Masallıda gənclər təntənə ilə Milli Orduya yola salınıb
İyulun 9-da Masallı şəhər Bayraq Meydanında Masallı rayonundan olan
bir qrup çağırışçı gənclərin təntənəli şəkildə ordu sıralarına yola salınma
tədbiri keçirilmişdir.
Tədbirdə Masallı Rayon İcra Hakimiyyəti
aparatı, SHXÇDX-nin Masallı rayon əməkdaşları, hüquq-mühafizə orqanlarının
rəhbərləri, ictimaiyyət nümayəndələri, valideynlər, jurnalistlər iştirak
etmişlər.
Tədbirdən öncə çağırışçılar
Heydər Əliyev Parkında ulu öndər Heydər Əliyevin abidəsini ziyarət etmiş,
abidənin önünə gül dəstələri düzərək, ehtiramlarını nümayiş etdirmişlər.
Masallı Rayon İcra
Hakimiyyətinin başçısının müavini Nəsir Muxtarlı bildirmişdir ki, ulu
öndərimizin siyasi kursunu uğurla davam etdirən Prezident, Ali Baş Komandan
cənab İlham Əliyev bu gün Silahlı Qüvvələrimizin müasir hərbi texnika ilə
təchiz edilməsinə, möhkəm nizam-intizamı, döyüş ruhu ilə seçilən və düşmənə
sarsıdıcı zərbə vurmağa qadir olan ordunun formalaşmasına nail olmuşdur.
Tədbirdə çıxış edən
Səfərbərlik və Hərbi Xidmətə Çağırış üzrə Dövlət Xidmətinin Masallı rayon
şöbəsinin rəisi, polkovnik-leytenant Fəxrəddin Mirzəliyev ordu sıralarına yola
düşən gəncləri təbrik edərək, onlara yaxşı yol, uğurlu hərbi xidmət
arzulamışdır.
MƏSQ Veteranlar Təşkilatı
rayon şöbəsinin sədri Məmmədağa Şiriyev, valideyn Gültab Qasımova, çağırışçı
Fərid Şahverdiyev və başqaları çıxış edərək fikir və arzularını, Vətənin
müdafiəsinin hər bir vətəndaşın mənəvi borcu olduğunu söyləmişlər.
Rayonun incəsənət ustalarının
ifasında vətənpərvərlik, qəhrəmanlıq mövzusunda mahnılar ifa edilmişdir.
Sonda çağırışçılar Azərbaycan Bayrağını öpüb "Qurani-Kərim”in
altından keçərək ordu sıralarına yola düşüblər.