Mariya Zaxarovanın açıqlaması etiraz doğurdu
Rusiya Xarici İşlər Nazirliyinin (XİN) rəsmi nümayəndəsi
Mariya Zaxarova bu günlərdə keçirdiyi brifinqdə Azərbaycan jurnalistlərinin
ünvanına səsləndirdiyi fikirlər narazılığa səbəb olub. O, azərbaycanlı
jurnalistin ermənilər tərəfindən girov götürülən, sonra isə 2014-cü ilin
dekabrında ömürlük həbs cəzası verilən Rusiya vətəndaşı Dilqəm Əsgərovla bağlı
sualını yarımçıq qoyaraq, suala tam qulaq asmadan, Azərbaycan mediasında gedən
yazılar barədə xoşagəlməyən ifadələr işlədib. Daha sonra "diplomat” bir qədər də
irəli gedərək, Rusiya XİN barədə yazılan məqalələrin jurnalistika etikasına
sığmadığını bildirib. Təbii ki, bu münasibət Azərbaycanda etirazla qarşılanıb.
Həm rəsmi şəxslər və ictimai-siyasi fəallar, həm də media nümayəndələri
M.Zaxarovanın bu davranışını tənqid ediblər.
Azərbaycan XİN-in
mətbuat xidmətinin rəhbəri Hikmət Hacıyev rusiyalı həmkarı M.Zaxarovanın
erməni girovluğunda olan Rusiya vətəndaşı D.Əsgərovun taleyi ilə bağlı azərbaycanlı
müxbirinin sualına aqressiv reaksiya verərək, Azərbaycan jurnalistlərinin
ünvanına xoşagəlməz ifadələr işlətməsinə münasibət bildirib. XİN rəsmisi deyib
ki, D.Əsgərovun taleyi barəsində suallarla müraciət edən jurnalistləri düzgün
başa düşmək və anlayışla qəbul etmək lazımdır. Nəzərə almaq lazımdır ki, Azərbaycanın
işğal olunmuşKəlbəcər rayonunda ata-analarının qəbirlərini ziyarət edərkən
Ermənistan silahlı qüvvələri tərəfindən girov götürülmüş D.Əsgərov və Şahbaz
Quliyevin taleyi Azərbaycan xalqının daim diqqət mərkəzində olan məsələdir.
H.Hacıyev bildirib ki, kütləvi informasiya vasitələri də ictimai rəyin
güzgüsüdür.
Mətbuat
Şurasının sədri Əflatun Amaşov Rusiya XİN-in sözçüsü M.Zaxarovanın qeyri-adekvat, qeyri-peşəkar,
daşıdığı vəzifəyə yaraşmayan mövqe ortaya qoyduğunu diqqətə çatdırıb. O, bu barədə
APA-ya açıqlamasında deyib ki, M. Zaxarova öz vəzifəsinin hər bir sualı sona qədər
dinləmək və təmsil etdiyi qurumun mövqeyini açıqlamaq olduğunu unutmamalıdır:
"Həmin məqamda Mariya Zaxarovanın davranışı daşıdığı vəzifəyə qeyri-adekvat,
qeyri-etikdir, peşəkarlıq baxımından kifayət qədər problemlidir. Mariya
Zaxarova yaxşı bilir ki, jurnalist o sualı ona nə üçün ünvanlayıb, jurnalistin
ünvanladığı sualda toxunduğu məqam bizim üçün nə dərəcədə əhəmiyyətlidir, o məqama
Azərbaycan-Rusiya münasibətləri baxımından hansı prizmadan baxılır. Mariya
Zaxarova yaxşı bilir ki, Dilqəm Əsgərovun da, Şahbaz Quliyevin də hərəkətlərində
heç bir qeyri-qanuni məqam yoxdur. Onlar valideynlərinin qəbirlərini ziyarət
etmək üçün doğma yurdlarında olublar. Eyni zamanda, Mariya Zaxarova onu da
yaxşı bilir ki, Dilqəm Əsgərov və Şahbaz Quliyevlə bağlı qondarma məhkəmə hökmlərinin
heç bir əsası yoxdur, oyuncaq bir rejimin heç bir beynəlxalq qanunvericiliyə
söykənməyən qərarları nəticəsində ədalətsiz olaraq cəza çəkirlər”.
Ə.Amaşov Azərbaycanın işğal altındakı ərazilərinə
qeyri-qanuni səfər edən Aleksandr Lapşinlə bağlı Rusiya tərəfinin fəallığına da
toxunub: "Biz arzulayardıq ki, Dilqəm Əsgərovla bağlı məsələdə də Rusiya,
Mariya Zaxarovanın özü bu qədər aktiv olsun. Ümumiyyətlə, Dağlıq Qarabağ
münaqişəsi, münaqişənin həllinin gecikməsi, Azərbaycanın ədalətli mövqeyinin
kifayət qədər diqqətdə saxlanılmaması jurnalistlərimizi, vətəndaşlarımızı hər
zaman narahat edir. Mariya Zaxarova gərək o sayaq münasibət göstərərkən,
jurnalistin təmsil etdiyi ölkənin mediası ilə bağlı əndazəyə sığmayan fikirlər
söyləyərkən Azərbaycan-Rusiya münasibətlərinin hazırkı vəziyyətini nəzərə ala
idi. Hazırda Azərbaycan-Rusiya münasibətləri kifayət qədər yüksək səviyyədə,
istidir. Mariya Zavxarova da məsələyə bu aspektdən yanaşmalı idi. Hesab edirəm
ki, bu, Mariya Zaxarovanın missiyasını düzgün yerinə yetirməməsi ilə əlaqədardır.
Mariya Zaxarovanın bundan əvvəlki bir sıra çıxışlarını da nəzərə alsaq, bu,
onda yaranmış müəyyən vərdişlərlə əlaqədardır”.
Yeni Azərbaycan
Partiyası (YAP) Siyasi Şurasının üzvü, "İki sahil” qəzetinin Baş redaktoru
Vüqar RəhimzadəRusiya XİN sözçüsünün səsləndirdiyi fikirlərə münasibət bildirərkən
M.Zaxarovanın özünün "xamlıq” etdiyini dilə gətirib. O, qəzetimizə
açıqlamasında bildirib ki, görünür M.Zaxarova hadisələrdən o qədər də məlumatlı
deyil və D.Əsgərovla bağlı səsləndirilən sualdan yayınmaq, vəziyyətdən çıxmaq
üçün belə bir addım atıb. Qeyd edib ki, elə bu cür davranışla da M.Zaxarova əsl
xamlığa yol verib: "Azərbaycanda söz, mətbuat, fikir azadlığı var. Hər bir
media qurumu sərbəst şəkildə istədiyi mövzuya münasibət bildirə bilər, yaxud
istənilən jurnalist hər hansı hadisəni şərh edib öz qənaətini, analizini ortaya
qoya bilər. Azərbaycanda kifayət qədər ciddi media qurumları, peşəkar
jurnalistlər var. Onlar öz qəti, səlis və dəqiq mövqelərini hazırladıqları məqalələrdə
böyük peşəkarlıqla nümayiş etdirirlər. Bu baxımdan, Zaxarovanın Azərbaycan
jurnalistləri barədə səsləndirdiyi fikirlər təəssüf doğurur. Hesab edirəm ki,
onun yanaşması, düşüncə tərzi naşıdır, daşıdığı vəzifəyə qeyri-adekvatdır, peşəkarlıqdan
da uzaqdır”.
"Bakı xəbər”
qəzetinin Baş redaktoru Aydın Quliyev deyib ki, azərbaycanlı jurnalistin D.Əsgərov və
Ş.Quliyevlə bağlı sualının M.Zaxarova tərəfindən yarımçıq kəsilməsi, suala
cavab vermək əvəzinə Azərbaycan jurnalistlərinin ünvanına xoşagəlməz fikirlər səsləndirməsi
əslində bir çox mətləblərdən xəbər verir. Onun sözlərinə görə, Azərbaycan
jurnalistləri haqlı olaraq öz yazılarında qeyd edirlər ki, Rusiya vətəndaşları
D.Əsgərova və Aleksandr Lapşinə rəsmi Moskva tərəfindən fərqli münasibətin
ortaya qoyulması qəbuledilməzdir: "Çünki, Rusiya XİN A.Lapşinin hüquqlarına həddən
ziyadə diqqət göstərdiyi, ən yüksək səviyyədə müdafiə etdiyi halda, erməni
girovluğunda saxlanılan azərbaycanlı D.Əsgərov bütün bu imtiyazlardan kənarda
qalıb, ona qarşı soyuqluq, laqeydlik var. Zaxarovanın da qıcıqlanmasına səbəb
budur ki, rəsmi Moskva bu mövzuda daha dərinə getmək istəmir. Yəni, burada söhbət
forpost Ermənistanın sıxışdırılmasından, bu dövlət tərəfindən işğal olunmuş Azərbaycan
torpaqlarında yaradılmış qondarma rejimin heç bir əsas olmadan girov saxladığı
Dilqəm və Şahbazın azad edilməsindən gedir. Rusiyanın əlində bunun üçün geniş
imkanlar olduğu halda bu resurslardan istifadə etmir. Rusiya xoşlamır ki, bu məsələdə
kimsə onu "sıxsın”. Əgər Rusiya "sıxışdırılarsa”, məcbur olacaq ki, mülki azərbaycanlıların
girov saxlanması siyasətinə son qoymaq barədə Ermənistana təzyiq göstərsin.
Zaxarova çox gözəl anlayır ki, Azərbaycan mediası Rusiyadan nə istəyir.
Zaxarovaya tövsiyə olaraq çatdırmaq istərdik ki, Azərbaycan mediası Rusiyaya
düşmən gözü ilə baxmır, ölkələrimiz arasındakı münasibətlərə xələl gətirilməsini
də arzulamır. Bizim Rusiyanın rəsmi dairələrindən gözləntimiz və tələbimiz
haqdır, ədalətli mövqedir, Rusiya vətəndaşı olan azərbaycanlı girovların azad
edilməsi üçün müəyyən tədbirlərin görülməsinə çağırışdır, Dağlıq Qarabağ
münaqişəsinə beynəlxalq hüquq normaları çərçivəsində yanaşmadır. Əgər bunlar
baş verərsə, Azərbaycan mediasında Zaxarovanı qıcıqlandıran və narahat edən
yazılara da rast gəlinməz”.
Rufik
İSMAYILOV