İqtisadi siyasətin prioritet istiqaməti
Azərbaycanın kənd
təsərrüfatı ölkə iqtisadiyyatının mühüm tərkib hissəsi kimi böyük inkişaf yolu
keçib. 90-cı illərin ortalarında ümummilli lider Heydər Əliyevin təşəbbüsü və
bilavasitə rəhbərliyi ilə həyata keçirilmiş aqrar islahatlar nəticəsində torpaq
üzərində xüsusi mülkiyyət münasibətləri formalaşıb və kənd təsərrüfatında köklü
dəyişikliklər baş verib. Belə ki, 1996-cı ildə ümummilli lider Heydər Əliyev
tərəfindən "Torpaq islahatı haqqında” Azərbaycan Respublikası Qanununun
imzalanması kənddə azad sahibkarlığın yaranmasının əsasını təşkil edib. Ulu
öndərin təşəbbüsü ilə Dövlət Aqrar İslahatı Komissiyasının yaradılması aqrar
islahatının istiqamətlərini, forma və mərhələlərini düzgün müəyyənləşdirməyə
imkan verib. Qısa bir müddətdə aqrar islahatların hüquqi bazasının yaradılması
və onların keyfiyyətcə yeni mərhələyə keçməsinə zəmin hazırlanıb. Bunun
nəticəsində isə aparılan proseslərin dönməzliyinə münbit şərait yaradılıb.
Azərbaycanda aqrar sahədə aparılan hüquqi və iqtisadi islahatlar
respublikamızın ərzaq təhlükəsizliyində əhəmiyyətli rol oynayıb. Bu baxımdan
Azərbaycan dövləti əhalinin ərzaqla etibarlı təminatına dair çoxşaxəli
tədbirlər həyata keçirib və ərzaq təhlükəsizliyinin birbaşa asılı olduğu aqrar
sahənin inkişafına yönələn irimiqyaslı dövlət proqramları qəbul edib.
Sevindirici haldır ki,
ümummilli lider Heydər Əliyevin böyük uzaqgörənliklə hazırlayıb həyata
keçirdiyi bu siyasət Prezident İlham Əliyev tərəfindən də uğurla davam
etdirilir. Bunun nəticəsidir ki, qeyri-neft sektorunun, o cümlədən kənd
təsərrüfatının inkişafı dövlət tərəfindən iqtisadi siyasətin prioritet
istiqamətlərindən biri kimi müəyyən edilib. Ərzaq təhlükəsizliyinin təmin
edilməsi sahəsində tədbirlərin sistemli və kompleks şəkildə həyata keçirilməsi
məqsədi ilə Azərbaycan Prezidentinin 2008-ci il 25 avqust tarixli 3004 nömrəli
Sərəncamı ilə "2008-2015-ci illərdə Azərbaycan Respublikasında əhalinin ərzaq
məhsulları ilə etibarlı təminatına dair Dövlət Proqramı” təsdiq edilib. Dövlət
fermerlər üçün bir sıra güzəştlər müəyyən edib. Kənd təsərrüfatı məhsulları
istehsalçıları, torpaq vergisi istisna olmaqla, digər vergilərdən azad
ediliblər. Əkin sahəsinin becərilməsində istifadə olunan yanacaq və motor
yağlarına görə istehsalçılara hər hektar üçün 40 manat, buğda və çəltik
istehsalçılarına isə hər hektar səpilmiş sahəyə görə əlavə olaraq 40 manat
subsidiya verilib. Fermer və sahibkarlar güzəştli şərtlərlə kredit, toxum,
gübrə, texnika, damazlıq mal-qara almaq imkanlarına malikdirlər. Hazırda da
yüksək məhsuldarlığın təmin edilməsi, yerli məhsulların rəqabət qabiliyyətinin
artırılması, kənd təsərrüfatının gəlirli sahələrinin inkişaf etdirilməsi,
fermerlərə dövlət dəstəyinin daha səmərəli təşkili və ərzaq təhlükəsizliyinə
nail olunması aqrar sahədə dövlət siyasətinin mühüm istiqamətləri olaraq
nəzərdə tutulur.
Söylənilənləri statistik
rəqəmlərin dili ilə ifadə etsək, qeyd edə bilərik ki, son illər Azərbaycanda
kənd təsərrüfatı sahəsində 900-ə yaxın yeni təsərrüfat subyekti yaradılıb. Bu, təxminən
3 milyon əhalinin işlə məşğuliyyəti deməkdir. Bununla yanaşı, indiyə qədər
həyata keçirilən regional inkişaf proqramları, qeyri-neft sektorunun inkişafı,
biznes mühitinin daha da yaxşılaşdırılması məqsədilə çoxsaylı fərman və
sərəncamların imzalanması, sahibkarlara güzəştli şərtlərlə 2 milyard manatdan
çox kreditlərin verilməsi də kənd təsərrüfatı sahəsinin inkişafında mühüm rol
oynayıb. Kənd təsərrüfatının ayrı-ayrı sahələrinə gəlincə, 2017-ci ildə 913,9
min ton və ya əvvəlki ilə nisbətən 1,3 faiz çox kartof, 1405,6 min ton (10,6
faiz çox) tərəvəz, 438,1 min ton (5,7 faiz az) bostan məhsulları yığılıb.
Dövlət Statistika Komitəsinin məlumatına görə, meyvə və giləmeyvə istehsalı
2017-ci ildə 8,2 faiz artaraq 954,8 min ton olub. İl ərzində əlavə olaraq 10942
hektarda fındıq, 971 hektarda nar, 471 hektarda xurma, 681 hektarda sitrus
meyvə bağları salınıb. Həmçinin ötən il 152,8 min ton (12,0 faiz çox) üzüm,
775,2 ton (23,7 faiz az) yaşıl çay yarpağı, 422,2 min ton (22,0 faiz çox) şəkər
çuğunduru, 30,6 min ton (78,1 faiz çox) dən üçün günəbaxan, 5213,2 ton (45,4
faiz çox) tütün yarpağı, 207,5 min ton (2,3 dəfə çox) pambıq yığılıb.
Bundan başqa, 2017-ci ildə
136,4 min hektar sahədə pambıq, 15,2 min hektar sahədə dən üçün günəbaxan, 13,8
min hektar sahədə şəkər çuğunduru, 3,2 min hektar sahədə isə tütün əkilib.
Dövlət Statistika Komitəsinin məlumatına görə, il ərzində həmin sahələrdən 30,6
min ton və ya 2016-cı ilin müvafiq dövrünə nisbətən 78,1 faiz çox dən üçün
günəbaxan, 422,2 min ton (22 faiz çox) şəkər çuğunduru, 5 min 213,2 ton (45,4
faiz çox) tütün yarpağı, 207,5 min ton (2,3 dəfə çox) pambıq yığılıb. Meyvə və
giləmeyvə istehsalı 8,2 faiz artaraq 954,8 min ton təşkil edib. İl ərzində
əlavə olaraq 10 min 942 hektarda fındıq, 971 hektarda nar, 471 hektarda xurma,
681 hektarda sitrus meyvə bağları salınıb. Bu məhsullar üzrə istehsal müvafiq
olaraq 45,5 (32,9 faiz çox), 156,8 (8 faiz çox), 147,2 (3 faiz çox) və 42,8
(8,4 faiz az) min ton olub. Ötən il, həmçinin 152,8 min ton (12 faiz çox) üzüm,
775,2 ton (23,7 faiz az) yaşıl çay yarpağı yığılıb.
Ət istehsalına gəlincə,
2017-ci ildə ölkə üzrə 540,5 min ton, yaxud əvvəlki ilə nisbətən 3,2 faiz çox
diri çəkidə ət, 2024,1 min ton (0,7 faiz çox) süd, 1714,0 milyon ədəd (6,5 faiz
çox) yumurta, 16,0 min ton (3,7 faiz az) yun, 245,2 ton (3,5 dəfə çox) barama
istehsal olunub. Dövlət Statistika Komitəsinin məlumatına görə ötən il 8465,6
min baş qoyun və keçi, 2679,3 min baş iribuynuzlu mal-qara, o cümlədən, 1289,8
min baş inək və camış mövcud olub. Cari il yanvarın 15-dək ölkə üzrə pambıq
qəbulu məntəqələrinə isə 207 min 391 ton məhsul təhvil verilib. Xatırladaq ki,
2015-ci ildə 18 min hektar çiyid səpilib, 35 min ton məhsul yığılmışdısa,
2016-cı ildə əkin sahəsi 51 min hektar, tədarük 89 min ton təşkil edib. 2017-ci
ildə pambıq tarlalarının sahəsi 136 min hektarı ötüb, məhsul yığımı isə 2016-cı
ilin ümumi göstəricisindən 2,3 dəfə çoxdur.
Bütün bu nailiyyətlərin
davamlı olması, kənd təsərrüfatının davamlı inkişaf etdirilməsi üçün Prezident
İlham Əliyev cari ilin əvvəlində "Çəltikçiliyin inkişafına dair 2018-2025-ci
illər üçün Dövlət Proqramı”nın təsdiq edilməsi haqqında”, "Çayçılığın
inkişafına dair 2018-2027-ci illər üçün Dövlət Proqramı”nın təsdiq edilməsi
haqqında”, "Sitrus meyvəçiliyinin inkişafına dair 2018-2025-ci illər üçün
Dövlət Proqramı”nın təsdiq edilməsi haqqında” Sərəncamlar imzalayıb. Yazının
sonunda bir daha vurğulayaq ki, Azərbaycanın kənd təsərrüfatında sağlam mühitin
formalaşdırılması, ərzaq təhlükəsizliyinin təmin olunması iqtisadi
strategiyanın əsas hədəflərindən biri hesab olunur. Dövlət başçısının həyata
keçirdiyi siyasət nəticəsində aqrar sahədə istehsal imkanlarının daha da
artırılması üçün önəmli addımlar atılır. Bunun nəticəsidir ki, ölkəmiz kənd
təsərrüfatı sahəsində böyük uğurlar qazanıb. Artıq kənd təsərrüfatı
məhsullarımızın xarici ölkələrə ixrac edilməsi də bu uğurların əyani
göstəricisidir.
Alpər TURAN