Kürü tökən balığın ovlanması cinayətdir
Balıq qida
rasionumuzun ən vacib elementlərindən biridir. Vitamin, mineral və proteinlə zəngindir.
Ancaq balığın bir "əmması” var. Deyirlər, "r” hərfi olmayan aylarda balıq yeməzlər.
Bunu deməyinə hamı deyir, lakin çoxu səbəbin nə olduğunu bilmir. Səbəblərdən
biri budur ki, "r” hərfi olmayan aylarda yəni, may, iyun, iyul, avqust
aylarında bəzi balıqlarda kürü tökmə mövsümü olur. Bu səbəbdən də, həmin dövrdə
kürü tökən balıqları ovlamaq olmaz. Çünki kürü tökən balığı ovlasaq, bu zaman o
kürü tökə bilməyəcək və nəsli kəsilmək təhlükəsi yaşayacaq. Ümumiyyətlə, balıqları
qorumaq üçün nə etmək lazımdır? Balığın kürü tökən vaxt ovlanmasının qadağan
olunub-olunmamasını, qadağa varsa, ona necə riayət olunduğunu, qanuna riayət
etməyənlər üçün hansı tədbirin görüldüyünü aydınlaşdırmağa çalışdıq.
Aprel, may ayları balığın kürü tökən vaxtı...
Ekologiya
və Təbii Sərvətlər Nazirliyinin (ETSN|)
Su Hövzələrində Bioloji Resursların artırılması və mühafizəsi
departamentinin baş müfəttişiİsmayıl Yunusov bildirdi ki, qanunda belə bir qadağa
var: "Aprel, may ayları balığın kürü tökən vaxtı olduğuna görə həmin müddətdə
balıq ovuna qadağa qoyulub. Bu işə nazirliyin nəzdində fəaliyyət göstərən Su Hövzələrində Bioloji Resursların
Artırılması və Mühafizəsi Departamenti nəzarət
edir. Mühafizə xidməti bilavasitə bu işlə məşğul olur. Xüsusilə nəzarət edilir
ki, həmin qadağan olunmuş müddətdə balıq ovu olmasın. Əgər həmin müddətdə
qanuna riayət etməyib balıq ovlayan olarsa, bu zaman inzibatı qaydada protokol
tərtib edilir və məsuliyyətə cəlb olunur. Balıq ehtiyatlarına vurulan ziyana
görə iddia qaldırılır, müvafiq mühafizə orqanlarına verilir və müəyyən tədbirlər
görülür. Bu tədbirlər inzibati cəzalar və cərimələrdir. Ancaq vətəndaş həddi
aşarsa və qanun pozuntusu halları bir neçə dəfə təkrarlanarsa, bu zaman cinayət
işi qaldırılır”.
Bütün balıqlar eyni
vaxtda kürü tökmür...
Amma
yaz-yay aylarında ovu qadağan olunsa da, bazalarda balıq satıldığını, kafe və
restoranların menyusunda balıq təklif edildiyini də görürük. Bəs bu paradoks
haradan qaynaqlanır? Milli Elmlər
Akademiyasının Zoologiya İnstitutunun əməkdaşı, biologiya üzrə fəlsəfə doktoru
Namiq Mustafayevbildirdi ki, balıq ovuna nəzarəti ETSN-nin
tərkibindəki Su Hövzələrində Bioloji
Resursların Artırılması və Mühafizəsi Departamenti edir: "Hansı balıqların tutulması hansı
aralıqda qadağandır, bu dəqiq göstərilir. Bütün balıqlar eyni vaxtda kürü
tökmür. Elə balıqlar var ki, kürü tökməyə aprelin əvvəllərindən başlayır.
Hazırda kürü tökən balıqlar yırtıcı olanlarıdır. Onlar da çox dərində kürü
tökürlər deyə, ovlamaq çətindir. Bazarda da onlardan azdır. Hazırda kütləvi şəkildə satılan balıqlar kütüm,
çarpan və s-dır. Onların da kürü tökmə vaxtı
aprelin axırları, mayın əvvəlləridir. Kürü tökmədən bir az əvvəl əksər balıqlar
qidalanmır. Onlar bədənlərində olan piydən istifadə edirlər və müəyyən qədər
arıqlayırlar. Ona görə bu ərəfədə tutulan balıqların dadı olmur. May ayına
doğru getdikcə həmin balıqların sayının azaldığını görəcəksiniz. Çünki əksər
balıqların kürü tökmə vaxtı may ayından başlayır, iyun , iyul, avqust hətta
sentyabr ayına kimi davam edir”.
"Balıqçılıq haqqında”
qanunda göstərilib ki...
N.Mustafayev həmçinin bildirdi ki, hazırda
qüvvədə olan "Balıqçılıq haqqında” qanunda balıqların ovlanma vaxtı göstərilib. "Qanunda göstərilib ki, hansı balıq nə zaman tutula bilər.
Bazarlarda indi ən çox rast gəlinən çəki, xanıbalığıdır. Bunlardan xanıbalığı
təbii şəraitdə kürü tökə bilmir. Onlara nəsil almaq üçün xüsusi inkubasiya sexlərində
iynə vururlar. Bu balıqlar 60-cı illərdə Azərbaycana gətirilib və əsasən şəxsi
təsərrüfatlarda yetişdirilir. Bu balıqların xüsusilə Neftçala, Salyan və aran
rayonlarında yetişdirildiyini görürük”.
Bu vaxt balıq ovlamaq kütləvi qırğındır
Balıqların
ovlanması ilə bağlı balıqçıların fikrini öyrənməsək olmazdı. Onların fikrincə,
balıq ovu üçün ən əlverişli mövsüm payız, qış və yaz ayları hesab edilir. Yay,
xüsusi ilə də el arasında deyildiyi kimi, adında "r" hərfi olmayan
aylarda balıq tutmaq məsləhət görülmür.Balıqçı Malik Mehrəliyev deyir ki,
"yayda balıqlar kürü qoyduqları üçün balıq ovu ilə məşğul olmaq məsləhət
deyil. Həm hava isti olur, həm də bu vaxt balıq ovlamaq kütləvi qırğın hesab
edilir".
Mütəxəssislərin söylədiklərindən belə bir
nəticəyə gəlmək olar ki, yay aylarında balıq ovu ilə məşğul olmaq məsləhət
deyil.
Sonda yazını bir deyimlə sonladırıram...
"Yaxşılıq et at dənizə, balıq bilməsə də, xaliq bilər”. Əgər balığa yaxşılıq
etmək istəyirsinizsə, kürü tökən vaxt onları ovlamayın. Yoxsa, bəzi nəsli tükənən
heyvanlar kimi balıqların da nəsli kəsiləcək.
Günel Azadə