“Klaviatura qəhrəmanları”nın Türkiyə “sevgisi”
Siyasi mübarizə aparan,
seçkilərdə iştirak edən tərəflərdən biri qalib, digəri məğlub olur. Bu, qaçılmaz
bir sonluqdur. Ona görə də qaliblər qalibiyyəti qeyd edərkən, seçkidə uduzanlar
da məğlubiyyətlərini qəbul etməlidirlər. Əgər xalq öz iradəsini nümayiş
etdiribsə, ona hörmətlə yanaşmaq hər kəsin, o cümlədən seçkidə məğlub olan
tərəfin də borcudur. Lakin əfsuslar olsun ki, Azərbaycanda demokratiya libasına
bürünən radikal müxalifət bu reallıqları görməzdən gəlir, sözün əsl mənasında
demokrat kimi davranmırlar. Onlar ölkəmizdə indiyə qədər keçirilən bütün
seçkilərdə məğlub olsalar da bunu qəbul etmir, seçkinin nəticəsini şübhə altına
salmağa çalışır, bir növ cığal uşaqlar kimi davranırlar.
Bəla burasındadır ki, bu
cür neqativ yanaşma, özlərinə sərf etməyəni qaralamaq cəhdi onlarda yalnız
Azərbaycana münasibətdə deyil, qonşu Türkiyəyə münasibətdə də özünü büruzə
verir. Misal üçün, iyunun 24-də qardaş ölkədə növbədənkənar parlament və
prezident seçkiləri keçirilib. Seçkinin ilkin və yekun nəticələri elan
edildikdən az sonra məğlub tərəf qalibləri təbrik etdi, Vətən və dövlətçilik
naminə hər kəs tərəfindən təqdir olunacaq addım atdılar. Müxalif mövqeyi ilə
seçilən tərəflər – rəqiblər tam demokratiya nümunəsi sərgiləyərək, seçkinin
qalibinin ünvanına hər hansı xoşagəlməz ifadə səsləndirmədi, ümumən seçkinin
nəticələrini şübhə altına salacaq hərəkətə yol vermədilər. Bununla onlar
Türkiyə xalqının iradəsinə hörmət etdilər, demokratik dəyərləri üstün
tutduqlarını göstərdilər.
Amma bizim radikal
müxalifət təmsilçiləri, eləcə də heç bir siyasi mənsubiyyəti olmayan
vətəndaşlar, o cümlədən bəzi media nümayəndələri öz "biləndərliklərindən” əl
çəkmədilər. Baxmayaraq ki, Türkiyədəki seçkilərlə bağlı qardaş xalqdan sonra ən
axırıncı söz deyəcək şəxs bunlardır, yenə də əməllərindən qalmadılar. Bu
seçkilərə "saxtakarlıq” damğası vurmaq üçün sosial şəbəkədə dəridən-qabıqdan
çıxan belə adamlar – "klaviatura qəhrəmanları” Türkiyə xalqının iradəsinə
açıq-aşkar hörmətsizlik nümayiş etdirdilər. Özlərini "demokratiya fədaisi”
hesab edənlərin belə qərəzli yanaşması sosial mediada təəssüf ki, indi də özünü
göstərməkdədir.
Mövzu ilə bağlı fikirlərini
"Kaspi”yə bölüşən siyasi şərhçi Elçin
Mirzəbəyli bildirib ki, qeyd olunanlarla yanaşı, Azərbaycanda seçki
mədəniyyəti formalaşmış siyasi partiyalar da var. Onun sözlərinə görə, belə
partiyalar seçkilərin nəticələrinə uyğun olaraq kifayət qədər yüksək mədəniyyət
nümayiş etdirirlər: "Belə partiyalar seçkidə məğlubiyyətlərini etiraf edir,
qalibləri təbrik edirlər. O ki, qaldı Azərbaycanda baş verən siyasi prosesləri ənənəvi
qaydada neqativ fonda görməyə adət etmiş şəxslərə, belələrinin davranışından
təəccüblənməyə dəyməz. Çünki onların məqsədi heç də Azərbaycan xalqının səsini
əldə etmək deyil. Onlar müəyyən zaman kəsiyində Azərbaycana qarşı hücuma keçən
xarici dairələrin maraqların, həmçinin öz korporativ maraqlarını təmin etməklə
məşğuldurlar. Əgər belə olmasaydı, bu günə qədər onlar ortalığa ciddi siyasi
platforma qoyar, öz ideoloji prinsiplərindən dəfələrlə imtina etdiklərini
nümayiş etdirməzdilər. Son 20 il ərzində sözügedən qrupların tamamilə
bir-birinə zidd olan, fərqli geostrateji maraqlar güdən güc mərkəzlərinin
mövqelərini necə müdafiə etdiklərini görmüşük. Onlar hətta Azərbaycanda
konstitusion dövlət quruluşunu devirməyə cəhd edən radikal ekstremist qüvvələrin
mövqeyini də müdafiə ediblər. Bu prinsipsiz, mövqesiz adamlar yalnız sifarişlə
davranır, ayrı-ayrı dairələrin maraqlarını ifadə edir, qoruyurlar. Bu baxımdan,
onların Türkiyədə keçirilən seçkilərə də bu kontekstdən yanaşmaları təəccüblü
deyil. Türkiyədə keçirilən seçkilərin nəticələri belələrinin maraqlarını ifadə
etmir. Heç kimə sirr deyil ki, bu seçkilərin nəticəsi Türkiyənin bir dövlət
olaraq möhkəmlənməsinə xidmət edir, bu ölkəni bölməyə, parçalamağa çalışan
qüvvələri siyasi proseslərdən kənarda saxlayır. Bu isə Türkiyə xalqının,
dövlətinin həmin qüvvələrə verdiyi ən tutarlı cavabdır”.
E.Mirzəbəyli qeyd edib ki,
radikal mövqeli bəzi şəxslərdən fərqli olaraq, Azərbaycan xalqı və dövləti
Türkiyə dövlətinə, xalqına, onun milli maraqlarının qorunmasına hər zaman
dəstək nümayiş etdirib. Onun fikrincə, "güclü Türkiyə güclü Azərbaycan deməkdir”
prinsipinə hər zaman riayət olunub: "Eyni yanaşma Azərbaycanla da bağlıdır.
Azərbaycan xalqı da güclü Azərbaycan dövlətinə dəstək verir. Azərbaycanı güclü
görmək istəməyən qüvvələr isə korporativ maraqlardan çıxış edərək, həm bizim
ölkədə, həm də Türkiyədə baş verən ictimai-siyasi proseslər barədə yanlış
təsəvvür formalaşdırmağa çalışır. Çünki, güclü dövlət, güclü dövlət
strukturları həmin qüvvələrin Türkiyə və Azərbaycandakı proseslərə
müdaxiləsinin qarşısını alır. Beləliklə də bu qüvvələr öz geosiyasi və
geoiqtisadi maraqlarını regionda formalaşdıra, təmin edə bilmirlər”.
Rufik
İSMAYILOV