“Layihələrimiz diasporumuzun inkişafına, Azərbaycan həqiqətlərinin dolğun şəkildə çatdırılmasına hesablanıb”
10 illik yubileyini qeyd etməyə hazırlaşan Azərbaycan-Slavyan
Gəncləri Assosiasiyası İctimai Birliyi ölkəmizin tanıdılması, dostluq
əlaqələrinin genişlənməsi istiqamətində ictimai fəallığı ilə tanınır. Təşkilatın
rəhbəri Toğrul Allahverdili "Kaspi”yə müsahibəsində ASGA-nın fəaliyyətindən və
gələcək planlarından danışıb.
- Azərbaycan-Slavyan
Gəncləri Assosiasiyası İctimai Birliyinin fəaliyyət istiqamətlərini necə
dəyərləndirirsiniz?
- Bu il 10 yaşını qeyd edən Azərbaycan-Slavyan Gəncləri Assosiasiyası
(ASGA) İctimai Birliyi 2006-cı ildən bəri ölkəmizin milli maraqlarına xidmət
edən bir sıra layihələr reallaşdırıb. Azərbaycan həqiqətlərini dünyada, xüsusən
də slavyan ölkələrində təbliğini qarşıya hədəf kimi qoymuşuq. Təşkilatımızın 2
regional, 3 xarici nümayəndəliyi fəaliyyət göstərir. Qeyd edim ki, ASGA Rusiya
nümayəndəliyi olaraq məqsədimiz Azərbaycan və slavyan gəncləri arasında dostluq
əlaqələri qurmaq, Azərbaycan mədəniyyətini, Qarabağ həqiqətlərini slavyan
gənclərinə təbliğ etməkdən ibarətdir. ASGA olaraq fəaliyyətimizdən tam razı
olmasam da, qənaətbəxş hesab edirəm. Görəcək çox işlərimiz var .
- Azərbaycan və slavyan
ölkələri gəncləri arasında dostluq və əməkdaşlıq əlaqələri sferasında hansı
işlər həyata keçirilir?
- ASGA olaraq üç slavyan ölkəsində Rusiya , Ukrayna və Polşada
nümayəndəliklərimiz fəaliyyət göstərir. Şübhəsiz ki, biz Rusiya nümayəndəliyi
olaraq, bu ölkənin ictimai proseslərində aktiv iştirak edirik. Çalışırıq ki,
Rusiya cəmiyyətinə yaxından inteqrasiya edək və intellektual imkanlarımızı
orada göstərə bilək. ASGA Rusiya nümayəndəliyinin həyata keçirdiyi bütün
layihələr diasporumuzun inkişafına, Azərbaycan həqiqətlərinin Rusiya, xüsusən
slavyan gənclərinə dolğun şəkildə çatdırılmasına hesablanıb. Bizim məqsədimiz
Rusiyada yaşayan həmvətənlərimizin hər bir sahədə təşəbbüslərini
stimullaşdırmaq, Azərbaycan və Rusiya dövlətlərinin diaspor siyasətinə töhfə
vermək, Azərbaycan diasporunu digər xalqların nümayəndələri arasında daha
uğurla təmsil etməkdir. Diaspor təşkilatı olaraq istər Rusiyada, istərsə də
təmsil olunduğumuz beynəlxalq layihələrdə Azərbaycanın adının daha yüksəklərə
qaldırılmasına çalışmışıq.
- Azərbaycan və slavyan
gənclərinin problemlərinin ümumi cəhətlərini necə müəyyənləşdirmisiniz?
- Qeyd etmək istərdim ki , Azərbaycan və slavyan gənclərinin oxşarlığı
olduğu kimi, problemləri də var və bu problemlərin kökündə az əvvəl qeyd
etdiyim kimi inteqrasiya dayanır. Biz əksəriyyətimiz Sovetlərin süquta uğradığı
dönəmdə dünyaya gələn gənclərik və Azərbaycan kimi əksər slavyan ölkələrində də
müharibələr, işğallar olub. Odur ki, bizim bir-birimizi anlamamız daha
önəmlidir. Qərbin ikili standartları slavyan ölkələrinə də təsirsiz ötüşmür.
Biz istər sosial şəbəkələr, istərsə də nümayəndələrimiz və təmsilçilərimiz
vasitəsi ilə çalışırıq ki , bu problemləri müəyyən edib, ən azından həll edə
bilməsək də müəyyən təkliflərlə çıxış edək. Bizim tək iqtisadi deyil, həm də
ortaq siyasi və mədəni maraqlarımız var.
- Bu gün Rusiyada kifayət
qədər azərbaycanlı gənc yaşayır, işləyir və təhsil alır. Ölkəmizlə bağlı
onların ictimai fəallıqlarını necə qiymətləndirirsiniz?
- Rusiya azərbaycanlılarının hazırkı durumunu ötən illərlə müqayisədə
çox yüksək qiymətləndiririk. Əgər əvvəllər diasporumuzda çoxlu parçalanma
meyilləri var idisə, son vaxtlar daha çox birləşdirici məqamlar çoxalıb. Onu da
deyim ki, Qarabağ kimi problemi olan bir xalq üçün bölünmək, parçalanmaq
yolverilməzdir. Bu gün ən böyük Azərbaycan diaspor təşkilatı Rusiyada fəaliyyət
göstərir. Diasporumuz artıq Rusiyanın bütün regionlarında təşkilatlanıb. Misal
olaraq Heydər Əliyev Fondunun vitse-prezidenti Leyla xanım Əliyevanın rəhbərlik
etdiyi Rusiyanın Azərbaycanlı Gənclər Təşkilatının (RAGT), ulu öndər Heydər
Əliyevin və Rusiya Prezidenti Vladimir Putinin xeyir-duası ilə təsis olunan
Ümumrusiya Azərbaycanlıları Konqresinin adlarını çəkmək olar. RAGT-ın rəhbəri
Leyla xanım Əliyevanın Rusiyadakı gördüyü işlər hər bir Azərbaycan gəncinə
örnəkdir.
- Ölkəmizdə həyata keçirilən gənclər
siyasətinin təsiri xaricdən necə duyulur?
- Ölkəmizdə gənclər siyasətinin əsası ulu öndər Heydər Əliyev
tərəfindən qoyulub. Müstəqilliyimizin ilk illərində verilən vacib qərarlardan
biri də məhz gənclərlə sağlam işin qurulması idi. Bu siyasət bu gün Prezident
İlham Əliyev tərəfindən də uğurla davam etdirilir. Bu gün prezidentin diqqət və
qayğısını dünyanın müxtəlif ölkələrində yaşayan azərbaycanlı gənclər də yüksək
səviyyədə hiss etməkdədirlər. Azərbaycan Prezidentinin İctimai-siyasi məsələlər
üzrə köməkçisi Əli Həsənov da bugünlərdə Moskvada olarkən ölkədə aparılan
diaspor siyasətindən və bu siyasətdə gənclərə verilən önəmdən danışdı. Dünyada
siyasi və iqtisadi gərginliklərin fonunda yeganə məqsədimiz sabitliyimizin
qorunub saxlanmasıdır.
- Azərbaycanın yaşadığı faciələr
- torpaqlarımızın işğalı, qaçqın problemi, 20 Yanvar, Xocalı faciələri və s. lə
bağlı Rusiyada keçirilən təbliğati işlər hansı səviyyədədir?
- Təbliğat demək olar ki, yüksək səviyyədə həyata keçirilir.
"Xocalıya ədalət” kampaniyası çərçivəsində Heydər Əliyev Fondu, Azərbaycan
Respublikasının Rusiya Federasiyasındakı Səfirliyi, Rusiya Azərbaycan Gənclər
Təşkilatı (AMOR) və Ümumrusiya Azərbaycan Konqresi tərəfindən Xocalı Soyqırımı
və ümumilikdə Qarabağ həqiqətləri ilə bağlı silsilə tədbirlər Moskvada və
Rusiyanın digər şəhərlərində keçirilir.
- Xarici ölkələrdə fəaliyyət
göstərən diaspor təşkilatları arasında əməkdaşlığını inkişaf etdirilməsi üçün
hansı addımlar atılmalıdır?
- Diaspor siyasətinə dəstək olmaq prioritet məsələmizdir. Ümummilli
lider Heydər Əliyev tərəfindən əsası qoyulan Azərbaycan diasporunun inkişafı bu
gün də Cənab Prezident, dünya Azərbaycanlılarının lideri İlham Əliyev
tərəfindən uğurla davam etdirilir. Ölkədən kənarda yaşayan gənclərin qazandığı
uğurlar ölkəmizin diaspor siyasətinin çox uğurlu olduğunun göstəricisidir. Ulu
öndər Heydər Əliyevin əsasını qoyduğu diaspor siyasəti Azərbaycanın dövlət
siyasətinin əsas tərkib hissəsi olub. Ulu öndər hakimiyyətdə olan zaman diaspor
nümayəndələrinin gördüyü işlərin qiymətləndirilməsi, onların problemləri
istiqamətində həyata keçirilən tədbirlər dövlət siyasətinin prioritet
məsələlərindən olub. Hazırda da prezident İlham Əliyev tərəfindən diaspora
siyasəti uğurla davam etdirilməkdədir. Xarici ölkələrdə fəaliyyət göstərən
diaspor təşkilatları arasında əməkdaşlığın inkişaf etdirilməsi üçün səfirliklərimiz
və Diasporla iş üzrə Dövlət Komitəsi ilə əməkdaşlıq etmək lazımdır .
Söhbətləşdi
Təranə Məhərrəmova