Köçəryandan polis binasını ələ keçirənlərə dəstək
Ermənistanda baş verən son hadisələr onu deməyə əsas verir ki,
hakimiyyət çox ciddi problemlərlə üzləşməkdədir. Bu prosesin qarşısını almaq
isə getdikcə çətinləşir. Hakimiyyət hər vəchlə bundan çıxış yollarını tapmağa
çalışsa da, istədiyinə nail ola bilmir. Xüsusən də narazıların vaxtilə
hakimiyyətdə təmsil olunan şəxslər arasından çıxması vəziyyəti gərginləşdirir.
Bu sırada eks-prezident Robert Köçəryan xüsusilə fəallaşıb.
Ermənistanın keçmiş prezidenti erməni KİV-inə geniş bir müsahibə
verib. Əvvəlcə eks-prezident bu yay Ermənistanda baş vermiş hadisələrə
münasibət bildirib. Onun fikrincə, əhalinin radikal qruplaşmanı dəstəkləməsi
insanların hakimiyyətə münasibətini, artıq xroniki hal almış siyasi, iqtisadi
və sosial problemlərin ictimai fikrə təsirini göstərir:"Bu, ölkənin
siyasi sisteminə göstərilmiş "sarı vərəqə” idi. Polis alayı binasının tutulması
faktının özü yox, cəmiyyətin bu hərəkətə reaksiyası, kütləvi dəstəyi, küçə və
sosial şəbəkələrdə bu aktı gerçəkləşdirənlərin qəhrəmanlaşdırılması narahatlıq
doğurur”. R.Köçəryan qeyd edib ki, bu halı görməzdən gəlmək olmaz və bununla
bağlı nəsə edilməlidir:"Əks halda ölkə barıt çəlləyinin üstündəymiş kimi
yaşayacaq. Radikal islahatlara ehtiyac var. İnsanlar ölkədə dəyişiklik imkanını
dövlət idarələrini tutmaqda yox, siyasi rəqabət və legitim seçkidə
görməlidirlər”.
Eks-prezident daha sonra Rusiyanın tənqidinə keçib. O, silah
satışlarının hərbi tarazlığı pozmasını"narahatlıq doğuran qanqaraldıcı
amil” sayıb. Ermənistanın keçmiş prezidenti beynəlxalq təşkilatların Qarabağla
bağlı Ermənistana sərfəli sayılmayan qətnamə və hesabatlarını, Azərbaycanın təşəbbüsü
ilə Ermənistan qıraqda qoyan yeni regional əməkdaşlıq formatını və
"Şimal-Cənub” nəqliyyat dəhlizinin yaradılmasını da belə amillər sırasında
sadalayıb. Onun sözlərinə görə, indi olub-bitənlərin geosiyasi nəticələri
uzunmüddətli perspektivdə açıq hiss ediləcək və iqtisadi, beynəlxalq və
regional məsələlərdə, eləcə də münaqişəyə dair danışıqlarda Ermənistanın
çəkisinə mənfi təsir göstərəcək: "Hökumət baş verənlərin səbəblərini
araşdırmalı, ortaya çıxan sınaqlara duruş gətirmək üçün praktik formul
tapmalıdır. Vəziyyətin nizamlanmasına yetərincə vaxtımız olmadığı da gözardı
edilməməlidir”. R.Köçəryanın fikrincə, Ermənistanın bugünkü statistikası real
iqtisadi durumu əks etdirmir və hökumət artıq ölkənin iqtisadi siyasətini
formalaşdırmır.
Keçmiş prezident indi sosial şəbəkələri insanların əhvalının və
ölkədəki ictimai-siyasi vəziyyətin ən yaxşı göstəricisi sayır. Onun sözlərinə
görə, cəmiyyətdə illərlə toplanmış neqativ əhval bu gün son dərəcə
kəskinləşib:"Bu isə investisiya fəaliyyəti, istehlakçıların əhvalı,
miqrasiya, yəni bütövlükdə iqtisadiyyata təsir etməyə bilməz”.
Ekspertlərin qənaətincə, Ermənistanın ikinci prezidenti Robert
Köçəryanın qeyd olunan bəyanatı onun böyük siyasətə qayıtması anlamına gəlir.
Məsələn, Ermənistanın müxalifyönümlü "Aykakan jamanak” qəzeti yazır ki,
R.Köçəryan bundan əvvəl hakimiyyətə yaxın media orqanlarının jurnalistləri ilə
görüşündə noyabr ayında siyasətə dönəcəyini bəyan edib.
Maraqlısı odur ki, Rusiyanın tənqid erməni mətbuatında özünə geniş
yer alıb. Məsələn, "168 JAM” qəzeti yazır ki, Ermənistanda qarşıdan gələn
parlament seçkilərinin gündəliyi formalaşdırılır və əsas məsələ də geosiyasi
seçim olacaq. "Parlament seçkilərində qalib Vladimir Putin olacaq” başlıqlı
məqalədə qeyd edilir ki, "Ermənistan bir qərara gəlməlidir – Avrasiya İqtisadi
İttifaqında qalmaq və bununla da regional proseslərdən kənarlaşmaq istəyirmi?”
Müəllifin qənaətincə, Aİİ və KTMT Ermənistan üçün alternativsiz deyil, Rusiya
isə ölkənin təhlükəsizliyinin təminatçısı rolunda çıxış etmir. Müəllif hesab
edir ki, Moskva hər vəchlə Ermənistanın geosiyasi seçimini müəyyən etməsinə
qarşı olacaq: "Ölkəyə isə onu Rusiya "çəkməsi”ndən qurtara biləcək yeni siyasi
qüvvə gərəkdir”. "Aravot”un şərhçisi isə "Avrasiya komediyası” faciəyə
çevrilməmiş ona son qoymağa çağırır: "Ermənistanın Avropa İttifaqı ilə Avrasiya
İqtisadi İttifaqı arasında körpü rolunu oynayacağı barədə xülya dağılıb, Rusiya
isə mövcud körpüləri dağıdır. Rusiya faktiki olaraq Ermənistanın müttəfiqi
deyil, Ermənistan isə onun girovudur. Hakimiyyətə Avropa inteqrasiyası adı
altında gələn qüvvələr isə öz siyasətlərinə heç bir məsuliyyət daşımırlar”.
Ən maraqlısı isə odur ki, R.Köçəryanla yanaşı, indiki baş nazir Karen
Karapetyan da ölkədəki ağır durumdan şikayətçidir. O, ötən gün etdiyi çıxışında
ölkə iqtisadiyyatında sürətli dəyişikliyi gözləməməyə çağırıb.Karapetyan
ölkə parlamentində hökumət başçısı kimi ilk dəfə qarşısına çıxıb. Müxalif
Ermənistan Xalq Konqresi fraksiyasından olan millət vəkili Lyudmila Sarkisyanın
ölkədə iqtisadi vəziyyətlə bağlı sualına K.Karapetyan xeyli susandan sonra, ah
çəkərək belə cavab verib: "Xatırladım ki, bu vəzifəyə təyin edildiyim cəmi
yarım gündür. Və mən bütün səmimiyyətimlə etiraf edirəm ki, iqtisadiyyatımız
çox ağır vəziyyətdədir”.
Azər