Koçova ailəsinin Sultanı
Türkiyənin məşhur
seriallarından olan "Çukur” Azərbaycanda da kifayət qədər tanınır və sevilir.
Serialda "koçovalı qadınlar” adı ilə tanınan xanımlar İstanbulun ən qədim məhəllələrindən
birində yaşayırlar. Bu məhəllənin idarəçiliyi isə Koçova ailəsinə məxsusdur.
Ercan Kesalın canlandırdığı ata İdris obrazının isə özünəməxsus bir fəlsəfəsi
var. O deyir ki, pisliyin də bir dərəcəsi var. Koçovalıların evində Türkiyənin
tanınmış və sevilən aktrisası Perihan Savaşla birlikdə İrem Altuğ, Zeynep
Kumral, Boncuk Yılmazın canlandırdığı bir qadın ortamı var. Onlar hər nə qədər
bir ailədə yaşasalar da, təbii ki, son söz Perihan Savaşın canlandırdığı Sultan
Koçovalıya məxsusdur. O, hər kəsi idarə edir. Perihan Savaşın müsahibəsini təqdim
edirik.
- Xoş gəldiniz, Perihan xanım. Bu qədər fasilədən
sonra yəqin ki, çəkiliş prosesi üçün
darıxmışdınız?
- Uzun zaman idi
ki, gözəl bir layihə təklifi gözlədiyim.
Belə bir seriala təklifi alanda düşünmədən razılıq verdim və həsrətində olduğum çəkiliş
proseslərinə qovuşdum. Çox darıxmışdım. Sənət adamları işləmədikcə, yığılıb
qalan təcrübələri olur və onlardan istifadə etməyə can atır.
- İlk çəkiliş günü
necə, həyəcan keçiribsinizmi?
- Əlbəttə. Mən hər
hansı obrazı canlandıracağım zaman, onun həyəcanını mütləq yaşayıram. Həyəcanın
olmamağı mümkünsüz. Teatrda da, filmdə də, serialda da belədir. Məncə, aktrisa
o həyəcanı yaşamalıdır.
- "Çukur”un məhəlləsini
necə dəyərləndirirsiniz?
- Mən də bir məhəllədə
doğulub boya-başa çatmışam. Ona görə məhəllə mədəniyyətini çox yaxşı bilirəm. Məhəllə
mühitində sizi ən arxa küçədəki insanlar belə tanıyır. Məsələn, küçədə oynayarkən
arxa küçələrə getdiyimizdə, həmin məhəllənin sakini bizə "haydı evinizə gedin”
deyərdi. Bizə adımızla səslənərdilər. "Çukur” serialında da elə bir mədəniyyət
var. Bir çox insanın özünü bu serialda tapacağına inanıram.
- Sultan yetim qız olub və indi çox qəddarlaşıb.
Onun emosiyaları uşaqlığı ilə bağlıdır? Bir də bu obrazın hansı xüsusiyyətləri
sizə daha çox bənzəyir?
- Onun
uşaqlarını qoruması mənə çox bənzəyir. Ayaqlarının üzərində duran sağlam bir
qadındır. Mən də onun kimiyəm, ancaq Sultan daha sərtdir. Elə olmağı lazımdır.
Düzdür, bəlkə də ailə şəraiti görməyib, yetim olub. Sonra da sevdiyi ilə evlənib.
Ancaq indi Sultan evin hakimidir və onun qanunları keçərlidir. Ona görə də evdə
Sultan bir dənədir.
- Sözü qanun
hesab edilən bir qadını oynamaq yəqin ki, çox zövqvericidir?
- Çox gözəl
hissdir. Evdəki insanların bir anda Sultan, ya da nənə deyərək müraciət etməsi
mənə xoş gəlir. Uşaqlara "nənənizdən qorxursunuzmu” deyə sual verirlər. Onlar
da cavabında deyir ki, qorxmuruq, ancaq nənəmizə hörmət edirik. Görün bu nə gözəl
bir sözdür. Bu qadın insanların qorxusunu deyil, hörmətini qazanmağa çalışır.
- Yaş ötdükcə insan o hörməti hamıdan gözləyir, elə
deyilmi?
- Əvvəllər
bayramlarda ailəmizin böyüklərinin ziyarətinə gedərdik, onların əlini öpərdik,
hal-əhvalını soruşardıq. Bizi belə yetişdiriblər. İndiki gənclər bayramlarda
heç böyüklərinə zəng etmirlər, kiçik bir mesaj yazırlar. Əvvəllər açıqcalar
vardı. Biz açıqcaları poçtlardan alırdıq. Ailəmizin böyüklərinə məktublar
yazırdıq. O açıqcalar və məktublar üçün çox darıxıram.
- "Çukur” serialında bir ailənin xarakteristikası və
xüsusiyyətləri öz əksini tapır. Görəsən yeniyetmələr uşaqlar böyüklərdən çəkinməyin,
onlara hörmət etməyin nə demək olduğunu
anlayırıqmı?
- İndiki gənclər
evdə böyüklərə fikirlərini bildirir və nə etmək istədiklərini deyirlər. Bunu
deyib, böyüklərdən icazə almırlar. Hörmət əlaməti olaraq, böyükləri xəbərdar
edirlər. Ancaq "Çukur”da isə övladlar atadan icazə alır. Əsas qəhrəman atadır.
Bizdə də belə ailələr çoxdur.
- Seriala "koçovalı qadın” - deyə bir anlam çıxdı.
Nədir bu koçovalı qadınların sirri?
- Hər kəs
Sultanın güclü bir xarakter olduğunu bilir. O, evdə və digər koçovalı
qadınlara, nəvələrinə və gəlinlərinə örnək bir qadındır. Gəlinlər ondan
xoşlanmasalar belə, zaman keçdikcə Sultanın düz hərəkət etdiyini anlayacaqlar.
Hamımızın anası evdə bir sultandır və onun sözü keçərlidir. Zaman-zaman anam da
mənə bəzi sözlər deyəndə "yaxşı” deyib, qulaqardına vurmuşam. Müəyyən yaşa çatdıqdan sonra anamın nə qədər
haqlı olduğunu anlamışam.
- Bəs siz Sultanın gəlini olsaydınız, onun
hökmranlığından qıcıqlanardınızmı?
- Yəqin ki, olardım. Amma sonradan onun haqlı
çıxdığını görəndə, Sultana haqq verərdim.
- Bu serialın əsas məğzi
nədir, sizcə?
- İndiki gənclərə
məhəllə qavramını aşılamaq, ailənin, dostluğun, eşqin bir-birinə necə bağlı
olduğunu göstərmək. Bundan başqa, məhəllə mədəniyyətini və Çukur məhəlləsini
insanlara tanıtmaq.
- Sizin canlandırdığınız Sultan xanım İdrisə
aşiqdirmi?
- Bəli. Həm də dəli
kimi.
- Bəs İdris?
- Məncə İdris də
ona aşiqdir. O da sevir, amma bəlli etməməyə çalışır. Etdiyi hərəkətlərə görə
peşman olsa da, bunu öz aralarında danışmayıblar. Sultan heç vaxt İdrisə qarşı
gəlməyib. İdris şorgözlüyündən Sultanın xəbərdar olduğunu da bilir. Ancaq mövzu
ora gəlib çatanda, sadəcə, baxışırlar.
- Məhəllədə ənənəvi adətlərin yaşaması da bir
mesajdır. Modernləşdiyimizi düşünsək də,
sanki daha yalnız bir həyat yaşayırıq.
- Mən modernləşməyi
sevən insanam. Uşaqları evdən çıxarmamaq kimi adətim yoxdur, amma Koçovalı ailəsinin
fərqli bir vəziyyəti var. Düşmənləri olduğu üçün bunu etmək məcburiyyətindədir.
Sultan nəvələrinə və digərlərinə zərər gəlməmək üçün onları evdə nəzarət
altında tutur. Normalda isə əlbəttə ki, Sultan da istəyər ki, ailə üzvləri öz həyatlarını
yaşasınlar. Ancaq biz modern olacağıq deyə, bəzi şeyləri bir-birinə
qarışdırmışıq. Rahat ana və ata olacağıq deyə düşünərkən, uşaqlarımızın ipini
çox boş buraxmışıq. Son dövrlər yetişən
gənclərə baxanda, buna bir daha əmin oluram.
- Yeni nəsil analar da uşaqların üzərində həddindən
artıq titrəyirlər. Təbii ki, bu da bizə sağlam təsir bağışlamır.
- Təbii ki, bunu
da bir nizama qoymaq lazımdır. Nə çox, nə də az. Uşaqların da bir fərd olduğunu
unutmamaq lazımdır. Onların da öz şəxsiyyətini tapmağa başladıqları zaman,
alçaltmamaq və sərbəst buraxmaq şərtdir.
- Çox müdafiə eləmək də zərərlidir.
- Övladları həddən
artıq müdafiə etmək təbii ki, səhv addımdır. Düzdür, diqqətli olacaqsınız, amma
ona hiss etdirməyəcəksiniz. Hiss etdirdiyinizdə, o uşaq daha sonra həyatın gerçəkləri
ilə qarşılaşdığı zaman, çox çabalayacaq və çətinliklərlə üzləşəcək.
- Əslində, qadınlardan da hər zaman, hər yerdə
güclü olmalarını tələb edirlər.
- Qadın onsuz da
güclüdür. Təəssüf ki, bəzi qadınlarımız "Mən bir şey bilmirəm, heç nə edə bilmərəm”
düşüncəsinə sahibdirlər. Mən buna etiraz edirəm. Sən qadınsansa, hər şeyi edə
bilərsən. Bu gün boşanma ərizələrinə nəzər yetirsək, görərik ki, qadınlar öz həyat
yoldaşlarını məhkəməyə verirlər. Çünki
kişilər buna cəsarət edə bilmirlər. Qadın hər şeyi bilir və hər zaman
güclüdür. Yetər ki, ondan istifadə etməyin
yollarını bilsin.
- Siz ayaqlarınızın üzərində durmağa çalışarkən,
yaşadığınız çətinliklər nələrdən ibarət olub?
- Bizim sahə
tamamilə fərqlidir. Bu sektorda işə başlayanda mütləq qarşınıza sizi sevməyənlər,
əzmək istəyənlər çıxır. Bunun acısını
yaşayırsınız və bu sizi hətta qamçılayır da. Üzərinizdə nə qədər təzyiq hiss
etsəniz də "mən bunu bacaracağam” dedikdə, siz ona qalib gəlirsiniz. Təbii ki,
mən də bir çox çətinliklərlə qarşılaşdım. Sevilmədiyim zamanlar da oldu. Baş
rola çəkilməyim deyə, digər aktyorların təzyiqinə məruz qalmışam. Buna
baxmayaraq, heç zaman məğlub olmadım və özümü təsdiqləyərək, bunu bacardım.
- Gücsüz olduğunuzu hiss etdikdə həyatınıza
davam edə bilmək üçün nələrdən güc aldınız?
- Övladlarımdan.
Mən dəmir ledi deyiləm. Həqiqətən çox üzüldüyüm, çökdüyüm zamanlar oldu, amma
ehtiyac duyduğumda, övladlarımdan enerji aldım. Ehtiyac olanda uşaqlarımın
varlığı ilə qalib gəldim. Əgər yaşayır, nəfəs alıramsa, bu həyatı davam etdirməliyəm.
Əvvəlcə özümə, sonra uşaqlarıma faydalı olmaq üçün.
- Həyatda örnək aldığınız biri oldumu?
- Anam çox güclü
qadındır, ondan örnək almışam. Məktəb müəllimlərinin də uşaqların həyatında önəmli
olduğunu düşünürəm. Mənim müəlliməm güclü bir qadın idi. Pis bir xəstəliyə
düçar oldu. Çox əziyyət çəkdi, amma bizi oxutdu. Onun evində çəkdiyi əziyyəti
görmüşdüm, amma sinfə daxil olanda bambaşqa bir qadın olurdu. O qadın mənim
üçün çox özəldir.
- Ən çox nəyə ağlayırsınız?
- Mən hər şeyə
ağlayıram. Gözüsulu biriyəm, tez məyus oluram, gözlərim dolur. Son dönəmlər isə
heyvanların vəziyyətinə ağlayıram. Onlara təcavüz edən, öldürən, yaralayan
insanların sərbəst buraxılmasına dözə bilmirəm. Heyvan deyib onları bir kənara
ata bilmirik, çünki onlar da bir can daşıyırlar. Heyvanlara şiddət göstərənlərin
ağır şəkildə cəzalanmasını istəyirəm.
- Ən böyük qorxunuz nədir?
- Ən böyük
qorxum təyyarə ilə bağlı idi. 30 il təyyarəyə minmədim. Sonra özümü müalicə
etdirdim. İndi rahatlıqla təyyarəyə minə bilirəm. Təbii ki, həyata qarşı
qorxularım var. Zaman-zaman "hara gedirik və nə olacağıq” deyə düşündüm. Artıq
bizdən keçib. Uşaqlarım, nəvələrim üçün çox narahatam.
- Ölümdən qorxursunuz?
- Yox. Hər gün
yuxudan durduğum zaman aldığım nəfəsə şükür edirəm. Yaşamaq duyğusunu sevirəm və
əgər qismətimə bu gün ölmək yazılıbsa,
onda ediləcək bir şey yoxdur.
Tərcümə etdi: Xəyalə Rəis