İnkişafına yeni texnologiyaların təkan verdiyi xəstəlik
Dünyada ən
çox yayılmış nevroloji xəstəliklərdən olan epilepsiyadan Azərbaycanda 60 minə
yaxın insan əziyyət çəkir. Səhiyyə Nazirliyinin mətbuat xidmətindən Trend-ə
verilən məlumata görə, hər il dünyada 2,5 milyon insanda epilepsiya xəstəliyi
aşkar edilir. Beynin xroniki xəstəliyi olan epilepsiya bütün bədəndə və ya
bədənin hansısa hissəsində qısamüddətli, təhrik olunmamış qıcolmalar şəklində
meydana çıxır. Müxtəlif ölkələrdə əhalinin hər 100 min nəfəri arasında 20-53,
inkişaf etməkdə olan ölkələrdə 100-190 epilepsiyaya tutulma halına rast
gəlinir. Hazırda dünyada 50 milyondan çox insan epilepsiyadan əziyyət çəkir.
Nevroloq Rima İbadovadeyir ki, epilepsiya xəstəliyinin son dövrlərdə artması, əslində, bir qədər
müəmmalı məsələdir: "Epilepsiya xəstəliyinə hətta eramızdan əvvəlki dövrlərdə
də rast gəlinib. Bu xəstəliyin genetik və sonradan qazanılmış formaları var. Sonradan qazanılmış epileptiklərdə xəstəlik beyin qanaxmaları səbəbindən, yaxud beyninin
hər hansı bir xəstəliyi ilə bağlı olaraq yaranır. Epilepsiyanın səbəbsiz
formalarını isə genetikaya bağlayırıq. Bəzən
xəstəliyi araşdırdıqda, yəni MRT müayinəsindən sonra bəlli olur ki, heç
bir simptom olmasa da, şəxs epilepsiya xəstəliyindən əziyyət çəkir. Xəstəliyin
yaş məhdudiyyəti yoxdur. Doğulduğu gündən etibarən qocalıq yaşına qədər epilepsiyaya
rast gəlinə bilinir. Hətta 70-80 yaşlarında belə ilk dəfə tutma keçirən
pasientlər olub. Yəni, istənilən yaşda epilepsiyaya rast gəlmək mümkündür. Epilepsiyanın
hansı səbəbdən qaynaqlandığını tam əminliklə demək mümkün deyil. Son dövrlərdə
xəstəlikdən əziyyət çəkənlərin sayının artma səbəblərində biri kimi radiasiya dalğalarının artması götürülə bilər.
Texnologiyanın inkişafı bu xəstəlikdən əziyyət çəkənlərin sayını artırır. Görmə
və ənsə payı ilə bağlı olan epileptik tutulmalar işığın təsirindən güclənə
bilir. Xüsusilə bu tip epilepsiya xəstələrinin artmasında kompüter və digər
texnoloji cihazlar mühüm rol oynayır. Həmçinin, energetik içkilər beyni
qıcıqlandırır ki, bu da epilepsiyanın yaranma səbəbləri sırasındadır. Son
dövrlərdə bu içkilərdən həddən çox
istifadə olunması, xəstəliyin geniş yayılmasına gətirib çıxarır. Digər səbəblər
isə əvvəlki illərdə olanlarla eynidir”.
Nevroloq
epilepsiyanın müalicə metodlarından da söz açdı: "Xəstəliyin müalicəsinə
gəldikdə isə deyə bilərəm ki, bu xəstəliyin müalicə metodları müxtəlifidir.
Bəzi hallarda xəstələr anti-epileptik
dərmanlarla müalicə edilir. Amma bəzən elə olur ki, 3-4 dərman, yəni xəstənin
bədən çəkisinə uyğun dozada verilsə d,ə tutmaları dayandırmaq mümkün olmur. Bu
halda epilepsiya cərrahiyyəsinə müraciət edirik. Neyrocərrahlar beynin
zədələnmiş hissəsini kənarlaşdırır və yaxud cərrahiyyə vasitəsi ilə digər vacib
müdaxilələr edilir. Ümumilikdə xəstəlik epilepsiya adlandırılsa da, onun çox
sayda alt qrupları var. Yaşa, tutmanın
növünə və xarakterinə görə müxtəlif epilepsiya formaları var. Bəzi xəstələr var
ki, onlara dərman verilmir. Belə
xəstələrdə bu tutmalar xəstəyə hər hansı bir problem yaratmır və zamanla keçib
gedir. Bəzi hallarda epilepsiyanın konkret növü müəyyən edilir və diaqnoz
qoyulur. Düzgün diaqnozun qoyulması xəstəliyin müalicəsi üçün çox vacibdir. Bu zaman xəstəyə konkret dozada, yəni bədən
çəkisinə uyğun miqdarda dərman təyinatı yazılır. Belə xəstələrdə çox zaman iki
il ərzində tutmasız dönəm olur. Bu dönəm iki ili keçdikdən sonra dərmanın
dozasını azaldırıq. Xəstə həkimin dediklərini düzgün formada yerinə yetirirsə,
çox hallarda xəstəlik sağalır. Amma epilepsiyanın elə növləri var ki, uzun
müddətli dərman qəbuluna ehtiyac yaranır. Bəzi xəstələr ömür boyu eyni dərmanı
qəbul etməlidir. Yəni, xəstəliyin müalicəsi pasientin yaşından, xəstəliyin
növündən asılı olaraq dəyişir. Xəstəliyə doğru diaqnoz qoyulduqda, çox hallarda
müalicə edilir. Amma məsələn, epilepsiya beyində olan şiş səbəbindən yaranıbsa,
həmin xəstəyə nə qədər dərman verilsə də, faydası olmayacaq. Tutmalar nisbətən
azaldılsa da, tam şəkildə sağalmır. 6 aydır ki, nevroloqlar və neyrocərrahlarla
birgə epilepsiya klubumuzu yaratmışıq. Mütəxəssislərlə birgə hər ayın sonuncu
cümə günü toplanıb epilepsiyanın müxtəlif aspektlərini müzakirə edirik. Son
dövrlərdə neyrocərrahlar epilepsiya cərrahiyyəsində böyük uğurlar qazanıblar. Bu məsələləri
müzakirə etmək üçün radioloqlar, nevroloqlar və neyrocərrahlar klubumuzda birgə
toplanır. Bu toplantılarda ağır xəstələrin müzakirəsi aparılır və xəstəliyin
səbəbləri araşdırılır. Çalışırıq ki, hər ay bu işi daha da inkişaf etdirək.
Ölkədə olan epilepsiya xəstələrinə yardım etmək üçün öz gücümüzü səfərbər
etmişik”.
Tibb üzrə ekspert, professor Adil Qeybulladeyir ki, epilepsiya beyində əlavə qıcıq sahələrinin əmələ gəlməsi və oyanma
ocaqlarının yaranması ilə müşayiət olunan bir xəstəlikdir. Xəstə qıcolmalardan
əziyyət çəkir və huşunu itirir. Epilepsiyanın
yaranması və xüsusi çəkisinin artması ilk növbədə ümumi əhalinin sayının
artması ilə bağlıdır. Əhalinin sayı artdıqca, adambaşına düşən xəstəliklərin
sayı da ümumi nisbətdə artır. Amma xəstəliyin konkret olaraq dinamikasının
artması müxtəlif səbəblərə bağlı ola
bilər. Bu səbəblər sırasına ekoloji faktorlar, qida, doğum zamanı travmalar
daxildir. Kəllə-beyin travması keçirən, beyinin müxtəlif törəmələrində kista və
şiş olan xəstələrdə, həmçinin ağır virus infeksiyalar keçirən şəxslərdə beyində
yaranan oyanma ocaqları fonunda əmələ gələ bilir. Yəni, ümumilikdə səbəblər
müxtəlifdir. Bütün hallarda epilepsiya xəstələrinin sayının artması
narahatedici məqamdır. Son dövrlərdə təkcə epilepsiya deyil, həmçinin onkoloji,
ürək-damar və digər nevroloji xəstəliklərin sayının da artması halı müşahidə
olunur. Hesab edirəm ki, Azərbaycanda ən ciddi problemlərdən biri də qida
təhlükəsizliyi ilə bağlıdır. Mümkün qədər çalışmalıyıq ki, ekoloji təmiz
qidalardan istifadə olunsun. Ölkənin daxilində olan resurslardan maksimum
şəkildə yararlanmaq lazımdır. Çalışmaq lazımdır ki, Azərbaycanda yetişən
meyvə-tərəvəzdən daha çox istifadə edilsin. Ümumilikdə, ölkənin genofondunun
qorunması üçün xüsusi proqram hazırlanmalıdır. Xaricdən gətirilən
meyvə-tərəvəzlərin və digər qida məhsullarının təhlükəsizliyinə diqqət
yetirilməlidir”.
Şəbnəm Mehdizadə