“İlk kitab layihəsi”
Artkaspi.az
"Yazarın ilk kitabı” adlı layihəyə davam edir. Layihənin məqsədi
yazıçıların ilk kitabı haqqında, onun çapı barədə xatirələrini danışması, hələ
kitabları nəşr edilməyən yazarlarla təcrübələrini bölüşmələridir. Budəfəki
qonağımız yazıçı Fəxri Uğurludur.
– İlk kitabınızın çap olunması ideyası haradan
qaynaqlandı?
– Əslində,
mənim bir də yox, iki "ilk kitab”ım çıxıb. Ötən əsrin səksəninci illərində
"Yazıçı” nəşriyyatında "Müəllifin ilk kitabı” adı altında seriya nəşr olunurdu.
Nəşriyyat mənim də kitabımı plana saldı, nəticədə 1992-ci ildə "Diləklərin
azması” adlı kitabçam işıq üzü gördü. Kitabda beş hekayə, bir povest yer
almışdı. Ancaq bundan az əvvəl mən
"Gənclik” nəşriyyatına da bir qovluq təqdim eləmişdim. Həmin qovluqda doqquz
hekayə vardı. Bu hekayələrdən ibarət "Tək ağac” kitabım 1991-ci ildə "Diləklərin
azması”ndan bir neçə ay qabaq işıq üzü gördü. İndi bilmirəm bunların hansı
mənim ilk kitabım sayılmalıdır. Hər
iki kitabın çapdan çıxdığı dövrdə mən Bakı Dövlət Universitetinin tələbəsiydim.
Təbii, imzamın görünməyini, tanınmağını istəyirdim. Ona qədər (1986-cı ildən bu
yana) dövri mətbuatda – qəzetlərdə, jurnallarda, eləcə də ədəbi almanaxlarda
dönə-dönə çap olunmuşdum. "Tək
ağac”ın yayılması uğurlu oldusa da, "Diləklərin azması” haqqında bunu demək
olmaz. Həmin aylarda ölkədə kitab yayımı sistemi böhrana düşmüşdü, "Azərkitab”
qazanc gətirməyən nəşrləri yayımlamaqdan imtina eləyirdi. Bu səbəbdən
"Diləklərin azması” kitab mağazalarına çox az paylandı, indi yaxşı
xatırlamıram, bəlkə də heç paylanmadı; tirajın əksər hissəsi, bəlkə də hamısı
ölkə kitabxanalarına verildi. Yeri
gəlmişkən deyim, tələbə vaxtı mənim daha bir kitabım çıxmışdı. Professor Kamil
Vəliyevlə birgə hazırladığımız "Oğuznamələr” adlı bu kitab 1993-cü ildə BDU-nun
nəşriyyatında otuz min tirajla işıq üzü görmüşdü. Onda mən universitetin
beşinci kursunda oxuyurdum.
– Kitabın çap
olunması zamanı hansı çətinliklərlə üzləşdiniz?
– O zaman kitab plana saldırmaq, kitab nəşr elətmək
çox çətin başa gəlirdi. Mən redaksiyalara, nəşriyyatlara lap erkən yaşlarımdan
ayaq döymüşdüm deyə məni az da olsa tanıyırdılar. Yaxşı adamların sayəsində
böyük çətinliyə ürcah olmadım.
– Kitabın üz
qabığı, tərtibat işlərində çətinliyiniz oldumu?
– Tərtibat məsələlərini nəşriyyat özü həll
eləyirdi, müəllifin müdaxiləsinə ehtiyac qalmırdı.
– İlk kitabınızın oxucu auditoriyası barədə nə
deyə bilərsiniz?
– Bu barədə dəqiq statistik məlumatım olmayıb.
Bircə bunu bilirəm ki, nəsr kitablarım beş min tirajla çap olunmuşdu.
– İlk
kitabının çapı hazırlığında olanlara məsləhətiniz nədir?
– Kitabı çapa verib canlarını qurtarsınlar, yeni
mərhələyə adlasınlar...
Hazırladı:
Aytac Quliyeva