Klassik-yeni müxalifət davası - Fotolar
Azərbaycanın radikal
müxalifəti demokratiya libasına bürünsə də əsl gerçəklikdə diktatorsayağı
davranışdan əl çəkə bilmir. 1993-cü ildən indiyə qədər müxalifətçiliyi həyat
tərzinə çevirənlər göydə günəşin tutulmasına, yerdə zəlzələ, daşqın, sunami
kimi təbiət hadisələrinin olmasına görə də iqtidarı günahkar bilməyi özlərinə
peşə seçiblər. 25 ildir bu "peşə xəstəliyindən” əl çəkə bilməyənlər vaxtaşırı
bir-birlərinə qənim kəsilməyi də bacarıblar. Hər dəfə seçkilərdə biabırçı
şəkildə məğlub olan radikallar proses başa çatandan sonra bir-birlərinin
ünvanlarına ən təhqiramiz ifadələr səsləndirib, qarşılıqlı ittihamlarla çıxış
edib, yollarını ayırıblar. "Ata-ana müxalifət” adı uğrunda mübarizə aparan AXCP
və Müsavat belə "çarpışmalarda” daha çox diqqət çəkiblər. Öz partiyaları
daxilində normal seçki keçirməyi bacarmayanlar rəqiblərini, fərqli fikir
bildirənləri ən müxtəlif vasitələrlə, o cümlədən şər-böhtan atmaqla, mənəvi
terrora məruz qoymaqla kənara tullayıblar. Beləliklə də ömürlərinin böyük
hissəsini müxalifətçiliyə qurban verənlər diktatorsayağı idarəetmənin
qurbanlarına çevriliblər. Radikal müxalifət liderləri sədarət kürsülərini
əllərindən verməmək üçün yeni nəsil müxalifətçilərin qarşısına da "iri dəyirman
daşı dığırlamağı” yaddan çıxarmayıblar. Hətta buna görə zaman-zaman müxalifət
daxilində klassik və yeni müxalifət söz-söhbətləri xeyli gərginlik yaradıb.
Ancaq radikal liderlərin bir işarəsi ilə həmin o "sözə baxmayan uşaqlar” dərhal
partiyadan uzaqlaşdırılıblar. Bunun nəticəsidir ki, əli kərimlilər, arif
hacılılar bu gün də "alternativsiz müxalifət liderləri” kimi "boy atmaqda”,
varlıqlarını sürdürməkdədirlər.
Bu günlərdə müxalifət
cameəsində daha bir gərginlik yaşanıb. Bu dəfə həmin gərginliyin səbəbi hazırda
Almaniyada yaşayan Emin Milli və tərəfdaşlarının klassik müxalifət ünvanına
sərt fikirlər səsləndirməsi olub. Müxtəlif bəhanələrlə xaricə sığınan bu
qrant dəllalları klassik müxalifəti bacarıqsızlıqda ittiham ediblər. Misal
üçün, xarici dairələrin maliyyələşdirdiyi "MeydanTv”nin rəhbəri E.Milli "Facebook”
vasitəsilə klassik müxalifətin, daha dəqiq desək, radikallığı ilə diqqət çəkən
AXCP-nin və onun sədri Əli Kərimlinin bostanına daş atıb. O, 20-25 ildir
Azərbaycanda siyasi hakimiyyətin dəyişməməsinə görə müxalifətdə təmsil
olunanların məsuliyyət daşıdıqlarını qeyd edib. Xüsusilə vurğulayıb ki, Ə.Kərimlinin
bu məsuliyyətsizlikdə, uğursuzluqda öz payı var. Yəni, E.Millinin məntiqinə
görə, müxalifət zəif olduğuna, xalqın etimadını itirdiyinə görə seçkilərdə səs
toplaya bilmir, daim məğlub olur. Ələkçinin qıl verəni rolunda çıxış edən başqa
bir "mühacir” Həbib Müntəzir də aşnası E.Millinin bu fikirlərinə dəstək olub.
Hər ikisi "Oyan” adlı məxfi bir hərəkatdan danışaraq, klassik müxalifətin
effekt vermədiyini, gizli təşkilatlanmaqla guya Azərbaycandakı mövcud iqtidarı
devirəcəklərini təbliğ ediblər. Maraqlı və gülməli məqam həm də budur ki, hər
iki şəxs bu məqsədlə çəkib yaydıqları video söhbətdə Azərbaycandakı siyasi
proseslərə müdaxilə etmək fikrində olmadıqlarını dönə-dönə bəyan ediblər. Guya
siyasətlə məşğul olmaq həvəsində olmadıqlarını söyləyən hər iki gənc "Oyan”
hərəkatına üzv olmayacaqlarını da bəyan ediblər. Yəni, siyasi bəyanatlar verən,
başlarından böyük qələtlərə yol açanlar guya siyasətlə məşğul olmayacaqlarını
bəri başdan dilə gətiriblər.
5-10 avro müqabilində
Vətən, millət maraqlarını satan, ölkəsinə dönük çıxan E.Milli və H.Müntəzir
kimilərinə klassik müxalifətin cavabı da özünü çox gözlətməyib. AXCP sədri
Ə.Kərimli "MeydanTv”nin "Facebook” səhifəsində canlı yayıma çıxaraq, E.Milli və
onun düşüncədə olanların ünvanına sərt fikirlər səsləndirib. O, E.Millinin bu
yanaşmasını ədalətsizlik və müxalifət daxilində çaxnaşma yaratmaq istəyi kimi
qələmə verib. E.Millini bu mövqeyinə görə dünyadan bixəbər, elmilikdən uzaq,
analiz qabiliyyəti zəif şəxs kimi xarakterizə edib. Eyni zamanda ritorik sual
edib ki, əgər klassik müxalifət bacarıqsızdırsa, qeyri-klassik müxalifət nə
üçün meydana çıxmır, bir iş görmür, özünü tanıtmır? Ə.Kərimli E.Milli və onun
düşüncəsində olanları əvvəl müxalifət olmağa, daha sonra klassik və ya yeni
müxalifət ayrı-seçkiliyi etməyə səsləyib. Ə.Kərimli "MeydanTv”yə müsahibəsində
Ermənistanda baş verənləri demokratik inqilab kimi xarakterizə etməklə
ermənilərə simpatiyasını da gizlətməyib, bir növ emin milliləri ermənilərdən
ibrət götürməyə çağırıb.
Ə.Kərimlinin yaxın dostu,
hazırda Fransada yaşayan Qənimət Zahid də məsələyə spektik yanaşıb. O, internet
üzərindən yayımlanan kanalda müəllifi olduğu verilişdə sətiraltı sözlərlə
E.Milli və H.Müntəzirin fikirlərini saf-çürük edib. Q.Zahid gizli təşkilatlanmanın
məsuliyyətsizlikdən, düşüncəsizlikdən qaynaqlandığını, bunu edən şəxslərin
insanları hüquq-mühafizə orqanlarına "ilişdirmək” istədiklərini dilə gətirib. O,
bir növ E.Milli və onun düşüncədə olanları "işverənlikdə”, hökumətin
agentliyini etməkdə günahlandırıb. "Facebook”da qarşılıqlı ittihamlarla
müşayiət olunan bu "söz davasına” sosial şəbəkə istifadəçiləri də öz münasibətlərini
bildiriblər. Təbii olaraq, AXCP funksionerləri, cəbhəçi trollar Ə.Kərimliyə
dəstək verib, onun müdafiəsinə qalxıblar. E.Milli, H.Müntəzi və onun kimilərini
müxalifətçiliyi bacarmayıb ölkədən qaçaq düşənlər kimi təqdim ediblər.
Bildiriblər ki, onlar öz bacarıqsızlıqlarını "ört-basdır etmək üçün” AXCP
sədrini hədəfə alıblar. Qeyd olunub ki, xaricdə oturub müxalifəti qınayanlar
aldıqları qrantlar hesabına media qurumu yaradıblar, amma ortaya faydalı iş
qoya bilməyib, heç bir nəticə əldə etməyiblər.
Alpər
TURAN