İnformasiya cəmiyyətində KİV-in artan rolu
«Mənim icmamda fikir müxtəlifliyinin olması Allahın
bizə mərhəmətini göstərən bir əlamətdir». Məhəmməd Peyğəmbərdən gətirilən bu
fikir bir daha sübut edir ki, insanlar həmişə fərqli informasiyalara maraq göstərirlər.
Bu maraq informasiya cəmiyyətində (İC) daha qabarıq hiss olunur. Çünki
informasiya cəmiyyəti elə bir cəmiyyətdir ki, burada sosial təyinatlı
informasiya təkcə siyasi elitaya deyil, həm də maliyyə, sosial statusundan
asılı olmayaraq, bütün sosial qruplara aid olur. Deməli, kütləvi informasiya
prosesləri - cəmiyyətin demokratikləşməsi üçün əsasdır.
Bəs, informasiya cəmiyyəti nədir, onu necə başa
düşmək lazımdır? Əvvəla, qeyd edək ki, «informasiya cəmiyyəti» anlayışı ilk dəfə
1966-cı ildə Yaponiyada meydana gəlib. «Gündoğan ölkə»nin mütəxəssislərinin qənaətinə
görə, informasiya cəmiyyətində əhalinin əsas hissəsi müasir informasiya
texnologiyalarından istifadə etməklə, informasiyanın istehsalı, saxlanması və
ötürülməsi ilə məşğul olur.
Müasir texnologiyaların inkişafı ona gətirib
çıxarıb ki, auditoriya geniş məlumat şəbəkəsinə malikdir. Eyni zamanda, professor
Qulu Məhərrəmlinin qeyd etdiyi kimi, «auditoriya alternativ məlumat mənbələrinə
yiyələnib, həm də medianın verdiyi hazır fikir qəliblərini qəbul etməyib məlumatları
özü araşdırıb qiymətləndirən, müstəqil nəticələr çıxaran tələbkar xəbər
istehsalçıları formalaşdırıb».
Bütün dünyada ictimai-siyasi proseslərin inkişaf
istiqamətlərinin müəyyənləşməsində kütləvi informasiya vasitələrinin (KİV) rolu
getdikcə artmaqdadır. KİV elə bir sosial vasitədir ki, bu və ya digər problemlərə
diqqət yetirmək və bunları həll etmək üçün təsir göstərir. Burada jurnalistin tərəfsizlik
göstərməsi mühüm amil olmalıdır.
XX əsrin ikinci 50 ilində dünyada xeyli dəyişikliklər
baş verdi. Antidemokratik rejimlər tədricən siyasi meydanı tərk etməyə başladı.
Bu prosesdə KİV-lər və sosial şəbəkələr heç də az rol oynamadı. İdeoloji
buxovdan azad olan mediada canlanma hiss olundu, yeni jurnalistikanın inkişafı
üçün münbit şərait şərait yarandı.
Ötən əsrin 60-70-ci illərindən başlayaraq sənaye cəmiyyəti
yeni dövrə - informasiya cəmiyyətinə daxil olmuşdur. Futuroloq A.İoseliani
informasiya cəmiyyətinə keçidi bilavasitə informasiya iqtisadiyyatının
yaranması zərurəti ilə əlaqələndirir.
«Ümumdünya
hörümçək toru» adlanan internet bu gün dünyanın bütün ölkələrini əhatə edir və
onun istifadəçilərinin sayı getdikcə artır. Bu da informasiya cəmiyyətinin əsas
əlamətlərindən biridir. İC-i barədə müxtəlif fikirlər mövcuddur. Məsələn,
ictimai inkişaf haqqında konseptual proqramların patriarxları olan E.Toffer,
D.Bell informasiya cəmiyyətini industrial cəmiyyətdən sonra yeni mərhələ kimi səciyyələndirirlər.
Onların fikrincə, sənaye cəmiyyətinin əsasını təşkil edən kapital və əmək
burada öz yerini informasiyaya, biliyə verir. Ümumiyyətlə Qərb ölkələrində
informasiya cəmiyyətinin formalaşmasının əsasında hesablama və informasiya
texnologiyasının inkişafı durur. T.Stounyer adlı alim isə informasiya barədə
yazır ki, informasiya kapitaldır, onu yığmaq da olar, gələcək üçün qorumaq da.
Deməli, informasiya cəmiyyəti üçün əsas odur ki,
insan informasiya bolluğundan istədiyi kimi istifadə edə bilsin. Cəmiyyətin hər
bir üzvü yaşadığı ölkədə və dünyanın başqa ölkələrində baş verən hadisələrdən xəbərdar
olur, dünyanın nə ilə nəfəs aldığını bilir. Odur ki, informasiya cəmiyyətində
informasiyanın vaxt itirmədən mübadiləsi qərarların qəbul edilməsindən və yüksək
səviyyədə məlumatlı olmaqdan çox asılıdır.
İnformasiya cəmiyyətinin reallaşması üçün
demokratik mühit olmalıdır. Yalnız demokratik hökumətlər öz vətəndaşları üçün
digər istənilən siyasi sistemin verə biləcəyindən daha geniş dairədə şəxsi
azadlıqları təmin edir. Məhz belə bir cəmiyyətdə informasiya almaq, ötürmək və
informasiya mübadiləsi aparmaq, qeyri-demokratik ölkələrə nisbətən xeyli
asandır. Onu da qeyd edək ki, demokratik cəmiyyətin mediası qeyri-demokratik ölkələrin
mediasından fərqlənir. Bu, hər şeydən əvvəl mətbuat və söz azadlığında özünü
göstərir, həm də vətəndaş cəmiyyəti quruculuğunun başlıca şərtlərindəndir.
Professor Cahangir Məmmədlinin təbirincə desək, demokratik cəmiyyətdə medianın
vəzifələrindən biri də adətən öz işi ilə bağlı informasiyanı gizlətməyə cəhd
göstərən hakimiyyəti daim nəzarətdə saxlamaqdır.
Qlobal informasiya mühitinin yarandığı müasir dövrdə
mətbuatın səyləri nəticəsində informasiya cəmiyyətdə əsas strateji resursa
çevrilmiş, onun rolu da getdikcə artmaqdadır. Peşəkar mətbuatın məhsulu olan
dürüst informasiya ölkənin siyasi,
iqtisadi, müdafiə və s. kimi əsas təhlükəsizliklərinin vəziyyətinə təsir göstərir.
Biz elə bir dövrdə yaşayırıq ki, super dövlətlərin
güc mərkəzlərinin siyasətini məhz informasiya formalaşdırır. Bir sözlə, dövlətlər
əlaqələr yaradarkən, münasibətlər qurarkən kütləvi informasiya vasitələrinə
müraciət edirlər. Bunu nəzərə alan tədqiqatçılar yazırlar ki, müasir dünyada
maraq qrupları var ki, informasiyalardan məharətlə istifadə edirlər.
Medianın gücündən istifadə etməyən, ona qiymət verməyən
liderlər ictimaiyyətin dəstəyini qazana bilmirlər. Məsələn, Amerika mətbuatının
yazdığına görə, ABŞ-ın keçmiş prezidenti Karterin hakimiyyətdən getməsinə səbəb,
həm də onun mətbuatda və televiziya ekranlarında görünməməsi və ya az görünməsi
idi. Bəzi dövlət başçıları medianın ictimai rəyə təsirini düzgün qiymətləndirdiyindən,
mətbuat səhifələrində və televiziya ekranlarında tez-tez görünürlər. Bu
görüntülər ilk növbədə seçki prosesində onların köməyinə çatır.
Hazırda internet şəbəkəsində yerləşdirilən
informasiyaların sayı getdikcə artır. Bu da faktdır ki, onların çoxu, demək
olar ki, işə yaramır, əksinə, insanlara pis təsir göstərir, hətta dövlətlər
arasında nifaq toxumu səpir.
Bunu nəzərə alaraq Prezident İlham Əliyev MDB ölkələrinin
milli informasiya Agentlikləri Rəhbərləri Şurasının iclasında iştirak edən
nümayəndələrlə görüşündə demişdir: «Ölkələr və xalqlar arasında qarşılıqlı
anlaşmanın möhkəmləndirilməsində informasiya agentliklərinin, kütləvi
informasiya vasitələrinin fəaliyyətindən çox şey asılıdır. Həqiqi məlumatın
vaxtında verilməsi operativ qərarların qəbulu, proseslərin düzgün şərh edilməsi,
ölkələr arasında ikitərəfli və çoxtərəfli əlaqələrin qurulmasında mühüm rol oynayır.
Lakin çox təəssüf ki, bəzən əksinə də olur. Bəzən hansısa yoxlanılmamış və ya qərəzli
informasiya, yaxud sifariş xarakterli informasiya ikitərfli münasibətlərə müəyyən
dərəcədə zərər də vura bilər. Buna görə də KİV nümayəndələri öz vəzifələrinə məsuliyyətlə
yanaşmalıdırlar».
Müasir dövrdə medianın ən mühüm funksiyalarından
biri də milli maraqları üstün tutmaq, vətəndaşları dövlətçiliyə sədaqət ruhunda
tərbiyə etməkdir. Bu sahədə KİV-lər cəmiyyətdə əsl vətəndaşlıq mövqeyinin
formalaşmasına töhfələr verməlidir. Etiraf edək ki, bəzən eyni informasiya bir
neçə mətbuat orqanında dərc olunur, özü də təhrif olunmuş variantda. Oxucu
bilmir onlardan hansına inansın, hansı həqiqəti yazıb. Azərbaycan Respublikası
Prezidentinin ictimai-siyasi məsələlər üzrə köməkçisi Əli Həsənov bu barədə belə
deyir: «Bəziləri hökumətin gördüyü işi bütövlükdə pisləyir, bəziləri tamamilə tərifləyir.
Vətəndaşlar özləri ortaq mövqe axtarmalı, düzgün təminatı özləri üçün ayırd etməli
olurlar. Əslində isə qəzetlər bütün məsələləri tam şəffaf, obyektiv təqdim etməlidirlər».
Bir neçə qəzeti oxuyub həqiqəti tapmaqda oxucu çətinlik çəkir. Bütün bu xoşagəlməz
hadisələr nəinki jurnalistin özünü, redaksiya kollektivini hörmətdən salır, mətbuata
oxucu inamını da azaldır.
Hazırda informasiya sosial tərəqqinin ən başlıca və
ən qiymətli resursuna çevrilir. Bütövlükdə operativ məsələlərin həllində ondan
geniş istifadə edilir. Təbii ki, yoxlanmamış, qərəzli informasiyalar istisna
olunur.
Dünyada informasiyanın əhəmiyyəti durmadan artır.
Bu proses Azərbaycanda da sürətlə gedir. «Azərbaycan Respublikasında
informasiya cəmiyyətinin inkişafına dair 2014-2020-ci illər üçün Milli
Strategiya»nın təsdiq edilməsi haqqında Azərbaycan Respublikası Prezidentinin sərəncamı
bu sahədə görülən işlərdən xəbər verir. Qarşıya qoyulan əsas məqsəd informasiya
cəmiyyətinə keçidi təmin etməkdir. Bu və digər sənədlərdə informasiya cəmiyyətinin
formalaşmasında dövlətin rolu aşağıdakı kimi təsnif edilmişdir:
- qlobal informasiya mühitinin yaradılması;
- elm, təhsil və mədəniyyətin sürətli inkişafı, elm
tutumlu informasiya və telekommunikasiya texnologiyaları məhsullarının
yaradılması və istehsalı üçün əlverişli şəraitin təkmilləşdirilməsi;
- vətəndaşların informasiya əldə etməsi üçün bərabər
imkanların və onların münasibliyinin təmin olunması;
- müəlliflik hüququnun və intellektual mülkiyyətin
təmin edilməsi:
- ölkənin informasiya təhlükəsizliyinin təmin edilməsi;
- informasiya cəmiyyətinin inkişafına yönəldilmiş
fundamental və tətbiqi elmi tədqiqatların genişləndirilməsi;
- on-line medianın, sosial şəbəkələrin və digər
yeni media vasitələrinin inkişaf etdirilməsi, onlardan səmərəli istifadəyə dair
tədbirlərin görülməsi.
Göründüyü kimi, Azərbaycanda informasiya cəmiyyətinin
qurulması sahəsində məqsədyönlü işlər gedir. Qeyd edək ki, son illər
respublikada telekommunikasiya infrastrukturu müasirləşdirilmiş, yeni
texnologiyaların tətbiqi genişləndirilmişdir.
«Cəmiyyət KİV-də davamlı yayılan informasiya ilə
özünü tənzimləyir. Cəmiyyətin tələbatı olan bu tənzimləmədə «gücsüzlər ondan
qorxar, savadsızlar onunla əlini kəsər, ağıllılar isə istifadə etməyi bacarar»
(Con Milton). İnformasiyalardan ağıllı, məqsədyönlü istifadə edənlər öz məqsədlərinə
çatırlar. Əksinə, informasiyalara elə-belə, məlumatlı olmaq xatirinə baxanlar, əhəmiyyətinə,
çəkisinə diqqət yetirməyənlər dünyəvi proseslərə qoşula bilmirlər.
Vətənpərvərlik, milli dövlətçiliyə sədaqət, milli
maraqlar uğrunda KİV-lər fəaliyyət göstərməlidirlər. Cəbhə xəttindəki vəziyyət
barədə yanlış məlumatlar, şəhid olmuş əsgərlərin sayının süni şəkildə şişirdilməsi,
düşmənə hərbi sirrin sızdırılması və s. məlumatlar dövlətçiliyimizə vurulan zərbədir.
«KİV haqqında» Qanunun 3-cü maddəsində göstərilir
ki, internet media kütləvi informasiya vastəsi sayılır. Bunu nəzərə almayan bəzi
internet istifadəçiləri ciddi qanun pozuntularına yol verirlər. Məsələn, bloqger
Aleksandr Lapşinin Azərbaycana ekstradisiyasını yada salaq. Rusiya, İsrail və
Ukrayna vətəndaşı olan bloqger 2011-2012-ci illərdə Dağlıq Qarabağa səfər edib
və onu "müstəqil dövlət” adlandırıb. Bu ekstradisiya Azərbaycan
diplomatiyasının uğuru, cinayətkar rejimin işgalçılıq siyasətinin iflasıdır.
Çox təəssüf ki, bəzi internet saytları bloqgerin Azərbaycan vətəndaşı
olmadığını əsas gətirərək, bunu qanun pozuntusu kimi qələmə verir, «qaranlıq
otaqda qara pişik axtarırlar». Onların bu canfəşanlığını Ermənistanın bəzi
saytları da təkrarlayır. Sonradan səhvlərini etiraf etsələr də, gec olur, bu
ondan irəli gəlir ki, «Bizim jurnalistikada yazıb, sonradan düşünmək təcrübəsi
güclüdür» (Əli Həsənov).
Cəmiyyət həyatının bütün sahələrində kütləvi
informasiya vasitələrinin qarşısında mühüm vəzifələr durur. Bu gün Azərbaycan
KİV-i müasir informasiya cəmiyyəti quruculuğunda milli həmrəyliyin və
tolerantlığın möhkəmləndirilməsində, demokratik özünüdərkin, siyasi mədəniyyətin
inkişafında, milli-mənəvi dəyərlərin qorunub saxlanmasında mühüm rol oynayır
və ictimai fikrin formalaşmasında onun əhəmiyyəti getdikcə artır.
Akif
Rüstəmov