KTMT-də baş katib müəmması
Rusiya prezidenti Vladimir Putin Kollektiv Təhlükəsizlik Müqaviləsi
Təşkilatının (KTMT) baş katibinin seçiləcəyi 6 dekabrdakı Sankt-Peterburq
sammitini təxirə salıb. Ermənistanın baş naziri səlahiyyətlərinin icraçısı
Nikol Paşinyan deyib ki, Rusiya prezidentilə telefon əlaqəsi zamanı sammitin
təxirə salınmasını təklif edib: "Sonuncu telefon söhbətimizdə Rusiya prezidenti
yaranmış vəziyyətlə əlaqədar 6 dekabrda KTMT-nin sammitini keçirməməyimizi,
işçi qaydada məsələnin həllinin müzakirəsini və yalnız bundan sonra hazır
qərarlarla sammitə getməyimizi təklif etdi. Mən də razılaşdım, çünki düşünürəm
ki, bu məsələni işçi prosedurlarla həll etmək daha düzgündür. Biz konsensusa
gəlməmişik və bu səbəbdən Astana sammitini təkrarlamağın mənası yoxdur. Putinlə
razılaşmamız da budur ki, konsensusa gələnədək işçi müzakirələrini davam
etdirəcəyik”.
BƏXTİYAR
Xatırladaq ki, Ermənistan KTMT baş katibi postu ətrafında yaratdığı
problemə görə təşkilatın daxilində təklənib. Paşinyan bu postu tutan Yuri
Xaçaturovu vaxtından əvvəl geri çağırmasına baxmayaraq, baş katib vəzifəsinə
yenidən erməni namizədin seçilməsində israrlıdır. Lakin 8 noyabrda KTMT-nin
Astanada keçirilən Kollektiv Təhlükəsizlik Şurasının geniş tərkibli iclasından
sonra mətbuata açıqlama verən Qazaxıstan prezidenti Nursultan Nazarbayev
bildirib ki, yeni baş katib Belarus nümayəndəsi olacaq. Bununla da KTMT
liderləri Ermənistanın baş naziri səlahiyyətlərini icra edən N.Paşinyanın
hazırladığı ssenarinin üstündən birdəfəlik xətt çəkiblər.
KTMT-nin baş katibi seçkisinin təxirə salınması ilə bağlı müxtəlif
versiyalar səsləndirilir. Bəs görəsən, bu məsələnin təxirə salınması nəyn
göstəricisidir?
Mövzu ilə bağlı "Kaspi” qəzetinə açıqlamasında Milli Məclisin deputatı, politoloq Elman Nəsirov bildirdi ki, dekabrın
6-da Kollektiv Təhlükəsizlik Müqaviləsi Təşkilatının baş katibi seçilməsi
məsələsinə baxılması gözlənilirdi: "Lakin Astana sammiti göstərdi ki, bu məsələ
ətrafında çox ciddi fikir ayrılığı var. Fikrimcə, bu təşkilat çərçivəsində
Ermənistana etimad olduqca aşağı səviyyədədir. Xüsusilə, Belarus və Qazaxıstan
dövlət başçılarının bu təşkilatın baş katibi seçimində Ermənistanın mövqeyinə tamamilə
fərqli mövqe ortaya qoyublar. Bu həm də Ermənistan üçün olduqca acınacaqlı
vəziyyət idi. Ona görə də Paşinyan belə ifadələr işlədirdi ki, nə baş verdiyini
anlamıram. O, "təşkilat çərçivəsində Ermənistana üzv ölkə olaraq etimad
göstərilmir, lakin digər üzvlər Azərbaycana silah satışını həyata keçirirlər və
bizim üçün artıq aydınlaşdırmaq lazımdır ki, kimə güvənmək olar, kimə güvənmək
olmaz”, deyə ittihamlar irəli sürüdü. Onu da qeyd edim ki, baş katibin
seçilməsinin təxirə salınması ilə bağlı müxtəlif versiyalar səsləndirilir.
Lakin görünür ki, keçən müddət ərzində Paşinyan Rusiya prezidentindən bu məsələ
ilə bağlı çox xahişlər edib. O, ən azı Ermənistanda parlament seçkilərinə qədər
bu məsələyə baxılmamasını, təxirə salınmasını istəyib. Çünki 6 dekabrda sammit
çərçivəsində Belarus nümayəndəsi KTMT-nin baş katibi seçiləcəyi təqdirdə
Paşinyan və onun tərəfdarları üçün seçkiqabağı çox ciddi zərbə olacaqdı. Bu
vəziyyət seçkilərin nəticələrinə Paşinyanın əleyhinə təsir göstərə bilərdi.
Mənə elə gəlir ki, burada Paşinyan nəticələrin necə olmasından asılı olmayaraq,
parlament seçkilərinə qədər baş katib seçilməsi məsələsinin təxirə salınmasını
çox xahiş edib. Yəqin ki, Rusiya hökuməti ilə bu istiqamətdə razılaşma əldə
edilib”.
E.Nəsirov vurğuladı ki, hazırda KTMT-yə erməni yox, rus generalı
rəhbərlik edir: "Müəyyən keçid dövrü üçün rus generalı bu vəzifəni icra edəcək.
İstisna deyil ki, artıq 2019-cu ildə vaxt müəyyən ediləcək ki, baş katib
məsələsinə yenidən baxılsın. Böyük ehtimalla baş katib vəzifəsinə məhz Belarus
nümayəndəsi seçiləcək”.
Politoloq Elşad
Mirbəşiroğlu bildirdi ki, KTMT-nin baş katibinin seçilməsinin təxirə salınmasında
əsasən Rusiyanın mövqeyi rol oynayıb: "Yəni, bu, Ermənistana güzəşt kimi
qiymətləndirilməməlidir. Çünki belə bir versiya var idi ki, Ermənistanın
nümayəndəsi qəbul olunmayacaq və Belarus nümayəndəsi baş katib seçiləcək. Hesab
edirəm ki, Rusiyanın baş katib seçkilərinin təxirə salmasına razılaşması Moskvanın
təşkilatda təşəbbüsü öz əlində saxlamaq niyyəti ilə bağlıdır. Bildiyimiz kimi,
hazırda KTMT-də baş katib vəzifəsini Rusiya nümayəndəsi icra edir. Bu baxımdan,
təxirəsalmanı Rusiyanın kiməsə güzəşti kimi dəyərləndirmək doğru deyil. Sadəcə
olaraq, Rusiya öz diqtəsini etdi və təşkilatda əsas söz sahibliyini əlində
saxlamağa nail oldu”.
E.Mirbəşiroğlunun sözlərinə görə, təbii ki, Paşinyan Putinin bu
istəyinə qarşı çıxa bilməzdi: "Yeri gələndə hesab etmək olar ki, bu, Paşinyanın
özünə də xeyir edir. Çünki Paşinyan Ermənistan nümayəndəsini baş katib vəzifəsinə
keçirə bilməyəcəkdi. Bu haradasa, seçki öncəsi Paşinyana sərf etmirdi. Amma heç
bir halda, verilən qərar Paşinyana dəstək kimi dəyərləndirilməməlidir. Bir daha
qeyd etmək istəyirəm ki, Putin təşkilatda söz sahibliyini öz əlində saxlamaq
istəyir. Onu qeyd edim ki, 2019-cu ildə KTMT-nin baş katibi vəzifəsinə Belarus
nümayəndəsi seçilə bilər. Çünki əlifba sırası ilə Ermənistandan sonra Belarus
nümayəndəsinin namizədliyinin irəli sürülməsi mümkündür və bu, tam qanunauyğun
şəkildə olacaq”.
BƏXTİYAR