İqtidara qarşı təkidlə həyata keçirilən inkarçılıq xətti
Hər bir dövlətin inkişaf prioritetləri onun milli
maraqları ilə bilavasitə bağlıdır. 2004-cü ildə qüvvəyə minən "Milli təhlükəsizlik
haqqında” qanunda göstərilib ki, milli maraqlar - Azərbaycan xalqının
fundamental dəyər və məqsədlərinin, habelə insanın, cəmiyyətin və dövlətin
inkişaf və tərəqqisini təmin edən siyasi, iqtisadi, sosial və digər tələbatların
məcmusudur. 2007-ci ildə qəbul olunmuş Milli təhlükəsizlik
konsepsiyasında isə müstəqilliyimizin və ərazi bütövlüyümüzün qorunması birinci
sırada göstərilməklə, milli-dövlət maraqlarımızın doqquz istiqaməti qeyd
edilib.
İrqindən, cinsindən, milliyyətindən, siyasi əqidəsindən,
tutduğu vəzifədən asılı olmayaraq, Azərbaycan vətəndaşlığı daşıyan hər bir şəxs
milli-dövlət maraqlarından çıxış etməli, dövlətçiliyimizin daha da güclənməsi,
ölkəmizin inkişafı naminə öz əməyini, bilik və bacarığını əsirgəməməlidir.
Lakin əfsuslar olsun ki, müxalifətçilik libasına bürünən radikallar, xüsusən də
AXCP sədri Əli Kərimli və ətrafındakı "liderlər” şəxsi maraqlarını milli-dövlətçilik
maraqlarından irəlidə görür, şəxsi maraqları naminə ağa qara deməyi özlərinə
peşə seçirlər. Azərbaycan Prezidentinin
ictimai-siyasi məsələlər üzrə köməkçisi, professor Əli Həsənovun "İlham Əliyev
dövlətçiliyin keşiyində, antimilli qruplar hakimiyyət eşqində...” məqaləsində
vurğulandığı kimi, 1991-1993-cü illərdə ölkəni təhlükəli böhrana sürükləyən və
hakimiyyəti itirdikdən sonra radikal müxalifətçilik yolu tutmuş Əli Kərimli və
yaxın ətrafı ötən müddətdə öz səhvlərindən heç bir nəticə çıxarmayıb, əksinə,
radikal antimilli və qeyri-konstruktiv mövqelərini ardıcıl olaraq davam
etdiriblər.Ə.Həsənov qeyd edib ki, AXCP sədri və əqidədaşlarından
fərqli olaraq, Prezident İlham Əliyev və onun sadiq komandası, Azərbaycanın
müvafiq dövlət qurumları, bütün silahlı qüvvələrimiz hər zaman olduğu kimi, bu
gün də müstəqilliyimizin, dövlətçiliyimizin, milli maraqlarımızın keşiyində
möhkəm dayanıblar.
Millət vəkili, "Yeni
Azərbaycan” qəzetinin baş redaktoru Hikmət Babaoğlu "Kaspi” qəzetinə açıqlamasında deyib ki, dövlət ən
ciddi sosial-siyasi institut olmaqla cəmiyyətin sosial sifarişi nəticəsində
meydana gəlir. Onun sözlərinə görə, dövlət cəmiyyətin bütün təbəqələrinin
maraqlarını nəzərə almaqla xüsusi idarəetmə institutları yaradır. Millət vəkili
söyləyib ki, bir millətin təşkilatlanma və idarəetmə baxımından yarada biləcəyi
ən böyük sosial-siyasi institut dövlətdir: "Azərbaycan xalqı dövlət qurmaq
bacarığına və istedadına malik olan, eyni zamanda, qurduğu dövləti qorumağı
bacaran xalqdır. Tarixin müxtəlif mərhələlərində dövlətçiliklə bağlı müəyyən təhdidlər
ortaya çıxır. Azərbaycan dövlətçiliyinin 5 min illik tarixi sübut edir ki, məhz
belə kritik anlarda da Azərbaycan xalqı öz dövlətini qorumaqla, onun yaşamasını
təmin etməklə milli varlığını qorumağı bacarıb. Heç şübhəsiz ki, illər ötdükcə,
cəmiyyət inkişaf etdikcə dövlətin institusional qurumları da ixtisaslaşmağa
başlayır və cəmiyyətin özü inkişaf etdiyi kimi, onu idarə etmək üçün yaradılmış
struktur vahidləri də təkmilləşir. Azərbaycan mürəkkəb geostrateji rayonda uzun
illər ərzində öz milli maraqlarını müstəqil şəkildə müdafiə etməyi bacarıb”.
H.Babaoğlu bir müddət əvvəl Keşikçidağ ətrafında
baş verən insidenti xatırladaraq təəssüflə qeyd edib ki, həmin vaxt Gürcüstanda
və Azərbaycanda bu hadisələri qızışdırmağa, az qala iki ölkə arasında savaşa səbəb
olacaq məsələ kimi təqdim etməyə çalışan əsl təxribatçılar meydana çıxıb. Onun
sözlərinə görə, siyasi fəaliyyətlə məşğul olan, gələcəkdə siyasi hakimiyyətə
iddialı olan, müəyyən siyasi keçmişi olan və bu gün Azərbaycan xalqı qarşısında
ictimai məsuliyyət daşımalı olan Ə.Kərimli kimilərin prinsipial dövlətçilik məsələlərində
qızışdırıcı mövqe tutması əsl antimilli xarakterli təxribatdır: "Onlar, bəlkə də,
elə hesab edirlər ki, məsələyə bu cür yanaşmaqla Azərbaycan hakimiyyətini gözdən
salacaqlar, hansısa məqamda Azərbaycan hakimiyyətini cəsarətsizlikdə ittiham
etməklə siyasi dividend əldə edəcəklər. Amma xalqımız nəyin və nə üçün baş
verdiyini yaxşı bildiyi üçün radikallar əsla məqsədlərinə çata bilməyəcəklər. Ən
azı ona görə ki, bu hadisələrin niyə baş verdiyini, bəlkə də, sıravi vətəndaş
daha düzgün dərk edir və hakimiyyətin mövqeyini daha doğru hesab edir, nəinki
özlərini "siyasətçi” adlandıran və hakimiyyətə iddialı olan bu adamlar. Onların
məqsədi bu hadisədən Azərbaycan dövlətinə, Azərbaycan hakimiyyətinə qarşı
siyasi şantaj vasitəsi kimi istifadə etməkdir. Ancaq milli maraqlar əsas
götürüldükdə müxalifətin də, hakimiyyətin də ümdə vəzifəsi Azərbaycan dövlətini
qorumaq olmalıdır”.
Millət vəkili deyib ki, Azərbaycan xalqının, dövlətinin
maraqlarını təhdid etmək üçün düşünülmüş bu cür təxribatlar varsa, bərtərəf etmək
lazımdır: "Bütün dünyada sivil müxalifətin rolu ondan ibarətdir ki, belə
prinsipial məsələlərdə dövlətin və xalqın maraqlarını qorumağı bacarsın. Azərbaycan
xalqı müdrik xalqdır və bu gün nəyin, harada, nə üçün və nə zaman baş verdiyini
dərk edir. Bu gün əldə etdiyi digər nailiyyətlərlə bərabər, Azərbaycanın ən
böyük sərvəti onun qurduğu intellektual cəmiyyətdir. Belə savadlı və yetkin cəmiyyəti
bir qrup radikal, əlbəttə, manipulyasiya edə bilməz. Ona görə də Əli Kərimlilər
bu ümummilli məsələdə təxribatçı mövqe tutmaqla bir daha hakimiyyətə deyil, Azərbaycan
dövlətinə, xalqına qarşı müxalifətdə olduqlarını sübut etdilər”.
"Bakı xəbər” qəzetinin
baş redaktoru, siyasi şərhçi Aydın Quliyev bizimlə söhbətində qeyd edib ki, milli dövlətçilik
və demokratik prinsiplərə söykənən cəmiyyət quruculuğu iki vacib platforma
olmaqla, xüsusilə də II Dünya Müharibəsindən sonra əksər yeni yaranan dövlətlərdə
siyasi qüvvələri bir araya gətirən faktor rolu oynayıb. O bildirib ki, bu iki
platformanı bir-biri ilə ağılla əlaqələndirməyi bacaran siyasi qüvvələrin və
liderlərin uğur şansları nisbətən üstün olub: "Milli dövlətçiliyin əsaslarını
yaratmadan demokratik şüarlara populizm xatirinə üstünlük verənlər həmişə
uğursuzluğa düçar olublar. Azərbaycanda bu gün radikal müxalifət mövqeyində
duranlar məhz belə siyasətin qurbanı olublar. Bu siyasətin üzündən hakimiyyəti,
siyasi perspektivlərini itiriblər. Nəticədə qisasçı qüvvələrə çevriliblər.
1993-cü ildə təsadüfən hakimiyyətə gəldikləri və təcrübəsiz olduqları üçün
milli dövlət quruculuğunun dəqiq yollarını tapa bilmədilər, indi isə əsasən
itirdikləri hakimiyyətin qisas davasını döyən qüvvələrə çevrildikləri üçün
milli-dövlətçilik kimi təmkinli və prinsipial mövqe tuta bilmirlər. İndiki
müxalif radikal dairələr yalnız o zaman milli dövlətçilik mövqeyində qərarlaşa
biləcəklər ki, öz düşərgələrinin daxilində hakimiyyət dəyişikliyi aparsın,
ambisioz köhnə liderləri mövqelərindən qovsun və keçmiş tarixdən daha obyektiv
dərs götürməyi bacaranları önə çıxarsın”.
Rufik İSMAYILOV