Koronavirusla mübarizənin ön cəbhəsində
Şəfqət, humanizm və mərhəmət prinsiplərini rəhbər
tutan həkimlərimiz öz həyatlarını riskə ataraq, başqalarının həyatını xilas etmək
üçün yorulmadan çalışırlar
Prezident İlham Əliyevin rəhbərliyi ilə həyata
keçirilən dövlət siyasətində səhiyyə sisteminin təkmilləşdirilməsi, bu sahənin
müasirləşdirilməsi və inkişafı, onun maddi-texniki bazasının möhkəmləndirilməsi,
ən nəhayət, vətəndaşlara keyfiyyətli tibbi xidmətin göstərilməsi mühüm yerlərdən
birini tutur. Bu məqsədlə müxtəlif vaxtlarda qəbul edilən Dövlət Proqramları
ölkə üzrə bütün tibb müəssisələrinin yenidən qurulmasına xidmət edib söyləsək,
yanılmarıq. Misal üçün, son 16 ildə Azərbaycanın ancaq bölgələrində 22 yeni xəstəxana,
15 diaqnostika müalicə mərkəzi inşa edilib, 28 mərkəzi rayon xəstəxanası əsaslı
təmir olunub. Bu müəssisələr ən müasir tibbi avadanlıq və qurğularla təchiz
edilib. Hazırda bir neçə xəstəxananın tikintisi rayonlarda və paytaxt Bakıda
davam etdirilir. Ümumi götürsək, Azərbaycanda əhalinin sağlamlığının qorunması
və tibbi xidmətin keyfiyyətinin yaxşılaşdırılması istiqamətində atılan addımlar
nəticəsində 2004-cü ildən indiyə qədər ölkəmizdə 750-dən çox tibb müəssisəsi
tikilib və ya əsaslı şəkildə təmir edilib. Görülən bu işlərin nəticəsidir ki,
indi Azərbaycanın bütün regionlarını əhatə edən müasir tibb müəssisələrində həm
müalicə, həm də diaqnostika aparmaq üçün bütün imkanlar var.
Məhz bu imkanlar hesabınadır ki, dünyanı bürüyən
koronavirus (COVİD - 19) pandemiyasının zərəri Azərbaycanda minimuma endirilib,
ölkə vətəndaşlarının sağlamlığı ən yüksək səviyyədə qorunub və qorunmaqdadır.
Ölkəmizdə koronavirusun geniş miqyasda yayılmasının qarşısı alınmaqla bərabər,
bu xəstəliyə tutulanların müalicəsi üçün tibb müəssisələri, səhiyyə işçiləri
tam gücü ilə səfərbər olunub. Nazirlər Kabineti yanında Operativ Qərargahın
aprelin 28-də yaydığı məlumata görə, hazırkı dövrədək ölkəmizdə 1717 nəfərin
koronavirus infeksiyasına yoluxması faktı müəyyən edilib, onlardan 1221 nəfər
müalicə olunaraq sağalıb, 474 nəfərin xüsusi rejimli xəstəxanalarda müalicəsi
davam etdirilir. Həmin şəxslərdən 15 nəfərin vəziyyəti ağır, 22 nəfərin vəziyyəti
orta ağır qiymətləndirilir, digərlərinin səhhəti stabildir. Təəssüf ki, 22 nəfər
vətəndaşımız koronavirusdan dünyasını dəyişib. Ötən müddət ərzində yeni yoluxma
hallarının müəyyənləşdirilməsi ilə əlaqədar 132.640 test aparılıb.
Əlbəttə ki, koronavirusla mübarizədə bu göstəricinin
əldə edilməsində dövlətimizin zamanında həyata keçirdiyi qabaqlayıcı tədbirlərlə
bərabər, sağlamlığımızın keşiyində dayanan həkimlərimizin, əsl fədakarlıq
nümayiş etdirən səhiyyə işçilərinin – gözəgörünməz qəhrəmanların əməyi də
böyükdür. Bu gün həkimlərimiz bu qlobal təhlükə ilə mübarizənin ön cəbhəsində
öz həyatlarını riskə ataraq şəfqət, humanizm və mərhəmət prinsiplərini rəhbər
tutur, ən qiymətli sərvət olan insan həyatının xilas olunması ücün yorulmadan
calışırlar. Belə insanlardan biri də Respublika
Klinik Xəstəxanasının şöbə müdiri, TƏBİB-in Koordinasiya Şurasının
koordinatoru, Qarabağ qazisi, Prezident təqaüdçüsü, hərbi həkim İmran
Qurbanovdur. Onunla söhbət əsnasında öyrəndik ki, Prezident İlham Əliyevin
və Birinci vitse-prezident Mehriban Əliyevanın rəhbərliyi ilə koronavirusla
mübarizə aparmaq üçün zamanında qabaqlayıcı addımlar atılıb. Ölkənin hava,
quru, dəniz sərhədlərinin bağlanması, gediş-gəlişin məhdudlaşdırılması, təhsil
müəssisələrinin fəaliyyətinin dayandırılması, kütləvi tədbirlərin, o cümlədən
toy və yas mərasimlərinin keçirilməsinin təxirə salınması, karantin rejiminin tətbiqi
son nəticədə virusun geniş miqyasda yayılmasının qarşısını alıb, vətəndaşların
sağlamlığının qorunub saxlanmasına xidmət edib: "Biz ilk vaxtlardan
koronavirusla mübarizəyə cəlb olunduq. İlk növbədə qarşımızda duran məslə hava
limanında xaricdən ölkəmizə gələn vətəndaşların qarşılanması, müayinədən
keçirilməsi, şübhəli hallarda yaxmaların götürülməsi, analizlərin aparılması, zərurət
yarandığı halda onların karantinə cəlb edilməsi oldu. Bu işi görəcək tibii heyət
müəyyənləşdirildi. Onların sırasına iki ixtisaslı həkim, 4 həkim laborant daxil
edildi. Həmin səhiyyə işçiləri Respublika Gigiyena və Epidemiologiya Mərkəzində
təlimlərə cəlb olundular və qısa müddət sonra hava limanında fəaliyyətə
başladılar. Orada qadın və kişilərin ayrı-ayrılıqda müayinə olunması üçün iki
kabinet təşkil olundu. Tibbi heyətə köməklik üçün prosesə ASAN Xidmətin
könüllüləri də cəlb edildi. Sözügedən kabinetlərdə həkim müayinələri təşkil
olundu, epidemioloji sorğu keçirildi. Hərarət, öskürək, boğaz ağrıları kimi
kilinik əlamətləri olan vətəndaşlardan analizlər götürüldü, karantinə cəlb
olundular. Beləliklə proses davamlı xarakter aldı. Koordinator və peşəkar həkim
kimi bütün bunların təşkilində bilik və bacarığımı, səriştəmi əsirgəmədim”.
İmran Qurbanov bildirdi ki, TƏBİB-in Koordinasiya
Şurasının koordinatoru olaraq Azərbaycanın bölgələrində koronaviruslu xəstələri
qəbul edəcək, onların müalicəsi ilə məşğul olacaq xəstəxanaların təşkilində də
yaxından iştirak edib: "Tibbi personalının təşkili, növbələrin salınması,
onların yerləşdirilməsi, konsultasiya həkimlərinin cəlb olunması və sair bu
kimi işlərlə məşğul olmuşuq. Masallı, Astara, Quba, Qobustan, Ağdaş, Şəmkir,
Goranboy, İmişli rayonlarında, Bakı və Gəncə şəhərlərində xəstəxanaların
yaradılması və onların tibbi personalının komplektləşdirilib növbəlilik sistemi
üzrə 3 növbədə işə çıxarılmasını təmin etmişik. Ümumilikdə görülən işləri təhlil
edəndə bir daha bu qənaətə gəlmək olur ki, Azərbaycan koronavirusla mübarizədə
bir çox ölkələrə nümunə olacaq addımlar atıb. Vaxtında qabaqlayıcı tədbirlər
görüb. İlk növbədə xaricdən ölkəmizə daxil olan vətəndaşlarımızın müayinədən
keçirilməsi, vaxtında karantinə alınması təşkil edilib. Yəni, onların izolyasiyasını
zamanında təşkil edib. Koronavirusa yoluxma şübhəsi olan insanlar kütləvi şəkildə
zamanında test nümunəsindən keçirilib. Xəstə insanların aşkar edilməsi və
müalicəyə cəlb olunması zamanında baş verib. Məhz bunların sayəsində Azərbaycan
Avropanın ən inkişaf etmiş ölkələrinin düşdüyü vəziyyətə düşməyib. Ölkəmizdə
virusun insandan insana yoluxması halının, kütləvi yayılmasının qarşısı alınıb.
Statistikadan da görünür ki, hər keçən gün virusdan sağalanların sayı
yoluxanların sayını üstələyir. Bu stabilləşməyə doğru gedişatdır və məmnunluq
doğurur”.
Gəncə Şəhər Təcili və
Təxirəsalınmaz Tibbi Yardım Stansiyasının çağırışçı həkim-kordioloqu Sərvər
Nadirov da peşə borcunu ləyaqətlə
yerinə yetirən, vətəndaşlarımızın sağlamlığının keşiyində dayanan fədakar həkimlərimizdəndir.
Həkim bizimlə söhbətində vurğuladı ki, koronavirusla mübarizə tədbirləri
başlayandan həmkarları ilə birlikdə o da bu işə səfərbər olub. S.Nadirovun sözlərinə
görə, evə çağırışlara gedərkən bir neçə koronaviruslu xəstənin aşkarlanması,
onların müayinə və müalicəyə cəlb olunması prosesində iştirakçı olub: "1995-ci
ildən təcili tibbi yardımda çalışıram. Çağırışlar adətən evə olur və biz bu
zaman hər cür xəstələrlə rastlaşırıq. Eləcə də koronavirus xəstəliyinin
daşıyıcısı olan vətəndaşlarla rastlaşırıq. Tənəffüs çatışmazlığı, öskürək,
boğazda qıcıqlanma və sair bu kimi əlamətləri olan xəstələri dərhal müayinəyə cəlb
edirik. Onlar barəsində dərhal mərkəzə məlumat veririk. Həmin xəstə də daxil
olmaqla bütün ailə üzvlərindən analizlər götürülür, zərurət yarandıqda karantinə
cəlb olunurlar. Koronavirus xəstəsi olduğu müəyyən edilən vətəndaşımızı
Goranboydakı xəstəxanaya da aparmışam. Müayinəyə cəlb etdiyimiz xəstələrdən koronavirus
çıxanlar olub ki, onları da aidiyyəti üzrə yerləşdirib müalicəsini təmin etməyə
çalışmışıq. Gözəgörünməz düşmən hesab edilən koronavirusla mübarizədə əlimizdən
nə gəlirsə edir, insanlarımızın sağlamlığının keşiyində dayanır və bu işimizdən
zövq alırıq”.
Həkim-kardioloq peşə fəaliyyəti, vətəndaşların
sağlamlığının qorunması üçün gördüyü işlərlə yanaşı, Prezident İlham Əliyevin rəhbərliyi
ilə Azərbaycanda vətəndaşların pandemiyadan etibarlı müdafiəsindən də söhbət
açdı. Qeyd etdi ki, ilk növbədə Nazirlər Kabineti yanında Operativ Qərargahın
yaradılması, ölkədə karantin rejiminin tətbiqi, sərhədlərin bağlanması,
Prezidentin ehtiyat fondundan vəsait ayrılması, dövlət dəstəyi proqramlarının
hazırlanması öz effektini verib: "Sözügedən proqramların icrası üçün ümumilikdə
2,5 milyard manat vəsait ayrılıb. Zəruri tibb avadanlıqları ölkəyə gətirilib. Ən
müasir tələblərə cavab verən "Yeni Klinika” tibb müəssisəsi, eləcə də son illərdə
regionlarda istifadəyə verilən müasir xəstəxanalar koronavirus xəstələrinin
müalicəsinə səfərbər olunub, ölkədə maska istehsalı müəssisəsi yaradılıb.
Bundan başqa, Prezident İlham Əliyev koronavirusa yoluxmuş xəstələrin müalicəsinin
səmərəli təşkili məqsədilə hər birində 200 çarpayı olan modul tipli 6 xəstəxananın
quraşdırılması ilə əlaqədar sərəncam imzalayıb. Bu məqsədlə də dövlət büdcəsindən
14,8 milyon manat vəsait ayrılıb. Azərbaycan Ümumdünya Səhiyyə Təşkilatı (ÜST)
ilə yeni əməkdaşlıq formatı çərçivəsində işləməyə başlayıb. ÜST mütəxəssisləri
ölkəmizə dəvət edilib, onların tövsiyələrinə riayət olunaraq Azərbaycanda çox
ciddi tədbirlər görülüb. ÜST nümayəndələri ölkəmizə gələrək, vəziyyətlə tanış
olublar. Onlar Azərbaycan rəhbərliyinin koronavirusun yayılmaması üçün çox önəmli
və təsirli tədbirlər gördüyünü qeyd ediblər. Düşünürəm ki, biz səhiyyə işçilərinin
koronavirusla mübarizədə oynadığı mühüm roldan danışarkən ölkə rəhbərliyi səviyyəsində
həyata keçirilən bütün bu tədbirləri xüsusilə qeyd etmək, qiymətləndirmək zəruridir”.
Sonda onu da xatırladaq ki, ÜST rəyinə görə
koronavirus pandemiyası ilə mübarizədə əsas şərtlərdən biri effektli izolyasiya
tədbirlərinin görülməsi, əhali arasında geniş müayinələrin aparılması və xəstəlik
hallarının vaxtında müəyyənləşdirilərək müalicəyə cəlb olunmasıdır. Mütəxəssislər
bu xəstəliyin sürətlə və geniş yayıldığını nəzərə alaraq, COVID-19-la bağlı
testlərin keçirilməsinə daha çox diqqət yetirilməsinin vacibliyini qeyd edirlər.
Yalnız bundan sonra yoluxan insanları təcrid etmək və onarın kontaktda olduğu şəxsləri
müəyyənləşdirmək mümkündür. Hazırda Azərbaycanda həyata keçirilən qabaqlayıcı tədbirlər
infeksiyanın yayılmasını mümkün qədər məhdudlaşdırmağa və sanitar-epidemoloji vəziyyəti
nəzarətdə saxlamağa imkan verir. Ölkədə koronavirusa yoluxma hallarının müəyyənləşdirilməsi
üçün bütün imkanlar mövcuddur, o cümlədən diaqnostik alətlər və tibbi ləvazimatlar
vaxtında ölkəyə gətirilərək, tibb müəssisələrinə təhvil verilib. Virusun
laborator diaqnostikası üçün tibb müəssisələrində dünyanın aparıcı şirkətlərinin
istehsalı olan müasir laboratoriya sistemləri qurulub, onlar həmçinin Avropa
ölkələrinin buraxdığı testlərlə təchiz edilib. İnanırıq ki, dövlətin həyata
keçirdiyi tədbirlər, yaratdığı imkanlar, həmçinin peşəkar həkimlərimizin öz peşə
borcunu vicdanla, yorulmadan yerinə yetirməsi sayəsində Azərbaycan bu bəla ilə
mübarizədən də qalib çıxacaq.
Rufik İSMAYILOV
Yazı Ailə, Qadın və Uşaq Problemləri üzrə Dövlət
Komitəsinin elan etdiyi "Görünməyən Qəhrəmanlar” mövzusunda müsabiqəyə təqdim
olunur