İş müsahibəsinə gedərkən nələri bilməliyik?- Gənclərə məsləhət
Universiteti
bitirdikdən sonra qarşımızda duran əsas hədəf iş tapmaqdır. Bu isə bir neçə mərhələdən
ibarətdir: CV-nin göndərilməsi, sonra test və ən sonda müsahibə. Təbii ki bu
saydıqlarımız bütün işəqəbul müəssisələrinə aid deyil. Hər şirkətin öz seçim
üsulu olur. Amma müsahibə və ya fərdi söhbət demək olar ki, əksər müəssisənin
seçimləri sırasında olur. Bu mərhələdə gənclər daha həyəcanlı olurlar və bu da
onların müsahibədə uğursuz olmalarına gətirib çıxaran nüanslardan biridir.
Bu dəfə "Gənclərə
məsləhət” rubrikamızda İnsan Resursları
üzrə mütəxəssis Elçin Zeynalovla iş müsahibəsindən uğurla keçməyin sirləri
haqqında danışdıq. Müsahibimiz deyir ki, CV-ni ilk nəzərdən keçirən şəxs insan resursları
üzrə mütəxəssisdir (İR mütəxəssisi) və şirkətdən asılı olaraq işə qəbul prosesi
fərqli qurula bilər: "İş müsahibəsində ilk görüşdüyünüz şəxs İR mütəxəssisidir.
İlk olaraq bundan əmin olun ki, o, sahəniz üzrə ekspert deyil və sizin sahəniz
üzrə biliklərinizi özü qiymətləndirə bilməsə də, tərəddüd, həyəcan və təcrübəsizliyinizi
aşkarlayacaq. Şirkəti mütəxəssisin tapılması maraqlandırır, odur ki, şəxsi və
xüsusi məlumat və istəklərinizi sonraya saxlayın. Birinci, seçilməyinizdir”.
Elçin bəy deyir
ki, iş müsahibəsində şəxsi keyfiyyətlər texniki biliklər qədər vacib sayılır:
"Siz öz sahənizin mütəxəssisi kimi müsahibə və ya testdən keçə bilərsiniz.
Texniki biliklərinizin olması hələ işə qəbul ediləcəyiniz demək deyil. Sizin şəxsi
keyfiyyətləriniz də texniki bilikləriniz qədər əhəmiyyətlidir. Əgər müraciət
etdiyiniz şirkət namizəddə axtardığı dəyərləri müəyyən edibsə, bu zaman siz
aidiyyəti rəhbərlərlə görüşdürüləcək və ya şəxsi keyfiyyətlərinizin
aşkarlanması üçün testə tabe tutulacaqsınız. Əgər sizin seçilməyiniz hansısa rəhbərin
şəxsi fikir və təşəbbüsündən asılıdırsa, bu zaman bilin ki, hadisələrin inkişaf
ssenarisini təxmin etmək çətindir. Çünki sizin kimi texniki bilik və
bacarıqlara sahib mütəxəssis namizədlərdən hansının uyğun zaman, şərait, müsbət
təsir bağışlama üstünlüyü əldə edəcəyi, İR mütəxəssisinin özünə məlum deyil.
Buna görə, məsləhət görərdim ki, müraciət etdiyiniz şirkəti dərindən incələyin,
əvvəlki iş yerlərinizdəki həmkarlarınızın və rəhbərlərinizin rəylərini alın”.
Həmsöhbətimiz
deyir ki, müsahibə zamanı bəzən gözlənilməz hallar da baş verə bilər: "İR mütəxəssisliyi
ölkəmizdə bir çox idarəetmə sahələri kimi yenidir. Buna görə də siz ola bilsin
ki, təcrübəsiz mütəxəssis tərəfindən də müsahibəyə çağırılasınız. Vakansiyanın
tələbləri, işin xüsusiyyətləri, tam incələnmədiyi halda, ilkin göstəricilərinizin
uyğun gəldiyi üçün ilk müsahibəyə dəvət oluna bilərsiniz. Amma növbəti mərhələdə
irəliləməyiniz çətin olacaq. Və ya müəssisənin içində vakansiya tələbi düzgün
formalaşmaya bilər. Şirkətin rəhbərliyi elan edilmiş vakansiyanı müsahibə
zamanı sonradan müxtəlif təşkilati və idarəetmə problemi səbəbi ilə bağlaya bilər.
Məsələn, işə qəbul ediləcəyiniz şöbədə iş bölgüsünün yenidən aparılması, layihədən
imtina və s. Həmçinin şirkət daxilində əməkdaşla ayrılma qərarına görə yaranmış
vakansiya, əməkdaşla rəhbərliyin təkrar razılaşması səbəbi ilə ləğv edilə,
sizinlə aparılan müsahibə yarımçıq qala bilər”.
Günel AZADƏ