İşğalçı ölkə münaqişənin həllində maraqlı deyil
ATƏT-in Minsk qrupu həmsədrlərinin regiona səfəri
zamanı erməni snayperi tərəfindən Azərbaycan Ordusunun zabiti Aqil Omarovun qətlə
yetirilməsi Ermənistan tərəfinin cəbhə bölgəsində vəziyyəti gərginləşdirmək,
danışıqlar prosesinə əngəl yaratmaq və 25 ildir davam edən bu münaqişədə mövcud
status-kvonu qoruyub saxlamaq məqsədini güdür. Ermənistanın bu addımları bir
daha təsdiq edir ki, işğalçı ölkə münaqişənin həllində maraqlı deyil və onun
sülh, atəşkəsə riayət olunması və digər bu kimi iddiaları yalnız beynəlxalq
ictimaiyyəti aldatmaq cəhdidir.
Lakin Ermənistanın baş naziri Nikol Paşinyan öz sələflərinin
səhvlərini təkrarlamağa davam edəcəksə, bu, onun hakimiyyəti üçün çox ciddi
problemlərin yaranmasına səbəb olacaq. Ermənistan hakimiyyəti bilməlidir ki,
işğalçılıq siyasətini davam etdirərək dinc sakinlərə, Azərbaycan hərbçilərinə
qarşı törətdiyi cinayətlər cavabsız qalmayacaq və hər belə hala görə daha ağır
adekvat cavab alacaq. Digər tərəfdən, beynəlxalq ictimaiyyət və ilk növbədə həmsədr
ölkələr Ermənistanın bu təxribatını birmənalı şəkildə pisləməlidir və iki ölkə
arasında substantiv danışıqların tezliklə başlanmasına nail olmalıdır. Bütün
dünya tərəfindən qəbul olunmayan status-kvo məhz Ermənistana qarşı ciddi təzyiq
nəticəsində dəyişməli, sülh prosesinə və erməni işğalının nəticələrinin aradan
qaldırılmasına yolu açmalıdır.
Politoloq Fikrət
Sadıqov mövzu ilə bağlı
bildirib ki, hazırda Ermənistanda qarşıdurma prosesi gərgin şəkildə davam edir.
Onun sözlərinə görə, Azərbaycan üçün bu qarşıdurmanın nədən baş verməsi deyil, onların
ölkəmizə qarşı təxribatı önəmlidir. Politoloq deyib ki, ATƏT-in Minsk qrupu həmsədrlərinin
regiona səfəri zamanı düşmənin atəşkəsi pozaraq Azərbaycan ordusunun zabitinin
qətlə yetirməsi növbəti təxribatdır: "Ermənistan beynəlxalq hüquq normalarını
açıq şəkildə tapdalayır. Belə olan halda, həmsədrlərin bu məsələyə biganə
yanaşması təəssüf doğurur. Azərbaycana ATƏT-in Minsk qrupu həmsədrləri tərəfindən
ümumi bəyanat deyil, məhz Ermənistana ünvanlanan bəyanat lazımdır. Şübhəsiz ki,
Azərbaycan tərəfi erməni snayperlərinə qarşı adekvat cavab verəcək. Ermənistan
cavabsız qalmamalıdır. Görünür, qarşı tərəf normal dildə münasibət qurmağı
bacarmır. Əgər Ermənistan danışıqlara hazır deyilsə, boyun qaçırırsa, demək
onlarla öz dillərində, yəni güc, təxribatlarına zərbə ilə cavab vermək üslubu
ilə danışmaq lazımdır. İşğal altındakı Dağlıq Qarabağ və ətraf ərazilər Azərbaycan
torpaqlarıdır. İşğalçılar tərəfindən bizim torpaqlarımızdan atılan güllələr
mütləq şəkildə cavablandırılmalıdır. Ermənistanın bu addımları bir daha təsdiq
edir ki, işğalçı ölkə münaqişənin həllində maraqlı deyil. Ermənistan sülh, atəşkəsə
riayət olunması və digər bu kimi iddialarla yalnız beynəlxalq ictimaiyyəti
aldatmaq məqsədi güdür”.
N.Paşinyanın bu addımlarının acı nəticələrinə
toxunan politoloq F.Sadıqov qeyd edib ki, əgər baş nazir öz sələflərinin atdığı
addımları davam etdirsə, ona qarşı etiraz edənlərin sayı artacaq: "Artıq İrəvanda
Paşinyana qarşı etiraz edənlər var. Bu hələ başlanğıcdır. Çünki Paşinyan vaxtilə
xarici siyasət istiqamətini dəyişdirəcəyi, fərqli siyasət həyata keçirəcəyi ilə
bağlı vədlər vermişdi. Lakin bu vədlərin heç biri yerinə yetirilmir. Paşinyan təcrübəsizliyi,
siyasətdən kənar bir şəxs olmaqla yanaşı, üstəlik də sələflərinin yolunu gedərsə,
bu, onun devrilməsinə gətirib çıxaracaq. Hesab edirəm ki, onu devirən elə hərbçilərin
özləri olacaq. Bəzi mənbələrdə qeyd olunur ki, Ermənistanda Paşinyana qarşı
çevriliş cəhdləri hazırlanır”.
Politoloq İlqar Vəlizadə isə hesab edir ki, erməni snayperi tərəfindən Azərbaycan
Ordusunun zabitinin qətlə yetirilməsi ilə bağlı ATƏT-in Minsk qrupu həmsədrlərinə
rəsmi Bakının narazılığı çatdırılmaqla yanaşı, sərt bəyanatlar verilməli, hətta
danışıqlar prosesi ilə əlaqədar korrektələrin aparılması üçün çağırışlar edilməlidir.
Onun fikrincə, Ermənistana qarşı konkret əməllər olmalı, bütün hallarda cəbhədə
mövqeyimiz gücləndirilməli, düşmənə adekvat cavablar verilməlidir. Politoloq
söyləyib ki, hazırkı vəziyyətdə Azərbaycan tərəfi Ermənistana adekvat cavab
versə, heç kəs etiraz edə bilməz: "Ermənistan işğal olunmuş ərazilərimizdən
bizim əsgərlərimizə və dinc əhaliyə atəş açır, təhlükə yaradır. Vaxtilə
helikopter və digər hadisələr zamanı da Azərbaycan Ermənistana sərt cavab verərək
düşmənin mövqelərini dəf etmişdi. Düşünürəm ki, bu dəfə də belə etməliyik.
Müdafiə naziri Zakir Həsənov vaxtilə bəyan etmişdi ki, əgər ermənilər bizə
qarşı hücum edib, təxribat törətsə, o zaman Azərbaycan tərəfi 10 qat artıq
cavab verəcək. Hesab edirəm ki, artıq bu prinsipi yerinə yetirməyin zamanıdır.
Ermənilər Azərbaycan torpaqlarında olduğunu başa düşməlidirlər. Torpaqlarımızda
olmaqla etdikləri cinayət azmış kimi, müxtəlif təxribatlara da əl atırlar. Buna
yol vermək olmaz. Ermənistan Azərbaycan tərəfindən atılacaq atəşlərin fəsadlarını
düşünməlidir”.
Ermənistanda etirazların davam etdiyini xatırladan
politoloq deyib ki, burada diqqət çəkən məqam narazı olan şəxslərin "Paşinyan,
sən yalançısan” şüaurlarını səsləndirməsidir: "Bu, o deməkdir ki, artıq Ermənistan
cəmiyyəti Paşinyanın yalanlarını görür və onu özləri ifşa edir. Biz onun
danışıqlar prosesində də yalançı olduğunu göstərməliyik. Çünki baş nazir həm Azərbaycana,
həm də Minsk qrupu həmsədrlərinə cəbhədə atəşkəsə əməl olunması, təxribatların
olmaması üçün hətta qırmızı xəttin yaranması ilə bağlı müəyyən vədlər vermişdi.
Amma son hadisə bir daha sübut etdi ki, Paşinyanın həm danışığı, həm də əməlləri
yalandır. Paşinyan "Arsenal” klubunun erməni əsilli futbolçu Mxitaryanın Azərbaycana
gəlməməsi ilə bağlı məsələdə də özünü ən pis tərəfdən göstərdi. Erməni əsilli
idmançının Azərbaycana gəlməməsi ilə bağlı ona dəstək oldu. Hansı ki, Paşinyan
xalqların sülhə hazırlanması istiqamətində işlərin aparılmasının vacibliyinin
bildirirdi. Budur onun sülhə hazırlığı? Bütün bunlar bir daha sübut edir ki,
Ermənistanın baş naziri populist olmaqla yanaşı, həm də yalançıdır. Belə bir
insanın hakimiyyətdə qalması ilk növbədə Ermənistan cəmiyyəti üçün təhlükəlidir”.
Yazı Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyilə həyata keçirilən "Ermənistanın işğalçılıq siyasəti nəticəsində yaranmış regional təhlükəsizlik barədə beynəlxalq ictimaiyyətin məlumatlandırılması” layihəsi çərçivəsində təqdim olunur.
Rufik İSMAYILOV