Çirkli hava öldürür
Uzm. Dr. Yalçın Velibey
Kardiologiya Uzmanı
Bu yazımda ürək-damar sistemimizə çox pis təsir
edən önəmli və ciddi bir problem olan hava çirkliliyindən bəhs etdim. Havanın
təmiz olması sağlamlığımız üçün çox önəmlidir. Müasir zamanda hava çirkliliyi
çox önəmli bir ekoloji problemdir. Hava çirkliliyi sağlam insanlara xüsusilə də
uşaqların, qocaların, hamilələrin sağlamlığına, eləcə də xroniki ağciyər və ürək
xəstəliyi olanlara çox pis təsir edir. Çirkli hava xroniki ağciyər
xəstəliklərinə, insulta, ürək damar xəstəliklərinə və hətta ciddi psixoloji problemlərə
səbəb olur.
2015-ci ildə dünyanın ən prestijli elm nəşrlərindən olan "Nature”
jurnalında çox önəmli bir araşdırmanın nəticələri yayınlandı. Bu araşdırmaya görə,
çirkli hava dünyada hər il 3.3 milyon insanı öldürür. Bu ölümlərin 75 faizi infarkt
və insult nəticəsində olur. Bu səbəbdən ölənlər ən çox ildə 1.4 milyon nəticə ilə
çinlilərdir. Dünyada ən çirkli havaya sahib ölkələr də Çin, Hindistan və
Pakistandır. Hətta Çində havanın çirkliliyi bəzən Ümumdünya Səhiyyə Təşkilatının
müəyyən etdiyi təhlükəli sərhədin 20 qatından çox olur. Hava çirkliliyinin ən
önəmli səbəbləri fosil yanacaqları (avtomobil yanacaqları və sairə), istilik qazanxanaları,
fabrik və zavodlardır. Ayrıca evdə günlük məişətdə istifadə etdiyimiz kondisioner
və soyuducular da havanı çirkləndirir. Çünki onlar qısaldılmış adı ‘CFC’ olan zərərli
xlorflorokarbon qazı yayırlar.
Havanı çirkləndirən önəmli faktorlardan biri də təbii qazın olmadığı
dünyanın bəzi bölgələrində istilik məqsədi ilə kömürdən istifadə edilməsidir.
Kömürdən çox istifadə edilən bölgələrdə yaşayan insanlarda xroniki ağciyər xəstəlikləri
və ürək-damar xəstəlikləri olduqca geniş yayılır. Çirkli havada insan sağlamlığına
zərərli olan əsas maddələr karbonmonoksid, karbondioksid, azot dioksid, kükürd
dioksid, metan, amonyak və sairə kimi qazlar, arsen, kadmiyum, civə, qurğuşun
kimi elementlər və havada asılı vəziyyətdə qalan və gözlə görünməyən müxtəlif
kimyəvi tərkibli kiçik hissəciklərdir. Bu maddələr nəinki havanı çirkləndirir, həm
də qlobal istiləşməyə səbəb olurlar. Çünki havada artan metan və karbondioksid kimi
qazlar Yer kürəsinə gələn günəş şüalarının və enerjisinin atmosferimizi tərk etməsinin
qarşısını alır və nəticədə havanın temperaturu önəmli dərəcədə artır.
Çirkli havanın
ürək-damar sisteminə çox pis təsir etməsi aparılan bir çox araşdırmada sübuta yetirilib.
Belə ki, ürək xəstəliyi olmayan 65000 qadın üzərində bir araşdırma aparılıb. Nəticədə
məlum oldu ki havanın çirkli olduğu bölgələrdə yaşayan qadınlarda ürək mənşəli ölümlər,
beyin insultu və infarkt havanın təmiz olduğu bölgələrdə yaşayan qadınlara nisbətən
daha çox müşahidə edilir. Havası çirkli olan bölgədə yaşayan qadınların
ömürləri daha az olur. Daha sonra qadın kişi fərqi qoyulmadan 450 000 sağlam insan
üzərində başqa bir araşdırma aparılıb. Bu araşdırma nəticəsində də məlum olub ki,
çirkli havanın olduğu bölgələrdə yaşayan insanlarda infarkt və ürək mənşəli ölüm
halları daha çoxdur. Çirkli havanın ürək-damar sisteminə mənfi təsiri bir çox səbəblərlə
əlaqələndirilə bilər. Belə ki, çirkli hava sinir sisteminə təsir edərək qan təzyiqini
qaldırır. Arteriyaların, o cümlədən ürəyi qidalandıran tac arteriyaların içində
trombun əmələ gəlməsinə səbəb olur. Qanın qatılığının artmasına səbəb olur. Nəticədə
bütün bu proseslər ürəyi qidalandıran damarların tıxanmasına gətirib çıxarır.
Havada asılı qalan və gözlə görünməyən kiçik hissəciklər ən azı, zərərli qazlar
qədər təhlükəlidirlər. Bu hissəciklər o qədər kiçikdirlər ki ölçüləri mikronla
ifadə edilir. Onlar nə qədər kiçikdirsə, sağlamlığımız üçün bir o qədər
zərərlidirlər. Ürək üçün ən təhlükəli hissəciklərin PM 2.5 və PM 0.1 olduğu
müəyyən edilib. (PM "hissəciklər və ya hissəcikli maddələr” sözünün ingiliscəsi
olan ‘particulate matter’ sözünün baş hərfləridir. Rəqəmlər isə hissəciyin
mikron cinsindən ölçüsünü göstərir). Bir bölgənin havasında bu hissəciklərdən nə
qədər çoxdursa, orada yaşayan insanların ürək-damar xəstəliyindən ölmə ehtimalları
artar.
Çirkli hava ilə əlaqədar səhiyyə problemlərinin və
ölümlərin getdikcə artması artıq dünyanın böyük dövlətlərinin və
təşkilatlarının diqqətini bu cəlb edib. Və bu istiqamətdə bəzi tədbirlər
görülməyə başlanılıb. Əgər ən qısa zamanda ciddi tədbirlər görülməzsə, 2050-ci
illərə doğru getdikcə hava çirkliliyindən ölənlərin sayının ildə 6.6 milyona
qədər artacağı gözlənilir. Artıq bəzi ölkələr havanın çirklilik
dərəcəsini radio və televiziyalardan elan edirlər.
Son
söz: Çirkli hava tənəffüs və
ürək-damar sisteminə çox pis təsir edir. Bu səbəblə ürək çatışmazlığı və ya
xroniki ağciyər xəstəliyi olanların, eləcə də ürək damar xəstəliyi olan
insanlar havanın çox kirli olduğu zamanlarda evdən bayıra çıxmamalıdırlar. Bu cür
xəstələrin mümkün olduğu qədər havanın çox çirkli olduğu bölgələrdə yaşamaları da
məsləhətli deyil.