İstanbul toplantısı neftin qiymətinə müsbət təsir göstərəcək
Neft İxrac edən Ölkələr Təşkilatına (OPEC) üzv
ölkələr Vyana sammitində neft hasilatını daha əvvəl nəzərdə tutulan gündəlik
0,7 milyon bareldən daha çox azalda
bilər. "Reuters.com” xəbər verir ki, bu barədə Əlcəzairin enerji naziri
Nurəddin Buterfe məlumat verib. O bildirib ki, OPEC Vyana yığıncağında bazarı
qiymətləndirəcək. Əgər hasilatın nəzərdə tutulan 0,7 milyon barel azaldılması
kifayət etməsə, bu həcm artırılacaq.
Qeyd edək ki, sentyabrın 28-də Əlcəzairdə OPEC-ə
üzv olan ölkələrin nümayəndələrinin qeyri-rəsmi görüşündə gündəlik hasilatın
32,5 milyon barel səviyyəsinədək saxlanılmasına dair razılıq əldə olunub.
Görüşdə neft hasilatının 6 aydan 1 ilədək "dondurulması” müzakirə edilib. Bu
həftə isə OPEC üzvləri və
təşkilata üzv olmayan bir sıra neft hasil edən ölkələr İstanbulda keçiriləcək
olan energetika forumunda yenidən toplanaraq hər bir ölkənin yeni kvotasının
müəyyən edilməsi ilə bağlı müzakirələr aparacaq. "Report"un
"Vesti" agentliyinə istinadən verdiyixəbərə
görə,Əlcəzairin energetika naziri Nurəddin Buterfa qeyd edib ki,
görüşün oktyabrın13-dəkkeçirilməsi gözlənilir. Bu ilnoyabrın
30-daVyana şəhərində keçiriləcək OPEC-in rəsmi sammitinə qədər təşkilata
üzv olan və digər neft hasil edən ölkələrin hasilat kvotalarının
müəyyənləşdirilməsi planlaşdırılıb. Məhz gələn həftə İstanbulda keçiriləcək
görüşün səbəbi bununla bağlıdır. Bəs görəsən bu proseslərin fonunda neftin
qiymətinin taleyi necə olacaq. Vyana görüşü nələri vəd edir? Qiymətlərin
qalxması tendensiyası davam edəcəkmi?
İqtisadçı-ekspert
Pərviz
Heydərov deyir ki, qiymətlərin qalxması tendensiyası davamlı olmaya bilər: "Neftin
1 barelinin dünya bazarlarında qiyməti artıq 53 ABŞ dolları həddindədir. Bu,
son 1 ildən çox bir vaxt ərzində ilk ən yüksək səviyyədir. Səbəb isə bəllidir.
Belə ki, son 2 il ərzində OPEC ölkələri və o cümlədən ona üzv olmayan digər
hasilatçı ölkələr deyəsən, nəhayət ki, ortaq bir razılığa gəlirlər. Söhbət
hasilatın azaldılacağından gedir. Ancaq, bu elə bir məsələdir ki, hər bir
hasilatçı tərəf, yəni ölkə üçün dəqiq və müvafiq yanaşma tələb edir. Belə ki,
bütün neft ölkələrinin hamısı eyni həcmdə hasilatla məşğul olmur. Odur ki, bu
və ya digər həcmdə azaldılma və yaxud dondurulma bir ölkəyə sərf edə bilər,
digərinə isə yox. Ona görə də bu kimi məsələlər hələ həllini tapmalıdır. Bu
baxımdan, qiymətlər qalxsa da, bunun davamlı olub-olmayacağını heç kim deyə
bilməz”.
İqtisadçının fikrincə, qiymətlərin bahalaşması üçün
təkcə hasilatın dayandırılması kifayət etmir: "Bununla belə, bir şeyi tam
dəqiqliyi ilə söyləmək mümkündür ki, qiymətlər 40 ABŞ dollarından aşağı düşəcək
istiqamətdə inkişaf edən deyil. Çünki bu heç bir ölkəyə - nə şist hasilatı ilə
məşğul olan ABŞ-a, nə də dünyada ən ucuz neft hasilatı ilə məşğul olan Səudiyyə
Ərəbistanına sərf edir. O ki qaldı artıma, davamlı bahalaşma üçün təkcə
hasilatın azaldılması və ya dondurulması yetərli deyil. Eyni zamanda, tələb də
genişlənməlidir. Tələbin genişlənməsi və yüksəlməsi üçünsə, dünya
iqtisadiyyatının aparıcı ölkələrinin iqtisadiyyatlarında artım olmalıdır.
Söhbət Çin və Avropa İttifaqı ölkələri, o cümlədən ABŞ başda olmaqla digər
nəhəng iqtisadiyyatlardan gedir. Bu mənada, mövcud fonda qiymətlər hətta 60 ABŞ
dollarına da yaxınlaşa bilər. Hətta onu ötə də bilər. Lakin bir şeyi dəqiqliklə
söyləmək olar ki, qiymətlər əvvəlki illərdəki kimi 100 dollara çatmayacaq,
yaxud bu həddi keçməyəcək”.
"Neft
Araşdırmaları Mərkəzi”nin rəhbəri İlham Şaban: "Sabahkı İstanbul energetika forumuna OPEC ölkələrindən
bir neçə nümayəndə qatılır. Burada söhbət OPEC-ə üzv ölkələrin enerji nazirləri
ilə neft hasilatının dondurulması çərçivəsində ikitərəfli görüşlərdən gedir. Təbii
ki, ümumilikdə İstanbul forumu və bu görüşlər bazara pozitiv siqnallar ötürür.
Hazırda neftin qiyməti 53 dollara yaxınlaşmaq üzrədir. Faktiki olaraq neftin
qiymətinin birdən-birə 13 faiz artım dinamikasına Əlcəzair görüşü böyük təsir
göstərdi. Qiymətlərin artmasının digər səbəbi çərşənbə günündə Amerikada neft
ehtiyatlarının azalması ilə bağlı enerji adminstrasiyasının açıqladığı hesabat
oldu. Yaxın günlərdə keçirilməsi planlaşdırlan İstanbul toplantısı da öz növbəsində
bazara müsbət siqnallar ötürməkdədir. Neft
hasilatının azalması ilə bağlı deyə bilərəm ki, bu mümkündür. Əgər
razılaşma və istək olsa, hasilatı azaltmaq mümkündür. Təkcə Rusiyanın özü
hasilatı bir milyon barel azaltsa, bu, dünya üçün böyük bir töhfə olardı”.
Ekspert Vyana görüşündən gözləntilərin böyük
olduğunu da vurğuladı: "Əgər Əlcəzair görüşündə razılaşma əldə olunubsa, Vyana
görüşündə həmin konfransın yekunu olaraq OPEC ölkələri artıq ilk dəfə kvotaları
rəsmən yenidən bölüşdürəcəklər. Vyana görüşü artıq hüquqi öhdəlik deməkdir. Bu
hüquqi öhdəlik qarşısında bazar böyük reaksiya göstərəcək. Çox güman ki, qəbul
edilən qərarlar yanvar ayının birindən qüvvəyə minəcək. Əgər fevral ayında dərc
olunacaq hesabatlarda öhdəlik götürən ölkələrin qərarlaşdırılan kvotalara əməl
etdikləri aydın olsa, onda neftin qiyməti artmaqda davam edəcək. Əgər reallıqla
deyilənlər üst-üstə düşməzsə, bazar buna neqativ reaksiya göstərəcək. Lakin bölüşdürülən bu kvotalar da çox güman
ki, 6 ay müddətinə qüvvədə olacaq. Çünki bu, uzunmüddətli ola bilməz. Neftin
qiymətinə dair proqnoza gəldikdə isə,
deyə bilərəm ki, bir barel neftin qiyməti 55, hətta müəyyən müddətə 57-58 dollara
çata bilər. Lakin belə olan təqdirdə, ABŞ-da və Kanadada kiçik neft
yataqlarında hasilat kəskin şəkildə artmağa başlayacaq ki, bu da neftin qiymətinin
aşağı düşməsinə səbəb olan əsas faktorlardandır”.
Şəbnəm
Mehdizadə