Bakı 24°C
“Kenqurular ölkəsi”nin həmişəcavan futbol ulduzu - Portret
Rusiyada keçiriləcək futbol üzrə dünya çempionatına sayılı günlər
qalıb. Dördilliyin ən möhtəşəm futbol turnirində iştirak haqqı qazanmış ölkələr
mundialın start fitini səbirsizliklə gözləyirlər. Ancaq futbol, dünya
çempionatında iştirak haqqı qazanan ölkələrin heç də hamısında bir nömrəli
idman növü deyil - Avstraliya kimi. "Kenqurular ölkəsi”ndə futboldansa, reqbiyə
daha çox maraq olduğu məlumdur. Lakin bu ölkənin futbol millisi son illərdə
qazandığı uğurlarla bu oyunu "sarı qitə”də də az-çox sevdirməyə nail olub.
Ancaq hər nə qədər olsa da, futbol yenə də reqbinin kölgəsində qalmağa davam
edir. Dünya çempionatı kimi mötəbər turnirlərdə isə futbol yenə ön plana çıxır.
Elə Rusiyadakı mundial da yəqin ki, bu cəhətdən istisna olmayacaq.
Tarixi ərzində 5-ci dəfə mundialda çıxış edəcək Avstraliya millisinin
bu turnirdə ən yaxşı nəticəsi 2006-cı ilə təsadüf edir (1/8 finala vəsiqə).
Digər DÇ-lərdə isə avstraliyalılar bir qayda olaraq, mübarizəni qrup
mərhələsində başa vurublar. "Kenqurular” bu dəfə də qrupun favoritlərindən
sayılmır. Fransa, Danimarka və Peru ilə bir qrupda yer alan avstraliyalıların
ən yaxşı halda qrupda 3-cü yeri tutacağı proqnozlaşdırılır. Lakin "sarı qitə”
təmsilçiləri 12 il öncəki kimi bütün bu proqnozları alt-üst etmək niyyətindədir.
Avstraliya millisinin üzvlərinin əksəriyyəti Avropa klublarında çıxış edir.
Ancaq komandanın heyətinə nəzər saldıqda, ilk diqqətçəkən adın Tim Keyhill
olduğunu görərik. Bu dəfə sizə reqbinin vətənində futbola meyl salan, uzun
illər İngiltərə Premyer Liqasında çıxış etmiş Keyhillin uğur hekayəsindən bəhs
edəcəyik.
Premyer Liqa üçün yuxusuz
qalan uşaq
Tim Keyhill 1979-cu il, dekabrın 6-da Avstraliyanın Sidney şəhərində
dünyaya göz açıb. Onun atası ingilis, anası isə samoalıdır. Tim reqbinin çox
sevildiyi ölkədə doğulmuşdu. Ancaq onun qanında futbol var idi. Ata Keyhill
daim İngiltərə Premyer Liqasının oyunlarını izləyirdi. Balaca Tim də atası ilə
birgə bu çempionatın oyunlarını yaxından təqib edirdi. Ancaq bir problem var
idi - İngiltərə ilə Avstraliya arasında olan saat fərqi. "Dumanlı Albion”da
oyunlar "sarı qitə” vaxtı ilə gecə 00:00-04:00 aralığında keçirilirdi. Bu
saatda Keyhill kimi 5-6 yaşlarında uşaqlar çoxdan yataqlarında olmalı idilər.
Lakin o, valideynlərinin bütün tənbehlərinə rəğmən, Premyer Liqa oyunlarına
baxmaqda inadkarlıq edirdi. Tim çətinliklə də olsa, atasından sevimli komandası
"Everton”un oyunlarını izləmək üçün icazə ala bilirdi. Onun sevimli futbolçusu
isə bu komandanın "vuran ayağı” Qari Lineker idi. Çox çəkmir ki "mavi ekran”
qarşısında izlədiyi futbol, Timdə bu oyunla məşğul olmaq həvəsi yaradır. Ancaq
onun dostları, qohumlarının əksəriyyəti reqbini seçmişdilər. Keyhill də müəyyən
müddət bu idman növü ilə məşğul olur. Lakin Tim reqbini sevmirdi. Anası da buna
qarşı çıxırdı. Reqbini təhlükəli hesab edən ana Keyhill, ərindən oğlunu daha
təhlükəsiz idman növünə yazdırmağı tələb edirdi. Ata Keyhill kiçik oğlu Krislə
birlikdə Timi futbola yazdırır. Beləcə, Tim Keyhillin uzunmüddətli futbolçu karyerası
başlayır.
Bankdan götürülən kreditlə
futbolun vətəninə...
Avstraliyada "Balmeyn Polis Boyz”, "Merrikvil”, "Plampton/Okhörst”
komandalarında çıxış edən Keyhill, 1995-ci ildə "Sidney Olimpik” klubuna keçir.
1997-ci ildə isə şəhərin digər klubu "Sidney Yunayted”lə anlaşır. Tim artıq 18
yaşına çatmışdı və hələ də futbolda istədiyi yerdə deyildi. O, futbol ölkəsi
olmayan Avstraliyada inkişaf etməyin mümkünsüz olduğunu bilirdi. Bunun üçün də
futbolun vətəni - İngiltərəyə yollanmaq, burdakı klublarda baxışdan keçərək,
karyerasını "dumanlı albion”da davam etdirməyi planlaşdırır. Lakin bu planı
həyata keçirmək üçün onun pulu yox idi. Valideynləri onu İngiltərəyə yollamaq
üçün 10 min dollar kredit götürürlər. Beləliklə, Tim Londona yola düşür. Lakin
onun İngiltərəyə getməsi üçün kredit götürən Keyhill ailəsinin maddi vəziyyəti
pisləşir. Valideynləri kredit borcunu ödəmək üçün dayanmadan çalışmalı olurlar.
Kiçik qardaşı ailə büdcəsinə kömək olmaq üçün məktəbdən ayrılıb, çalışmağa
başlayır. Lakin Keyhill ailəsi bundan narazı deyildi. Onların tək arzusu
oğullarını Premyer Liqada görmək idi.
"Milluol”da başlayan
uzunmüddətli macəra
Tim isə bu vaxt "Milluol”da baxışdan keçirdi. O, İngiltərəyə gələn
kimi bir otaqlı ev kirayə götürür. "Milluol”a keçmək üçün çox çalışır. Nəhayət,
klubun məşqçiləri bu avstraliyalı gəncə "yaşıl işıq” yandırırlar. Tim 1998-ci
ildə "Milluol”la müqavilə bağlayır. Müqavilə üçün aldığı 5 min funt-sterlinqi
isə evinə - ailəsinə göndərir. Düzdü, ilk illərdə onun "Milluol”dakı qazancı
çox az idi. Lakin Tim bacardığı qədər ailəsinə yardım etməyə çalışırdı. Bir
neçə il sonra isə ailəsi onun göndərdiyi pullarla ev belə almışdı.
Futbol karyerasına gəldikdə isə Keyhilldə olan həvəs onun "Milluol”da
möhkəmlənməsinə kömək olur. Lakin avstraliyalı gəncin tezliklə Premyer Liqa
klublarının diqqətini çəkmək şansı çox az idi. Çünki onun çıxış etdiyi komanda
İngiltərədə 4-cü dərəcəli çempionat olan 2-ci liqada çıxış edirdi. Komandanın
əsas üzvlərindən olan Tim, 2001-ci ildə "Milluol”un 1-ci liqaya vəsiqə qazanmasında
yaxından iştirak edir. Onun böyük klubların diqqətini çəkmək üçün əsas yolu
kuboklar idi. 2004-cü ildə Keyhillin bu cəhətdən bəxti gətirir. "Milluol” heç
kimin gözləmədiyi halda İngiltərə FA kubokunda finala kimi irəliləyir. "Şirlər”
növbə ilə "Valsall”, "Telford Yunayted”, "Bernli”, "Tranmir” və "Sanderlend”i
mübarizədən kənarlaşdıraraq həlledici görüşə vəsiqə qazanır. "Sanderlend”ə
qarşı yarımfinal görüşündə isə komandasına qələbə qazandıran yeganə qola məhz
Tim imza atır. Kardiffin "Milennium” stadionunda keçirilən finalda "Milluol”un
rəqibi İngiltərə nəhəngi "Mançester Yunayted” olur. Həmin vaxt səviyyəcə 3-cü
divizion olan 1-ci liqada çıxış edən "Milluol”un İngiltərə nəhənginə qarşı heç
bir şansı yox idi. Görüş mankunianların 3:0 hesablı qələbəsi ilə nəticələnir.
Keyhill digər görüşlərdə olduğu kimi bu dəfə də 90 dəqiqə meydanda olur.
Komandasının finalda böyük hesablı məğlubiyyətinə rəğmən, Tim Premyer Liqa
klublarının "radar”ına düşə bilmişdi.
Gerçəkləşən xəyal
Onun xidmətində maraqlı olan klub isə uşaqlıq arzusu "Everton” idi.
"İrislər” 2004-cü ildə 24 yaşlı hücumameyilli yarımmüdafiəçini heyətinə cəlb
edir. Liverpul təmsilçisi Keyhill üçün onun klubuna 1,5 milyon funt-sterlinq
ödəyir. Klubun menecerləri Timin transferini reallaşdırarkən, bəlkə də, onun
komandaya bu qədər xeyir verəcəyini düşünmürdülər. Keyhill tezliklə "Everton”un
əsas heyət üzvünə çevrilir. Tim Premyer Liqadakı ilk mövsümündə 33 oyunda şans
qazanır, 10 qol vurur. O, düz 8 mövsüm "irislər”in əsas üzvlərindən olur.
Ümumilikdə isə Keyhill sevimli klubunun formasında meydana çıxdığı 278 oyunda
68 qol vurmağı bacarır.
Amerika, Çin, Avstraliya
və.... İngiltərə
Keyhill "Everton”dakı son mövsümünə kimi komandanın əsas üzvlərindən
idi. Lakin o, getmək vaxtının çatdığını anlayırdı. 32 yaşı olan Tim, gələcəkdə
maddi təminatını sığortalamaq üçün daha çox qazanacağı çempionatları nəzərdən
keçirdi. 2012-ci ildə MLS təmsilçisi "Nyu-York Red Bulz”un dəvətinə "hə” cavabı
verdi. 3 mövsüm ABŞ təmsilçisində çıxış edən Keyhill, daha sonra milyonların
dövr etdiyi Çinə yollanaraq, burda "Şanxay Qrintaun Şenxua” və "”Hanqjou
Qrintaun” klublarında çıxış edir. O, 2016-cı ildə uzun fasilədən sonra vətəni
Avstraliyaya geri dönür, "Melburn Siti” ilə anlaşır.
Bu il Rusiyada keçiriləcək dünya çempionatında Avstraliya millisinin
heyətində yer almaq istəyən Keyhill, ölkə çempionatında çıxış etməklə, bu
istəyinə çatmağın çox çətin olduğunu başa düşürdü. O, məhz buna görə, ölkənin
əsas millisinin bir çox üzvü kimi yenidən İngiltərəyə yollanmaq fikrinə düşür.
Ancaq çətin ki hansısa ingilis klubu karyerasının qürub çağını yaşayan
futbolçuya qucaq açardı. 38 yaşlı futbolçuya bu çətin anında qucaq açan komanda
isə məhz İngiltərə macərasını başladığı "Milluol” olur. Keyhill hazırda
Çempionşipdə mübarizə aparan "şirlər”in əsas heyət üzvü olmasa da, burdakı
məşqlərlə formada qalaraq, Avstraliya millisinin DÇ-2018-dəki heyətinə düşməyi
arzulayır. Mütəmadi olaraq milliyə dəvət alan Tim, bu arzusuna yaxın görünür.
4 variant, 1 seçim -
Avstraliya
Millidən söz düşmüşkən, Keyhill İrlandiya yığmasında da çıxış edə
bilərdi. Belə ki, onun atası İngiltərədən olsa da, məhz irland əsillidir. Onun,
anasının mənsub olduğu Samoanın futbol millisində də çıxış etmək imkanı olub.
O, hətta bu ölkənin U-20 komandasının heyətində 2 oyunda da forma geyinib.
Maraqlıdır ki, o, Samoa U-20 millisində çıxış edərkən cəmisi 14 yaşında olub.
Lakin daha sonra Avstraliya gənclər yığmasından gələn təklifə "hə” cavabı
verib.
2004-cü ildə isə onun milli ilə bağlı nə az, nə çox, düz 4 (!) seçim
şansı olub - İngiltərə, Samoa, İrlandiya və Avstraliya. Tim bir qədər götür-qoy
etdikdən sonra doğma vətəni Avstraliya yığmasına üstünlük verir. O, millidə
2004-cü il martın 30-da CAR-la yoldaşlıq görüşündə debüt edir. Timin milli
karyerası uğurlu alınıb. "Kenqurular”ın heyətində keçirdiyi 105 oyunda 50 qola
imza atan Keyhill, yığmanın tarixi ərzində ən məhsuldar futbolçudur. O,
Avstraliya millisinin heyətində çıxış etdiyi 3 mundialda 5 qol vurub. 2006-cı
ildə Almaniyada keçirilən dünya çempionatında tarix yazaraq 1/8 finala adlayan
Avstraliya millisinin əsas "silahlar”ından biri məhz Keyhill idi. O, 2006-cı
illə yanaşı, DÇ-2014-də də yığmanın ən məhsuldar futbolçusu olur (hər iki
turnirdə 2 qola imza atır). Keyhill Avstraliya millisi ilə 2 titul qazanıb. O,
"kenqurular”ın heyətində 2004-cü ildə Okeaniya Millətlər Kubokunun, 2015-ci
ildə isə Asiya kubokunun qızıl medallarına sahib olub.
Ailə
Keyhill 2010-cu ildə, uşaqlıq sevgisi Rebeka Qrinhill ilə ailə həyatı
qurub. Cütlüyün 4 övladı - 3 oğlu, 1 qızı var. Tim bir çox futbolçudan fərqli
olaraq, heç vaxt ailəsi ilə gündəmə gəlməyib.
Tim karyerasına, arzularına necə çatmasına işıq salan kitab da yazıb.
Kitab "Tim Keyhill irsi” adlanır.
Portret
Onun futbola sevgisi hətta 38 yaşında da tükənmir. Tim böyük
əzmkarlıq hesabına İngiltərə xəyallarını gerçəkləşdirdi. Bu "yuxu” hələ də
davam edir. Ancaq hər bir şirin yuxunun sonu olduğu kimi, Keyhill də bu röyadan
gec-tez ayılacaq. İndi əsas olan isə bu röyaya xoş sonluqla yekun vurmaqdı.
"Oyanmaq” üçün ən yaxşı yer isə məhz Rusiyadır.
Elnur
