Lokal döyüşlərdə qazanılan uğurlar böyük qələbənin ilk müjdəçiləridir
Azərbaycan xalqının
ümummilli lideri Heydər Əliyevin ordu quruculuğu ilə bağlı həyata keçirdiyi
tədbirlər bu gün onun siyasi kursunun layiqli davamçısı, Prezident İlham Əliyev
tərəfindən inamla, uğurla davam etdirilir. Bu tədbirlər sayəsində son illər
yeni hərbi hissələr, hərbi şəhərciklər istifadəyə verilib, ordumuz yeni silah
və texnika ilə təchiz edilib, peşəkarlığını artırıb. Müdafiə nazirinin təsdiq
etdiyi plana müvafiq keçirilən kütləvi vətənpərvərlik tədbirləri, Ali Baş
Komandanın təmas xəttində, səngərlərdə zabit və əsgərlərlə söhbətləri isə şəxsi
heyətin mənəvi-psixoloji hazırlığında daha mühüm rol oynayıb. Bütün bunların
nəticəsində Cənubi Qafqazın lider dövləti sayılan Azərbaycan eyni zamanda
regionun ən güclü ordusuna sahib olan dövlətə çevrilib. Bunu sadəcə biz deyil,
beynəlxalq təşkilatlar, dünyanın konfliktologiya üzrə mütəxəssisləri, hətta
erməni hərbi ekspertləri də dilə gətirirlər. Etiraf olunur ki, Azərbaycanın
hərbi potensialı Ermənistanın hərbi potensialından qat-qat güclüdür. 2016-cı
ilin aprel döyüşləri, cari ilin Günnüt döyüşləri, Ermənistanın təxribatlarına
cavab olaraq işğal altındakı ərazilərimizin bir qisminin düşməndən azad
edilməsi də deyilənlərə əyani sübutdur.
Bu günlərdə
"Globalfirepower” portalının 2018-ci il üçün hazırladığı siyahı ilə Azərbaycan
Ordusunun qüdrəti yenidən diqqət mərkəzinə gəlib. Həmin siyahıya görə,
Azərbaycan hərbi gücünə görə dünya reytinqində 2017-ci illə müqayisədə 5 pillə
irəliləyərək 53-cü mövqedə qərarlaşıb. Azərbaycan bu reytinqlə qonşuları
Gürcüstan (82) və Ermənistanı (84) geridə qoyub. Qeyd edək ki, bu reytinq siyahısının
hazırlanması zamanı dövlətlərin hərbi gücünün müəyyən edilməsi üçün 50 müxtəlif
amil nəzərə alınıb. Burada silahlarla yanaşı, coğrafiya, təbii ehtiyatlar,
əhalinin sayı və sair amillər diqqətdən keçirilib. Nəticə olaraq Azərbaycan
Ordusu regionda liderliyini qoruyub saxlayıb.
Prezident İlham Əliyev də
həm Bakının işğaldan azad edilməsinin 100 illiyi ilə bağlı təşkil olunan
paradda, həm də Biləsuvar rayonuna səfəri zamanı ictimaiyyət nümayəndələri
qarşısındakı çıxışında bu amilə diqqət çəkib. Azərbaycan Silahlı Qüvvələrinin
real mənzərəsini dilə gətirən Ali Baş Komandan işğalçı Ermənistanın baş naziri
Nikol Paşinyanın iddialarına da tutarlı cavab verib. O, düşmən ölkənin hazırda çox
ağır vəziyyətə olduğunu vurğulayıb. Qeyd edib ki, heç bir halda Ermənistan
ordusu Azərbaycan Silahlı Qüvvələri ilə rəqabət apara bilməz. Dövlət başçısı
deyib ki, iyirmi il Ermənistana rəhbərlik etmiş kriminal diktatura rejimi
çöküb. Prezidentin sözlərinə görə, Ermənistanda rəhbərliyə gəlmiş yeni simalar
öz məsuliyyətini dərk etmir, sarsaq bəyanatlar verirlər və təmas xəttində,
Ermənistan-Azərbaycan sərhədində gərginliyə rəvac verən addımlar atırlar.
Prezident
İlham Əliyev deyib ki, Azərbaycan Ordusu düşmənin layiqli cavabını verir,
bundan sonra da verəcəkdir. O, bir neçə gün bundan əvvəl də Azərbaycan
əsgərlərinin Ermənistan hərbçilərinə dərs verdiyini xatırladıb və yaxın
günlərdə ermənilərin özlərinə çətinliklə gələcəyini bəyan edib. Dövlət başçısı
deyib ki, Azərbaycan ordusu daha da gücləndiriləcək, onun döyüş qabiliyyəti bir
qədər də möhkəmləndiriləcək. Prezidentin sözlərinə görə, hərbi paradda nümayiş
etdirilən texniki imkanlar, əsgər-zabitlərin hazırlığı düşmənə yaxşı siqnaldır
ki, otursun yerində, yoxsa, axırı pis olar.
"Bakı Xəbər"
qəzetinin baş redaktoru, siyasi ekspert Aydın Quliyevhesab edir ki, Prezident İlham Əliyevin cənub bölgəsinə səfəri
zamanı ordumuzun gücü və Bakının azad edilməsi ilə bağlı bir müddət əvvəl
keçirilmiş yubiley paradı barədə fikirləri azı iki istiqamətdə önəmlidir: "Əvvəla,
belə bəyanatlarla insanların təhlükəsizliyimizin yüksək səviyyədə təmin
olunmasına inamı daha da artır. İkincisi, dünyadakı bəlli ünvanlar "Azərbaycan
Ordusu düşmənə layiqli cavabını verir, verəcək” kimi sərt mesajı məhz xalqın
arasında olan Prezidentin dilindən eşidirlər. Bu, çox vacib məqamdır. 2016-cı
ilin aprelində Lələtəpədə və bu ilin mayında Naxçıvanda keçirilmiş tarixi
əməliyyatlardan sonra bu günlərdə düşmən təxribatına verilmiş ağır cavab barədə
ilk mesajlar məhz cənub səfərində açıqlandı. Cənab prezidentin ilk dəfə
açıqladığı bu məlumatlar əslində xalqımızın haqq-ədalət müharibəsinə möhkəm
inandığını və bu müharibəyə hər vaxt dəstək verməyə hazır olduğunu dostlarımıza
da, düşmənlərimizə də çox dəqiq şəkildə göstərdi".
Mövzu ilə bağlı fikirlərini
"Kaspi”yə bölüşən hərbi ekspert,
ehtiyatda olan polkovnik-leytenant İbrahim Rüstəmli bildirib ki, istər
ümummilli lider Heydər Əliyevin dövründə, istərsə də Prezident İlham Əliyevin
zamanında Azərbaycanda ordu quruculuğu hər zaman prioritet olub. Onun sözlərinə
görə, bu, təsadüfi deyil: "Ordu quruculuğu, güclü Silahlı Qüvvələr Azərbaycanın
həyata keçirdiyi siyasətin ana xəttini təşkil edir. Çünki, Azərbaycanın 20
faizi ərazisi Ermənistan silahlı qüvvələri tərəfindən işğal olunub. Sülh
danışıqları bir nəticə verməyəcəyi halda işğal altındakı ərazilərimiz hərbi
yolla azad ediləcəkdir. Ona görə də bu günə hazırlıq, Dağlıq Qarabağ
probleminin birdəfəlik, Azərbaycanın ərazi bütövlüyü çərçivəsində həlli ölkəmiz
üçün həyati əhəmiyyət daşıyır. Məhz bu səbəbdən də Silahlı Qüvvələrimizin
maddi-texniki bazası, silah-sursat arsenalı, hərbçilərimizin peşəkarlıq
səviyyəsi hər il gücləndirilir. Təkcə bir faktı söyləmək yetər ki, Azərbaycanın
illik hərbi büdcəsi ümumilikdə Ermənistanın dövlət büdcəsindən böyükdür. Bu
kimi faktlar qarşılığında Ermənistan silahlı qüvvələrini Azərbaycan Ordusu ilə
müqayisə etmək olmaz. Bütün parametrlər üzrə ordumuz düşmən ölkənin silahlı
qüvvələrindən qat-qat güclüdür".
Hərbi ekspert bildirib ki, zərbaycan dünyanın 30-dan artıq ölkəsi ilə
hərbi sahədə əməkdaşlıq edir: "Bu əməkdaşlıq əlaqələri sayəsində ən müasir
silahlar alınaraq ordumuzun istifadəsinə verilib. İşğala məruz qalan bir ölkə
kimi Azərbaycanın öz ordusunu gücləndirmək beynəlxalq hüququn prinsiplərinə
tamamilə uyğundur, mənəvi, psixoloji, siyasi haqqımızdır. Ermənistanın
təxribatları nəticəsində son illər ərzində cəbhədə baş verən lokal toqquşmalar,
erməni hərbçilərinin böyük sayda canlı qüvvə, hərbi texnika, silah-sursat
itkisi verərək geri çəkilməsi, ərazilərimizin bir qisminin işğaldan azad
edilməsi də ordumuzun gücünün göstəricisidir. Lokal döyüşlərdə qazanılan
uğurlar isə böyük qələbənin ilk müjdəçiləridir”.
Rufik
İSMAYILOV