İvanişvili-“Rustavi-2” qarşıdurması güclənir
Gürcüstanda əsas müxalifət kanalı olan"Rustavi-2” ilə bağlı qalmaqal güclənir. Hökumətin
mediaya, azad sözə təzyiq göstərdiyini iddia edən kanal buna etiraz olaraq
fevralın 18-də fəaliyyətini dayandırıb. Bazar günü isə minlərlə Tbilisi sakini
kanala dəstək məqsədi ilə parlamentin önündə aksiya keçirib. Bəzi media
orqanları etiraza 10 minə yaxın şəxsin qatıldığını deyir.
"Hökumətin mətbuat azadlığını məhdudlaşdırmasına imkan verməyəcəyik”.
Kanalın xəbər proqramının aparıcısı Diana Jojua aksiyaçılar qarşısında
çıxışında deyib: "Biz birlikdə "Rustavi-2” kanalını, Gürcüstanda söz azadlığını
qoruyacağıq”.
Telekanalın direktor müavini Z.Udumaşvili isə "Biz bu gün bir olmalı,
hökumətə bu ölkənin söz azadlığına toxuna bilməyəcəyini söyləməliyik”, - deyib.
Bu məsələdə də prezident hökumətə müxalifətdədir. Gürcüstan prezidentiGeorgi
Marqvelaşvilinin sözçüləri dəfələrlə bəyan edib ki, prezident bütün media
orqanlarına və xüsusən də tez-tez basqıya məruz qalan"Rustavi -
2”kanalına tam dəstəyini ifadə edib. Hakim "Gürcü arzusu” Partiyası ilə
yola getməyən Georgi Marqvelaşvili bütün media orqanlarına, özəlliklə də
tez-tez basqıya məruz qalan "Rustavi-2”
kanalına dayaq duracağına söz verib.
"Rustavi-2”kanalının rəhbərliyi iddia edir ki, hökumət iş
adamlarından birinin əli ilə bu kanala nəzarətə ələ keçirmək istəyir. Kanal
rəhbərliyinin fikrincə, rəsmilər iş adamı Kibar Kalvaşinin əliylə kanala
nəzarəti ələ keçirməyi qarşıya məqsəd qoyub. 54 yaşlı milyonçu K.Kalvaşi
əvvəllər kanal səhmlərinin böyük hissəsinə sahibmiş, amma təxminən 10 il öncə –
M.Saakaşvili administrasiyası dövründə səhmlərə nəzarət paketini satıb. İndi o,
səhmlərini satmağa məcbur edildiyini deyir və onları məhkəmə yolu ilə geri
almağa çalışır. Sənədlərə görə o, "Rustavi-2” üçün 200 min dollar ödəyib. Sonra isə TV
üçün 7 milyon ABŞ dolları ödənməsi barədə iddia qaldırıb. Qeyd edək ki, hazırda
TV-nin səhmlərinin 90 faizinin sahibləri sabiq prezident Saakaşviliyə yaxınlığı
ilə bilinən Karamanişvili qardaşlarıdır.
"Azad Zona” QHT-nin idarə heyətinin sədri Gela Vasadze deyir ki,
hakimiyyət ölkədəki müstəqil medianı neytrallaşdırmağı qarşısına məqsəd qoyub. G.Vasadze
hesab edir ki, bu, siyasi qərardır: "O, hakimiyyətin sifarişini yerinə
yetirir”. Yerli məhkəmələr 2015-ci və 2016-cı illərdə keçirilən toplantılarda
iş adamının xeyrinə qərar çıxarıblar. Bu günlərdə isə Gürcüstan Ali
Məhkəməsinin məsələylə bağlı son qərarı verəcəyi gözlənir. Kanal rəhbərliyi
K.Kalvaşinin yuxarılarla əlaqəli olduğunu, buna görə məsələni öz xeyrinə həll
edə bildiyini deyir. Gürcüstanın insan haqları təşkilatları da məhkəmələrin
telekanal haqda qərarlarına etiraz edib, yaydıqları bəyanatda bu qərarların
mətbuat azadlığına zərbə vurduğunu bildiriblər.
Öz növbəsində Gürcüstan rəsmiləri ittihamları rədd edir, kanala
nəzarəti ələ keçirmək niyyətində olmadıqlarını bildirirlər. Bu arada ABŞ Dövlət
Departamenti və Avropa İttifaqı da hadisə ilə bağlı bəyanat veriblər. Onlar
"Rustavi 2”-yə qarşı təzyiqlərin azad sözə zərbə olduğunu bildiriblər.
Xatırladaq ki, "Rustavi-2”
kanalının rəhbərliyi bir neçə dəfə, "qaranlıq” müqavilələr əsasında
dəyişdirilib. 2014-cü ildə kanalın yaradıcısı Erosi Kitsmarişvili maşınında ölü
halda tapılıb, polisin dediyinə görə, onu başından güllə ilə vurublarmış.
Hadisədən bir az əvvəl E.Kitsmarişvili hökumətin telekanala nəzarəti ələ
keçirməyə, özününsə buna əngəl olmağa çalışdığını deyibmiş. 2012-ci ildə
Gürcüstanda hakimiyyət dəyişikliyindən sonra "Rustavi-2” telekanalı qatı müxalifət
kursu götürüb və seçkilərdə məğlub olan "Vahid Milli Hərəkat”ı dəstəkləyib. Onu
da qeyd edək ki, "Rustavi-2”
telekanalı 2003-cü il "qızılgül inqilabı”nda əhəmiyyətli rol oynayıb və Mixail
Saakaşviliyə güclü dəstək göstərib. Lakin indi vəziyyət fərqlidir. Keçmiş
hakimiyyət, hazırda müxalifətdə olan "Vahid Mili Hərəkat” elə də ciddi
populyarlığa malik olmasa da, son aksiyada əhalinin telekanala böyük dəstəyi
hökuməti özündən çıxarıb.
Azər NURİYEV