İnsan xarakteri dəyişə bilərmi? - Polemika
"İnsanyeddi yaşında necədirsə,yetmişində də odur”
– deyirlər. "İlan qabığını dəyişər, xasiyyətini dəyişməz” kimi
bir atalar sözümüz də var. Yəni, insan necə gəlibsə, elə də gedəcək. Onun
xarakterini dəyişmək mümkün deyil. Lakin digər qisim isə iddia edir ki, insan
yaşa dolub, həyat təcrübəsini artırdıqca, kənar təsirlər, yaşadığı hadisələr,
düşdüyü mühit onun xarakterinə ciddi təsir göstərə bilir. Bəs görəsən,
gənclərimiz bu haqda nə düşünürlər? İnsanın xarakteri dəyişə bilərmi?
Xarakter heç vaxt tam olaraq
dəyişmir
Həşim Sərablı, tələbə
Həşim
fikirləşir ki, xarakter insanı fərd edən ən başlıca amildir: "Ümumiyyətlə,
fərdləri fərqləndirərkən onların xarici görünüşü ilə bərabər, necə insan
olması, xarakteri də bir o qədər önəmlidir. Xarakterin zamanla dəyişilməsinə
gəldikdə isə bu, bir qədər fərqli məsələdir. Belə ki, güclü iradəyə sahib
insanların xarakteri daha möhkəm olur. Adətən, güclü xarakterə malik insanlar hətta yanlışlarını gördüyü zaman da
bəzən hər hansı dəyişikliyə getmək istəmirlər. Amma bir qisim insanlar var ki,
zaman-zaman kiminsə təsirinə düşərkən, xarakterində müəyyən dəyişikliklər
yarana bilir. Təbii ki, tam olaraq heç bir fərdin xarakterini dəyişdirmək
olmur. Sadəcə, təbliğat yolu ilə fərdin özünün də səhv olduğunu başa düşdüyü
müəyyən xarakteri dəyişmək olar”.
Həşim qeyd
etdi ki, bir fərd öz xarakterini tam olaraq dəyişməməlidir: "Əlbəttə, yanlış
olduğu, səhvlərə yol verdiyi halda, dəyişiklik edilməsi normaldır, amma
bütünlükdə xarakteri dəyişmək yaxşı hal sayıla bilməz və məncə, bu, mümkün
deyil. Çünki xarakter insanın kimliyindən xəbər verir. İnsan qısa müddət
ərzində xarakterini dəyişirsə, deməli, tez-tez öz kimliyini, şəxsiyyətini də
dəyişir”,
Xarakter dəyişkən bir məfhumdur
Elvin Paşazadə, jurnalist
Elvin isə
deyir ki, xarakter insanın özünəməxsus davranış formasıdır. Lakin əlavə
təsirlər xarakterin dəyişməsinə səbəb olur: "Psixologiyada belə bir anlam var
ki, istənilən insanda müxtəlif temperament tiplərinin xüsusiyyətləri özünü əks
etdirir. Temperamentin formalaşmasında isə ətraf mühit, həyat tərzi, insana
verilən tərbiyə ciddi şəkildə təsirini göstərir. Ona görə də şəxs daha çox uşaq
və yeniyetməlik çağlarında bu təsirə məruz qalır. Zaman keçdikcə həmin təsirlər
özünü göstərməkdə davam edir. Özümüz də bəzən gülərüz, həmişə ətrafındakılara
sevinc bəxş edən uşağın böyüdükcə tədricən dəyişdiyinin şahidi oluruq. Və yaxud
əksinə. Məhz bu səbəbdən də insan xarakterinin dəyişkən olduğunu demək olar.
Nadir hallarda ola bilər ki, bir insan xarakteri dəyişməz olaraq qalsın. Nümunə
kimi özümü deyə bilərəm ki, xarakterim dəyişkəndir və melanxolikdir. Mənimlə
eyni xarakterdə olan insanları anlamaq
digər şəxslərə bəzi hallarda çətinlik yaradır”.
Elvin
bildirdi ki, xarakterin dəyişkən olması yaxşı və arzuolunan hal deyil, lakin
dəyişkən xarakterli insanlarla münasibət qurmamaq haqda da əminliklə fikir
yürütmək də doğru olmaz: "Ümumiyyətlə, psixoloqlar və dünya alimləri insan
xarakterlərini üz cizgilərinə görə də müəyyən etməyin mümkün olduğunu deyirlər.
Bütün bunlarla bərabər, insan xarakteri onun dünyagörüşü və əqidəsilə də sıx
bağlıdır. Daha sonra imzalarla insan xarakterini müəyyənləşdirənlər də az
deyil. Yəni, insanın xarakterinin müəyyənləşməsi ciddi və qəliz məsələdir.
Təbii ki, hər kəsin ətrafında müxtəlif xarakterli insanlar mövcuddur. Hər bir
halda, onlar bizim şəxsiyyətimizin formalaşmasında xüsusi rol oynayır”.
Daxilində olan mahiyyət heç vaxt
tam olaraq dəyişmir
Könül Şibliyeva, müəllimə
Könül də
Elvinlə həmfikirdir. O da xarakterin dəyişə bilən olduğunu düşünür: "Xarakterin
az bir hissəsi insana əvvəldən verilir. Yəni, bu hissə onun özündən asılı
olmur. Lakin getdikcə şəxsin xarakteri ailəsindən və olduğu mühitdən asılı
olaraq formalaşır. Uşaq vaxtı hər kəs ətrafına fikir verir, gördüklərini
öyrənir. Ətraflarında olan mənfi və müsbət hər şeyi kiçik yaşlardan başlayaraq
mənimsəyirlər. Onlar mənimsədiklərini qavraya bilməsələr belə, bu, onların
xarakterinin formalaşmasında mühüm rol oynayır. Lakin böyüdükcə yaxşı və pisin
nə olduğunu daha aydın ayırd edə bilirik. Fikrimcə, insanın xarakteri zamanla
dəyişə bilir. Amma insan əvvəl-axır
özündə olana geri dönür. Fərqi yoxdur, nə qədər dəyişirsənsə dəyiş, daxilində
olan mahiyyət heç vaxt tam olaraq dəyişmir”.
Könül
əlavə etdi ki, xarakteri tez-tez dəyişən insanlara qarşı münasibəti elə də
yaxşı deyil: "Xarakterin dəyişməsi mənfi və müsbət olan hər şeyi üzə çıxarır.
Bəzən elə olur ki, qarşımızdakı insanı tanıya bilmirik. Dəyişkən xarakterli
insanın sabah necə olacağını, sənə qarşı necə davranacağını bilmək olmur.
Müəyyən mənada, belə insanlardan ehtiyat edirik. Dəyişkən xarakterli insanların
ətrafında da az adam olur. Çünki bələd olduğun insanın dəyişdiyini gördükcə,
ondan uzaqlaşmalı olursan. Hesab edirəm ki, xarakterin dəyişməsində həm ətraf
təsirlərin, həm insanın yaşadığı hadisələrin müəyyən qədər təsiri olur”.
Şəbnəm Mehdizadə