilə aidiyyəti
qurumlara tapşırıqlar verərək, bu sahədə aidiyyəti qurumlar arasında əməkdaşlığın
daha da gücləndirilməsinin vacibliyini bildirib.
Bəs görəsən görülən bu tədbirlər Azərbaycanda
turizmin inkişafına hansı faydaları olacaq? Yeni yaradılacaq çimərliklər ölkəyə
gələn turistlərin sayına təsir edəcəkmi?
İstədiyimiz
infrastrukturu yarada bilsək...
"Luna Travel”
turizm agentliyinin direktoru, hüquqşünas Rəhman Quliyev deyir ki, bu addım nəinki gəlmə turizminə, hətta daxili turizmin
də inkişafına böyük təkan verəcək: "Yerli turistlər adətən, yayda dincəlmək
üçün xarici ölkələrə, Türkiyənin Antalya, Bodrum kimi çimərlikləri ilə məşhur
olan şəhərlərinə üz tuturlar. Bunun da səbəbi çimərliklərin sayının az olması və
digər problemlərlə bağlı idi. Nəticədə Azərbaycandan xeyli sayda turist axını
xarici ölkələrə üz tuturdu. Bu qərarla artıq həmin turistləri öz ölkəmizə cəlb
edə biləcəyik. Düşünürəm ki, layihəni həyata keçirə bilsək, qısa müddət ərzində
turizm sahəsində xeyli inkişaf ola bilər. Belə çimərliklərin yaradılmasında əsas məqsədlərdən biri də məhz budur. Bizdə çimərliklərin
yaradılması üçün geniş ərazi və əlverişli şərait var. Bu çimərliklərin ödənişsiz, yaxud ucuz
qiymətə olması daha sərfəli olacaq.
Bununla yanaşı, turizm şirkətlərinin proqramına bu çimərliklərin daxil
edilməsi, ölkəyə gələn turistlərdə maraq
yarada bilər. İstədiyimiz infrastrukturu yarada bilsək, növbəti üç il ərzində istirahət
üçün ölkədən xaricə üz tutanları müəyyən qədər daxili turizmə cəlb edə bilərik.
Təbii ki, bunun üçün müəyyən müddət tələb
olunur. Hesab edirəm ki, 3-5 il ərzində buna nail olmaq mümkün olacaq”.
Hər cür
imkanımız var
Millət vəkili
Vahid Əhmədov bu
addımı turizm sahəsinə göstərilən qayğı kimi qiymətləndirir: "Prezidentin imzaladığı strateji yol xəritələrində
qeyri-neft sektorunun inkişafına diqqət xüsusi vurğulanıb. Bu sahələrdən biri də
turizm sahəsidir. Turizmin inkişafı üçün bizim hər cür imkanımız var. Təbii ki,
müəyyən problemlər hələ də qalmaqdadır. Düşünürəm ki, zamanla bu problemlər də həllini tapacaq. Turizm
Nazirliyi bu məqsədlə bu günə kimi xeyli işlər görüb. Bu işlərin məntiqi
ardıcıllığı olaraq, ölkəyə gələn turistlərin sayında son illər ərzində xeyli
artım müşahidə edilir. Azərbaycana xarici turistlər tərəfindən böyük maraq var.
Nəqliyyat və digər infrastruktur məsələlərinə diqqət ayrılır. Görülən bu tədbirlərin
əsasında Azərbaycana daha çox turistin gəlməsini
təmin etmək dayanır”.
Məqsəd
turizmi sənayeyə çevirməkdi
Azərbaycan Turizm və
Menecment Universitetinin Turizm və qonaqpərvərlik fakültəsinin dekanı Rəhman Səfərov deyir ki, bu həm də iqtisadi səmərəliliyi artıracaq: "Turizm sahəsində görülən bütün işlər və verilən sərəncamlar turizmin
inkişafına birbaşa təkan verəcək amillərdir. Görülən işlərin nəticəsi olaraq,
Azərbaycana gələn turistlərin sayında keçən illə müqayisədə bu il
20-25 faiz artım müşahidə edilir. Çimərlik turizmi ilə bağlı verilən bu qərar Azərbaycana gələcək turistlərin sayına öz müsbət təsirini
göstərəcək. Ümumilikdə, gələn turistlərin sayında 25 faiz artım varsa, bu qərarla
daha 10 faiz artım olacağı istisna deyil. Baxmayaraq ki, Azərbaycanda çimərlik
mövsümü çox qısamüddətli davam edir. Hesab edirəm ki, ictimai çimərliklərin
yaranması turizm sektoruna xeyli müsbət təsir göstərəcək. Lakin turizm təkcə bir istiqamətdən ibarət deyil.
Onun müxtəlif sahələrinin inkişafı zəruridir. Məqsəd turizmi sənayeyə çevirməkdi. Məqsədimiz çoxşaxəli
olaraq turizm sənayesini inkişaf etdirməklə, ölkənin turizm sənayesini
formalaşdırmaqdır. Çünki Azərbaycan yüksək turizm potensiallı ölkədir. Belə bir
sənayenin formalaşdırılması, yeni iş yerlərinin açılması həm də iqtisadi səmərəlilik baxımından əlverişlidir.
İnsanlar üçün yeni imkanlar açılır. Eyni zamanda, ölkəmizin bu sahədə əldə
etdiyi gəlirin miqdarı daha da artmış olacaq”.
Şəbnəm
Mehdizadə