İnnovasiyalı klasterlərin yaradılmasına dair konfrans keçirilib
Bakı Biznes Mərkəzində İqtisadiyyat Nazirliyinin təşkilatçılığı ilə "İnnovasiya klasterlərinin yaradılmasında dövlət-özəl
sektor əməkdaşlığı: mövcud aktivlər və yerli xammaldan səmərəli istifadə" mövzusunda Konfrans keçirilib.
Aidiyyəti
dövlət qurumlarının, ali təhsil müəssisələrinin, elmi-tədqiqat institutlarının
nümayəndələrinin və sənayenin müxtəlif sahələrində fəaliyyət göstərən
sahibkarların iştirakı ilə keçirilən tədbirin məqsədi dövlət-özəl
sektor tərəfdaşlığının genişləndirilməsi, yerli xammaldan istifadənin səmərəliliyinin
artırılması, innovasiya klasterlərinin yaradılmasına elmi-tədqiqat
institutlarının və universitetlərin cəlb edilməsidir.
Konfransda
çıxış edən İqtisadiyyat nazirinin müavini Niyazi Səfərov Azərbaycan
Respublikası Prezidentinin rəhbərliyi ilə sənayenin modernləşməsi, qeyri-neft
sənayesinin şaxələndirilməsi və ixrac imkanlarının genişləndirilməsi
istiqamətində sistemli tədbirlərin həyata keçirildiyini, sənaye parkları və
məhəllələrinin, rəqabətqabiliyyətli və innovativ sənaye məhsulları istehsalı
müəssisələrinin yaradıldığını və ixrac potensialının genişləndiyini bildirib.
Nazir müavini həmçinin, Azərbaycanda ağır sənaye və maşınqayırmanın inkişafına
dair Strateji Yol Xəritəsində müəyyən edilmiş hədəflər üzrə 2017-ci ildə
görülmüş işlər və bu il həyata keçiriləcək tədbirlərdən danışıb, sənayedə yerli
istehsalın dəstəklənməsi məqsədilə yerli xammaldan səmərəli istifadənin
əhəmiyyətini qeyd edib, innovasiya əsaslı sənayenin inkişafında elmi-tədqiqat
institutlarının və ali təhsil müəssisələrinin rolunu diqqətə çatdırıb.
Tədbirdə "Socar
Polymer” MMC-nin maliyyə menecerinin müavini Rauf Quliyev "Socar Polimer” ətrafında
yaradılacaq klasterin yerli xammal təminatı, Dövlət Neft və Sənaye Universitetinin rektoru
Mustafa Babanlı yeni istehsal sahələri üçün ixtisaslı kadrların
hazırlanması, AMEA-nın
Polimer Materialları İnstitutunun direktoru, AMEA-nın
müxbir üzvü Bəxtiyar Məmmədov müasir
tədris texnologiyalarına keçid, təhsilin müasir standartlara və innovativ
proqramlara yönəldilməsi barədə məruzələrlə çıxış ediblər.
Sonra İqtisadiyyat
Nazirliyinin İqtisadi İslahatlar Elmi-Tədqiqat İnstitutunun direktoru Vilayət
Vəliyevin "Sənaye innovasiya subyektlərinin səmərəli fəaliyyəti
üzrə dövlət siyasəti və sənaye innovasiya subyektlərinin səmərəliliyinin
qiymətləndirilməsi", institutun direktor müavini Arzu Hüseynovanın "Sənaye
klasterlərinin fəaliyyətinin səmərəliliyi", institutun baş elmi işçisi Malik Mehdiyevin "Sənaye
klasterlərinin qiymətləndirilməsinin yeni modeli" mövzusunda təqdimatları
dinlənilib.
İqtisadiyyat Nazirliyinin Sənaye şöbəsinin müdir müavini
Fikrət Qurbanov sənaye klasterlərinin səmərəli fəaliyyəti
üzrə həyata keçirilən tədbirlər barədə məlumat verib. Sumqayıt Kimya Sənaye Parkının
direktoru Nazim Talıbov Parkının rezidentləri tərəfindən
reallaşdırılan layihələri diqqətə çatdırıb, Azərbaycan
Respublikası SahibkarlarTəşkilatları Milli Konfederasiyasının vitse-prezidentiVüqar Zeynalov sahibkarlıq subyektlərinin fəaliyyətində
və yeni müəssisələrin qurulmasında klaster yanaşmanın əhəmiyyətindən
danışıb.
Konfransda
innovativ sənaye istehsalının artırılmasına və dövlət-özəl sektor
əməkdaşlığının möhkəmləndirilməsinə dair təkliflər səsləndirilib, sahibkarları
maraqlandıran suallar cavablandırılıb.