“Marafon” fiaskosu
Erməni lobbisinin soydaşlarına yardım adı altında keçirdiyi xeyriyyə
marafonu növbəti dəfə fiaskoya uğrayıb.
Bəlli olduğu kimi, hər il "Hayastan” ümumermənistan fondu işğal altında olan
Azərbaycan torpaqlarında zorla məskunlaşdırılan sakinlərə yardım göstərilməsi
adı altında xeyriyyə marafonları keçirir. Maraq doğuran məsələ odur ki, hər il
yığılan vəsaitlərin həcmində ciddi azalmalar müşahidə edilir. Bu isə o anlama
gəlir ki, artıq dünya ermənilərində Ermənistan hakimiyyətinə əvvəlki inam
qalmayıb. Onlar anlamağa başlayırlar ki, verdikləri pullar təyinatı üzrə deyil,
bir qrup insanın cibinə gedir.
Erməni mətbuatında dərc olunan xəbərlərdə vurğulanır ki, bu dəfə
sayca 19-cu illik xeyriyyə telemarafonunda təxminən 14 milyon dollardan çox
vəsait yığılıb. 12 saatlıq telemarafon hətta bir neçə yerli televiziya ilə də canlı
yayımlanıb. Məlumata görə, bu vəsaitin bir qismi hazırda erməni işğalında olan
Dağlıq Qarabağın ziyan dəymiş rayonlarının bərpasına, oradakı erməni əhalinin
təhlükəsizliyi və müdafiəsinin təminatına, həmçinin çoxuşaqlı ailələr üçün
evlər tikilməsinə sərf olunacaq. Eyni vaxtda Ermənistan və işğal altındakı Dağlıq
Qarabağda məqsədli proqramlar həyata keçiriləcək. Ümumermənistan "Hayastan”
fondu bəyan edib ki, bir sıra sosial və infrastruktur layihələr həyata keçirmək
niyyətindədir. Lakin məsələ ondadır ki, bunlar elə kağız üzərində qalır.
Məsələn, fondun 2015-ci ildə keçirdiyi telemarafonda yığılmış vəsait hesabına
işğal altındakı Azərbaycan torpaqlarında yaşayan çoxuşaqlı erməni ailələri üçün
28 yeni ev tikilməsi nəzərdə tutulmuşdu. Lakin hələ də bu layihə reallaşmayıb.
Ayrılan vəsaitin taleyi isə bəli deyil.
Beləliklə, artıq dünya boyu səpələnən ermənilər daha əvvəlkitək
soydaşlarına yardım göstərməkdə maraqlı görünmürlər. Onlar anlamağa başlayırlar
ki, boğazlarından kəsib göndərdikləri həmin vəsait sonradan Ermənistan
rəhbərliyinə daxil olan şəxslər tərəfindən mənimsənilir. Bu barədə dəfələrlə
mətbuat səhifələrində məlumatlar gedib. Xaricdəki erməni icmasının nüfuzlu
funksionerləri hesab edirlər ki, hakimiyyəti zorla ələ keçirən Serj Sarkisyan
rejimi ölkəni tamamilə iflasa uğradıb. Konkret sübutlar qismində isə bəyan
edilir ki, göstərilən müddət ərzində Ermənistanı tərk edənlərin sayı 1 milyonu
keçib. Eyni zamanda, diqqət ona yönəldilir ki, ölkə bütün regional layihələrdən
təcrid olunub. Bu vəziyyətə etiraz edənlər isə təzyiqlərə məruz qalıb, həbs
edilib və ya öldürülüb. Bu səbəbdən müxaliflər bəyan edirlər ki, Sarkisyan
hökuməti beynəlxalq insan haqları məhkəməsi qarşısında cavab verməlidir. Ən
acınacaqlısı isə odur ki, hakimiyyət vaxtilə Qarabağda separatçı müharibədə
döyüşmüş insanları həbs edir, onlara işgəncələr verir.
Ümumiyyətlə isə ermənilərin hər il keçirdikləri marafon "dilənmə
marafonu” adlandırılsa, daha yaxşı olar. Bu kampaniya ermənilər üçün adi
davranış forması, yaşam tərzinə çevrilib. Yəqin ki, ilin sonunda Ermənistan
prezidenti Serj Sarkisyan və Dağlıq Qarabağdakı separatçıların lideri Bako
Saakyan yenə ABŞ ilə Fransaya yollanacaq, orada dilənəcək, pul istəyəcək və
axırda da telemarafon keçirəcəklər. Məsələ ondadır ki, əgər əvvəllər belə
"xeyriyyə” telemarafonlarında hər dəfə təqribən 25 milyon dollar yığılırdısa,
2014-cü ildən başlayaraq məbləğ sürəkli azalır. 2014-cü ilə 16 milyon dollar
yığılmışdısa, ötənilki marafonda ermənilər 14 milyon dollar ianə toplayıblar.
Səbəb isə bəllidir - son iki ildə xaricdə yaşayan ermənilərin diaspor
təşkilatları ilə rəsmi Yerevan arasında münasibətlər hədsiz dərəcədə pisləşib.
Daha doğrusu, diasporda Serj Sarkisyana nifrət yaranıb. S.Sarkisyanın ABŞ-a və
ya Avropa ölkələrinə səfərləri zamanı diaspor mənsubları Ermənistan
prezidentinin olduğu binanın qarşısına yığışır, piketlər keçirir,
Yerevandakıvə Xankəndidəki cinayətkarlar yığınını yemləmək
istəmədiklərini deyirlər.
Belə bir durumda Ermənistan Milli Konqresi hərbçilərin ehtiyaclarını
qarşılamaq üçün hökumətin yeni fond yaratması və bura işləyən hər vətəndaşdan
ayda 1000 dram (2 dollar) cəlb etmək istəməsi ətrafında yaranan ziddiyyətdən
maksimal dərəcədə öz lehinə istifadə etməyi düşünür. "Aravot” yazır ki, müxaliflər
bu məqsədlə kütləvi aksiyaların keçirilməsini belə istisna etmirlər: "Çünki
cəmiyyətdə hakimiyyətin bu niyyətindən böyük narazılıq var. Hətta iş o yerə
çatıb ki, Ermənistanda bəzi deputatlar hökumətin hərbçilərin ehtiyacları üçün
vətəndaşlardan 1000 dram tutmaq təşəbbüsünü dilənçilik adlandırırlar”.
"Epress.am” saytı isə bu fonda sosial şəbəkələrdə yayılan
materiallara diqqət çəkərək, onlara istinadən yazır: "Bizim ölkədə hakimiyyət
etibar olunan heç nə təklif eləmir. Yığılan pullardan ölən və əlil olanların
ailələrinə nəsə düşəcəyinə necə inanmaq olar? Hər 2 dramdan biri
Sarkisyanlardan birinin cibinə gedir. Bu hakimiyyətə necə inanmaq olar ki, dedovşina
və zabit özbaşınalığı üzündən ölən əsgərləri Azərbaycan gülləsinin qurbanı kimi
təqdim edir?”
Azər NURİYEV