Karantindən sonrakı turizm...
Cəmilə Əliyeva:
"Vətəndaşlar rayonlara səyahət edəndə hotellərin hazırkı monitorinqini, təhlükəsizliyi
necə qoruduğunu mütləq nəzərdən keçirməlidirlər”
Karantin dövründən sonra hotellərin fəaliyyəti, təklif olunan xidmətlərdə yeni qiymət siyasəti, hotellərdə sanitariya və gigiyena qaydalarına riayət olunması, qonaqların qarşılanması və yerləşdirilməsi və s. kimi suallar hazırda yay mövsümündə istirahət etmək arzusu ilə yaşayan insanları düşündürməkdədir. Azərbaycan Turizm Agentlikləri Assosiasiyasının (ATAA) təşəbbüsü ilə keçirilən "Pandemiya dövründən sonra daxili turizmin inkişafı və region hotellərinin xüsusi hazırlığı” mövzusunda onlayn müzakirə bu sahədə bir sıra suallara aydınlıq gətirib.
Azərbaycan Turizm Agentlikləri Assosiasiyasının Ekspertlər Şurasının üzvü Cəmilə Əliyeva «Kaspi»yə müsahibəsində ölkə hotellərinin turizm mövsümünə hazırlığı, karantindən sonra qonaqların qəbuluna və yerləşdirilməsi və s. aktual məsələlərlə bağlı sualları cavablandırıb.
- Pandemiyadan sonra vətəndaşlara göstərilən turizm xidmətlərində yeni norma və standartlar, xüsusi yanaşmalar necə tətbiq ediləcək?
Söhbətləşdi
Təranə Məhərrəmova
Karantin dövründən sonra hotellərin fəaliyyəti, təklif olunan xidmətlərdə yeni qiymət siyasəti, hotellərdə sanitariya və gigiyena qaydalarına riayət olunması, qonaqların qarşılanması və yerləşdirilməsi və s. kimi suallar hazırda yay mövsümündə istirahət etmək arzusu ilə yaşayan insanları düşündürməkdədir. Azərbaycan Turizm Agentlikləri Assosiasiyasının (ATAA) təşəbbüsü ilə keçirilən "Pandemiya dövründən sonra daxili turizmin inkişafı və region hotellərinin xüsusi hazırlığı” mövzusunda onlayn müzakirə bu sahədə bir sıra suallara aydınlıq gətirib.
Azərbaycan Turizm Agentlikləri Assosiasiyasının Ekspertlər Şurasının üzvü Cəmilə Əliyeva «Kaspi»yə müsahibəsində ölkə hotellərinin turizm mövsümünə hazırlığı, karantindən sonra qonaqların qəbuluna və yerləşdirilməsi və s. aktual məsələlərlə bağlı sualları cavablandırıb.
- Pandemiyadan sonra vətəndaşlara göstərilən turizm xidmətlərində yeni norma və standartlar, xüsusi yanaşmalar necə tətbiq ediləcək?
- Öncə
qeyd etmək istərdim ki, Dövlət Turizm
Agentliyi və Azərbaycan Turizm Bürosu tərəfindən ölkənin turizm sənayesində
sanitariya və gigiyena qaydalarına əməl olunmasının effektivliyini təmin edərək
bizneslərin rəqabət qabiliyyətinin artırılması məqsədilə xüsusi proqram –
Sanitariya və Gigiyena Metodları və Normaları Proqramı (SAHMAN - Sanitation and
hygiene methods and norms) hazırlanıb. Bu proqramın yerləşdirmə (mehmanxana və mehmanxana tipli müəssisələr), ictimai iaşə
obyektlərində (restoran və kafelər) və eyni zamanda, turistlərə xidmət edən nəqliyyat
vasitələrində tətbiqi pandemiyadan
sonra daxili turizmə güclü təkan verəcək. Proqram
turistləri COVID-19 tipli nəfəs yolu xəstəliklərindən qorumaq üçün sənaye nümayəndələrini
qabaqlayıcı tədbirlər kimi sanitariya və gigiyena tövsiyələrinə əməl etməyə
çağıraraq, həm də gələcəkdə baş verə biləcək hər hansı bu növ xəstəliklərlə
mübarizədə uğurlu təcrübə formalaşdırmaq məqsədini daşıyır. "SAHMAN” proqramı təkcə paytaxt otellərinə deyil,
həmçinin region otellərinə tətbiq olunacaq. Qeyd
edək ki, yerli otellərimiz tamamilə ödənişsiz və könüllü olaraq SAHMAN
proqramına qoşulmaqla müvafiq dövlət orqanları tərəfindən müəyyən edilmiş
mövcud standartlara əlavə olaraq bu proqramın da tələblərinə riayət etmək öhdəliyini
qəbul edəcəklər. Proqram bir neçə mərhələdən
ibarət olacaqdır. SAHMAN proqramı onlayn
qeydiyyat, onlayn və yerində keçiriləcək təlimlərdə iştirak və
sertifikatlaşdırma, müvafiq nişanlanma ilə təmin edilmə, monitorinq və yoxlama
kimi dörd əsas mərhələ üzrə həyata keçiriləcək. Daha ətraflı məlumat yaxın günlərdə
təqdim ediləcək www.sahman.az saytında yerləşdiriləcək. Təqdirəlayiqdir ki, bir çox otellər karantin dövründə belə fəaliyyətlərini
davam etdirmiş, proqramdan əlavə sərbəst olaraq işçi kadrları üçün xüsusi təlimlər həyata
keçirmişlər. Məhdudiyyətlər aradan qaldırıldıqdan sonra regionlarımıza səyahət
edəcək vətəndaşlarımıza gözəl xəbərlərdən biri odur ki mehmanxanalar tam surətlə
xüsusi hazırlıqlara başlayıblar. Bu tədbirlər içərisində yemək məkanlarında, səhər,
günorta və axşam yeməkləri zamanı masalar arasında sosial məsafənin
qorunmasıdır. Artıq açıq bufet konsepsiyasının bütün dünyada olduğu kimi
yığışdırılacağını düşünürük. Bu baxımdan hotellərdə müxtəlif konseptdə dəyişikliklər
olacaq. Az ulduzlu butik hotellərin səhər yeməklərinin müxtəlif setlər şəklində servis olunacağı gözlənilir. Daha böyük zəncir
hotellərdə isti yeməklərin masada servis olunmasını təklif edəcəklər. Açıq
bufet menyusuna daxil olan təamların kiçik ölçülü qablaşdırmalarda, porsiya
olaraq, yəni hərənin özü üçün götürə biləcəyi şəkildə servis ediləcək. Müştəri ilə otel personalı
arasında sosial məsafənin saxlanılması təmin olunacaq. Qonaqlar qeydiyyatdan
çıxdıqdan sonra digər gələnlərin əvvəlki kimi iki saat ərzində dərhal otağa
daxil olmasına icazə verilməyəcək. Ən azı 12 saat ərzində otağın
havalandırılması, sanitariya və gigiyena baxımından təmizlənməsi şərtdir. Yalnız bu müddət başa
çatdıqdan sonra nömrə təmizlənib yeni müştərilərin istifadəsinə veriləcək. Bundan başqa, qeydiyyat masasında (resepşn) maska və
əlcəklərdən istifadə olunması, nağd pulla alış-verişin minimuma endirilməsi,
restoranlara, ictimai-iaşə obyektlərinə girişdə hərarət ölçü cihazların
qoyulması artıq günümüzün reallığıdır. Bu, bütün dünya ölkələrində standartlara
daxildir. Biz də turizm sənayesinin nümayəndələri olaraq bütün normalara əməl
etməliyik ki, vətəndaşlarımız sıxıcı karantin dövründən sonra ölkəmizin mənzərəli
guşələrinə gedib mehmanxana komplekslərində qaldıqda sağlıqlı şəkildə istirahətlərini
davam etdirsinlər. Biz karantin dövrünü Operativ Qərargahın qəbul etdiyi qərarlara
uyğun olaraq keçiririk. Bundan sonra da təhlükəsizliyimizi qorumalıyıq.
- Ölkənin ulduzundan asılı olmayaraq
bütün mehmanxana şəbəkəsində karantin dövrünün bu cür sanitar gigiyena
normaları ilə bağlı təlimlər keçirilibmi?
-
"SAHMAN” proqramına qoşulmaq üçün artıq otellərə müəyyən məlumatlar,
press-relizlər göndərilib və onlayn qeydiyyat başlanıb. Daha öncə qeyd etdiyim
kimi, proqramın təlimatlarına uyğun olaraq, artıq otellərdə hazırlıqlar başlanıb.
Vətəndaşlar öz növbəsində turist kimi önümüzdəki aylarda - gediş-gəlişlə bağlı
məhdudiyyətlər götürüldükdən sonra,
rayonlara səyahət edəndə və ya otellərdə qalmaq fürsətini nəzərdən keçirəndə
qiymətdən də önəmli olan hotellərin hazırkı monitorinqini, təhlükəsizlik siyasətini
nə qədər qoruduğunu mütləq nəzərdən keçirməlidirlər. Hesab edirəm ki, hazırkı
prioritet bu olmalıdır.
- Müzakirələrdə yay mövsümündə hotellərin
müştərilərə müxtəlif endirimli paketlər və kampaniyalar təklif ediləcəyi də səslənib.
Təbii ki, bu, müştərilər üçün cəlbedici məqamdır...
- Unutmayaq ki, hazırda turizm sənayesi böyük
böhranla üz-üzədir. Hotellərin hər hansı büdcəyə ehtiyacı var. Ölkə əhalisinin
də hazırkı maliyyə durumunu nəzərə alsaq, hər iki tərəf bir-birinə qarşı
anlayışlı addım atmalıdır. Təbii ki, hotelləri mövcud maliyyə problemlərini,
karantin dövrünü nəzərə alıb maksimal şəkildə endirim etməyə çağırmışıq. Onlar
da bu çağırışa müsbət reaksiya veriblər. Bəli, müxtəlif kampaniyalar gözlənilir.
Sadəcə, bir az səbrli olub karantin dövrünü adlamaq lazımdır. Bundan sonra hər
şey bəlli olacaq. Bilirsiniz ki, bu gün dünya turizminin gündəmi çox dəyişkəndir.
Biz hansısa analizi verəndə, sabahı başqa bir xəbər eşidirik. Proqnozlarımız
demək olar ki, öz əhəmiyyət keyfiyyətini itirir.
- Bəs hotellərin qiymət siyasəti barədə
müzakirələr nə yerdədir?
- Təbii
ki, keçən mövsümlərə nisbətdə gözləntilər otel qonaqlama qiymətlərinin daha
aşağı olmasıdır. Aşkar görürük ki, bir çox otellərimiz pandemiya dövrünün çətinliyini nəzərə alaraq artıq endirim kampaniyalarına
start vermişlər. Güzəştli qiymət siyasəti və ya endirim kampaniyası ilə əlaqədar
ATAA-nın, yerli otel nümayəndələrinə verə biləcəyi təkliflər yalnız məsləhət
xarakterli ola bilər. Lakin məlumdur ki, mehmanxanaların, xüsusilə də böyük
brend nümayəndəlikərinin qiymət siyasəti bir sıra prinsiplərə dayanır.Eyni
zamanda otel sahiblərinin və sahibkarların maraqları da müdafiə olunmalıdır.
- Hazırda ölkə otelləri yerli turistlər
tərəfindən rezervasiya olunubmu?
- Təbii ki, müraciətlər var: yerli vətəndaşlarımız
zəng edir, maraqlanır, hansı otellərin təhlükəsizlik baxımından məsləhətli
olması ilə bağlı suallar verirlər. Biz də təbii ki, turizm agentliyi olaraq məsləhətlərimizi
veririk. Bilirsiniz ki, ölkə əhalisi bu il səyahət əyləncəsi baxımından sıxıntı
keçirib. Novruz Bayramını istədiyimiz şəkildə, bütün koloriti ilə qeyd edə bilmədik.
Bundan əlavə, həftə sonları ən uzaq rayonlara səfərə çıxmağı xoşlayırıq. Ancaq
hazırkı dönəmdə biz bu gəzintilərdən də məhrum olmuşuq. Bu sıxıntıları da nəzərə
alaraq vətəndaşlarımız yenidən vətən təbiətinin gözəllik və mənzərələrindən
yenidən zövq almaq üçün səbirsizlənirlər. Bir sözlə, hamımızın ən qısa zamanda
dekorasiya dəyişikliyinə ehtiyacı var.
- Dəniz mövsümü də yaxınlaşır. Dənizə
yaxın hotellərlə bağlı müraciətlərə cavablarınız necədir?
- Ümumiyyətlə, su hövzələrinin istifadəyə
verilməsi, çimərliklərə giriş-çıxış şərtləri hələ ki, ölkə turizminin gündəminə
çıxarılmayıb. Dənizkənarı istirahət mərkəzlərinə, məhdudiyyətləri pozmamaq şərtilə
girişlərin icazəli olduğu məlumatı yayılıb. Bundan başqa, Operativ Qərargahdan
bununla bağlı heç bir məlumat almamışıq və bu istiqamətdə xəbərləri gözləyirik.
- Bütün hallarda bu turizm mövsümünün də
insanlar üçün əlçatan olacağına ümidlər varmı?
- Təbii
ki, var... Nəzərə alsaq ki, hazırda turizm sənayesi iflic olmuş vəziyyətdə və
iqtisadi proqnozlara görə mənfi 95 faiz ziyan içindədir, onda ölkədə turizm sənayesinin
qollarını xilas etmək üçün daxili turizmə təkan vermək fürsətini dəyərləndirmək
lazımdır. Bu, bütün dünyanın gündəmindədir. Məsələn, qardaş ölkə Türkiyədə iyun
ayı tamamilə daxili turizmə həsr edilmiş elan olundu. Belə ki, öncə hotellərdə
öz vətəndaşlarını yerləşdirməyi düşünürlər. İyul ayında isə artıq sərhədlərini
digər ölkələrdən gələn qonaqlara da açacaqlar. Dünyanın sevilən turistik
istiqamətlərində hazırda bu ssenari aktivdir. Bunun üçün də ilk növbədə yerli vətəndaşın
maliyyə durumunu nəzərə almağı düşünürük. Bu, çox vacib məqamdır.
- Onda belə çıxır ki, iyun ayında
daxili, növbəti ayda isə xarici ölkə turistləri üçün ölkəmizdə turizmin fəaliyyəti
gözlənilir?
- Bu
proqnozu vermək çətindir. Beynəlxalq hava reyslərinin yenidən aktivləşdirilməsi,
hava limanının fəaliyyətinin yenidən bərpa olunması proqnozları haqqında hər
hansı bir dəqiq məlumat vermək doğru olmazdı. İyun ayında
karantinin yumşaldılması yenə də baş verəcəkmi? Rayonlara gediş-gəlişə qoyulan
məhdudiyyət aradan qaldırılacaqmı? Bu suallara cavab vermək çətindir. İlkin
prioritet bütün hallarda turizm sənayesini ayaqda saxlamaq üçün daxili turizmin
inkişafıdır. Yəni daxili turizm başlayacaq, mehmanxana kompleksləri,
ictimai-iaşə obyektləri hamısı vətəndaşlara öz xidmətlərini təklif edəcək.
Ümidvarıq ki, endirimli qiymətlərlə xidmətlər olacaq. Bu, hazırda prioritet
plandır. Bu planın startının nə zaman veriləcəyi haqda proqnoz verməyə həqiqətən
çətinlik çəkirik. Çünki yoluxma statistikası üzrə ölkənin gündəmi hər gün dəyişir.
Söhbətləşdi
Təranə Məhərrəmova