Kukla Teatrının istedadlı uşaqları - Fotolar
Ötən gün
yolumuzu Abdulla Şaiq adına Azərbaycan Dövlət Kukla Teatrından saldıq. Uzun
müddət idi ki, teatrın nəzdində fəaliyyət göstərən "Oyuq” teatr studiyasının
uğurlarını mütəmadi olaraq izləyir, onların hansı şəkildə fəaliyyət göstərdiyi,
uşaqların tədris prosesi ilə bağlı xəbər almaq istəyində idik. Teatrın qapısından
içəri daxil olar-olmaz, bizi studiyanın uşaq qrupunun rəhbəri, Kukla Teatrının
baş inzibatçısı, tanınmış yazıçı Səidə Haqverdiyeva qarşıladı. Reportajı
hazırlamaq üçün bizə hər bir imkanı yaradan Səidə xanımla studiyanın keçmişi,
bu günü və gələcəyi haqqında danışdıq.
"Hər birimiz bir çiçəy”in gətirdiyi uğur
Söhbət
əsnasında öyrəndik ki, teatrın baş rejissoru olan mərhum sənətkarımız Rəhman Əlizadə
studiyaya maraqlı bir ad düşünüb – "Oyuq”. "Oyuğ”un mənası oyma kukla deməkdir.
Kuklanı yonub, oyub onu qəlibə necə salıb gözoxşayan edirlərsə, buraya gələn
şagirdləri də cilalayıb gələcəyimiz üçün istedadlı, cəmiyyət üçün yararlı vətəndaşlar
yetişdirmək məqsədi güdülür. Gördüyümüz qədəri ilə, istəklərinə nail də olurlar.
Bu studiya əvvəllər böyüklər üçün fəaliyyət göstərib. 2012-ci ildə isə teatrın baş
inzibatçısı tərəfindən Heydər Əliyevin doğum günü ilə əlaqədar olaraq "Hər birimiz
bir çiçək” adlı tamaşa hazırlamaq üçün "Kaspi”
Təhsil Mərkəzinin kurslarına müraciət edilib. Teatrın direktorunun təşəbbüsü
ilə keçirilən bu müsabiqədə 600 nəfər şagirdin içərisindən 60 nəfəri seçilib. 60
nəfərdən də 30-u ilə tamaşa hazırlanıb. "Oyuq” teatr studiyasının hazırladığı
bu ilk tamaşa o qədər uğurlu alınıb ki, uşaqlarda məsuliyyət, bacarığın
olduğunu görən teatrın direktoru Rəşad Əhmədzadə studiyanın fəaliyyətini davam etdirməyə
qərar verib. Sözügedən studiya bu günə kimi həm böyüklər, həm də uşaqlar üçün
fəaliyyət göstərir. "Oyuq” teatr studiyasının yaradıcı heyəti hər ay iki tamaşa
nümayiş etdirir. Bu tamaşalar kimsəsizlər, uşaq evləri, internat məktəbləri,
əlil uşaqlar üçün nəzərdə tutulur.
Bu günə qədər
fəaliyyətini uğurla davam etdirən studiyanın uşaq qrupunun rəhbəri Səidə
Haqverdiyeva bizimlə söhbətində ilk olaraq "Oyuğ” un uşaqlarının beynəlxalq arenalarda
əldə etdikləri nailiyyətlərdən danışdı: "İndiyə kimi Makedoniya, Bolqarıstan, Türkiyə,
Rusiya, İran və bir çox başqa ölkələrdə olmuşuq. Əksəriyyətində də qalibiyyət
əldə etmişik. Aylin Nəcəfli və Selcan Müseyibova dəfələrlə beynəlxalq
festivallarda iştirak edərək qalib olublar. Müsabiqələrə gedirik, fəxri fərmanlarla,
mükafatlarla geri dönürük. Sonuncu dəfə Sankt-Peterburqda keçirilmiş "Caz
karuseli” ikinci beynəlxalq müsabiqəsində baş mükafata – Qran-priyə layiq
görüldük. Uşaqlarımız tamaşa göstərdilər və tamaşanın sonunda mahnı oxudular. Bizim
Selcan o tamaşada 3 kuklanın səsini çıxarırdı, Aylin nağılçı idi. Biz orada üç nominasiya
üzrə mükafata layiq görüldük. Rusiyada bizim nağıl qəhrəmanlarımızı çox gözəl qarşıladılar”.
Beynəlxalq arenalardan səsləri gələn azyaşlı
istedadlarımız
Studiyanın uşaq
qrupunun rəhbəri buranın iş strukturundan da danışdı. Bildirdi ki, uşaqlarla həftəsonları
məşğul olurlar. Səbəb isə onların vaxtlarını səmərəli keçirmələri və dərslərinə
mane olmamaqdır. Səidə xanım mütəmadi olaraq uşaqların dərs qiymətlər ilə də
maraqlanır. Deyir ki, əgər studiyanın uşaqlarının qiymətlərində zəiflik müşahidə
edirsə, həmin şagirdi studiyadan uzaqlaşdırır: "Təhsil bizim üçün hər şeydən önəmlidir. Uşaqlarımızın hamısı savadlıdır.
Studiyamızda 5-15 yaş arasında olan uşaqlar təhsil alır. Biz ayda iki dəfə onlarla
psixoloji test edirik. Əgər uşaqlarda hər hansı bir narahatlıq olarsa, valideynlərini
bu barədə xəbərdar edirik. Studiyada uşaqlara gimnastika, səhnə hərəkətləri, səhnə
danışıqları dərsləri keçirik. Uşaqlara çoxşaxəli şəkildə xidmət göstəririk. Güman
etmirəm ki, burada təhsil alan uşaqların hamısı gələcəkdə aktrisa, müğənni olacaq.
Ancaq bunu əminliklə deyə bilərəm ki, onlar incəsənəti sevəcəklər. Bizim də məqsədimiz
uşaqlara mədəniyyəti aşılamaq, incəsənətimizi sevdirməkdir”.
Səidə xanım
bizə "Oyuq” studiyasının bu zamana qədər əldə etdiyi uğurlardan ağızdolusu
danışdı. Burada təhsil alan uşaqların hazırda serial və kino aləmində
fəaliyyətlərini göz önünə gətirərək, təhsil verdikləri uşaqların səslərinin
"Türkvision” kimi beynəlxalq layihələrdən gəldiyini dilə gətirdi: " Ötən il
uşaqlar arasında keçirilən mahnı müsabiqəsi olan "Türkvision”un qalibi Nuray Əkbər bizim şagirdimizdir. Bundan əlavə, bu
gün ekranlarda, kinoteatrlarda rol alan film və
seriallarımızda bizim studiyanın yetirmələri çəkilir. Uşaqlarımız kamera
arxasında işləməyi yaxşı bacarırlar. Bu da rejissorların işlərini
asanlaşdırır”.
Pedaqoqumuzun proqnozu
Söhbətimizi
yekunlaşdırıb, dərs prosesinə şahid
olduq. Studiyada uşaqlara dərs keçən quruluşçu rejissor Cəmilə Allahverdiyeva
uşaqlar arasında "Oyaq gözəl” tamaşasının məşqlərini edirdi. Cəmilə xanımı görər-görməz,
tanıdıq. O, mərhum rejissor Rəhman Əlizadənin ən sədaqətli tələbələrindəndir. 19
ildən artıqdır ki, aktrisa kimi səhnədə öz sözünü demiş Cəmilə xanımı bu dəfə
də pedaqoq kimi tanıdıq.
O deyir ki,
özündə pedaqoq qabiliyyəti olduğunu heç zaman hiss etməyib: "Özümə rejissor deyə
bilmərəm. Çünki mən Rəhman Əlizadənin rejissorluğunu görmüşəm. Onun
tökdüklərini az da olsa yığmışam. O ki qaldı uşaqların dərs prosesinə, biz
burada uşaqlara səhnə danışığı, davranışı, hərəkətləri öyrədirik. Uşaqlar studiyamıza
müsabiqə yolu ilə seçilirlər. Vacib deyil ki, buranı bitirən uşaqlar gələcəkdə
müğənni, ya da aktrisa olsunlar. Əgər buradakı uşaqlar həmyaşıdlarından 3 pilləkən
yuxarıda dayanırlarsa, demək ki, onlar digərlərindən fərqlənirlər. "Oyuq” studiyasını
bitirən uşaqların çox gözəl danışıq qabiliyyəti olur və onlar burada cəmiyyətdə
özlərini idarə etməyi öyrənirlər. Gələcəkdə seçdikləri peşədə bu onlara kömək edəcək”.
Cəmilə xanım
deyir ki, studiyanın uşaqları burada bir-birilərini dinləməyi, sözünü kəsməməyi,
sərbəstliyi də öyrənmiş olurlar. Özünə qapanan uşaq belə burada özünü ifadə edə
bilir: "Bura nə məktəb, nə də bağçadır. Çox zaman valideynlər buraya uşaqlarını
gözəl danışmaq, həyəcanını dəf etmək üçün qoyurlar. Bir qonaqlığa gedəndə çıxıb
uşağının sərbəst şəkildə şeir deməsini istəyirlər. Biz də bunun üçün əlimizdən
gələni edirik”.
Studiyanın quruluşçu
rejissoru bildirdi ki, tamaşaların ssenarilərini tanınmış yazıçıların
əsərlərindən götürürlər və bir qismini də Səidə Haqverdiyeva yazır. O, studiya
üçün yazdığı ssenaridə nağıl qəhrəmanlarını bir yerə toplayır: "İndiyə qədər
bir neçə tamaşamız olub. Onlardan "Oyaq gözəl”, "Şah və xudpəsənd oğul” kimi tamaşaları
misal gətirə bilərik. Tamaşalarımız rəngarəngdir. Biz sadəcə tamaşa
göstərmirik. Hər tamaşamızda uşaqlara ötürəcəyimiz bir mesaj olur. Onlara paylaşmaq,
yaxşının qədrini bilmək, dost, humanist olmaq kimi hissləri aşılayırıq”.
Uşaqlarla söhbətimizdən
Studiyanın
pedaqoqu ilə söhbətdən sonra qəhrəmanlarımızla tanışlığa başladıq. Selcan Müseyibova
(Xatun) 3 ildir ki, "Oyuq” teatr studiyasında tədris alır. Teatrı çox sevdiyini
deyir: "Kukla Teatrı mənim həyatımda böyük dəyişikliklər edib. Mən burada həm dərs
keçirəm, həm də əylənirəm. Biz burada səhnə danışığı, hərəkəti öyrənirik. Cəmilə
müəllimə bizə sözlərin necə tələffüz edildiyini tədris edir. Bura mənim həyatımın
bir parçasına çevrilib. Səidə müəllimə bizə böyük stimul verir. Onun göstərişlərindən
sonra biz daha da həvəslənirik. Mən indiyə qədər saysız obrazlar
canlandırmışam. Bir neçə mahnı ifa etmişəm. Bundan başqa, iki filmə - "Ər
quyusu”, "Bir ovuc sonsuzluq” və "28 iyun” serialına çəkilirəm. Və bütün bunlar
Səidə xanımın sayəsində baş verir”.
3 aydır studiyaya
gələn Məryəm Əsədova deyir ki, burada günü xoş keçir: "Valideynlərim məni bura gətirmək
istədiklərini deyəndə çox sevindim. Mən rəqs etməyi çox sevirəm. Teatrda "Oyaq gözəl” tamaşasında hind qızı rolunu oynayıram.
Bu tamaşada mən hind rəqsi edirəm və hind rəqsini çox sevirəm”.
Bir ildən çoxdur
ki, bu studiyaya gələn Xanım Qasımova isə burada "Maşa” və "Məktəbli qız” rollarını
oynadığını deyir: "Uşaqlıqdan teatrın vurğunu olmuşam. Düzdür, indi də çox
yaşım yoxdur. Ancaq burada özümü rahat və evdəki kimi hiss edirəm. Studiyada bizə
ucadan danışmağı öyrədirlər”.
Dörd ildir ki,
"Oyuq” studiyasında fəaliyyət göstərən Aysun Cəbrayılova əldə etdiyi uğurlara
görə müəllimlərinə minnətdardır: "Onlardan çox şey öyrənmişəm. Mən teatrda pəri,
cadugər, tıq-tıq xanım obrazlarını canlandırmışam. Dörd ildə çox rollarım olub.
İncəsənətə böyük marağım yaranıb”.
3 aydan artıqdır
ki, bu studiyada fəaliyyət göstərən Nəzrin Xəlilova isə bildirdi ki, o, burada düzgün
danışmağı, səhnədə özünü idarə etməyi öyrənir. Ən böyük arzusu isə aktrisa olmaqdır:
"Məktəb tədbirlərində iştirak edirəm. Cəmilə xanım mənə çox dəstək olur”.
"Türkvision”
yarışmasının qalibi, "Cehizsiz gəlinlər” serialının qəhrəmanı balaca Nuray
Əkbər iki ildir ki, "Oyuq” studiyasına gəldiyini, burada çox şey öyrəndiyini
deyir: "İlk dəfə səhnədə pəri rolunu oynamışam. Cəmilə müəlliməyə təşəkkürümü bildirirəm
ki, bizə səhnədəki davranışları öyrədir. Səidə Haqverdiyevanı və Rəşad
Əhmədzadəni çox sevirəm. Bilirsiniz ki, mən həm də musiqiçiyəm. Bu il Bülbül adına
Orta İxtisas Məktəbinə daxil olmuşam”.
Hind rəqsinin
vurğunu olduğunu deyən Selcan Rzayeva isə səhnədə özünü rahat hiss etdiyini deyir.
Fatimə İsmayılova da baxmayaraq ki iki aydır buradadır, ancaq elə hesab edir
ki, uzun müddətdir stduyanın uşaqları ilə eyni səhnəni bölüşür: "Anam deyib ki,
dərslərini oxumasan, səni studiyaya aparmayacam. Mən də var gücümlə dərslərimi yaxşı
oxumağa çalışıram ki, bu studiyaya gəlim”.
Mehdizadə Ağasəfər
"Şər və xudpəsənd oğul” tamaşasında Pinokio rolunu oynayır. O, deyir ki, burada
sözü düzgün tələffüz etməyi, səlis danışığı öyrənib: "Misal üçün, səhnədə profillə
dayanmaq olmaz. Ucadan danışmamaq lazımdır ki, zalda əyləşənlər səsimizi
eşitsin”.
Əliyev Fərid
"Şər və xudpəsənd oğul” tamaşasında vəzir rolunu oynayır. Deyir ki, studiya
onun üçün çox maraqlıdır. Əliyev Yılmaz isə Akademik Milli Dram Teatrında "Şah Qacar”
tamaşasında Şah Qacarın uşaqlığını oynayır: "Üç ildir ki, bu obrazı
canlandırıram. Fuad Poladovla eyni səhnəni bölüşürəm. Buraya isə bir aydır gəlmişəm
və buradakı fəaliyyətimdən də çox razıyam”.
Dörd yaşlı
İsmayıl isə studiyaya dostları ilə görüşmək üçün gəldiyini bildirir. O, da
"Oyaq gözəl” tamaşasında Şirinlərdən birini canlandırıb. Uğur Cəbrayıllı "Oyaq
gözəl” tamaşasında Şirinlərdən birini canlandırdığını, səhnədə "Bizim
dostlarımızı azad edin!” deyə qışdırdığını əyani şəkildə bizə göstərdi.
Qeyd edək ki, ötən həftə studiyaya uşaqların
qəbulu üçün müsabiqə elan olunmuşdu. Hazırda seçilən uşaqlarla bərabər
studiyanın 40 nəfərə qədər üzvü var.
Xəyalə Rəis