Kövrəkdən kövrək olanların bayramı
Beynəlxalq Ahıllar Günü əvvəlcə Avropada, sonra Amerikada, ötən əsrin
90-cı illərinin axırlarında isə artıq bütün dünyada qeyd olunmağa başlayıb. Hər
il BMT Baş Məclisinin müvafiq Qətnaməsinə əsasən, oktyabrın 1-də qeyd edilən
bayramın təsis edilməsinin başlıca məqsədi ailə və icmaların, eləcə də
cəmiyyətin həyatında ahıl və yaşlıların iştirakını fəallaşdırmaq, onların hüquq
və ehtiyaclarını diqqətə çatdırmaqdır.
BMT-in məlumatına görə, son onilliklər ərzində dünya əhalisinin
tərkibi kəskin dəyişib - 1950-ci ildən 2010-cu ilə qədər dünyada orta ömür 46-dan
68 ilə qədər artıb və əsrin axırlarında 81 ilə çatdırılacağı proqnozlaşdırılır.
Hazırda dünyada yaşı 60-dan yuxarı olan 900 milyondan çox insan var, 2050-ci
ilə qədər onların sayının iki milyarda yaxın olacağı və dünya əhalisinin 20
faizindən çoxunu təşkil edəcəyi gözlənilir. Mütəxəssislərin proqnozlarına
inansaq, 2050-ci ildə bəşəriyyət tarixində ilk dəfə olaraq yaşı 60-dan yuxarı
olanların sayı uşaqlardan daha çox olacaq.
400
minə yaxın ahıl
Beynəlxalq Ahıllar Günü ölkəmizdə 1993-cü ildən qeyd olunur. Ümummilli
lider Heydər Əliyev ahıl insanlara, onların problemlərinə böyük diqqət və qayğısının
nəticəsi olaraq, 2001-ci il iyunun 22-də "Ahıllara sosial xidmət haqqında”
Qanun imzalanıb. Həmin sənədə əsasən, 70 yaşına çatan Azərbaycan vətəndaşları,
habelə ölkəmizdə daimi yaşayan əcnəbi və vətəndaşlığı olmayan şəxslər ahıl
hesab olunur. Ulu öndərin diqqət və qayğısı sayəsində bu kateqoriyadan olan
vətəndaşların təminatlarının artırılması üçün ardıcıl işlər aparılıb. Bu gün də
ölkəmizdə təqaüd yaşlı insanlar diqqət və qayğı ilə əhatə olunublar. Ölkə
başçısı İlham Əliyev təqaüd yaşlı insanların sosial müdafiəsinin
gücləndirilməsi məqsədilə "Ahıl vətəndaşların sosial müdafiəsinin
gücləndirilməsi üzrə Dövlət Proqramı”nı təsdiqləyib. Həmçinin onların sosial
vəziyyətinin yaxşılaşdırılması istiqamətində davamlı islahatlar həyata
keçirilir ki, bunlar ölkəmizdə sosial müdafiə sisteminin beynəlxalq standartlar
səviyyəsində yenidən qurulmasına imkan verir. Təkcə bu il onların
maddi-rifahını yüksəltmək üçün həyata keçirilən sosial paketlərdə pensiyaların
minimum məbləği iki dəfə artırılıb. Belə ki, 2006-cı ildə sığorta prinsiplərinə
əsaslanan yeni "Əmək pensiyaları haqqında” Qanun qüvvəyə mindikdən ötən dövrdə,
ölkəmizdə əmək pensiyasının minimum məbləği 8 dəfə artıb. Xüsusilə Prezident
İlham Əliyevin 2019-cu ildə təqdim etdiyi, sosial sahədə inqilabi
irəliləyişləri təmin edən sosial islahatlar paketi bu istiqamətdə növbəti mühüm
addımların atılmasını təmin edib. Bu il həyata keçirilən iki sosial paketin
nəticəsi kimi, ölkəmizdə minimum pensiya 2019-cu il martın 1-dən 116 manatdan
(bir sıra kateqoriyalar üzrə 80 manatdan) 160 manata, oktyabrın 1-dən isə 200
manata çatdırılıb. Beləliklə, Azərbaycanda əmək pensiyasının minimum məbləği
təkcə cari il ərzində 72,4 faiz artırılıb, həmçinin yeni məbləğlə ölkəmizdə
minimum pensiya məbləği pensiyaçılar üçün yaşayış minimumunu (149 manat) 34,2
faiz üstələyib, minimum pensiyanın alıcılıq qabiliyyəti (PPP üzrə) baxımından
Azərbaycan MDB-də ilk yeri tutub.
Əmək və Əhalinin Sosial Müdafiəsi Nazirliyinin mətbuata verdiyi
məlumata görə, "Sosial xidmət haqqında” Azərbaycan Respublikası Qanununa əsasən
ölkəmizdə yaşı 70-ə çatmış şəxslər ahıl hesab olunurlar və hazırda ölkəmizdə
ahıl vətəndaşların sayı 400 minə yaxındır.
Ahıllar
üçün günərzi xidmətlərin təşkili
Prezident İlham Əliyev tərəfindən uğurla davam etdirilən və daha da
gücləndirilən bu siyasət ahıl insanlarımızın etibarlı sosial müdafiəsinə
yönələn tədbirlərin ildən-ilə geniş miqyas almasına imkan verib. Dövlət
başçısının imzaladığı müvafiq fərman və sərəncamlar, "Azərbaycanda demoqrafiya
və əhali sakinliyinin inkişafı sahəsində Dövlət Proqramı”, "Ahıl vətəndaşların
sosial müdafiəsinin gücləndirilməsi üzrə Dövlət Proqramı” və digər sənədlər
nəticəsində ahıllara dövlət qayğısının artırılması sahəsində mühüm addımlar
atılıb.
Ahıl vətəndaşların bir qismi də İkinci Dünya Müharibəsi
iştirakçılarıdır. Hər il 9 May - Qələbə günü ərəfəsində dövlət başçısının
müvafiq Sərəncamı ilə, İkinci Dünya Müharibəsi iştirakçılarına və ya sonralar
vəfat etmiş döyüşçülərin dul arvadlarına, arxa cəbhədə fədakar əməyinə görə
orden və medallarla təltif edilmiş şəxslərə birdəfəlik maddi yardımlar verilir.
Eyni zamanda, Prezident İlham Əliyevin 2019-cu il 15 aprel tarixli Fərmanına
əsasən cari il aprelin 1-dən müharibə əlilləri üçün təqaüdlər I dərəcə əlilliyi
olanlar üçün 250 manata, II dərəcə əlilliyi olanlar üçün 230 manata, III dərəcə
əlilliyi olanlar üçün 210 manata çatdırılıb. Həmçinin I dərəcə əlilliyi
olanlara qulluq edənlər üçün 2019-cu il 15 aprel tarixli digər Fərmanla aylıq
təqaüd (50 manat) təsis edilib. İkinci Dünya müharibəsinin iştirakçılarına
Prezidentin aylıq təqaüdü isə 150 manata çatdırılıb. Əmək və Əhalinin Sosial
Müdafiəsi Nazirliyi tərəfindən ötən dövrdə digər müvafiq kateqoriyalardan olan
vətəndaşlarla bərabər, İkinci Dünya Müharibəsi ilə əlaqədar səbəblərdən əlilliyi
olanların da mənzil və minik avtomobili ilə təminatı həyata keçirilib.
Heydər Əliyev Fondunun nəcib
layihələri
Son illərdə nazirliyin, bir çox sosial xidmət müəssisələrində olduğu
kimi, mühüm bir hissəsi ahıllardan ibarət 235 nəfərin yaşadığı Pensiya Yaşına
Çatmış Şəxslər Üçün Sosial Xidmət Müəssisəsində də müasir tələblərə uyğun
yaşayış şəraiti yaradılıb. Müəssisə üçün 5 mərtəbəli 170 yerlik ikinci korpus
inşa olunaraq istifadəyə verilib. Heydər Əliyev Fondu tərəfindən həyata
keçirilən nəcib layihələr Pensiya Yaşına Çatmış Şəxslər Üçün Sosial Xidmət
Müəssisəsini də əhatə edir. Bu layihələr çərçivəsində pansionatdakı qocaların
səhiyyə ocaqlarında müayinə edilməsi, onlar üçün konsertlərin, bayram şənliklərinin
keçirilməsi və s. tədbirlər təşkil edilir.
"Sosial xidmət haqqında” Qanuna əsasən, hazırda Əmək və Əhalinin
Sosial Müdafiəsi Nazirliyi tərəfindən 10 minədək tənha ahıl və əlil şəxs
evlərində sosial-məişət xidməti ilə təmin edilir. Onlardan 7700-ü ahıl
şəxslərdir. Sosial-məişət xidməti kimi onlara sosial işçilər tərəfindən ev
təsərrüfatında təmizlik işlərinin aparılmasında, yemək hazırlanmasında, zəruri
ərzaq, sənaye və məişət mallarının, müvafiq hallarda tibbi və psixoloji
yardımın, hüquqi məsləhətlərin alınmasında və s. işlərdə köməklik göstərilir.
Qeyd olunanlarla yanaşı, Prezident İlham Əliyevin "Xüsusi qayğıya
ehtiyacı olan uşaqlara və digər şəxslərə göstərilən sosial xidmətlərin
genişləndirilməsi üçün əlavə tədbirlər haqqında” 2019-cu il 1 iyun tarixli
Sərəncamı sosial xidmətlər sistemində yeni bir istiqamət kimi, ahıllar üçün də
günərzi xidmətlərin təşkilinə imkan verib. Sərəncamın icrası işləri
çərçivəsində Əmək və Əhalinin Sosial Müdafiəsi Nazirliyinin sosial xidmət
sifarişləri əsasında ilk mərhələdə 10 şəhər və rayonda (Bakının Binəqədi,
Xəzər, Sabunçu, Pirallahı rayonlarında, Sumqayıt, Gəncə və Mingəçevir
şəhərlərində, Abşeron, Lənkəran, Xaçmaz rayonlarında) ahıllar üçün günərzi
xidmət mərkəzləri yaradılıb. Həmin mərkəzlərdə tənha ahıllar yarımstasionar
şəkildə, yəni günərzi formasında sosial-məişət xidmətləri ilə təmin olunur,
onların asudə vaxtlarının mənalı təşkili və s. istiqamətlərdə işlər aparılır.
Təranə
Məhərrəmova