Limitlərin artırılması vətəndaşların qənaət imkanlarını genişləndirəcək
Azərbaycanda elektrik enerjisi və təbii qazın
istifadəsində tətbiq olunan güzəştli limit artırılıb. Bunu iqtisadiyyat
naziriŞahin Mustafayevbildirib. Onun sözlərinə görə, bu qərar ölkə
başçısı İlham Əliyevin müvafiq tapşırığı əsasında qəbul olunub. Belə ki, təbii
qazın pərakəndə satış tarifinə görə, əhali üzrə illik istehlak həcmi 1500
kubmetrdən 1700 kubmetrədək artırılıb. Bundan başqa, əhali üzrə aylıq elektrik
enerjisi istehlakı üzrə limit 250 kilovat-saatdan 300 kilovat-saatadək artıb.Biz də ekspertlərin
yeni qərar haqqında rəylərini öyrənməyə çalışdıq.
Millət vəkili
Vahid Əhmədov qəzetimizə
açıqlamasında yeni qərarı müsbət qiymətləndirdiyini bildirdi: "Hesab edirəm ki,
əvvəlcədən qəbul edilən qərar bir qədər ağır gəlirdi. Yaxşı ki, dövlət
başçısı diferensial sistemdən istifadə
etməklə, müəyyən qədər güzəşt etdi. Düşünürəm ki, yeni qərar insanların sosial
həyatına da xeyli müsbət təsir göstərəcək. Çünki atılan bu addım sosial müdafiə
üçündür. Lakin yenə də qeyd etməliyəm ki, qazın, işığın əvvəlki qiymətini müəyyən
qədər saxlamaq olardı”.
İqtisadçı
Vüqar Bayramovda "Kaspi”yə açıqlamasında sözügedən qərar
haqqında öz fikirlərini bildirdi: "Bu, çox müsbət addımdır. Hesab edirəm ki, bu,
sosial baxımdan da çox vacib bir addımdır. Bu məsələyə yenidən baxılması gündəmdə
idi. Düşünürəm ki, limitlərin artırılması vətəndaşların qənaət imkanlarını genişləndirəcək. Kvotaya
yenidən baxılması və artırılması nəticə etibarı ilə köhnə tariflərlə istifadə
edənlərin sayını və əhatəsini genişləndirməyə imkan verəcək. Düşünürəm ki, əhatə dairəsinin genişləndirilməsi isə köhnə
tariflərdən istifadə edənlərin sayının artırılması baxımından da çox vacibdir.
Hesab edirəm ki, limitlərin dəyişdirilməsi
tətbiq edilən diferensial sistemin təkmilləşdirilməsi istiqamətində atılan əsas
addım kimi qiymətləndirilməlidir. Eyni zamanda, bu sistemin təkmilləşdirilməsi
istiqamətində atılan ilk addımdır. Bu, həm də imkan verəcək ki, növbəti dövrlərdə
sistem özünü təkmilləşdirə bilsin. Yeni qərar inkişaf etmiş ölkələrdə olduğu
kimi gecə və ya gündüz, şəhər, yaxud kənd tariflərinin müəyyənləşməsinə gətirib
çıxara bilər. Qeyd edim ki, növbəti mərhələdə yeni addımlar da atıla bilər.
Çünki, qeyri-neft sektorunun inkişaf prioritetlərinə uyğun olaraq, sənaye
sektorunda da diferensial sistemin tətbiq edilməsi və uyğun limitlərin müəyyənləşdirilməsi
müzakirə olunan məsələlər sırasındadır. Nəticə etibarı ilə yeni limitlərin tətbiqi
diferensial sistemin təkmilləşdirilməsinə imkan yaradır və eyni zamanda sözügedən
sistemin təkmilləşdirilməsi zəminində
baza rolunu oynayır”.
Millət vəkili
Elman Nəsirov Trend-ə açıqlamasında deyib ki, Tarif (qiymət)
Şurasının elektrik enerjisi və təbii qazdan istifadəyə görə tətbiq edilən
limitlərə yenidən baxması gözlənilən idi. Onun sözlərinə görə, Tarif Şurasının
yeni qərarı həqiqətən də istehlakçıların xeyrinə işləyir: Tarif Şurasının əvvəlki
qərarında istifadə edilən elektrik enerjisi və qaza görə limitin az olması
istehlakçıları narahat edirdi. Seçicilərimlə görüşdə onlar da bu məsələ ilə
bağlı mənə müraciət edirdilər. Əhali əvvəlki limitdən artıq elektrik enerjisi və
təbii qaz istifadə etdiyini bildirirdi. Gözləyirdik ki, Tarif Şurası bu qərarla
bağlı dəqiq araşdırma aparsın və limitlərə yenidən baxsın”.
E.Nəsirov əlavə edib ki, bu, müsbət qərardır və alqışlanmalıdır:
"Xüsusilə qış mövsümündə bu limit istehlakçılar üçün az idi. İndiki qərar
daha da məntiqlidir. Çox istərdim ki, Tarif Şurası belə qərarları qəbul edərkən,
problemi daha da dərindən araşdırsın".
Milli Məclisin
deputatı Fəzail AğamalıTrend-ə açıqlamasında bildirib ki, Azərbaycan
Prezidenti İlham Əliyevin tapşırığı ilə təbii qaz və elektrik enerjisindən
istifadəyə görə güzəştli limitlərin artırılması dövlət başçısının xalqa göstərdiyi
bir qayğıdır. O, qeyd edib ki, Prezident əhalinin aşağı təbəqəsinin sosial
müdafiəsini gücləndirmək üçün lazımi tapşırıqlar verir: "Dövlət başçısının bu
tapşırığı da vətəndaşlara bir dəstəkdir. Əlbəttə, prezidentimiz hər zaman
xalqın yanında olduğu kimi, xalqın maraqlarını hər şeydən üstün tutduğu kimi,
indi də bunu nümayiş etdirdi”.
F.Ağamalı hesab edir ki, ölkə Prezidenti gələcəkdə
də bu məsələyə qayıda bilər: "Çünki xalqımızın həyat səviyyəsinin yaxşılaşması,
sosial problemlər içərisində olmaması ana xətt təşkil edir və dövlətimizin
başçısı bu məsələni həmişə diqqətdə saxlayır”.
Şəbnəm