Manata inamın gətirdiyi divident
Mütəxəssislərin fikrincə, milli valyutaya güvəni
tam bərpa etmək üçün bank sektorundakı vəziyyəti nizamlamaq lazımdır
2019-cu il oktyabr ayının
1-nə olan məlumata görə, Azərbaycan əhalisinin banklardakı əmanətlərinin milli
valyuta ekvivalentində məbləği əvvəlki ilin eyni dövrü ilə müqayisədə 5 faiz
artaraq 8 milyard 605,3 milyon manat təşkil edib. Əmanətlərin 55,7 faizi
xarici, 44,3 faizi isə milli valyutada qoyulub. Milli valyutada olan əmanətlər
ötən ilin müvafiq dövrünə nisbətən 24,1 faiz artıb, xarici valyutada əmanətlər
isə 6,5 faiz azalıb. 2019-cu il oktyabr ayının 1-nə ölkənin bank və digər
kredit təşkilatlarının kredit portfeli isə milli valyuta ekvivalentində 14
milyard 211,3 milyon manat təşkil edib, onun 11 milyard 563,1 milyon manatı
uzunmüddətli kreditlər olub. Ödəmə vaxtı keçmiş kreditlərin məbləği ümumi
kredit portfelinin 10,2 faizini təşkil edib.
Manatla qoyulan əmanətlərin
həcminin artması onu göstərir ki, əhalinin milli valyutaya inamı artıb. Bəs bu
inamı artıran səbəblər hansılardır?
İqtisadçı Pərviz Heydərovbanklarda əhalinin manatla olan əmanətlərinin artmasının,
bilavasitə, valyuta bazarında yaranan sabitliklə əlaqəli olduğunu deyir:
"Bildiyimiz kimi, 2015-ci ildə ard-arda devalvasiya baş verdi və 2016-cı
il ərzində isə manat təxminən 15%-ə yaxın ucuzlaşdı. Bu da vətəndaşlarda manata
olan inamı sarsıtdı. Nəticə olaraq, vətəndaşlar banklarda olan əmanətlərini
geri çəkdi. Geri çəkməyənlər isə xarici valyutaya çevirdilər. Beləliklə, həmin
dövrdə banklara dollarla əmanət qoyuluşu 90%-ə qədər qalxdı. Amma 2017-ci
ildən ölkənin valyuta bazarında sabitlik yarandı və manatın məzənnəsi 1.70
həddində dayandı. Bu amil, əhalidə əvvəlki dövrdə manatla bağlı itmiş inamın
bərpasına şərait yaratdı. Lakin hazırda əmanətlərdə müşahidə edilən artım təkcə
manatın məzənnəsinin sabit olması ilə bağlı deyil. Bildiyimiz kimi hökumət də
2016-cı ilin mart ayında əmanətlərin sığortalanması haqqında qanun qəbul etdi.
Həmin qanunda manatla yerləşdirilən əmanətlərdə faiz dərəcəsi dollar ilə
müqayisədə daha çox idi. Qanuna əsasən manatla olan əmanətlər tam olaraq
sığortalandı. Bu addım da əhalidə banklara olan inamın artmasına müsbət təsir
etdi. Qeyd edilən qanunun müddəti mart ayında başa çatacaq, amma bir müddət
əvvəl Milli Məclisin iclasında müddət uzadıldı”.
Müsahibimiz qeyd etdi ki, keçən dövr ərzində xarici valyuta ilə
əmanətin səviyyəsi aşağı düşüb: "Bu, müsbət tendensiya idi. Digər
tərəfdən, infilyasiya 2 rəqəmli deyil, daha aşağı səviyyədədir. Belə ki, keçən
il infilyasiyanı 3% ətrafında başa vurduq, halbuki 2017-ci ildə 12.9 faiz idi.
Bu il üçün də infilyasiyanın 3% ətrafında olacağı gözlənilir. Sadalanan bu
nüanslara əsasən, əhalinin manatla əmanət yerləşdirməsi əvvəlki dövrlərə nisbət
artıb. Amma bunlar arxayınlıq yaratmamalıdır. Çünki məsələ təkcə manata inamda
deyil. Əmanət məsələsində banklara da inam olmalıdır. Təəssüf ki, bank
sektorundakı vəziyyət qənaətbəxş olmadığı üçün vətəndaşlarda müəyyən
tərəddüdlər var. İnamı tam bərpa etmək üçün bank sektorundakı vəziyyəti düzəltmək
lazımdır. Problemli kreditlər həll olunmalı, banklar biznes dairələrinə,
iqtisadiyyatın real sektoruna da kredit verməlidirlər. Həmçinin banklar kredit
faizlərini aşağı salmalıdırlar”.
İqtisadçı Rəşad Həsənovbildirdi ki, əmanətlərin artımı müəyyən qədər də olsa, bank
sektoruna olan inamın bərpasının göstəricisidir. Eyni zamanda qeyd etmək
lazımdır ki, bu məsələdə xüsusilə də əmanətlərin sığortalanması ilə bağlı
dövlətin ortaya qoyduğu mövqe də əsasdır: "Əgər əmanətlərin tam
sığortalanması baş verməsəydi, həcm bu səviyyədə olmazdı. Çünki bank sektoru
faktiki olaraq riskli hesab olunur. Mövcud sığorta sistemi əmanətlərin həcminə
müsbət təsir etdi. İkinci məsələ isə manatın məzənnəsinin sabit olmasıdır. Bu
da müəyyən qədər manata olan inamı artırıb. Artım daha çox müddətli əmanətlərin
həcmində hiss edilir. Amma buna baxmayaraq, faktiki olaraq bu gün əhalinin
əlində dövriyyədən kənarda qalan vəsaitlərin həcmi də kifayət qədər çoxdur.
Çünki insanlar həmin əmanətlərini hansı bankda yerləşdirməklə bağlı ciddi tərəddüdə
sahibdirlər. Bu zaman həmin vəsaitə nəzarət imkanları məhdudlaşır. Eyni zamanda
pulun dövretmə sürəti aşağı düşür. Nəticə etibarı ilə də iqtisadiyyata dəstək
də azalır. Bu baxımdan banklarda əmanətlərin həcminin artması çox
əhəmiyyətlidir. Burada əsas məsələ bank sektoruna olan inamı artırmaqdır.
Düşünürəm ki, əmanətlərin sığortalanma müddətinin uzadılması effektli olacaq.
Digər tərəfdən, bank sektorunda sağlamlaşdırma işləri sürətlənməli və eyni
zamanda birləşmə prosesində olan problemlər də öz həllini tapmalıdır. Həmçinin
problemli kreditlərlə bağlı konkret qərarlar qəbul edilməlidir. Əgər sadalanan
məsələlər reallaşarsa, bankların göstəriciləri kifayət qədər yüksələcək”.
İqtisadçı Ramin Rəhimov milli valyuta ilə olan depozitlərin artmasının
olduqca yaxşı hal olduğunu vurğulayır: "Xatırlayırsınızsa, bir müddət öncə Milli
Bankın prezidenti açıqlama vermişdi ki, hazırda manata qarşı hər hansı bir
təzyiq yoxdur və üzən məzənnə siyasətinə keçid bir müddət təxirə salınır. Bu da
o deməkdir ki, əhali, xüsusilə də sahibkarların milli valyutaya inamı bərpa
edilib. Fikir versəniz, xarici valyuta ilə manatda depozitlərin qoyuluşu
arasında kəskin fərqlər var. Bu da gəlirlilik baxımından əhalini əlindəki pulu
milli valyutada saxlamağa təşviq edir. Bu tendensiyanın belə davam etməsi
iqtisadiyyatımız üçün yaxşıdır ki, dolardan asılılıq aşağı düşür. İnsanların
pulunun dollarla olması, əmanət qoyuluşunda dolların artması, gələcəkdə
dolların kursunun dəyişməsi zamanı bankları əlavə yükə məruz qoyar. Banklar
məzənnə riskinə məruz qalmamaq üçün dollarla olan əmanətlərin faiz dərəcələrini
aşağı saxlayırlar. Əhali isə daha çox gəlir əldə etmək istəyir. Nəticə etibarı
ilə Mərkəzi Bankın sədrinin çıxışı, eyni zamanda ölkə prezidentinin
islahatlarla bağlı atdığı addımlar əhalidə milli valyutaya olan inamı bərpa
edib. Bu isə ilk növbədə iqtisadiyyatın stimullaşdırılması baxımından da vacib
amildir. Çünki biz xarici valyutanın bahalaşması və ya ucuzlaşmasının idxal-ixrac
prosesinə necə təsir etdiyini bilirik. Düşünmürəm ki, yaxın gələcəkdə, ən azı
qarşıdakı 6 aylıq müddətdə dolların kursunda dəyişiklik olsun. Xarici valyutada
olan əmanətlərin milliyə transfer olunması gözlənilir”.
Günel Azadə