İslam Kərimovun potensial varisi
Gözlənildiyi kimi,
Özbəkistanın baş naziri Şövkət Mirzəyev ölkənin müvəqqəti prezidenti elan
edilib. Onun təyinatı parlamentin yuxarı və aşağı palataları tərəfindən təsdiq
olunub. Halbuki ölkə Konstitusiyasının 96-cı maddəsinə əsasən prezident
səlahiyyətlərinin müvəqqəti icrası Senatın sədri Niqmatilla Yuldaşevə həvalə
olunmalı idi. Lakin iddialara görə, o, təcrübəsinin az olduğunu əsas gətirərək
bundan imtina edib. Və bu səbəbdən də deputatlar yekdilliklə baş nazirin
namizədliyini dəstəkləyiblər.Özbəkistan Konstitusiyasına əsasən prezident
seçkiləri növbəti üç ay ərzində keçirilməlidir.
Kənd
təsərrüfatı mütəxəssisindən baş nazirliyə
Ş.Mirzəyev 1957-ci ildə
anadan olub. Daşkənd İnstitutunun məzunudur. Kənd təsərrüfatı üzrə
ixtisaslaşıb. Ayrı-ayrı illərdə paytaxtın bir neçə rayonunda administrasiya
rəhbəri olub. 2003-cü ildən Özbəkistanın baş naziri postunu tutur.
Ş.Mirzəyev atdığı bir sıra
qeyri-adi addımlarla diqqəti cəlb edib. Özbəkistanda elə də ciddi nüfuza malik
olmayan bu şəxs vaxtilə tabeliyində olanlara qarşı fiziki zor tətbiq etməsi ilə
tanınıb. Eləcə də özbək müğənnisi Əbdüləziz Kərim Türkiyə vətəndaşlığını qəbul
etdiyinə görə onu vətəndaşlıqdan məhrum edib. İclasların birində onu hətta
"vətən xaini” adlandırıb. Lakin türk ekspertlər bildirirlər ki, bütün bunlara
baxmayaraq, yeni prezidentin dövründə iki ölkə arasında münasibətlər yaxşılaşa
bilər. Bəlli olduğu kimi, mərhum prezident İ.Kərimovun Türkiyəyə münasibəti o
qədər də yaxşı deyildi. Səbəb də Ankaranın özbək müxalifətinin liderlərindən
olan Məhəmməd Salehə sığınacaq verməsi olmuşdu.
Mirzəyevin
Moskvadan dəstəyi var
Hələ bir neçə gün əvvəldən
əksər ekspertlər proqnoz vermişdi ki, Özbəkistanda hakimiyyət dəyişikliyi baş
verərsə, İ.Kərimovun varisi olmağa əsas namizədlərdən biri ölkənin baş naziri Ş.Mirzəyev
olacaq.Özbəkistanda son illərdə yaranmış situasiyanı təhlil edərkən
belənəticəyə gəlmək olarki, Ş.Mirzəyevin ölkənin güc strukturları,
xüsusən dəMilli Təhlükəsizlik Xidmətinin rəhbəri Rüstəm İnoyatovla yaxşı
münasibətləri var. Bundan başqa, onun 2009-cu ildə qohum olduğu özbək əsilli
milyarder Alişer Usmanovla (Usmanovun qardaşı oğlu Mirzəyevin qardaşı qızı ilə
evlənib) yaxşı münasibətləri var. Maraqlıdır ki, İ.Kərimov bu nikahın əleyhinə
olsa da, qohumluq sonda baş tutdu. Lakin az sonra A.Usmanovun qardaşı oğlu
Babur avtomobil qəzasında həlak oldu. Bütün bunlardan əlavə, Vladimir Putin
Rusiyanın baş naziri olanda onunla MDB baş nazirlərinin iclaslarında görüşərdi.
Onların arasında şəxsi əlaqələr də var.
Ekspertlər hesab edirlər
ki, Ş.Mirzəyevin Moskvadan dəstəyi var və o, ölkə
rəhbərliyindərusiyapərəst qanadı təşkil edir. "Özbəkistan üçün Rusiya ilə
əlaqələr strateji tərəfdaşlıq səviyyəsində olub, belədir və belə da qalacaq”,
- deyə Ş.Mirzəyev Daşkəndə səfər edən
Rusiya prezidenti V.Putini əmin edib.
London Şərqşünaslıq və
Afrika Araşdırmaları Məktəbinin dəvətli elmi işçisi, özbək politolqu Alişer
İlhamovun fikrincə, Özbəkistandakı siyasi sistem o qədər qeyri-şəffafdır ki,
nəyisə əvvəlcədən proqnozlaşdırmaq çətindir və gözlənilməz ssenariləri istisna
etmək olmaz. "Qonşu Türkmənistanın timsalında demək olar ki, möcüzələr baş
verir. Saparmurat Niyazovun ölümünədək kim deyə bilərdi ki, hakimiyyətə
Qurbanqulu Berdıməhəmmədov gələcək? Onu tanıyan və diqqətə alan çox az idi.
Odur ki, Özbəkistanda da yeni fiqurların üzə çıxa biləcəyini istisna etmək
olmaz” – deyə A.İlhamov bildirib.
Hansı
klanlar hakimiyyət uğrunda mübarizə aparır?
Bütün ekspertlər belə bir
qənaətlə razılaşırlar ki, ölkədə ən nüfuzlu kölgə fiquru MTX-nin rəhbəri Rüstəm
İnoyatovdur. A.İlhamovun fikrincə, belə bir fikir formalaşıb ki, R.İnoyatov və
Ş.Mirzəyevin Moskvadan dəstəyi var və beləliklə, onlar alyans şəklində
rusiyapərəst qanadı təşkil edirlər. "Öz növbəsində Rüstəm Əzimovu elitanın güc
təbəqəsi yox, iqtisadiyyat və maliyyə ilə bağlı adamlar dəstəkləyirlər. Nəzərə
alınmalıdır ki, Özbəkistanın Dünya Bankından, BVF-dən və başqa investorlardan
aldığı kreditlər Əzimovun şəxsi zəmanəti ilə verilir”, – deyə A.İlhamov qeyd
edir. Bundan başqa, Özbəkistanda həmişə klan sistemi güclü olub. Bu sistemdə
xüsusilə də Daşkənd və Səmərqənd klanları ən nüfuzlu hesab edilir. Lakin əksər
ekspertlərin fikrincə, belə bölgü artıq keçmişin qalığıdır. "Bütün bu klanlar
kifayət qədər şərtidir və Kərimovun karyerasının başlanğıcında olduğu kimi elə
də ciddi rol oynamırlar. Kərimov öz prezidentliyi ərzində bu regional elitaları
xeyli zəiflədib. Buna görə də belə bölgünü vaxtı ötmüş hesab etmək olar”, -
deyə A.İlhamov vurğulayıb. "Özbəkistanda iki ən qüdrətli dövlət orqanı var: MTX
və DİN. Vəziyyətə fiziki olaraq məhz onlar nəzarət edir. Bütün qalan klanlar və
başqa strukturlar bu iki işlək siyasi strukturun qarşısında zəifdirlər.
Özbəkistanda hətta ən ucqar aul və qışlaqlarda da milis məntəqəsi var. Bu idarə
sayca daha çox əməkdaşa malikdir. Kərimov xarici səfərlərə çıxanda onun
səlahiyyətlərini daxili işlər naziri icra edirdi. Onun özünə nəzarəti isə MTX
həyata keçirirdi” - deyə başqa bir politoloq Kemoleddin Rabbimov bildirib.
"İ.Kərimovun varisi kim olursa-olsun, İnoyatovun və MTX-nin birbaşa dəstəyi
olmadan hakimiyyətə gələ bilməz” – deyə Eurasia.net saytının müxbiri Joanna
Lillis diqqətə çatdırıb.
Bəs
Özbəkistanda hakimiyyətin dəyişməsi hansı regional əhəmiyyətə malikdir?
"Özbəkistanda hakimiyyətin
ötürülməsinin dinc və sosial gərginliksiz keçəcəyinə üç səbəb var. Birincisi,
elita sabitliyin pozulmasında maraqlı deyil, çünki bunun nəticəsində sərvətini
itirə bilər. İkincisi, ölkə əhalisi çox güman ki, gözləmə mövqeyi tutacaq və
hakimiyyətin qərarlarını gözləyəcək. Odur ki, qarşıdan gələn iki ildə əhalinin
hakimiyyətdən böyük gözləntiləri olacaq. Üçüncüsü xarici aləmdir. Nə Rusiya, nə
Çin, nə müsəlman ölkələri, nə Avropa və nə də Amerika Özbəkistanın əsas oyunçu
olduğu Mərkəzi Asiya regionunda qeyri-sabitlik istəyirlər” – deyə ekspert K.Rabbimov
bildirib. O əlavə edib ki, bundan başqa, Özbəkistanın regional qonşularla
münasibətində yaxşılaşma baş verə bilər. Kreml üçün hakimiyyət dəyişikliyindən
sonra da regiondakı nüfuzunu saxlamaq çox mühümdür. "Məsələ burasındadır ki, İslam
Kərimov qonşu dövlətlərin başçıları ilə düşmən münasibətlərdə olub və xarici
siyasətin gərginliyində şəxsi faktor həlledici idi. Çox mümkündür ki, yeni
lider bu vəziyyəti dəyişsin” – deyə J.Lillis söyləyir. K. Rabbimov isə əmindir
ki, yeni lider qonşu ölkələrlə danışıqlara getməli olacaq: "Söhbət ilk növbədə
su problemindən gedir. Kərimovun vaxtında bu barədə cəmiyyətdə çox az
danışılırdı. SSRİ-nin dağılmasından sonra Özbəkistanın əhalisi artaraq 19
milyondan 31 milyon nəfərə çatıb. Ölkənin su ehtiyatları isə azalıb”.
Ekspertlər belə bir
məsələdə həmrəydirlər ki, Rusiya hazırda baş verənləri diqqətlə izləyir və
regiondakı nüfuzunu saxlamağa çalışacaq. Buna görə də Özbəkistanın növbəti
prezidentinin Kremlə loyallığı Rusiyanın marağındadır.
Azər