Öldürdüyümüz və öldürən çimərliklər
Havaların
istiləşməsi ilə insanların çimərliklərə axını da başlayıb. Amma təəssüflər
olsun ki, hər il olduğu kimi, bu il də çimərliklərlə bağlı bəzi problemlər
qalmaqdadır. Belə ki, mövsümün yenicə açılmağına baxmayaraq, artıq xeyli sayda
insan tələfatı qeydə alınıb. Dəfələrlə xəbərdarlıq edilməsinə baxmayaraq, hələ
də qadağan olunmuş zonalarda çimən insanlar var. Çimərliklərlə bağlı problemlərdən
biri də ekoloji təmizlik məsələsidir.
Belə ki, bu günlərdə Respublika Gigiyena və Epidemiologiya Mərkəzi ölkə
ərazisindəki çimərliklərdə dəniz sularının çirklənməsi ilə bağlı növbəti
monitorinq keçirib. Bu barədə Trend-ə mərkəzin şöbə müdiri Ziyəddin Kazımovməlumat verib. Şöbə müdiri bildirib ki, monitorinq nəticəsində ölkə ərazisində
iki çimərlikdə dəniz suyunda bakterioloji çirklənmə aşkar edilib:
"Araşdırmalar zamanı məlum olub ki, Bakının Şıx çimərliyi və Qaradağ
rayonunun Sahil çimərliyində bakterioloji çirklənmə aşkar edilib. Mərkəzin
qərarı ilə həmin çimərliklərdə dəniz suyundan istifadə qadağan edilib. Digər
çimərliklərdə isə vəziyyət normaldır".
Z.Kazımov
deyib ki, Sahil və Şıx çimərlikləri hazırda fəaliyyət göstərir:
"Çimərliklər fəaliyyət göstərir. Vətəndaşlar həmin çimərliklərdə istirahət
edə bilərlər, amma dəniz suyundan istifadə etməməklə".
Çimərliklərdə
təhlükəsizlik məsələləri necə təmin edilir? Xəzərdə çirklənmə nədən yaranır,
neqativ halların qarşısını almaq üçün hansı tədbirlər həyata keçirilir? Bu
suallarla əlaqədar qurumlara və ekspertlərə müraciət etdik.
Kiçik Həcmli Gəmilərə Nəzarət və Sularda Xilasetmə
Dövlət Xidmətinin şöbə müdiri Elsevər Həsənovçimərliklərdə təhlükəsizlik tədbirləri ilə bağlı görülən işlər haqqında məlumat
verdi: "İyun ayının 1-dən bəri Kiçik Həcmli Gəmilərə Nəzarət və Sularda
Xilasetmə Dövlət Xidmətinin bütün avadanlıqları hazır vəziyyətə gətirilib və
bütün şəxsi heyət gücləndirilmiş iş rejimində işləyir. Xidmətin nəzarətində
olan 41 çimərlik ərazisində müvafiq təhlükəsizlik tədbirləri görülüb və
çimərliklərin sahilboyu ərazisində maarifləndirici və xəbərdaredici lövhələr
qoyulub. Suda üzmə tələbləri müəyyənləşdirilib və şarlar qoyulub. Həmçinin
çimərlik ərazisində suyun dibi yoxlanılaraq sualtı relyefdə dəyişiklik olan,
daşlıq, qayalıq müəyyən edilən yerlərdə "qadağandır” lövhələri qoyulub. Eyni zamanda, Bakı
şəhərində maarifləndirmə tədbirləri çərçivəsində məktəb və universitetlərdə
şagird və tələbələrə çimərliklərdə hansı təhlükəsizlik qaydalarına əməl edilməsi
barədə broşurlar paylanıb”.
E.Həsənov
qeyd etdi ki, aprel-may ayları ərzində Bakı şəhərində 6 - Qaradağ, Sabunçu, Binəqədi, Xəzər, Səbail,
Suraxanı rayonlarında və Sumqayıt şəhərində monitorinqlər aparılıb:
"Respublikanın Xaçmaz, Astara və Beyləqan rayonlarının su tutarlarına və
çimərlik ərazilərinə baxış keçirilib və təhlükəli faktlarla bağlı qeydiyyat
aparılıb. Monitorinqlərin nəticəsi olaraq hər bir rayonda müşavirələr təşkil
olunub. Bu müşavirələrdə aidiyyəti orqanların
nümayəndələri iştirak ediblər. Əhalinin istirahətinə maneə yaradan
amillər yerli icra orqanlarının diqqətinə çatdırılıb və bu istiqamətdə birgə
tədbirlərin həyata keçirilməsi planlaşdırılır. Təhlükəsizlik tədbirlərinə
xüsusi diqqət ayrılır. Qeyd edim ki, xidmətin 50-yə yaxın əməkdaşı peşə
hazırlıq kurslarına yiyələniblər. İyul ayının 4-ə qədər nəzarətdə olan
çimərliklərdə 24, qeyri-çimərlik ərazilərindən isə 4 nəfər xilas edilib. Bəzən
insanlar təhlükəli yerlərdə, xüsusən silsilə qayalıq olan yerlərdə çimirlər.
Həmçinin, küləkli hava şəraitində, spirtli içki qəbul edərək, qaranlıq
vaxtlarda da çimərliyə gedirlər. Çox vaxt xilasedicilərin çağırışlarına
əhəmiyyət verilmir və üzmə tələblərini pozurlar. Təsadüfi deyil ki, boğulma
halları da məhz bu məqamlarda qeydə alınır”.
Milli
Ekoloji Proqnozlaşdırma Mərkəzinin prezidenti Telman Zeynalovdeyir ki,Xəzərin statusu
məsələsi öz həllini tapmayana qədər bu kimi problemlər qalmaqda davam edəcək:
"Bu barədə uzun illərdir müzakirələrin getməsinə baxmayaraq, hələlik heç bir
standart qəbul olunmayıb. Hətta biz ekoloji təmizliyə riayət etsək belə, bu,
kifayət deyil. Çünki Xəzər təkcə bizə aid deyil. Ona görə də çimərliklərdəki ekoloji təmizliklə bağlı
mövcud problemlərin həlli üçün ilk növbədə Xəzərin statusu haqqında qərar
verilməli və bütün Xəzəryanı ölkələr də Xəzər dənizinin toxunulmaz olduğuna
razılıq verməlidir. Hesab edirəm ki, çimərliklərdəki çirklənmələr məhz bununla
bağlıdır. Biz əgər ölkədə turizmin inkişafından danışırıqsa ilk növbədə
çimərliklərimizdəki bu kimi problemləri həll etməliyik. Çünki çimərlik turizmi
turizmin ən mühüm qollarından biridir”.
Ekologiya
standartlarının monitorinq fondunun prezidenti, professor Rauf Sultanovdeyir
ki, çirklənmələrə əsasən, Xəzərə
axıdılan müxtəlif zərərli maddələr, məişət tullantıları və neft qalıqları səbəb olur: "Ona görə də
mütəmadi olaraq çimərliklərdə ekoloji standartlarla bağlı analizlər və
monitorinqlər aparılır. Monitorinqin nəticələrinə əsasən, Azərbaycanda Abşeron
yarımadasındakı çimərliklərdə baktereoloji çirklənmələr daha çox müşahidə
olunub. Düzdür, bu günə kimi bu
istiqamətdə müxtəlif işlər görülsə də, bəzi problemlər hələ də qalmaqdadır.
Təəssüflər olsun ki, çimərliklərin bəziləri ekoloji standartların tələblərinə
cavab vermirlər. Ekoloji cəhətdən çirklənmiş çimərliklər isə insan həyatı üçün təhlükəlidir. Elə çimərliklər var ki,
orada 1-1,5 metr neft qalıqları çöküb. Çirklənmələrin böyük bir qisminə isə məişət
tullantıları səbəb olur. Təəssüflər olsun ki, təmizlik məsələlərinə vətəndaşlar
özləri də laqeyd yanaşırlar. Bu sahədə görüləsi işlər çoxdur. Ona görə də
çimərliklərə ciddi nəzarət olunmalıdır”.
Şəbnəm Mehdizadə