İslam Kərimov vəfat etdi - Fotolar
Özbəkistanın ilk prezidenti İslam Kərimov uzun
sürən xəstəlikdən sonra 78 yaşında vəfat edib. İlk olaraq bu xəbəri "Reuters”
agentliyi üç diplomatik qaynağa istinadən yayıb. Bundan başqa, dünyanın digər
məşhur KİV-ləri də öz qaynaqlarına istinadən xəbəri tirajlayıb. Qeyd edək ki, Özbəkistan hökuməti
də prezident İ.Kərimovun vəfat etməsi barədə xəbərləri təsdiqləyib. APA-nın
xəbərinə görə, bu barədə "İnterfaks" agentliyi Özbəkistan hökumətinin
saytına istinadən məlumat yayıb.Yeri gəlmişkən, bir neçə
gün idi ki, özbək müxalifəti onun öldüyü barədə xəbərlər yaysa da, məlumat
rəsmi təsdiqini tapmırdı. Dünən səhər isə hökumət prezidentin beyninə qan
sızdığı barədə məlumat yaydı. Məhz bundan sonra da onun öldüyü barədə Qərb
KİV-ləri xəbər yaydılar. Xatırladaqki,İ.Kərimov
1938-ci il yanvarın 30-da Özbəkistanın Səmərqənd şəhərində anadan olub. O,
keçmiş SSRİ-də Özbəkistan Kommunist Partiyasının I katibi (1989-1991) olub.
1990-cı ildən isə ölkənin prezidenti idi. İ.Kərimovümumilikdə Özbəkistana
28 il rəhbərlik edib.
İlk
başsağlığı Türkiyədən gəlib
İlk olaraq Türkiyənın baş
naziri Binəli Yıldırım Özbəkistan prezidenti İ.Kərimovun ölümü ilə bağlı
başsağlığı verib. Bu barədə o, Türkiyədə 65-ci hökumətin 100 günü ilə bağlı
keçirdiyi iclasda deyib. "Özbəkistan prezidenti ölüb. Allah rəhmət eləsin.
Türkiyə Cümhuriyyəti adından Özbəkistan xalqına dərin hüznlə başsağlığı verirəm”,
- deyə o bildirib. Baş nazir bu barədə məlumatı haradan aldığını açıqlamayıb.
Qeyd edək ki, hökumətin iclası bəzi televiziyalarla canlı yayımlanıb.
Səmərqənddə
təhlükəsizlik tədbirləri gücləndirilib
Ölüm xəbərinin ardınca Özbəkistanın
Səmərqənd şəhərində təhlükəsizlik tədbirləri gücləndirilib. Şəhərin mərkəzi
küçələrində bir sıra yollar bağlanıb. Sentyabrın 2-də
Daşkənd-Səmərqənd marşrutu üzrə hərəkət edən "Əfrasiyab” sürət
qatarının reysi təxirə salınıb. Bir sıra KİV-lər isə Özbəkistan baş naziri Şövkət
Mirzəyevin artıq Səmərqənddə olduğunu yazıb. ABŞ-da mülki aviasiyaya nəzarət
edən Federal Aviasiya Administrasiyası bildirir ki, Özbəkistanın Səmərqənd
şəhərindəki aeroport şənbə günü - sentyabrın 3-də rəsmi təsdiqlənmişlərdən
savayı bütün təyyarələr üçün qapalı olacaq. Dünənə olan icazələrin isə hamısı
ləğv olunub.İ.Kərimovun öldüyü haqda
xəbəri birinci yayan "Ferqana.ru” portalı isə artıq onun doğma şəhəri
Səmərqənddə məzar hazırlıqlarının getdiyini xəbər verib və müvafiq fotolar
yayıb.
Sosial şəbəkələrdə yer alan
fotolara görə Səmərqənd qəbiristanlığında, orta əsrlərdən qalma Şahi Zinda mavzoleyinin
yaxınlığında İ.Kərimov üçün məzar yeri hazırlayırlar. Buldozer və
ekskavatorlarla ərazidə iş gedir, köhnə məzarlar dağıdılır. Həmin yerdə İ.Kərimovun
anası və iki qardaşı dəfn olunub. "Ferqana.ru” bildirir ki, İ.Kərimovun
cənazəsini daşıyan təyyarə məxfi şəkildə Daşkənddən Səmərqəndə uçub. Feysbukda
yer alan məlumatlara görə, Səmərqənddə dəfn mərasiminə intensiv hazırlıq gedir,
şəhərin küçələri təmizlənir, abadlıq işləri görülür. Kərimovların ata evləri
sürətlə təmir olunur, sahə müvəkkili isə sakinlərə deyib ki, "çox pis bayram
olacaq”. Şəhər sakinləri Səmərqəndə bir-birinin ardınca şüşələri qara plyonka
ilə örtülmüş qara maşınların gəldiyini müşahidə edir.
İslam
Kərimovun xəstəliyi və hakimiyyət oyunları
Beləliklə, Özbəkistanın
Sovet İttifaqı dağılandan bəri lideri olmuş İ.Kərimov vəfat etdi. Bütün diqqət
isə hazırda prezidentin davamçısının kim olacağına yönəlib. İndi 31 milyon
əhalisi olan ölkə prezident Kərimovsuz Özbəkistanda yaşamaq perspektivi ilə
üz-üzə qalıb. Onun davamçısının kim olacağı isə hələ məlum deyil. Son illərdə
davamçı ilə bağlı debatlar Kərimov ailəsinin daxili problemlərindən birinə
çevrilib. Bir neçə il öncəyə qədər çoxları inanırdı ki, İ.Kərimovu onun
cazibədar böyük qızı, pop ulduzu, dəb dizayneri və sahibkar qadın Gülnarə
Kərimova əvəzləyəcək. O, buna hazırlanırdı və ölkədə ən nüfuzlu insanlardan
biri hesab olunurdu. Ancaq onun zirvədən enişi sürətli və qəddarcasına oldu. G.Kərimovanın
ev dustağı olduğunu göstərən şəkillər hələ 2014-cü ildə Londonda yayılmışdı. 2013-cü
ildə korrupsiya barədə qalmaqallar yaşananda onun biznesi əlindən alındı, TV və
radio kanalları bağlandı. O, həmçinin korrupsiya ilə bağlı Avropa və ABŞ-da
istintaqa cəlb olundu. Onun hazırda ev dustağı olduğu bildirilir. G.Kərimova
hakimiyyəti itirərkən bacısı Lola Tillayeva-Kərimovanı və anasını ondan yaxa
qurtarmağa çalışmaqda ittiham etdi.Bir çox təhlilçilər deyir
ki, bu ailə çəkişməsi ölkədə dərin hakimiyyət mübarizəsini üzə çıxardı.
Prezidentliyə
iddiaçılar
Gülnarənin başına
gələnlərin arxasında kimlərin durduğu barədə danışarkən çəkdiyi adlar indi
prezidentliyə iddiaçılardır. Onlardan biri Rüstəm Əzimovdur, onun iki vəzifəsi
var - baş nazirin müavini və maliyyə naziri.R.Əzimov 1998-ci ildə nazir
təyin olunub və İ.Kərimova çox yaxın hesab olunurdu.Daha çox qərbyönlü kimi
tanınan R.Əzimov 1990-cı illərdə Avropa Yenidənqurma və İnkişaf Bankının
Özbəkistan üzrə rəhbəri olub. İsveçrədə yaşayan özbək jurnalist Alişer Taksanov
deyir ki, R.Əzimovun qalib olmaq üçün yaxşı şansı var, çünki o, "Daşkənd klanı”ndandır:
"Bu klan ölkədə bütün əsas mövqeləri tutmağı bacarıb - Daxili İşlər Nazirliyi, Təhlükəsizlik
Xidməti, Maliyyə Nazirliyi və sairə. Bu klan rəqibi, baş nazir Şövkət Mirzəyev
tərəfindən idarə olunan "Səmərqənd klanı”ndan daha güclüdür. Mərkəzi Asiyada
klanlar regional sədaqətə əsaslanan şəbəkələrdir və bu şəbəkələr hakimiyyət və
var-dövlət toplamaq üçün istifadə olunur və prezidentin davamçısının təyin
olunması kimi məqamlarda çox mühümdür”.
Ancaq digərləri inanır ki,
2003-cü ildən bəri baş nazir vəzifəsini tutan Ş.Mirzəyev prezident Kərimovu
əvəzləməyə daha real namizəddir. "Kimin əlində dövlətin daha çox resursu var -
buna baxsanız, o zaman Şövkət Mirzəyevin şansı daha çoxdur”,- deyə özbək siyasi
təhlilçi, Fransada sığınacaq almazdan öncə Prezident Administrasiyasında
çalışmış Kamoliddin Rabbimov deyir: "Hakimiyyətin ötürülməsi çox güman ki,
ictimaiyyətin gözündən saxlanacaq. O, bu işdə 13 il olub və öz adamlarını ölkə
boyunca mühüm vəzifələrə təyin edib”. Çoxları inanır ki, Təhlükəsizlik Xidmətinin
rəhbəri və keçmiş "KQB” casusu Rüstəm İnoyatov güc brokeri olacaq.R.İnoyatov G.Kərimovanın öz
imperiyasının çökdürülməsində əli olduğunu iddia etdiyi şəxslərdən biridir.
Ancaq belə intriqalar Özbəkistanda hakimiyyətin necə ötürüləcəyinə dair güclü
mesaj verir. Prezident Kərimovun davamçısı olmaq istəyən şəxs siyasi elitanın
qalan hissəsi İlə kompromisə getməlidir – G.Kərimovanın etmədiyi də elə bu idi.
"Hər şey davamlılığa,
Kərimovun yaratdığı kimi bir rejimin saxlanmasına meyilli bir şəxsə işarə edir”,
- deyə ekspert Mak Glinçey bildirib. Onun fikrincə, "buna səbəb odur ki,
Özbəkistanda bütün var-dövlət mənbələri hökumətdən gəlir. Özbəkistanda zəngin
olan insanların onlara bu var-dövləti verən sistemi qoruyub-saxlamağa güclü
meyli var”. Bəziləri deyir ki, baş nazir Ş.Mirzəyev səhnəarxası danışıqlarda
əsas söz sahibidir.Beləliklə, keçidin sakit və
ictimaiyyətdən gizli olacağı gözlənilir. Çoxları gözləyir ki, İ.Kərimovun
qoyduğu müxalif səsə qarşı dözümsüzlük və etirazların dağıdılması ənənəsi davam
etdiriləcək.
Ekspertlər hesab edirlər
ki, əslində yeni prezident heç də yaxşı tanınmayan biri ola bilər. "Bu, bütün
güc brokerlərinin özünü rahat hiss etdiyi bir kompromis namizəd ola bilər və
nəticədə barəsində çox eşitdiyimiz üç nəfərdən heç biri olmaya bilər”, -deyə M.Glinçey
bildirib. Aydın olan bir şey var ki, yeni lider Özbəkistandakı mövcud sistemi
dəyişməyə cəhd etməyəcək.
Azər