İnsanları bir araya gətirən kitab - Fotolar
Bakı VI
Beynəlxalq sərgi-yarmarkası başa çatdı. Oxucuların, ədəbiyyat adamlarının,
kitab həvəskarlarının yaddaşında kitabla, kitabı sevən insanlarla təmas və xoş
xatirələr qaldı. Əlbəttə, sərgi-yarmarka ilə bağlı iştirakçıların bir sıra təklifləri
və arzuları da səsləndi. Təklif və arzular reallaşarsa, ölkəmizdə bu tip tədbirlər
daha mükəmməl keçirilər və kitabın təbliğatında böyük rol oynaya bilər. "Kaspi” kitab sərgi-yarmarkasının yekunu ilə bağlı tədbirdə iştirak edən ziyalıların təəssüratları
ilə yanaşı, təşkilatçıların da səslənən təkliflərə münasibətini öyrənib.
Hələlik Bakı İdman Sarayı
"Təşkilatçı
olaraq yarmarkaya gələn insanların razılığı bizim üçün ən böyük göstəricidir”-
deyən Mədəniyyət
Nazirliyi Kitab dövriyyəsi və nəşriyyatlarla işşöbəsinin müdiriAslan Cəfərov hesab edir ki, kitab
yarmarkası hər il keçirilsə, kitaba maraq da güclənər, oxucu da çoxalar:
"Müasir texnologiyalar insanları bir qədər kitabdan uzaqlaşdırıb. 1990-cı illərin
axırı -2000-ci illərin əvvəlindən başlayaraq internet, mobil telefonlar
yaranandan bəri kitaba münasibət dəyişib. Yəni kitablar bir qədər insanlardan
uzaqlaşıb. Artıq sevindirici haldır ki, insanlar yenidən kitaba doğru gəlir, həmçinin
kitablar insanlara yaxınlaşır - bu, qarşılıqlıdır. Biz də çalışırıq ki,
insanlarımız daha çox mütaliə etsin”. Mediada və sosial şəbəkələrdə kitab
yarmarkası haqqında xoş fikirlər yazıldığını deyən nazirlik rəsmisi, səslənən təkliflərə
də münasibətini bildirdi: "Təkliflər olunur ki,
yarmarka günlərinin sayını çoxaltmaq lazımdır. Məkanın darısqal olması
ilə bağlı səslənən fikirlərə gəlincə, hələlik şəhərin mərkəzinə yaxın elə bir məkan
yoxdur. Açıq havada da bu fəsildə yarmarkanı keçirmək münasib deyil. Daha geniş
məkan deyəndə, "Ekspo” mərkəzini nəzərdə
tuta bilərik. Amma hazırkı vaxtda insanları həmin sərgi salonuna aparmaq da o qədər
asan deyil. Düzdür, sərgi salonu uzaq məsafədə yerləşsə belə, kitabsevərlər gələcək,
ancaq əhalinin əksəriyyəti gəlməyəcək. Bəlkə biz bu gün "Ekspo” mərkəzə getsək,
insanlarımızı yenə kitabdan uzaqlaşdırmış olarıq. Amma Bakı İdman Sarayına
insanlar öz körpə uşaqları ilə də gələ bilirlər. Mənə elə gəlir ki, hələ bir
neçə il də kitab yarmarkasını şəhərin mərkəzində keçirməliyik. Yarmarkanı
keçirmək üçün çox yerlərə baxmışıq və müzakirələr etmişik. Ən uğurlu yer Bakı
İdman Sarayı sayılıb».
Qiymətlərdə endirimlərin olması
Professor Rüstəm Kamal Azərbaycan oxucusunun yarmarkaya axını və kitaba
marağın güclənməsini ürəkaçan məqam kimi dəyərləndirir: "Keçən ilki yarmarkada
mənzərə belə deyildi. Onda insanlar tədbirə az gəlmişdi. Bu il isə qələbəlik
idi. Kitab insanları bir araya gətirdi. Müəyyən müəlliflər öz əsərlərinin
satışını təşkil edə bilmişdilər. Hesab edirəm ki, kitab sərgilərinin olması,
yarmarkaların təşkili Bakı şəhərinin obrazını da dəyişir. Kitab özü böyük bir mədəniyyətdir.
Bakı kimi şəhərlərdə kitab sərgi və festivallarının, yarmarkaların keçirilməsi
çox vacibdir”. Hər kitab yarmarkasında iştirak etdiyini deyən ədəbiyyatşünas
alim, müşahidələrindən danışaraq xarici kitab nəşriyyatlarının az təmsil
olunmasına təəssüfünü bildirdi: "Bu məqam məni bir az təəssüfləndirdi. Azərbaycan
kitabı isə tam mənzərəsi ilə yarmarkada təmsil olunurdu. Mən, hətta, ildə bir dəfə
respublika səviyyəli kitab yarmarkasının olmasının da tərəfdarıyam. Ayrı-ayrı ustad
dərslərinin təşkil olunmasını istərdim. Yazıçılarla, ədəbiyyatşünas alimlərlə
oxucuların görüşlərinin daha çox keçirilməsi yaxşı olardı. Azyaşlı uşaqlar uşaq
yazıçılarını canlı görüb tanıyaydılar. Bu cür yarmarkalar ölkənin böyük şəhərləri
ilə birgə də keçirilə bilər. Bu da kitabın təbliğatına təkan verər”. Alimin
fikrincə, yarmarkada qiymətlərdə endirimlərin olması da çox vacibdir: "Bütün
kitablara endirimlər olsa, yaxşıdır. Kitablar dükanlardakı satış qiymətlərindən
fərqli olaraq hamıya əlçatan qiymətdə satılmalıdır. Qoy nəşriyyatlar 50-100
kitabı endirimli qiymətlə satmaq üçün nəşr etsinlər. Bununla ziyana düşməzlər,
ancaq bu, kitabın təbliğatı ola bilər”. R.Kamalın fikrincə, kitab yarmarkasının
kontekstində Nəsiminin 650 illiyi ilə bağlı tədbirin keçirilməsi də sərgi-yarmarkanın
statusunu qaldırıb.
Kitabdan ƏDV-nin götürülməsi
Kitabın
təbliği və insanların cəlb olunması baxımından kitab yarmarkasını Mədəniyyət
Nazirliyinin uğurlu layihələrindən biri adlandıran «525-ci qəzet»in baş redaktoru, Yazıçılar Birliyinin gənclərlə iş üzrə katibi Rəşad Məcidindiyə qədər Bakıda keçirilən kitab sərgi yarmarkalarının hamısında iştirak
etdiyini deyir: «Fikrimcə, budəfəki yarmarka keçən ildəkilərlə müqayisədə daha
qələbəlik idi. Mən insanların kitaba daha çox marağının şahidi oldum. Bu, bizdə
xoş təəssürat yaratdı. İmza günlərinin də çox olması, müəlliflərin kitablarının
çapı da yarmarkaya marağı artırmışdı. Həmçinin oxucuların, millət vəkillərinin,
dövlət rəsmilərinin iştirakı da yarmarkaya olan marağın nəticəsi idi. Onların
yarmarkaya təkcə kitaba baxmaq üçün yox, kitab almaq üçün gəlmələri sevindirici
hadisə idi. Yarmarka günlərində mən həmin məkanda oldum və yaddaşımda xoş bir
xatirə qaldı. İnsanlar hamısı bir-birinə yaxınlaşır, bir-birlərini kitab
bayramı münasibəti ilə təbrik edirdilər. Doğurdan da, bu, bir bayram idi. Kitab
oxuyan, kitabı sevən insanlar fərqli adamlardı. Onların xoş aurası var». R.Məcidin
sözlərinə görə, yarmarkada «Qanun» nəşriyyatı ciddi fəallığı ilə seçilib. Belə
ki, nəşriyyat çoxlu imza günləri, o cümlədən məşhur fransız yazıçısı Jan Kristof Rüfənin kitabının
imza gününü keçirib: "O cümlədən, "TEAS-press” nəşriyyatının, Azərbaycan Tərcümə
Mərkəzinin, Azərbaycan Yazıçılar Birliyinin, "XAN” nəşriyyatının stendləri də
yaddaqalan idi. Hesab edirəm ki, kitab sənayesinin inkişafı, müəlliflərin
qonorar alması, kitablarının çapı nəşriyyatların rəqabət şəraitində inkişafı ilə
bağlıdır. Nəşriyyatlar rəqabətə uyğun olaraq nə qədər çox inkişaf etsələr, müəlliflərin
də gələcəkdə cəlb olunması istiqamətində addımlar atılacaq. Bu baxımdan sərgi-yarmarka
kitabın təbliği üçün dövlətin yaratdığı bir şəraitdir”. R.Məcid hesab edir ki,
bundan sonra da kitab çapı ilə bağlı qanunlarda müəyyən dəyişikliklərin
olmasına, proqramın qəbul olunmasına ehtiyac var: "Kitabdan ƏDV-nin götürülməsi,
kitab mağazalar şəbəkəsində vergilərin azaldılması, xüsusən bölgələrdə kitab
mağazalarının yaradılması çox vacib məsələdir. Hesab edirəm ki, bu yarmarkanın
da çox böyük təsiri oldu. Bu onu göstərir ki, Azərbaycanda ən müxtəlif nəsillərin
nümayəndələri, xüsusən gənclər kitaba maraq göstərirlər». Sərgi-yarmarkada iki
kitabının imza gününün keçirildiyini deyən R.Məcid «Qələmsiz yazılanlar»
kitabının ən çox satılan kitablar sırasında olduğunu qeyd etdi: «Bu, sosial şəbəkə
ədəbiyyatının bir nümunəsi idi. Ona görə, artıq yazıçı və şairlərimiz
oxucuların marağını nəzərə alıb, dövrə uyğun belə mövzular, əsərlər
yaratmalıdırlar ki, diqqəti cəlb edə bilsinlər».
Xarici nəşriyyatların cəlbi
Yazıçı-publisist Mirmehdi Ağaoglu hesab edir ki,
əvvəlki illərə nəzərən budəfəki sərgi-yarmarka xeyli maraqlı keçib: "Mən sərginin
birinci günü və sonuncu günləri orada oldum. Deyim ki, gələnlərin ardı-arası kəsilmirdi.
Xüsusən "Qanun”, "Xan”, "Parlaq imzalar”, "Teas Press” nəşriyyatlarının,
"Bakumoz”un stendinin qarşısında demək olar, 3 gün boyu qələbəlik yaşandı. Yarmarkada
hər yaş qrupundan alıcıların olduğunu gördüm. Bu onu göstərir ki, son illərdə
ölkədə kitab oxuyanların sayı xeyli dərəcədə artıb, kitaba maraq güclənib”.
Yazıçı bir-birindən maraqlı imza günlərinin keçirilməsini təqdirəlayiq hal
hesab edir: "Bildiyim qədər, hətta bir xarici yazıçının da imza günü keçirildi.
Bütün bu müsbət cəhətlərlə yanaşı, onu da deyim ki, xarici nəşriyyatlar yox dərəcəsində
idi. Yaxşı olardı, bizə daha yaxın olan Rusiya və Türkiyə nəşriyyatları bu sərgi-yarmarkada
iştirak edərdilər. Görünür, Türkiyənin nəhəng nəşriyyatları Azərbaycana gəlməyi
rentabelli hesab etmirlər. Ancaq düşünürəm ki, hər halda, onları Bakı
yarmarkasına gəlmək üçün cəlb etməyin
hansısa bir yolunu tapmaq olar. Yəqin növbəti illərdə Bakı Yarmarkasının
miqyası daha da güclənər, xarici nəşriyyatlar da lazımı şəkildə təmsil
olunarlar”.
Gələcəyin oxucuları
Yazıçı-şair Kənan Hacı yarmarkanın böyük coşqu ilə keçdiyini deyir: «Tədbirdə
böyük qələbəlik gördüm. Bir yazıçı olaraq qürur duydum. Kitabın təbliğində,
satışında, oxunmasında əvvəlki illərə nisbətən böyük irəliləyiş olduğunu hiss
etdim. Yarmarkaya böyük insan axını var idi”. İmza gününün də xeyli izdihamlı keçdiyini
deyən K.Hacı yarmarka üçün daha böyük məkanın olmasını vacib hesab edir:
"İnsanlar artıq yarmarka günlərində Bakı İdman Sarayına sığmırlar. Arzu edərdim
ki, bu tipli sərgilər ildə 2-3 dəfə və daha geniş məkanlarda keçirilsin.
Yarmarkada iştirak edənlərin çoxu gənclər - gələcəyin oxucuları idi. Bu, bizi
sevindirir. Gənclər axın-axın gəlirdilər, bu, çox ürəkaçan mənzərə idi. Hiss
olunur ki, Azərbaycanda oxucu var».
Üç aydan bir keçirilsin
"Milli mətbuatımızın banisi, görkəmli maarifçi və dəyərli
ziyalımız Həsən bəy Zərdabi deyirdi ki, yaxşı kitab çox qiymətli xəzinədir. Bu
gün xəzinə dalınca getdim və deyəsən tapdım. Sərgi yox, sanki xəzinələr adası
idi”- deyə sərgi-yarmarkada iştirakından məmnunluğunu "Facebook” profilində
paylaşan Azərbaycan Respublikası Nazirlər Kabineti
Aparatının mətbuat xidmətinin rəhbəri Ayaz Mirzəyev yarmarkaya böyük həvəslə qatıldığını deyir: "Bazar günü olmasına rəğmən, böyük həvəslə
kitab yarmarkasına getdim. Mənim uşaqlıqdan, məktəb illərindən kitaba, xüsusən
kitab qoxusuna böyük bağlılığım var. Bir ay ərzində 30, yəni hər gün bir kitab
oxuya bilərdim. İndi bunu fiziki olaraq çatdıra bilməsəm də, bu sevimli məşğuliyyətimdən
uzaq düşməməyə çalışıram. Kitaba böyük marağım var. Bu baxımdan kitab sərgisi də
ürəyimcə oldu”. A.Mirzəyev yarmarkada hər oxucunun zövqünə, istəyinə uyğun
kitabların yer aldığını söyləyir: "Mən bir neçə kitab aldım. Bəzilərinin müəllifləri
ilə tanış oldum. Kitabların imza günündə iştirak etdim”. A.Mirzəyev bu cür sərgilərin
hətta üç aydan bir keçirilməsini arzulayır: "Yarmarkada qarşılaşdığım mənzərədən
çox sevindim. Bəzən deyirlər ki, oxucu sayı, gənclərin kitaba marağı azalıb,
uşaqlar virtual dünyaya üstünlük verir, kitaba yaxın durmurlar və s. Bu, əslində
mübahisəli fikirdir. Mən bu fikirlərin yanlış olduğunu yarmarkada müşahidə
etdim. Sərgidə çoxlu gənclər, uşaqlar vardı. Onlar kitablar alır, əsərlərlə
bağlı müzakirələr aparır, müəlliflərlə şəkil çəkdirirdilər. Bu ümumi bir bayram
idi. Mən belə bir bayramın iştirakçısı olduğuma görə çox sevindim”.
Təranə Məhərrəmova