Bakı 27°C
Kolumbiyanın ümidi olan “utancaq oğlan” - Portret
Futbol üzrə dünya çempionatının startına sayılı günlər
qalıb. Bütün dünyanın futbol azarkeşləri Rusiyada keçiriləcək mundialı səbirsizliklə
gözləyirlər. Dördilliyin ən möhtəşəm futbol turnirinin sevilməsinin tək səbəbi,
heç də burda çıxış edən güclü yığmalar deyil. Dünyanın ortabab milliləri də öz
rəngarəng oyunları ilə mundiala həmişə rəng qatıblar. Kolumbiya yığması da bu
cür komandalardandır. Futbol həvəskarları hələ də, Rene İqita, Karlos
Valderrama kimi oyunçuları xatırlayırlar.
Kolumbiya millisi bu günə kimi 5 dünya çempionatında
çıxış edib. Cənubi amerikalıların mundiallarda ən yüksək nəticəsi isə son DÇ-yə
təsadüf edib. Kolumbiyalılar Braziliyada təşkil edilən mundialda 1/4 finala
kimi irəliləsə də, burda meydan sahiblərinə uduzaraq mübarizəni dayandırdı.
Ancaq cənubi amerikalılar öz oyunları ilə hətta bu ölkədən olmayan futbol
azarkeşlərinin də könlündə taxt qurdular. Kolumbiya yığmasının ən diqqətçəkən
üzvü isə Xames Rodriqes oldu. Xames mundial ərzində vurduğu 6 qolla turnirin ən
sərrast futbolçusu oldu və "qızıl buts”a layiq görüldü. Builki DÇ-də Yaponiya,
Polşa və Seneqalla bir qrupda mübarizə aparacaq Kolumbiya millisi qrupun
favoritidir. Yığmanın əsas "silah”ı isə yenə Xames olacaq. Bu yazıda sizə
Kolumbiya millisinin kapitanı, "Bavariya”nın üzvü Xames Rodriqesin həyatından bəhs
edəcəyik.
2 yaşında topa toxunuş, 5
yaşında futbolla tanışlıq
Xames David Rodriqes Rubio 1991-ci ilin 12 iyulunda
Kolumbiyanın Kukuta şəhərində dünyaya gəlib. Hələ çox kiçik olarkən ailəsi ilə
birlikdə Venesuela sərhədinə yaxın İbaque şəhərinə köçürlər. Xamesin
uşaqlığının bir hissəsi məhz bu şəhərdə keçib. Onun atası keçmiş futbolçu
Vilson Xames Rodriqes Bedoya, anası isə Mariya Del Pilar Rubiodur. Evin tək
övladı olması onu ailənin ən sevimli üzvünə çevirib. Xames başqa latın
amerikalı ulduzlar kimi nə asfalt meydançalarda corabdan hazırlanmış topla
futbol oynayıb, nə də kriminal mühitdə böyüyüb. Heç futbola görə məktəbi də
atmayıb. Onun yüksəliş hekayəsi digər latın amerikalı futbolçulardan tam fərqlənir.
Yaxşı mənada.
Atasının futbolçu olması bu oyunun qapılarını onun
üzünə taybatay açıb. Onun topla tanışlığı cəmi 2 yaşında olub. 5 yaşı olan
zaman isə atası onun əlindən tutaraq, Tolima Futbol Akademiyasına aparıb. O,
özü bu barədə belə deyir:
"Futbolu həmişə sevmişdim. Lakin cəmi 5 yaşım olanda
atam məni Tolima Akademiyasına yazdırdı. Futbola bax, belə başladım”.
Xarakterini formalaşdıran
problem
Xames sakit uşaq idi. Lakin onun bu sakitliyinə səbəb
xarakteri yox, anadangəlmə qüsuru idi. Onun kəkələmə problemi var idi. Məhz
buna görə, danışmağa çox da üstünlük verməzdi. Uşaq komandasında onunla birgə
oynamış dostları Xamesin dilindən çox nadir hallarda söz eşitdiklərini deyirlər.
Ailəsi onun kəkələmə problemini həll etmək üçün həkim yanına göndərir. Lakin
böyüdükdən sonra da onun problemi özünü büruzə verməyə davam edir. Problem onun
xarakterinə də təsir edir. Elə məhz bu səbəbdən, Xames bir qədər utancaq biri
kimi formalaşır. Bu, onun hər hərəkətində özünü göstərir. Onun kəkələmə
problemi hələ də qalmaqdadır. Rodriqes bu problemin öhdəsindən tam gəlmək üçün
tez-tez yüksək səslə kitab oxuyur.
Atanın səhvlərindən
çıxarılan nəticə
Xames ilbəil özünü inkişaf etdirirdi. Bunda atasının
da böyük rolu var idi. Yox, Xames heç də atası Vilsonun oyunlarının videokastelərinə
baxıb, ondan nə isə öyrənmirdi. O, atasının səhvlərindən nəticə çıxarırdı.
Vilson Kolumbiyanın ən istedadlı oyunçularından
sayılsa da, zədələr və spirtli içkilərə meyillilik onun karyerasını məhv edir.
O, öz oğlunun bu səhvləri təkrarlamaması üçün daim ona nəzarət edir. Xamesin
özünün dediyi kimi - "İnsanlar həyatda bəzən özlərinin və ya başqasının xətaları
ilə öyrənirlər”. O da belə eləmişdi. Ailəsinin tam dəstəyi, ata məsləhətləri və
öz gücünə inam, onu futbol karyerasında pillə-pillə irəli aparırdı.
Bu uğurlarda ailəsinin ona olan inamı da böyük rol
oynayırdı. Anası Mariya oğlu barəsində "Xames heç vaxt futbolçu olmaq istəməyib,
ancaq doğulduğu gündən futbolçudur” deyir.
14 yaşında peşəkar
karyerada debüt
Xamesin peşəkar karyerası çox erkən başlayıb. O,
2006-cı ildə Kolumbiya birinci liqa təmsilçisi "Enviqado”ya keçir. Elə həmin
ildə, 15 yaşı tamam olmamış peşəkar karyerasında ilk oyununu keçirir. İki il bu
komandanın uğurları üçün çalışan Xames, 2008-ci ildə Argentinanın "Banfild”
komandasına transfer olunur. Onun ilk legioner karyerası uğurlu alınır. Xamesin
oyunu Avropa klublarının diqqətindən yayınmır. "Köhnə qitə” təmsilçilərinin
skautları gənc kolumbiyalının istedadı barədə "futbolçu ovçusu” olan klublara məlumat ötürürlər. Ən cəld tərpənən
isə "Portu” olur. "Əjdahalar” 2010-cu ildə, cəmi 5,1 milyon avro qarşılığında
Xamesi heyətə cəlb edirlər. Rodriqes "Portu”da 3 mövsüm keçirir. İlk ilində komandaya
uyğunlaşan gənc yarımmüdafiəçi, növbəti illərdə diqqətləri üzərinə çəkməyə
bacarır. Çox çəkmir ki, futbolçu almaqda simiclik etməyən "Monako” gənc
kolumbiyalını heyətinə cəlb etmək üçün "Portu”nun "qapısını döyür”. "Knyazlıq
klubu” 45 milyon avro qarşılığında Xamesi heyətinə cəlb edir. Rodriqesin Fransa
karyerası cəmi bir il çəkir. Yox, o, "Monako”dan heç də zəif oyununa görə ayrılmır.
DÇ-2014-dəki parlaq çıxışı onu "ulduz ovçusu” "Real”ın "radar”ına salır.
"Monako” "kral klubu”nun 63 milyon funt-sterlinqlik təklifinə "yox” deyə
bilmir. Beləliklə, Xames 2014-cü ildə Madrid təmsilçisinin üzvünə çevrilir. O,
Kolumbiya futbolu tarixinə bu ölkənin ən bahalı futbolçusu kimi düşür. "Real”ın
əsas heyət üzvünə çevrilən Rodriqes, "kral klubu” ilə 2 dəfə Çempionlar
Liqasının, 1 dəfə La Liqanın, 2 dəfə UEFA Superkubokunun, 2 dəfə Klublararası
dünya çempionatının qalibi olur.
Xamesin "Real”dakı ilk günlərində işləri qaydasında
getsə də, sonradan az şans qazanmağa başlayır. Formasının pik nöqtəsində ehtiyatda
gün keçirmək istəməyən Rodriqes ayrılmaq qərarına gəlir. Kolumbiyalı
futbolçunun xidmətində Avropanın bir neçə nəhəng klubu maraqlı olsa da,
"Bavariya” hamıdan qabağa düşür. Münhen təmsilçisi 14 milyon avro qarşılığında
Xamesi 2 illik icarəyə götürür. Son mövsümdə "Bavariya”da ilk ilini keçirən
yarımmüdafiəçi, bura da erkən uyğunlaşır. Münhen təmsilçisində ümumilikdə 39
oyun keçirən Xames, 8 qola imza atır.
Milli
Xames millidə ilk oyununu 2011-ci ildə, Boliviyaya
qarşı keçirib. Gənc futbolçu həmin matçda son dəqiqədə Radamel Falkaoya verdiyi
məhsuldar ötürmə ilə yadda qalır. Görüş 2:1 hesabı ilə Kolumbiyanın xeyrinə
başa çatır, Rodriqes isə qarşılaşmanın ən yaxşısı hesab edilir. Xames yığmada
ilk qolunu DÇ-2014-ün seçmə mərhələsi çərçivəsində Peru ilə keçirilən matçda
vurur (1:0).
Yarımmüdafiəçi millinin heyətində DÇ-2014-də parlayır.
Braziliyada keçirilən mundialın qrup mərhələsində Yunanıstan (3:0), Fil Dişi
Sahili (2:1) və Yaponiyanın (4:1) qapısına bir dəfə yol tapan Xames, yığmanın
1/8 finala çıxmasına töhfə verir. Bu mərhələdə isə Uruqvay səddi onun dublu ilə
(2:0) dəf edilir. Xames 1/4 finalda meydan sahibləri və DÇ-nin əsas favoriti
olan Braziliyanın da qapısına yol tapır. Lakin onun vurduğu qol həlledici
olmur. 2:1 hesabı ilə qalib gələn "sambaçılar” yarımfinala adlayan tərəf olur.
Ailə
Xames çox erkən ailə həyatı qurub. O, ailə başçısı
olanda cəmisi 19 yaşı olub. Onun həyat yoldaşı - voleybolçu Daniela Ospina isə
18 yaşında idi. Daniela Xamesin millidəki komanda yoldaşı, qapıçı David
Ospinanın bacısıdır. 19 yaşlı Rodriqes əvvəlcə onunla telefon və internet üzərindən
əlaqə saxlayırdı. Lakin bu uzun məsafəli əlaqə belə onun Danielaya vurulmasına
mane olmur. Onlar 2011-ci ildə ailə həyatı qururlar.
2013-cü ildə Xames-Daniela cütlüyünün bir qız övladı
dünyaya gəldi. Lakin erkən yaşda yaranmış məhəbbət çox uzun çəkmir. Cütlük ötən
ilin yayında boşandı. Lakin onlar qalmaqalla yox, xoşluqla, dost kimi yollarını
ayırıblar.
Xames kriminal ölkə, narkobaronların "at oynatdığı”
Kolumbiyada böyüyüb. Özü hər nə qədər kriminal aləmdən uzaq olsa da, futbolçu
olan əmisi Arli Rodriqes bunun qurbanı olub. O, cəmisi 19 yaşında, yerli
kriminal qruplarından birinin üzvlərinin açdığı 6 güllə yarası ilə dünyasını dəyişib.
Xames məşhur kolumbiyalı futbolçu Radamel Falkao ilə
uşaqlıq dostudur. Bunda adıçəkilən oyunçuların atalarının da böyük rolu var.
Belə ki, həm Rodriqesin, həm də Radamelin atası vaxtilə futbolçu və dost
olublar.
Kolumbiyada Rodriqesin "10 Gold” adlı enerji içkisi
buraxılır. Bu marka daim Kolumbiyadakı kasıb uşaqlara dəstək verir.
Hər bir uşaq kimi Xamesin də kumiri olub. Bunlardan
biri real, digəri isə xəyalidir. Rodriqes sonradan bir komandada oynayacağı
Kriştiano Ronaldonun pərəstişkarı olub. Onun digər qəhrəmanı isə məşhur cizgi
film xarakteri "Kapitan Tsubasa” olub.
Xames ali təhsil də alıb. O, futbolçu olmasına
baxmayaraq, vaxt tapıb "Universidad Nacional Abierta” ali məktəbini bitirib.
Oyun tərzi
1.80 m boya malik Xamesin doğma mövqeyi yarımmüdafiənin
mərkəzidir. Futbolçu orta xəttin cinahlarında da oynaya bilir. Xamesin işlək
ayağı soldur.
26 yaşlı futbolçu əsasən, uzaqdan və cərimə zərbələrindən
vurduğu qollarla yadda qalıb. İnsafən, bu, onda çox yaxşı alınır. Ən yaxşı
qolların nümayiş etdirildiyi videolarda mütləq Xamesin ən azı bir qoluna rast gələ
bilərsiniz.
Portret
Hamı onu utancaq biri kimi tanıyıb. Lakin bu, heç də
belə deyil. Çox az danışsa da, insanlarla əlaqə yaratmağı, əylənməyi sevir. Fərqləndikdən
sonra etdiyi rəqslər də buna sübutdur. Xames hazırda olduğu mövqeyə yüksəlmək
üçün bəlkə də, başqa ulduzlar qədər əziyyət çəkməyib. Anasının dediyi kimi, o,
futbolçu kimi doğulub. Bu istedadını isə artıq bir dəfə - DÇ-2014-də sübut
edib. Lakin son illərdə bir qədər kölgədə qalan yarımmüdafiəçi, öz bacarığını
daha bir dəfə göstərməli, elə həmin - 4 il öncəki Xames olduğunu sübut etməlidir.
Rusiyada keçiriləcək mundial bu cəhətdən kolumbiyalı üçün əsl sınaq
olacaq.
Elnur
