İnsanları düzlüyə, namuslu həyata çağıran film - Fotolar
Müxtəlif
dövrlərdə ictimai həyatda gedən proseslərin, baş verən hadisələrin insanların
mənəviyyatına təsiri şübhəsizdir. Kino işçiləri mənəvi dəyərlərin insan
həyatında oynadığı rolun əhəmiyyətini qiymətləndirərək, bunu filmlərində müxtəlif
formada əks etdirməyə çalışıblar.
Məsələ
burasındadır ki, haqqında söhbət açdığımız milli-mənəvi məsələlər kinomuz üçün
yeni mövzu deyil. Əgər kino tariximizə diqqət yetirsək, hələ 1915-ci ildə
Bakıda çəkilmiş ilk Azərbaycan
tammetrajlı "Neft və milyonlar səltənətində” 2 seriyalı bədii filmində
bu mənəvi-əxlaqi prinsiplərin həllini tapdığını görə bilərik.
Sonrakı
illərdə bu mövzuda bir çox dəyərli film çəkilib: "Almaz”, "İsmət”, "Telefonçu
qız”, "Sən niyə susursan?”, "Qızıl qaz”, "Xatirələr sahili”, "Bir cənub
şəhərində”, "İstintaq”, "Yaramaz”, "Pəncərə”, "Ad günü” və s. kino əsərləri bu
qəbildəndir.
Bu
filmlərin əsas xüsusiyyətlərini təyin edən cəhət ondan ibarətdir ki, burada
qoyulan problemlər günün vacib məsələlərinə cavab verir. Müasir cəmiyyətin
ictimai proseslərini kinematoqrafik axtarışlarla dərindən və bütün kəskinliyi
ilə açıb göstərir, irəliyə getməyə maneçilik törədən nə varsa – biganəlik,
ikiüzlülük, üzgörənlilik və s. qarşı mübarizəni əks etdirir.
"Xatirələr
sahili” də film-düşüncədir. Əxlaqi-etik məsələlərə toxunan bu film gənclərin
cəmiyyət qarşısında məsuliyyəti, mənəvi əlaqələri haqqındadır.
Filmdə
Böyük Vətən müharibəsinin ağır illərində həyata qədəm qoymuş, müharibədən sonra
yetkinləşmiş adamlardan, onların doğma torpağı yeniləşdirməyə, daha da
zənginləşdirməyə, gözəlləşdirməyə çalışdıqlarından bəhs olunur.
Çətin
günlərin birləşdirdiyi bu uşaqlar indi necə yaşayırlar, onların taleyi necə
həll olunub, həyatlarında nə kimi dəyişikliklər baş verib? Film bu barədə
söhbət açır.
Oqtay
Orucovun ssenarisi əsasında rejissor Yalçın Əfəndiyevin quruluş verdiyi
"Xatirələr sahili” bədii filmi 1972-ci ilin məhsulu olsa da, burada qaldırılan
məsələlər bu gün də aktuallığını itirməyib.
...Beş
uşaqlıq dostu – Aydın, Kamran, İmran, Vəli və Səlim kənddə müharibə illərində
bir yerdə böyüyüb, boya-başa çatıblar. Müharibədən sonra ali savad alan
dostların yolları ayrılıb, hərə bir işin sahibi olub.
Aydın
jurnalistdir, Bakıda qəzetlərin birində müxbir işləyir. Kamran iri çay
sovxozunun direktorudur. İmran konserv zavodunun rəhbəri, Səlim tərəvəz
bazasının müdiridir. Vəli mədəniyyət işçisidir.
Səlim
dostlarından fərqli olaraq işlədiyi sahədə yeyintiyə yol verir və dövlətin külli
miqdarda vəsaitini mənimsəyir. Buna görə də məhkəmənin qərarı ilə ona 6 il iş
kəsilir.
Kamranla
Aydın bu məsələni müzakirə edərkən Kamran deyir: − Sən nə desən də, o,
oğrudur... adi oğrudur və onun gördüyü bütün işlərə görə 6 il həbs azdır.
Aydın
isə məsələyə başqa aspektdən yanaşır:
–
O, təkcə oğru deyil, o, həm də məktəbdə səninlə bir parta arxasında oturub.
Səlimin də sənin kimi uşaqlığı çətin olub. Mən anamla birgə atamın ölüm
xəbərini alandan bir həftə sonra o da sənin kimi atasının qara kağızını aldı.
Bu
söhbətdən belə başa düşmək olar ki, Səlim səhv etsə də, cinayət törətsə də dost
dosta mənəvi dayaq olmağa borcludur.
Məhkəmə
qurtarandan sonra Səlimin arvadı Xalidə məhkəmənin xalq iclasçısı olan Kamrana
ağzından çıxanı deyir, Səlimə kömək etmədiyinə görə onu təhqir edir: "Adamı
türməyə göndərdin, özün də qonaq qəbul edirsən, indi mən nə edim? Sizin
uşağınız yoxdur, məndə isə dördü var. Susursan? Bəlkə onları uşaq evinə
göndərəcəksən? Əgər sənin başına belə bir iş gəlsəydi, Səlim evini satardı... Səni
xilas edərdi...”
Göründüyü
kimi, Xalidə Kamranı cinayət törətmiş Səlimə hansı yolla olursa-olsun kömək
etməməkdə günahlandırır. Qadın başa düşmək istəmir ki, onun əri cinayətkardır, cəzasını
almalıdır.
Kamran
isə Aydınla söhbətində özünə belə haqq qazandırır: "Səncə, mən onun bazasında
oturub, dilə tutmalı idim ki, əzizim, oğurluq etmə. Yoxsa axırın pis olar...”
Aydının
cavabı təkcə Kamrana yox, elə tamaşaçılara da ünvanlanıb: "Kamran, mən
istəyirəm ki, təkcə özünə cavabdeh olmayasan.”
"Ən
vacib müsahibə” filminin qəhrəmanlarından biri deyir ki, "insanlar bir-birinə
borcludurlar.” Borclu sözü burada mənəvi kömək etmək mənasını daşıyır. Aydının
sözünə görə, insanlar həm də bir-birinə cavabdeh olmalıdırlar. Müdriklərdən
biri deyib ki, özünü insan adlandıran hər kəs biri-digərini ürəkdən sevib,
hörmət bəsləməlidir.
Filmin
süjet xətti elə qurulub ki, burada əvvəldən axıra kimi retrodan, yəni keçmişə
müraciətdən də istifadə olunur. Retrodan əsasən filmin baş qəhrəmanı Aydın
istifadə edir. Biz filmdə əvvəllər baş verən hadisələri məhz onun vasitəsilə
öyrənirik. O, tez-tez müharibə illərinin uşaqlıq çağlarını xatırlayır.
Aydının
daxili səsi də filmin bir çox epizodlarında eşidilir. "Bizdən soruşanda
deyirdik ki, atalarımız cəbhədədir. Bəs bu suala Səlimin uşaqları necə cavab
verəcəklər?...”
Filmdə
səslənən bu sual adamı çox dərin düşüncələrə aparır. Axı, bu gün də həbsxanalarda
analar, atalar aldıqları cəza müddətini çəkirlər. Görəsən həbsdə olanların
uşaqlarına verilən belə suallara onların cavabları necə olur? Görəsən həbsdə
olan valideynlər bu barədə heç düşünüblərmi?
Filmin
də maraqlı tərəflərindən biri istər övladların, istərsə də məhkum olunmuş
valideynlərin bu suallar ətrafında düşünmələridir.
"Xatirələr
sahili” insanları düzlüyə, namuslu əməyə və həyata, bir-birini başa düşməyə
çağırır, eyni zamanda incə mətləblərdən, yüksək insani keyfiyyətlərdən danışır,
insanlar arasındakı səmimi münasibətlərin vacibliyini xüsusi qeyd edir.
Bərəçi
Bəşir dayının Aydına dediyi bu sözlər fikrimizi bir daha təsdiq edir: "Eh,
Aydın, Kamrana indi demişəm, Sizə də deyirəm. Savadlı olmusunuz, institut
bitirmisiniz, uşaqlar böyütmüsünüz. Amma bir-birinizi qorumağı öyrənmədiniz.”
Haqlı iraddır, xüsusilə bu gün üçün.
İkinci
ibrətamiz misal. Aydın dostu Səlimin başına gələn bu əhvalatı işlədiyi
redaksiyada baş redaktora danışarkən onun cavabında tamaşaçını düşünməyə sövq
edir: "İnsanın daxilində çürümə nədən baş verir? Özüm belələri ilə hərdən
rastlaşmışam. Xaricən sanki sağlamdır, daxilən isə... daxildən onu hansısa qurd
yeyir...”
Filmdə
səslənən bu iradları eşidəndən sonra baş verən cinayətlərin kökünün haradan
başlaması barədə istər-istəməz fikirləşməli olursan.
Kiminin
varlanmaq hərisliyi gözlərini tutur, kimi zəhmət çəkmədən asan yolla qazanc
əldə etmək istəyir, kimisi də cəzasız qalacağına əmin olub cinayət törədir.
Məncə, əksər cinayətlərin kökündə nəfs, tamah, gözü doymamaq durur.
Nəfs,
tamah haqqında müdriklər, yazıçılar sənət adamları nəsihətamiz fikirlər
söyləyib, adamları pis əməllərdən çəkindirməyə çalışıblar. Məsələn,
folklorumuzda belə bir misal var: "Tamahkarın gözü kor olar.”
Aşıq
Ələsgər isə deyib ki,
Aldanıb
dünyanın cah-cəlalına,
Haram
qarışdıran öz halalına,
Xəyanət
eyləyən qonşu malına
Haqqın
divanında qaldı da getdi.
Filmdə
iki məqama diqqət yetirmək lazımdır.
Onu
da qeyd edək ki, filmdə xalqımızın ən əziz bayramı – Novruz bayramı hadisələrə
uyğun öz əksini tapıb. Ümumiyyətlə, Azərbaycan kinosunda Novruz bayramı
mövzusuna beş dəfə müraciət olunub. İlk dəfəbu müraciətə "Dəli Kür” filmində (1969), sonralar "Yeddi
oğul istərəm” (1979), "Xatirələr sahili” (1972), "Qızıl uçurum” (1980) və "Qara
gölün cəngavərləri” (1984) bədii filmlərində rast gəlirik.
"Xatirələr
sahili” filmində baş qəhrəman Aydın uşaqlıq illərini xatırlayaraq deyir: "Anamı
dəfn edəndən iki həftə sonra Novruz bayramı gəldi.”
Ekranda
uşaqlar əllərində məşəllər və şamlar kənd meydançasında alovlanan ocağa doğru
cumurlar. Cavanlar əl-ələ verib, alovun ətrafında rəqs edir, deyib gülürlər.
Aydının
daxili səsi eşidilir: "Bizim tərəflərdə Bahar bayramını belə adlandırırlar.
Dörd il ərzində (Böyük Vətən müharibəsi nəzərdə tutulur – A.K.) onun barəsində
unutmuşdular. Amma indi 45-ci ilin mart ayı idi. Hamı elə bil zəncirdən
qırılmışdı. Bütün kəndə bircə dənə də qara kağız gəlməmişdi. Biz hamımız,
Vəlidən başqa, atalarımızın qara kağızlarını almışdıq...”
Aydın
evə gəlib şamı yandırır. Sonra cibindən qovurulmuş buğdanı çıxararaq şamın
ətrafına səpələyir. Və uzun müddət fikrə dalıb yanan şama baxır.
Filmə
Bahar bayramı epizodu təsadüfən daxil edilməyib. Bir tərəfdən müharibənin başa
çatması ilə əlaqədar adamların əhval-ruhiyyəsində baş verən müsbət
dəyişikliklər, digər tərəfdən Aydının anasını itirəndən sonra bayram axşamı
evdə şam yandırması – bütün bunlar həyatın davam etməsinə bir işarədir.
Filmdə
ikinci məqam məşhur amerikan yazıçısı, Nobel mükafatı laureatı Ernest
Heminqueylə bağlıdır. Yazıçının əsərləri dünyanın hər yerində, o cümlədən
Azərbaycanda çox populyar idi. Xüsusilə 60-70-ci illərdə Bakıda bir sıra mənzil
və idarələrdə kitab rəflərinə qoyulmuş, divardan asılmış yazıçının portretini
görmək olardı. Həmin portret Aydının mənzilində, iş otağında da olduğu üçün
bizə o dövrü xatırladır.
Filmin
yaradıcıları, xüsusilə quruluşçu rəssamlar Firəngiz Qurbanova və Fikrət Əhədov
dövrlə bağlı bu detaldan yerində istifadə ediblər.
Hər
zaman operatorluq sənətindəki səliqə-sahmanı ilə seçilən Zaur Məhərrəmov nəinki
filmdə baş verən dramatik hadisələri, dövrün ab-havasını, həm də qəhrəmanların
vəziyyətlə bağlı keçirdikləri psixoloji sarsıntıları, onların iç dünyasını müasir
kino dili ilə ekranda canlandıra bilib. Quruluşçu operator respublikamızın göz
oxşayan təbiət mənzərələrini məharətlə lentə alıb, filmdə müasir gənclərimizə
xas olan xüsusiyyətləri canlandırıb.
Bəstəkar
Xəyyam Mirzəzadə bu psixoloji filmin janrına uyğun mahnı və musiqi parçaları
bəstələyib, bu musiqi parçaları personajların mənəvi aləmlərinin qabarıq
şəkildə nəzərə çarpmasında əhəmiyyətli rol oynayıb. Filmdə mahnını estrada
müğənnisi Oqtay Ağayev ifa edir.
"Xatirələr
sahili”ndə maraqlı aktyor ansamblı iştirak edir. Aktyorlardan Tofiq Mirzəyev
Aydının, Həsənağa Turabaov Kamranın, Əliabbas Qədirov İmranın, Rafiq Əzimov
Vəlinin obrazlarını yaradıb. Səlimin rolu kiçik olduğuna görə aktyor Gümrah Rəhimov
epizodda çıxış edib.
Beş
dostun uşaqlıqlarını isə Samir Səlimov, Comərd Əliyev, Ələkbər Əliyev, Çingiz
Quliyev və Bəhruz Qarayev ifa edib.
Digər
rollarda Murad Heydərov (Murad), Amaliya Pənahova (Xalidə), Telman Adıgözəlov
(Şamil), Ələddin Abbasov (Əhməd dayı), Zemfira Sadıxova (Əminə) oynayırlar.
Aydın
Kazımzadə