İnsanlar qənaət etməyə öyrənəcəklər
Ötən il dünya bazarında neftin qiymətinin kəskin
ucuzlaşmasına, neft ixrac edən dövlətlərdən biri kimi Azərbaycanın gəlirlərinin
azalmasına, manatın iki dəfə devalvasiyaya uğramasına səbəb olub. Yaranmış şəraitə
uyğun olaraq, Azərbaycan prezidentinin rəhbərliyi altında yeni iqtisadi
prioritetlər elan olunub, çevik iqtisadi siyasət, zəruri islahatlar həyata
keçirilib. Biz sözlə, bütün zəruri addımlar atılıb ki, ölkə əhalisinin sosial təminatında
hər hansı problemlər yaranmasın və yarnmayıb da. Lakin bununla belə, dövlətin
bir sıra sosial öhdəliklərini yerinə yetirməsi üçün bəzi sahələrdə, xüsusən də
kommunal xidmət sektorunda qiymətlərin real tələblərə uyğunlaşdırılması zərurətə
çevrilib. Məhz bu zərurətdən irəli gələrək, noyabrın 28-də Tarif Şurasının
elektrik enerjisi və təbii qazla bağlı yeni tarif tənzimlənməsi barədə qərar qəbul
edib. Amma bu qərarda da ölkədə aparılan sosialyönümlü siyasət nəzərə alınıb, əhalinin
aztəminatlı təbəqəsinin sosial müdafiəsi məqsədilə bir çox ölkələrin təcrübəsində
mövcud olan diferensial tarif yanaşması, optimal qiymətlərin tətbiqi daha məqsədəuyğun
hesab olunub.
İqtisadiyyat
Nazirliyinin İqtisadi İslahatlar Elmi-Tədqiqat İnstitutunun aparıcı elmi
işçisi, iqtisadçı-ekspert Pərviz
Heydərovmövzu ilə bağlı "Kaspi”yə açıqlamasında bildirib ki, hər şey dəyişir, bahalaşır
və qiymətlər artır. O, belə olan halda bəzi kommunal xidmətlərin bahalaşması da
normaldır: "Təbii qazın qiymətinə
sonuncu dəfə 3 il bundan qabaq – 2013-cü ildə baxılıb. Həmin ildən təbii qazın
pərakəndə satışı 1000 m3
üçün 100 manat müəyyən edilib ki, bu da 1 m3-ə 10 qəpik demək idi. İşığın qiymətinə
isə sonuncu dəfə bu ilin yayında baxılıb. 2016-cı il 14 iyul tarixində Tarif
Şurasının növbəti iclasında "Azərişıq” ilə "Azərenerji” ASC-lərin müraciətləri əsasında
elektrik enerjisinin ölkədaxili tariflərinin tənzimlənməsi barədə qərar qəbul
edilib. Həmin qərara görə, 1 kilovat/saat elektrik enerjisinin topdansatış qiyməti
4,3 qəpik, pərakəndə satışı 7 qəpik müəyyən olunub. Buna qədər isə elektrik
enerjisinin pərakəndə satış qiyməti düz 10 il qabaq, yəni 2007-ci ilin
yanvarından 6 qəpik təyin edilib. Aradan keçən müddət ərzində ölkədə elə bir
sahə olmayıb ki, qiymət artımı baş verməsin. Ən azı, manatın dollar qarşısında
2 dəfə devalvasiyaya uğradığı faktını nəzərə almalıyıq. Bizlər istəyirik ki, bəzi istiqamətlərdə bu, özünü göstərməsin - baş verməsin.
Bu isə mümkün deyil”.
İqtisadçı ekspert deyib
ki, Tarif Şurası bu dəfə qiymət artımlarına
diferensiallaşdırılmış şəkildə yanaşmağa məcbur olub. Onun fikrincə, bu, ölkəmizdə
neçə illərdən bəridir, həyata keçirilən ümumi qiymət siyasətində ilk belə
haldır: "İndiyədək demək olar ki, heç bir sahədə və istiqamətdə qiymətlərdə
differensiallaşdırma tədbiq olunmayıb. Hesab edirəm, buna indiki şəraitdə böyük
ehtiyac var idi. Çünki əhalinin ölkənin istehlak bazarında son qiymət
artımları, inflyasiya, manatın kəskin ucuzlaşması tendensiyaları ilə əlaqədar
sosial-iqtisadi vəziyyəti - real gəlirləri xeyli dərəcədə azalmış və zəifləmiş
vəziyyətdədir. Nəzərə alsaq ki, qazın tarifi təqribən, 2 dəfə, işığınkı isə 1,6
dəfə artırılıb, bunun hamı üçün eyni dərəcədə tətbiq olunması vətəndaşların aztəminatlı
təbəqəsi üçün onların sosial-iqtisadi durumu baxımdan, böyük fəsadlar yarada
bilərdi. Və nəticədə yığım faizi özü belə, aşağı düşəcəkdi. Ona görə də belə
bir addım atılıb”.
İqtisad elmləri doktoru,
professor Fikrət Yusifov isə bildirib ki, son qiymət artımı əhalinin 70 faizə qədərinə
aid olmayacaq. O, enerjidaşıyıcıların tarif artımının pozitiv tərəflərini də diqqətə çatdırıb: "Dövlət Neft Şirkətinin rəsmi məlumatlarına
görə, hazırda ölkə əhalisinin 62 faizinin qaz istehlakı illik 1500 kubmetr həddini
keçmir. "Azərişıq” ASC-dən əldə etdiyimiz məlumata görə, əhalinin 75 faizinin
aylıq elektrik enerji sərfiyatı 250 kilovat saatdan çox deyil. Deməli, orta
hesabla qaz və işığın qiymətindəki dəyişikliklər əhalinin təxminən 70 faizinə
aid olmayacaq. Tariflərdə edilən dəyişikliklərdən sonra, insanların qənaət
rejiminə keçməsi nəticəsində, bir il ərzində bu rəqəmin daha 10 faiz artaraq,
80 faizə çatacağı gözləniləndir.Əhalinin yerdə qalan 20 faiz imkanlı təbəqəsi
tərəfindən qaz və elektrik enerjisinin limitdən artıq sərfinə görə artan tariflərlə
ödəniş etməsi isə tam normal bir haldır. Bununla yanaşı, enerjidaşıyıcıların
tarif artımının pozitiv tərəfləri də var. Birincisi, insanlar real olaraq qənaət
etməyə öyrənəcəklər. Razılaşaq ki, biz çox az hallarda qənaət haqqında düşünə
bilirik. Qənaət haqqında düşünə bilmədiyimizi sübut edən kifayət qədər "yaxşı”
nümunələrimiz var. Məsələn, toy məclislərimizə dəvət etdiyimiz insanlara
onların bir axşam yeyə biləcəyindən 10-20 dəfə çox yemək təklif etməyimiz,
dünyasını dəyişən yaxınımıza yas mərasimi vermək üçün imkanımız olmasa belə,
bankdan kredit götürüb yüzlərlə insana "ehsan” verməyimiz bu sıradan olan israfçılığımızın
bariz nümunələridir. Görəsən özümüzdən başqa kim bizi bu israfçılığa məcbur edə
bilər? Heç kim! Bu siyahıları kifayət qədər genişləndirmək mümkündür.
Doğrudan da biz nə vaxtsa qənaət etməyi öyrənməyə başlamalıyıq. Digər tərəfdən,
yeni tariflər insanlarımızı alternativ enerji mənbələrindən istifadə etməyə
stimullaşdıracaq. Bu gün artıq dünyanın bir çox ölkələrində bu sahədə böyük
nailiyyətlər əldə olunub. Ölkəmizdə isə günəş və külək enerjisindən istifadə
etmək imkanları kifayət qədər böyükdür”.
Alpər TURAN