"Könüllü” Tələbə Təqaüd Proqramının qalibləri açıqlandı
"Azərbaycan gəncliyi 2017-2021-ci illərdə” Dövlət Proqramına
müvafiq olaraq gənclər arasında könüllülük fəaliyyətinin daha geniş təşviq
edilməsinə ictimai dəstək verilməsi məqsədi ilə keçirilən "Könüllü”
Tələbə təqaüd proqramı müsabiqəsi başa çatdı.
Bu gün YARAT Müasir İncəsənət Məkanında təqaüdlərin tələbə könüllülərə
təqdim olunması ilə bağlı tədbir keçirildi. Qeyd olundu ki, "Könüllü” Tələbə
Təqaüd Proqramının büdcəsi, dosent Nadir Adilov tərəfindən yazılan,Azərbaycan
Universiteti Elmi Şurasının rəyi ilə nəşr edilən "Gəncsən? Başla!” gənclər
üçün şəxsi inkişaf kitabının satışından əldə edilən vəsait hesabına və müəllifin
şəxsi təşəbbüsü ilə formalaşıb.
Tədbirdə bildirildi ki, ötən ilin oktyabr ayından start verilən
müsabiqəyə 58 müraciət daxil olub. Təqaüd fondunun ümumi miqdarı 3000
manat təşkil edir. Müsabiqəyə daxil olan müraciətlər komissiya tərəfindən
dəyərləndirilib.
Tədbirdə çıxış edən Vətəndaşlara
Xidmət və Sosial İnnovasiyalar üzrə Dövlət Agentliyinin sədr müavini Ülvi Mehdiyev bildirdi ki, "ASAN xidmət”də
könüllü olaraq fəaliyyətə başlayanların hər birinin ideyaları dəstəklənir və bu
ideyaların həyata keçirilməsi üçün şərait yaradılır: "Bununla bağlı bizdə
"İdeya bankı” da mövcuddur. Ora həm "ASAN xidmət”in əməkdaşları, həm də istənilən
şəxs ideya göndərə bilir. Həmin ideyalardan gerçəkləşməsi mümkün olanları
seçilir. Onlardan hətta bir neçəsi "ASAN xidmət”in xidməti fəaliyyətində də tətbiq
olunur. Bildiyim qədər 60-a yaxın müraciət olub, onların da arasında 20 ideya
müəllifi seçilib. Həmin şəxsləri təbrik edirəm. Hər birinizi "İdeya bankı”nda təşəbbüskar
olmağa, ideyalarınızı təqdim etməyə dəvət edirəm”.
Gənclər və idman nazirinin
müaviniİntiqamBabayev
dedi
ki, ötən ilin noyabrında təqdimatı edilən kitab özlüyündə uğurlu bir layihə
oldu: "Qısa bir müddət öncə biz kitabın təqdimatına toplaşmışdıq. Sonra kitabın
imza günləri müxtəlif yerlərdə təşkil olundu, şirkətlərimiz kitabların gənclərə
pulsuz təqdim etməsi üçün maliyyə ayırdılar. Bunlar göstərdi ki, bu kitab
uğurlu bir ideya, layihədir. Mükafatı təsis edənləri və alanları təbrik edirəm”.
Millət vəkili Fuad Muradov çıxışında bildirdi ki, ölkənin
inkişafında gənclərin rolu əvəzsizdir, bunun üçün isə gənc kadrlar özlərini
daim inkişaf etdirməlidirlər: "Biz burda hamımız kitabı təbliğ edirik və gənclərə
dəstək olmaq üçün gəlmişik. Kitabı dəstəkləyən çox böyük şirkətlərimizin adını
burda gördüm. İnanıram ki bu dəstək gələcəkdə də davam edəcək. Bu gün Azərbaycanda
bir çox işlər görülür və gənclər olaraq biz bu ənənəni davam etdirməliyik.
Bunun üçün də bilik və bacarıq ilk sırada gedir. Bu kitab da gənclər üçündür.
Bu kitabın hazırlamasında əməyi keçən hər kəsi təbrik edirəm”.
"AzərTürk Bank”ın
Srateji planlaşdırma və marketinq departamentinin direktoruLeyla Məmmədova bu gün
gənclərə özlərini inkişaf etdirmək üçün yaradılan imkanlardan danışdı: "Öncəki illərlə müqayisə edəndə indi
gənclər üçün olan imkanlar çox fərqlidir. Əvvəllər şərtlər daha çətin idi, biz
şirkətlərə yalvarırdıq ki, təcrübə imkanları yaratsınlar. Amma indi ölkədə
könüllülük proqramları genişlənir, bu da gənclərimiz üçün böyük imkandır. Mən
artıq o cür bütün mərhələləri keçmişəm. Universitet həyatında yaxşı oxumaqla
yanaşı, təcrübə qazanmaq, dostluqlar qurmaq da önəmlidir”.
"AsanRadio”nun direktoru
Emin Musəvi gənclərimizi öyrənməyə, özlərini inkişaf etdirməyə çağırdı:
"İstedadlı, müasir gənclərimizə motivasiya vermək, onları bir qədər də
ruhlandırmaq çox önəmlidir. Müəyyən qaydalar var ki, onlardan yararlanıb hətta
gənc yaşda da müdrik olmaq olar. Hər işə məsuliyyətlə yanaşmaq, gözəl insan
olmaq, bilikləri inkişaf etdirmək və rəqabətə dözümlü olmaq sözsüz ki, sizi
uğurlu edəcək. Müəllifi təbrik edirəm, gənclərimizə uğurlar arzulayıram”.
Sonda çıxış üçün söz kitabın
müəllifi Nadir Adilova verildi. O bildirdi ki, tədbirin təşkilatçılığını
könüllülər ediblər. Onların burda iştirak etməsinin başqa bir səbəbi də var:
"Yaxın günlərdə çapa gedəcək növbəti kitabımın filmində də bu könüllülər çəkiləcək.
Onlar özləri də yəqin ki, bunu bilmirdilər, amma ümid edirəm ki, alınacaq. Gənclər
üçün əhəmiyyətli bir film olacaq. Fürsətdən istifadə edib bütün dostlara təşəkkür
edirəm ki, dəvətimizi qəbul edib gəliblər. Korporativ Sosial Məsuliyyət çərçivəsində
kitabı alıb tələbələrə pulsuz paylayan şirkətlərə, "Yarat” Müasir İncəsənət məkanına
da minnətdaram”.
Çıxışlardan sonra müsabiqənin qalibləri mükafatlandırıldı. 2 tələbə
könüllüyə 500 manat məbləğində birdəfəlik təqaüd verildi. Həmçinin, könüllüllük
fəaliyyətinə stimullaşdırılmasına dəstək məqsədi ilə 20 tələbə-könüllünün hər
birinə 100 manat pul mükafatı təqdim olundu.
Aygün