Kafe müdiri rolunda niyə məhz “Tofiq Bəhramov” adı...
Rusiya Federasiyasının "StarMedia” internet kanalında "Qrin-Film”
Yaradıcılıq Birliyinin istehsalı olan "Kulinar 2” serialı nümayiş olunur.
Serialın rejissoru Andrey İvanov, ssenari müəllifləri Sergey Kuzminıx, İqor
Ter-Karapetov, Mixail Kolodinski, Vladimir Kukovyakin, və Robert Rovnikdir.
Serialın təxmini mövzusu belədir ki, Feliks Malinin Sankt-Peterburqda
yaşayır. Azsaylı dost və tanışları arasında o, yaxşı adam, daim rəsmi iş
səfərlərində olan qapalı biri kimi tanınır. Üstəlik, onun qeyri-adi bir vərdişi
var: o, yemək bişirməyi çox sevir və bunu həqiqətən də yaxşı bacarır. Əslində,
Feliks Daxili İşlər Nazirliyinin əməliyyat-axtarış bürosunda xidmət göstərir.
Xidmət rəhbərliyindən yalnız bir neçə nəfərin onun haqqında bilgisi var. Hər
tapşırığa xüsusi bir zövqlə yanaşır, sanki növbəti yeməyini bişirir və hətta
hər bir əməliyyata kulinariyaya aid bir ad qoyur. Elə buna görə ona "Kulinar”
operativ təxəllüsü verilir. Onun işi – operativ şəkildə daxilə sızaraq,
hüquq-mühafizə orqanlarını maraqlandıra biləcək hər şey haqqında məlumatların
toplanmasıdır. Cəsurdur, analitik zehnə malikdir, ağıllıdır və tez bir zamanda
istənilən ətraf mühitə uyğunlaşa bilir. Bəzən, işində qeyri-qanuni üsullara da
əl atmalı olur və rəhbərlik, nəticə əgər müsbətdirsə, buna göz yumur. Və
beləcə... davam edir...
Zamanın darmacal vaxtında heç kimin bütün kanalları, kanallarda
nümayiş olunan filmlərin hamısını seyr eləmək imkanı yoxdur. Böyük qardaşım
Vaqifin bu serial haqqında dediklərindən, bir vətəndaş olaraq narahatlığından
sonra bir neçə seriyasını izləməli oldum. İnsafən, pis də çəkilməyib. Amma
indiki halda Rusiya istehsalı olan "Kulinar 2” serialının necə çəkilməsi, əhatə
etdiyi mövzular bir tamaşaçı olaraq məni az maraqlandırır. Mən sadəcə olaraq bu
Vətəni, bu milləti sevən bir insan kimi narahat edən serailada azərbaycanlı
obrazının – kafe müdirinin niyə "Tofiq Bəhramov” adlandırılmasıdır. Bu, bir
təsadüfdürmü, və ya burda hansısa başqa gizlinlər var...
Kriminal aləmin bəzi məqamlarının gizləndiyi kafenin müdiri Tofiq
Bəhramov adlı azərbaycanlı obrazını Leonid Alimov canlandırır. Niyə məhz Tofiq
Bəhramov? Tofiq Bəhramovun dünya şöhrətli azərbaycanlı futbol hakimi olduğunu
kim bilmir ki...
Tofiq Bəhramov DÇ-1966-cı ilin finalında İngiltərə-Almaniya
qarşılaşmasında verdiyi ədalətli qərarı ilə futbol tarixində unudulmaz iz
qoyub. İngiltərə yığmasının futbolçusu Cefri Herstin mübahisəli qolunu qeydə
alan Tofiq Bəhramovun qərarının doğru olduğunu sonradan bütün dünya bildi.
Həmin ərəfədə "Qızıl fit”lə yalnız baş hakimlər təltif olunurdu.
Tofiq Bəhramov isə bu qarşılaşmada laynsman funksiyasını yerinə
yetirsə də, Britaniya kraliçası "Qızıl fit”i və "Qızıl ilahə”nin kiçik modelini
həmyerlimizə təqdim etmişdi.
Həmin qərar hələ də müzakirə edilir. Texnologiya inkişaf etdikcə, bu
qol da zaman-zaman yada düşür və hər dəfə də əksər mütəxəssislər Bəhramovun
haqlı olduğunu qeyd edirlər. Amma əfsanəvi hakimin qərarına "mız” qoyanlar da
tapılır. SSRİ dağıldıqdan sonra rusiyalı mütəxəssislərin də arasında belələri
tapıldı. Dünənə qədər "sovet hakimi”nin verdiyi qərardan qürur duyanlar, onu
ədalətli hesab edənlər Tofiq Bəhramovun dünyada azərbaycanlı, müstəqil Azərbaycanın
vətəndaşı kimi tanınmasını həzm edə bilmirdilər. Elə ona görə də, fürsət
tapdıqca, əfsanəvi hakimi aşağılamağa çalışırlar.
Müəmmadır: hər şeydən əvvəl və sonra
"kafe müdirinin niyə məhz Tofiq Bəhramov adlandırılması” sualı... Başqa
ad tapmadılarmı? Filmin ssenari müəlliflərindən birinin Ter-Karapetov olması
rusların da "bəşarət gözü”nü bağlayıbmı? Düşünməyə dəyər...
Vasif SÜLEYMAN