Kamerunlu atanın, əlcəzairli ananın fransız oğlu - Portret
Fransa millisi demək olar, bütün böyük yarışların favoritləri
sırasında olur. Heyətində həmişə bir çox ulduz futbolçu yer alan "xoruzlar”,
bir qayda olaraq mundiallarda çempionluq üçün mübarizə aparır. Lakin maraqlıdır
ki, bu sevinc "üçrənglilər”ə cəmi bir dəfə qismət olub. Fransızlar 1998-ci
ildə, vətəndə keçirilən mundialda ilk və hələ ki, sonuncu dəfə dünya kubokunu
başı üzərinə qaldırıb. Həmin vaxt Fransa millisinin heyətində kimlər yox idi
ki? Fabian Bartez, Didye Deşam, Lilian Türam, Loran Blan, Tyerri Anri, Zinəddin
Zidan...
DÇ-1998-dən sonrakı mundiallarda da Fransa millisi ulduzlardan kasad
olmayıb. Ancaq sonra gələn nəsil hələ ki, Zidan və dostlarının qəhrəmanlığını
təkrarlaya bilməyib. Son bir neçə ildə Mişel Platininin vətənində bir çox
istedadlar ortaya çıxıb. Məhz bu bu gənclər fransalı futbol azarkeşlərində
millinin 20 illik həsrətə son qoyacağına inam yaradır. Vətəndə keçirilən son
Avropa çempionatında finala kimi irəliləyən "üçrənglilər”, burda Portuqaliyaya
uduzsalar da, sərgilədikləri oyunla fanatlarının bu inamının heç də əbəs
olmadığını göstərdilər. Lakin Avropa çempionatında Fransa millisində yer
almayan bir futbolçu var ki, o, məhz qitə birinciliyindən sonra parladı. SöhbətPSJ-nin gənc ulduzu Kilian Mbappedən gedir. Bu yazıda sizə çox gənc yaşda bir
çox klubun diqqət mərkəzinə düşən, gələcəkdə Messinin, Ronaldonun taxtına oturacağı
deyilən Mbappenin qısa karyerası ərzində böyük yüksəlişindən bəhs edəcəyik.
Fransa millisinin tarixi
uğurundan bir neçə ay sonra...
Kilian Mbappe 1998-ci il dekabrın 20-də, Fransanın paytaxtı Parisdə
dünyaya gəlib. Mbappe dünyaya göz açanda, Fransa millisinin dünya çempionu
olmasından cəmi 5 aydan bir qədər artıq müddət keçirdi. Kilianın futbolla,
ümumiyyətlə, idmanla məşğul olması heç də təsadüf olmayıb. Belə ki, onun atası
Vilfrid Mbappe keçmiş futbolçu idi. Kamerun əsilli olan Vilfrid sonradan Fransaya
gəlmiş və burda məşqçi kimi çalışmağa başlamışdı. Fransada daimi qalmaq üçün
isə ona vətəndaşlıq lazım idi. Məhz buna görə, o, Əlcəzair əsilli fransalı
xanım Fayza ilə ailə həyatı qurur. Kilianın idmançı genlərini kimdən aldığı ilə
bağlı danışarkən, onun anası Fayzanı da unutmamaq lazımdı. Belə ki, xanım
Mbappe vaxtilə həndbolçu olub. Keçmiş futbolçu və həndbolçunun övladının
idmandan kənarda qalmaq şansı demək olar, yox idi. Belə də olur. Mbappe hələ
çox kiçik yaşlarından futbola meyl salır. Onun ilk məşqçisi isə təbii ki, ata
Mbappe olur. 6 yaşına kimi evdə, atasının rəhbərliyi altında futbolun sirlərinə
yiyələnən kiçik Kilian, 2004-cü ildə atasının məşqçi kimi çalışdığı "Bondi”
komandasına yazılır. O, hələ çox kiçik yaşlarından komanda yoldaşlarından
kəskin fərqlənir. Artıq 6 yaşında ona gələcəyin ulduzu kimi baxırlar.
Gecə-gündüz top qovmaqdan yorulmayan Kilian, atası ilə birlikdə futbol
matçlarını izləməyi də unutmurdu. Məhz bu təcrübə gün keçdikcə onun gücünə güc
qatır, top oyunu üzrə bir az da inkişaf etdirirdi. Oğlunun istedadına bələd
olan Vilfrid onun inkişafı üçün əlindən gələni edirdi. "Bondi”də top qovduğu
zaman Mbappe paralel olaraq, "Klerfonten” futbol akademiyasına da gedirdi.
Hansı ki, bu akademiya Fransada çox məşhurdur. Nikola Anelka, Tyerri Anri, Lui
Saha, Hatem Ben Arfa, Blez Matyuidi kimi futbolçular vaxtilə məhz bu
akademiyada təcrübə keçiblər.
Tyerri Anrini geridə qoyan
istedad
15 yaşında isə istedadlı futbolçu "Monako”nun aşağı yaş qrupuna
qoşulur. Mbappe qısa müddətdə "knyazlıq klubu”nun əsas komandasına qədər
yüksəlir. 2015-ci il, dekabrın 2-də Liqa 1-in "Kan”la evdə keçirilən
qarşılaşmada çempionatda ilk oyununa çıxır. O, 1:1 hesablı bərabərliklə
nəticələnən qarşılaşmanın 88-ci dəqiqəsində Fabio Koentraonu əvəz edir. Mbappe
16 yaş 347 günlüyündə meydana çıxaraq, "Monako”nun çempionatda ən gənc
futbolçusu ünvanına yiyələnir və əfsanəvi hücumçu Tyerri Anrinin 21 illik
rekordunu qırır. 2016-cı il fevralın 20-də isə "Trua” ilə ev matçında (3:1) qol
hesabını açır. Cəmi bir neçə gün sonra "Monako” rəhbərliyi gənc istedadla
müqavilə bağlayır. Bu, Mbappenin peşəkar futbolçu kimi ilk müqaviləsi olur.
Kilian "Monako” ilə 2019-cu ilin yayına kimi nəzərdə tutulmuş müqavilə
bağlayır.
2016/17 mövsümü isə gənc futbolçu üçün daha uğurlu keçir. O, məhz bu
mövsümdə "knyazlıq klubu”nun əsas heyət üzvünə çevrilir. Çempionatda keçirdiyi
29 oyunda 15 qola imza atan Mbappe, avrokuboklarda da şans qazandığı 9 oyunda 6
dəfə rəqibin qapı torunu titrədir.
180 milyon avroya...
Qısa müddətdə Avropada öz adını tanıtdırmağa nail olan gənc istedad,
köhnə qitənin nəhəng klublarının diqqət mərkəzinə düşür. Xüsusilə, ötən ilin
yayında Kilianın adı gündə bir böyük klubla yanaşı çəkilir, onun transferi üçün
fantastik rəqəmlər deyilirdi. Gözlənildiyi kimi, Mbappe 2017/18 mövsümündən
yeni komandanın üzvünə çevrilir. Transfer məsələsində pula xəsislik etməyən PSJ,
18 yaşlı ulduzu heyətinə cəlb edir. Ancaq UEFA-nın Maliyyə feyr-pley
qaydalarından qorxan parislilər, Mbappeni birbaşa transfer etmir. Paris klubu
gənc futbolçunu bir illik icarəyə götürür. Müqaviləyə əsasən, PSJ cari mövsümün
sonunda 180 milyon avro (!) ödəyərək, Kilianın transfer hüququna tam
yiyələnəcək.
PSJ-nin "Donatello”su
Kilian hələ PSJ-nin tamhüquqlu üzvü olmasa da, artıq bu komandaya
isinişib. O, cari mövsümdə şans qazandığı 30 görüşdə 15 qola imza atıb. PSJ-nin
ən gənc üzvlərindən olan Mbappe, komandada hamının sevimlisi sayılır. Komanda
yoldaşları onunla zarafatlarından da qalmırlar. Çox götür-qoy etdikdən sonra
ona ləqəb də tapıblar - Donatello. Yox, söhbət heç də məşhur italyan heykəltəraşdan
getmir. Mbappenin komanda yoldaşları onu məşhur "Ninja tısbağalar” cizgi
filminin xarakterlərindən olan "Donatello” obrazına bənzədirlər. Hətta bir dəfə
paltardəyişmə otağında Kiliana hədiyyə kimi məhz bu personajın maskasını
verirlər.
Ailə
Yuxarıda onun valideynləri - atası Vilfrid və anası Fayza barədə
məlumat verdik. Kilianın bir qardaşı da var. Ethan ondan 7 yaş kiçikdir.
Əslində, Kilian qardaşı ilə birgə də yaşıl meydana ayaq basıb. Belə ki,
futbolçularla birgə meydana çıxan uşaqların arasında yer almaq istəyən Ethan,
buna görə evdə qardaşına daim təzyiq edirdi. Sonda kiçik qardaşının istəyinə
davam gətirməyən futbolçu, "Monako”nun oyunlarından birində onun da meydana
çıxmasına icazə alır. Meydana çıxarkən Ethanın əlindən isə məhz Kilian özü
tutur. Qardaşından söz düşmüşkən, Mbappenin məşhur qol sevinci məhz qardaşı ilə
bağlıdır. Belə ki, hər dəfə qol vuranda qollarını sinəsində çarpaz birləşdirən
Kilian, bu hərəkəti məhz kiçik qardaşından götürüb. Özünün sözlərinə görə,
Ethan "pleysteyşn”da hər dəfə onu məğlub edəndə, məhz bu hərəkəti edir.
Kilian Mbappenin bir də mənəvi qardaşı var. Belə ki, Vilfrid Mbappe
dostunun oğlunu - Jires Kembo Ekokonu hələ kiçik yaşlarından yanında saxlayıb.
Jires Kiliandan 10 yaş böyükdür. O, Mbappeyə həmişə böyük qardaş, həmçinin,
onun futbolda ilk kumiri olub. Kembo Ekoko hazırda da futbolla məşğul olur. 30
yaşlı hücumçu Türkiyə Super Liqa təmsilçisi "Bursaspor”da top qovur.
Hollandiya ilə oyunda siftə
Mbappe Fransa millisinin aşağı yaş qruplarında çıxış edib. Kilian
2016-cı ildə Fransa U-19 millisinin heyətində Avropa çempionu da olub. Onun
əsas yığmada debütü isə ötən ilə təsadüf edib. Mbappe martın 25-də, DÇ-2018-in
seçmə mərhələsi çərçivəsində baş tutmuş Lüksemburqla səfər oyununun (3:1) 78-ci
dəqiqəsində Dmitri Payetin yerinə meydana daxil olub. Gənc istedad DÇ-2018-in
seçmə mərhələsi çərçivəsində, avqustun 31-də keçirilmiş Hollandiya ilə ev
oyununda (4:0) isə millidə ilk qolunu vurub.
Oyun tərzi
Mbappenin boyu 1.78 m-dir. Futbolçunun işlək ayağı sağdır. Hücumun
sivri ucunda və ya yarımmüdafiənin sol cinahında da oynaya bilən Mbappenin
doğma mövqeyi sağ cinah vingeridir. Yeni-yeni parlamağa başlayanda, onu oyun
tərzinə və xarici görünüşünə görə Tyerri Anriyə bənzədirdilər. Uzun müddət
"Arsenal”da Anri ilə birgə çalışmış Asen Venger, Mbappeni məhz vaxtilə
yetirməsi olan futbolçu ilə müqayisə etmişdi. Maraqlıdır ki, Anri də vaxtilə
"Monako”da top qovub. Onun bu klubla bağlı olan rekordlarını isə Mbappe
qırıb.
Kilianın özünün pərəstiş etdiyi futbolçu isə "Real”ın hücumçusu
Kriştiano Ronaldodur. Mbappe hələ çox kiçik yaşlarında, "kral klubu”nun
düşərgəsində olduğu zaman portuqaliyalı ulduzla görüşüb, şəkil də çəkdirib.
Portret
Mbappenin əsas xüsusiyyəti onun çox sürətlə inkişaf etməsidir. Cəmi
bir neçə il öncə dünya futbolunun ulduzları ilə şəkil çəkdirən uşaq, bu gün
onların yaşıl meydanlardakı əsas rəqibinə çevrilib. Bu gedişlə, onun "Qızıl
top” uğrunda mübarizəyə qoşulacağı gün də uzaqda deyil. Hələliksə o, Fransa
millisinin bu il Rusiyada baş tutacaq dünya çempionatında əsas "silah”larından
olacaq.
Elnur