Bakı 15°C
LDU-da seminar keçirilib
Lənkəran Dövlət Universitetində (LDU)
Lənkəran Şəhər İcra Hakimiyyəti ilə birgə "Əhalinin sosial rifahının yaxşılaşdırılması dövlət
siyasətinin əsas prioritetlərindəndir” mövzusunda seminar keçirilib. Universitetin böyük akt zalında
keçirilən seminarı LDU-nun rektoru vəzifəsini icra edən professor Natiq
İbrahimov açıq elan edib. Universitet rəsmisi ölkəmizdə sosial sferada baş
verən uğurlu yeniliklər, xüsusən də tələbə gənclərin təhsil almalarının
stimullaşdırılması istiqamətində həyata keçirilən ardıcıl dövlət siyasətindən
söz açıb. "Dövlət başçısı İlham Əliyevin bu günlərdə imzaladığı, tələbə və
doktorantların sevinclə qarşıladığı ali təhsil müəssisələrində təqaüd
sisteminin təkmilləşdirilməsi, ali məktəb tələbələri üçün Prezident təqaüdünün
məbləğinin artırılmasını nəzərdə tutan sərəncamları və fərmanı Azərbaycan
gəncliyinə göstərilən qayğının bariz nümunəsidir. Təqaüd alacaq tələbələrin
sayının 16 min nəfər artırılması, 54 təhsil müəssisəsində dövlət sifarişi
əsasında təhsil alan tələbələrin sayının 54 min nəfərdən 70 min nəfərə
çatdırılması çox ciddi uğurdur və ölkə başçısının düzgün yeritdiyi sosial
siyasətin nəticəsidir”.
Universitetin iqtisadiyyat və innovativ idarəetmə
kafedrasının müdiri, iqtisadiyyat elmləri doktoru, professor Telman İmanov
"Əhalinin sosial rifahının yaxşılaşdırılması dövlət siyasətinin əsas
prioritetlərindəndir” mövzusunda məruzə edib.Məruzəçi ölkədə sosial-iqtisadi inkişafın artan templə
getdiyini rəqəmlər əsasında şərh edib, ölkə başçısının son ayda verdiyi fərman
və sərəncamların əhalinin maddi rifah halına müsbət təsir edəcəyini, onların
həyat səviyyələrinin yüksəlişinə xidmət etdiyini vurğulayıb, sosial
müavinətlərin, təqaüdlərin, minimum əmək haqqlarının, tələbə təqaüdlərinin
artırılmasını yüksək dəyərləndirib.
Məruzə ətrafında
çıxış edən Lənkəran Şəhər İcra Hakimiyyətinin məsul işçisi
Ramiz Hacıyev, Rayon Ağsaqqallar Şurasının sədr müavini Sərhad Məmmədov,
universitetin təbiyyat fakültəsinin IV
kurs tələbəsi Aytac Tacibzadə ölkədə
və rayonda gedən böyük quruculuq işlərindən, həyata keçirilən iqtisadi
layihələrdən söz açaraq prezident İlham Əliyevə minnətdarlıqlarını bildiriblər.
Tədbirin sonunda ölkə başçısı
İlham Əliyevə seminar iştirakçıları adından müraciət qəbul edilib.
