Masallıda quruculuq işləri davam edir - Fotolar
Bəzi versiyalara görə, Masallı rayonun adı masal-nağıl mənasını
verir. Masal kimi, nağıl kimi yer hesab olunub bu məkan. Ancaq rayonda son
illər baş verən dəyişikliklər elə nağıllarda olduğu kimidir. Masallı rayonu
ilbəil, aybaay yox, günbəgün dəyişir. Ölkəmizin regionlarında baş verən
sosial-iqtisadi inkişaf Masallının da dəyişən görkəmində öz təsdiqini tapır. Biz
də bunu həftə sonu ölkənin tanınmış media təmsilçilərinin daxil olduğu qrupun
tərkibində rayona səfərimiz çərçivəsində əyani olaraq gördük.
"ASAN xidmət” yox, "ASAN
həyat”
2016-cı ilin sentyabr ayında rayonda regional "ASAN xidmət” kompleksi
istifadəyə verilib. Ancaq bunu "ASAN xidmət” yox, "ASAN həyat” adlandırmaq daha
doğrudur. Bu kompleksin bir çox üstün cəhətləri var. Rayon və bölgə əhalisi
burda həm dövlət qurumlarının göstərdiyi xidmətlərdən yararlana, həm də asudə
vaxtlarını əyləncəli şəkildə keçirə bilərlər. Kompleksdə 4 mərtəbəli inzibati
bina və 6 ictimai iaşə obyekti cəmləşib.
Mərkəzdə 10 dövlət orqanı tərəfindən
32 növ xidmət göstərilir. Eyni zamanda, mərkəzdə 112 növ funksional yardımçı
xidmətlər - bank, sığorta, hüquqi yardım, tərcümə xidmətləri təşkil edilib. Bu
mərkəz Masallı rayonu da daxil olmaqla Cəlilabad, Lənkəran, Astara, Lerik və
Yardımlı rayonlarının əhalisinə də xidmət göstərir. Burada 250 nəfər işlə təmin
olunub. Hər gün təxminən 1500 vətəndaşa xidmət göstərilir. Bura müraciət edən
insanlar yüksək standartlara uyğun xidmətlə yanaşı, eyni zamanda istirahət və
əyləncə imkanlarından da istifadə edirlər. "ASAN həyat” kompleksində Heydər
Əliyev İncəsənət Məktəbi, kafe, bank, "ABAD mərkəz”, "ASAN brend” dükanı və
"ASAN İntellektual” inkişaf mərkəzi fəaliyyət göstərir.
"ABAD”ın perspektivi
Xüsusilə qeyd etmək lazımdır ki, "ASAN həyat”ın nəzdində yaradılan
"ABAD mərkəz”i olduqca perspektivli layihədir. Ailə Biznesinə ASAN Dəstək (ABAD) layihəsi çərçivəsində ailə biznesinin
formalaşdırılması, bu təsərrüfatlar vasitəsilə məhsulların istehsalı,
xidmətlərin göstərilməsi və brendləşdirilməsi, müxtəlif təsərrüfat sahələri
üzrə fəaliyyətin istiqamətləndirilməsi həyata keçirilir. Əsas məqsəd
regionların sosial-iqtisadi inkişafını təmin etməkdən ibarətdir. Bu prosesdə
ilkin olaraq müxtəlif istehsal sahələrinə uyğun seçilmiş ailələrə
avadanlıqlardan istifadə, qablaşdırma, dizayn, məhsulların bazara çatdırılması
üzrə təlimlər keçirilir. Ailələr müasir istehsal avadanlıqlarına malik
konteynerlərlə təmin olunur. Bu avadanlıqların köməyi ilə konteynerlərdə
pendir, ət məhsulları, tərəvəz, meyvə çeşidlərinin emal edilməsi, ölkədə ilk
dəfədir ki, tətbiq olunur. Artıq qısa zaman ərzində 6 ailə belə konteynerlə
təmin olunub. Onu da vurğulayaq ki, konteynerlər vətəndaşların öz həyətlərində
quraşdırılır. Məhsulun qablaşdırılmasından tutmuş, onun satışının təşkilinə
qədər bütün xidmətləri "ASAN xidmət” öz üzərinə götürür. Vətəndaşdan yalnız
sağlam qida üçün sağlam xammal istehsal etmək tələb olunur.
Masallının da bulvarı
olacaq
Masallı rayonunda yenidənqurma işləri bütün sahələri əhatə edir.
Əhalinin istirahətini təmin etmək də prioritet vəzifələrdən biridir. Hazırda
rayonun mərkəzini iki hissəyə bölən Viləş çayı boyunca bulvar-park salınır.
Çayın hər iki sahilini əhatə edəcək bulvar-parkın uzunluğu 6,5 km olacaq. Bulvarda
insanlara xidmət göstərmək, onların istirahətini mənalı və əyləncəli etmək üçün
iaşə obyektləri, idman meydançaları salınacaq. Uşaqların əylənməsi üçün də
xüsusi oyun meydançaları quraşdırılacaq. Hazırda-parkın salınması üçün torpaq
yatağının işlənməsi, çay məcrasının betonlaşdırılması və ağacların əkilməsi prosesi
həyata keçirilir. Park Masallının mərkəzindən Bayraq Meydanına qədər uzanacaq.
Tarixə və incəsənətə diqqət
Tarix Diyarşünaslıq Muzeyi və İncəsənət Mərkəzi də ötən ilin
sentyabrında istifadəyə verilib. Masallının qədim tarixini özündə əks etdirən
eksponatlar uzun müddət Hişkədərə kəndindəki qəzalı binada yerləşmişdi. İndi bu
eksponatlar müasir tələbələr cavab verən muzeydə saxlanılır. Bu muzeydə
Masallının qədimliyi ilə müasirliyinin vəhdəti yaradılıb. 620 yerlik İncəsənət Mərkəzində
isə uşaqlar müxtəlif janrlar üzrə təhsil alırlar. Burda rəqs, musiqi,
heykəltəraşlıq, rəssamlıq bölmələri fəaliyyət göstərir.
Çəltiyi, çayı əvvəlki
şöhrətini qaytaracaq
Rayon İcra Hakimiyyəti başçısı Rafil Hüseynov bildirdi ki, Masallıda görülən işlər Azərbaycan
Respublikasının Prezidenti İlham Əliyevin rəhbərliyi ilə ölkədə aparılan
işlərin tərkib hissəsidir. Masallı rayonu indi islahatların əsas mərkəzlərindən
biridir. Qeyri-neft sektorunun inkişaf etdirilməsi prioritet vəzifələrdən
biridir. Azərbaycan Respublikası Prezidenti 11 aprel 2017-ci ildə "Azərbaycan
Respublikasında kənd təsərrüfatının inkişafı ilə bağlı əlavə tədbirlər haqqında” Sərəncam imzalayıb. Həmin sərəncam
Azərbaycanda kənd təsərrüfatının, bütövlükdə aqrar sahənin inkişaf
etdirilməsinə yönəlik direktiv sənəddir. Hazırda rayonda çayçılığın, xüsusilə
də çəltikçiliyin inkişaf etdirilməsi üzrə layihələr icra edilir. Masallıda ötən
əsrin 60-cı illərinin sonlarına qədər çəltik əkilib. Sonradan itən bu ənənə
hazırda bərpa edilib. Çayçılığın inkişaf etdirilməsi üçün kompleks tədbirlər
həyata keçirilir. Sovetlər vaxtı Masallı faraş kələm istehsalı ilə
ixtisaslaşmışdı. Amma sonradan bu sahə də arxa plana keçmişdi. Hazırda rayonda
faraş tərəvəz istehsalını bərpa etmək üçün hazırlıq işləri görülür. Kələm
ixracını həyata keçirmək üçün Rusiya ilə müqavilə də bağlanılıb. Rayon
rəhbərliyi bu sahələri inkişaf etdirməklə, Masallı çəltiyinin, çayının,
kələminin əvvəlki şöhrətini qaytarmaq niyyətindədir. Görülən bütün işlər isə son
nəticədə, insanların sosial rifahının yüksəldilməsinə istiqamətlənib.
Fuad Abasoğlu