İşimizin zövqlü tərəfi hər yerdə imzamızın olmasıdır - Biznes
Səbuhi Kazımzadə: "4 aylıq kirayə pulunun 2 ayını
geri qaytardı və dedi ki, gənclərə dəstək olmaq lazımdır”
Maliyyənin
və zamanın idarə edilməsinə xüsusi önəm verir. Düşünür ki, biznes qurmaq üçün
ali təhsilə ehtiyac yoxdur, amma insan gərək daim öz üzərində işləsin, özünü
inkişaf etdirsin. "Biznes” rubrikamızın budəfəki qonağı "Stampel” şirkətinin təsisçisi Səbuhi Kazımzadədir.
Səbuhi Kazımzadə
kollecdə mühasibat uçotu, kompüter operatorluğu üzrə təhsil alıb. Təhsil
dönəmində kassa aparatlarının satış müdiri və tənzimləyici şəxs kimi çalışıb.
Əsgərlikdən sonra mühasibatlıq sahəsində fəaliyyət göstərməyə başlayıb. Əmisinin
yanında bir sıra müəssisələrdə satış müdiri, Şəmkir, Qazax, Ağstafa, Gədəbəy,
Tovuz kimi rayonlarda isə bölgə satış müdiri işləyib. Karyerasının ilk
addımlarını satış müdiri kimi başlaması, onda biznesə böyük maraq yaradıb və
zamanla öz işini qurmaq qərarına gəlib.
- Söhbətimiz zamanı, "ali təhsilim yoxdur, amma bu
qədər iş görmüşəm, bu da mənim uğurumdur” dediniz. Maraqlıdır, sizcə, biznesin
qurulmasında ali təhsil nə dərəcədə rol oynayır?
- Təbii ki, təhsilin böyük
rolu var və təhsili nə zaman istəsəniz, ala bilərsiniz. Təhsilin qəti şəkildə
rolu olmadığını deyə bilmərik. Sadəcə olaraq, mənim uzun müddət satış sahəsində
olmağım ciddi təcrübə qazandırmışdı. Yəni həmin dövrdə düşünmədim ki, ali
təhsilim yoxdur və mən biznes qura bilmərəm. Düşünürəm ki, bu sahədə kifayət
qədər keşməkeşli yollardan keçmişəm. O yolu gedərkən ayağıma çox daş dəydi,
bilmədiyim məqamlar çox oldu. O zaman isə bəzi mənbələrə müraciət edib
öyrənirdim. Xüsusilə də, internet dövründə nəyisə öyrənə bilməmək mümkün deyil.
Nəticə etibarilə düşündüm ki, gedib hansısa təhsil ocağında oturmağım, mənim
üçün zaman itkisidir. Amma daim öz üzərimdə çalışıram. Bu sahədə yazılmış
kitabları oxuyuram, internetdə araşdırmalar aparıram, dostlarla bəzi mövzularda
müzakirələr edirəm. Həmçinin mənə bu sahədə töhfə verəcək beynəlxalq və yerli
forumlara, sərgilərə, tədbirlərə qatılıram.
- Bəs, növbəti mərhələdə istər ölkə daxilində,
istərsə də xaricdə təhsil almağı düşünürsünüzmü?
- Hələ ki,
belə bir düşüncəm yoxdur.
- Maraqlıdır, biznes sizin üçün nə deməkdir?
- Mənim
üçün biznes maliyyə, pul axını, zamanın idarə edilməsidir.
- İlk işinizi necə qurdunuz?
- İlk
başladığım dönəmlərdə kiçik mağazalarım vardı. Onları ciddi biznes işi kimi
qiymətləndirmirəm. Amma birinci böyük işim "RM Group” şirkətini sıfır büdcə ilə
qurdum. Reklam və möhürlərin satışı işini həyata keçirirdi. Bu şirkətin "homeoffice”
olmasını istədim. Ev sahibi ilə danışıb bildirdim ki, ilkin ödənişi bir ayın
tamamında verəcəyəm. Amma necə oldusa, gəlir əldə edə bilmədik. Məcbur qalıb ev
sahibi ilə danışdıq və üç aylıq möhlət istədik. Dedim ki, 3 ayın tamamında sizə
4 aylıq pul ödəyəcəyəm. Sağ olsun, ev sahibi məni anladı və ofisi
boşaltmağımızı istəmədi. Öz evimdəki stol, stulu, kompüterimi gətirib
işləyirdim. Həmin dövrdə çox böyük çətinlik çəkdim. Tək çatdıra bilmədiyimi
görüb, işçi götürdüm. Ciddi iş rejimində çalışırdıq. 3 ayın sonunda kifayət
qədər maliyyə əldə etdik və ev sahibinə söz verdiyim ödənişi etdik. Həmin
dövrdə bəlkə də ən böyük dəstəkçimiz həmin ev sahibi oldu. 4 aylıq kirayə
pulunun 2 ayını geri qaytardı və dedi ki, gənclərə dəstək olmaq lazımdır. Çünki
bizim necə çətin bir şəraitdə işlədiyimizi, necə əziyyət çəkdiyimizi görmüşdü. Bəlkə
də bu gün biznesdə olmağımın birinci səbəbkarı həmin şəxsdir.
- Biznes qurularkən ilkin mərhələdə onun təməlində
nələr dayanır?
- İnsan
birinci növbədə səbir etməyi bacarmalıdır. Bundan başqa, maliyyə işini
bilməlidir. Yəni biznesdə maliyyənin idarəsi çox vacibdir. Bu sahəyə başlamaq
istəyən biri, mütləq maliyyə tərəfini nəzərə almalıdır. Biznesi quran şəxs
əlindəki maliyyəni hara xərcləyəcəyini bilməlidir. Çünki bəzən bizneslərin
iflasa uğramasının səbəbi maliyyə axınının düzgün idarə olunmamağıdır.
- Söhbət zamanı maliyyənin idarə edilməsi
məsələsinə çox toxunursunuz. Maraqlıdır, maliyyəni idarə etmək üçün xüsusi qabiliyyət
lazımdır?
- Bu,
sadəcə biznes quran şəxs üçün keçərli deyil. Ümumiyyətlə, hər kəs öz büdcəsini
idarə etməyi bacarmalıdır. Biznes quran
isə ikiqat diqqətli olmalıdır. Bu gün 5 manat qazanırıqsa, onun 5-ni də
xərcləməyimiz düzgün deyil. Nə qədər pulu hara xərclədiyimizi yaxşı götür-qoy
etməliyik. Yalnız bu gün üçün yaşamaq olmaz, sabahın da xərcini düşünməlisən.
Bunun üçün isə xüsusi istedad və ya qabiliyyət tələb olunmur. Mən şəxsən bu
sahəni çox araşdırıram, bəzi kitabları oxuyuram. Məsələn, "Maliyyə axını” adlı kitab var.
Oxumaq istəyənlər üçün onu məsləhət görə bilərəm.
- Bir az indiki biznesinizdən danışaq. Necə oldu
"Stampel” şirkətini qurmaq qərarına gəldiniz?
- İşə
başlamazdan əvvəl kiçik bir bazar araşdırması etdim. Gördüm ki, möhür satanlar
yalnız reklam şirkətlərinin və dəftərxana ləvazimatları satan mağazaların
daxilində var. Respublikamızda möhür satışı elə də çox deyil, bazarda müəyyən
qədər də olsa, rəqabət var. Ən maraqlısı da budur ki, milli brend kimi bu
məhsulun satışı mövcud deyil. Düşündüm ki, bunu niyə də mən yaratmayım? İşi
qurarkən ilk olaraq məkanı və bu
məhsulun kimlərə lazım olacağını fikirləşdim. Möhür daha çox hüquqi şəxslərə,
dövlət orqanlarına lazımdır və bunların da qeydiyyatdan keçdiyi yer Vergilər Nazirliyinin
idarəsidir. Mən də şirkətimizi həmin idarənin yanında kirayələdim. Yəni həmin
yer çox stratejidir. Belə ki, nazirlikdə qeydiyyatdan keçən şəxs ona yaxın bir
ərazidə öz möhürünü əldə edə biləcək. 2014-cü ildə işə başlayanda yalnız bir
məkanda fəaliyyət göstərirdik, indi bir neçə yerdə filiallarımız var.
- Biznesdə önəmli olan faktorlardan biri də addır.
Ad seçimini necə etdiniz?
- Razıyam,
bir biznesin sonrakı mərhələdə inkişafında ad çox böyük rol oynayır. "Stampel”
ingilis dilində olan "stamp”, yəni möhür sözündən götürülüb. Bu, bütün dünyada
eyni səslənir. Ona görə, elə bir ad düşündüm ki, brend, gələcəkdə qlobal aləmə
çıxanda da özünü təsdiq edə bilsin. Məncə, ad seçimi uğurlu alınıb. Bir
məhsulun brend kimi formalaşmasında şüarın da rolu böyükdür. Bizim markanın
şüarı isə "İmzanızın dostu”dur. Yəni hüquqi şəxslər imza çəkəndə mütləq şəkildə
onun yanında möhür vururlar və biz də həmin imzaların yanında vurulan möhürük.
Ona görə də, "imzanın dostu” şüarını seçdik.
- Bildirdiniz ki, işə başlayarkən bazar araşdırması
etdiniz. Bu araşdırma bütün bizneslərdə edilməlidir?
- Mütləq şəkildə bütün
bizneslərdə bazar araşdırması olmalıdır. Nə qədər çox araşdırma edilsə, bir o
qədər yaxşı nəticə əldə edilər. Mən araşdırma edərkən rəqiblərimin kim
olduğunu, məhsulu hansı qiymətə satdıqlarını öyrənirdim. Həmçinin məhsulun
satılacağı müştərilər də araşdırılmalıdır.
- Maraqlıdır, möhür biznesinin çətin tərəfləri
nələrdir?
- Əslində, heç bir biznesin
çətin tərəfi yoxdur. İnsan öz işini sadələşdirməli, ondan zövq alaraq
işləməlidir. Spesifik sahə olduğu üçün bəzən müştərilərlə anlaşılmazlıq
yaranır. Amma bunu da dərhal həll etməyə çalışırıq. Məsələn, respublikada
bizdən başqa, möhürü yerindəcə 10 dəqiqəyə düzəldən başqa bir şirkət yoxdur.
İşimizin zövqlü tərəfi isə hər yerdə
imzamızın olmasıdır.
- Öz biznesini qurmaq istəyən gənclərə məsləhətiniz
nədir?
- Addım
atmaqdan qorxmasınlar. Məqsədyönlü və istəkli olsunlar. Bizneslərinin
batmasından qorxmasınlar. Nəzərə alsınlar ki, bu da onlar üçün bir təcrübədir. Bəlkə
də mənim də yüz minlərlə pulum batıb. Amma həmişə cəhd etmişəm, addım atmışam. Öz
biznesini qurmaq istəyə gənclərə mən də kömək edə bilərəm. Qeydiyyatını pulsuz
edərəm, amma möhürünü ödənişli verərik (gülür).
Günel
Azadə