İlin sonuna kimi 15 ölkədə olmağı planlaşdıran komanda - Startap
Daima
səhvlərindən nəticə çıxarmağa çalışır. Düşünür ki, insan yalnız səhvlərindən öyrəndikcə,
yeni uğurlar qazana bilər. Uğursuzluqları uğurun stimulu kimi görən müsahibim
deyir ki, önəmli olan insanın qazandığı təcrübədir. Bununla yanaşı, daim
yenilik axtarışında olmağın vacibliyini vurğulayan müsahibim 300 min dollarlıq "Keepface”
startap layihəsinin rəhbəriVaqif
Abbasovdur.
Qeyd edək
ki, V.Abbasov 1983-cü ildə Bakı şəhərində anadan olub. 2004-cü ildə Heydər
Əliyev adına Azərbaycan Ali Hərbi Məktəbin məzunu olub. Təhsil aldığı
müəssisədə hərbi ixtisası ilə yanaşı, Mülki İdarəetmə Mühəndisliyi ixtisasına
yiyələndikdən sonra 2012-ci ildə ehtiyata buraxılıb: "Beş il bundan əvvəl rəqəmsal
marketinq sahəsində çalışan şirkətlərin bu sahəyə olan marağını görüb, trendin
dəyişəcəyini ehtimal edirdim. Hələ o vaxt ABŞ-da bu sahə üzrə yeni uğur qazanmış
cəmi bir, ya iki şirkət var idi. Onları izləyir və araşdırmalar edirdim.
Hazırda ABŞ-da bu sahədə fəaliyyət göstərən 200-dən çox şirkət var. 2015-ci
ilin sonlarında artıq qərar verdim ki, bu xidməti Azərbaycanda da qurmağın
vaxtıdır. Amma bu elə bir sahədir ki, tək nə isə etmək mümkün deyil. Ona görə
də fəaliyyətə başlamaq haqqında qərar verdikdən sonra ilk işim həmtəsisçi
komandanı qurmaq oldu. Onlar olmasaydı, hazırkı səviyyə çatmaq yəqin ki, mümkün
olmazdı. Beləliklə, komandamızı qurub işə başladıq”.
Həmsöhbətimiz
qeyd edir ki, hərbi xidmətdən ayrıldıqdan sonra uğurlu və qismən uğursuz bir
neçə layihəsi olub: "Hesab edirəm ki, səhvlər üzərində öyrənib, daha böyük
uğurlara nail olmaq olar. Bu günə kimi bir neçə uğurlu və uğursuz layihəm olub.
Həmin layihələrdən qazandığım təcrübələri hazırda "Keepface” üzərində tətbiq
edirəm. Qeyd edim ki, "Keepface” 2016-cı ilin yanvar ayında Azərbaycanda
fəaliyyətə başlayıb və influencer marketinq platformasıdır. Bu, sosial mediada
çoxlu izləyici kütləsinə sahib olan və
aktiv, maraqlı məzmun hazırlayan istifadəçilərlə şirkətlərin birgə reklam
kampaniyalarını həyata keçirən və prosesi avtomatlaşdıran texnoloji sistemdir. Brendlər platformadan yararlanaraq, əməkdaşlıq
etmək istədikləri "influencer”ləri seçərək bütün prosesi platforma üzərindən
həyata keçirə bilirlər. Ən önəmlisi isə kampaniyalara hər an nəzarət edir və
istədikləri vaxt hesabatları əldə edə bilirlər”.
V.Abbasov
deyir ki, investorlar həmişə layihə axtarışında olur: "Bizə əvvəllər də mütəmadi
şəkildə investisiya təklifləri olunurdu. Amma biz bu məsələyə çox vaxt ayırmaq
istəmirdik. Çünki investisiyamız olmadan da işlərimiz pis getmirdi.
Mentorlarımızın məsləhəti ilə gələn təklifləri dəyərləndirməyə başladıq və ilk
"Seed” (toxum) investisiyanı əldə etdik. Əslində, mənə elə gəlir ki, Azərbaycan
reallıqlarını nəzərə almasaq, əldə etdiyimiz məbləğ elə də böyük hesab
edilməməlidir. Azərbaycanda qurulan və hələ də əsas ofisi ölkəmizdə olan bir
startap kimi deyə bilərəm ki, hazırda coğrafi və iqtisadi mövqeyimiz regional
xidmət göstərən şirkətlər üçün ən uyğun yerlərdən biri hesab oluna bilər. Biz
çox rahatlıqla rus, türk, fars və ərəb dilli ölkələrlə biznes əlaqəsi qura
bilmə imkanına sahibik. Qonşu ölkələrimizin heç biri bu üstünlüyə sahib deyil. Düzdür,
şirkətimizin əldə etdiyi uğur elə də böyük olmasa da, yeni başlayan komandalar
üçün motivasiya ola bilər. Fikrimcə, hazırda Azərbaycanda qurulan bir
komandanın böyük hədəflərə çatmasına mane olan heç bir səbəb yoxdur”.
Müsahibim
qazandıqları investisiyanı fəaliyyət sahələrini genişləndirməyə sərf edəcəyini deyir: "Bizim
əsas məqsədlərimizdən biri yeni bazarlara daxil olmağa və texnoloji məhsulumuzu
inkişaf etdirməyə çalışmaqdır. Sərmayəni də sırf bu istiqamətdə xərcləmək
niyyətindəyik. Düzdür, biz bunu əvvəl də edirdik, sadəcə, maliyyə resursu
işləri daha da sürətləndirəcək. İnvestisiya edən şirkətin maliyyə resursundan
başqa, bizə fərqli istiqamətlərdə dəstəyi olacaq. Müqavilədən öncə, əlavə
dəyərlər müzakirə olunub və müqaviləyə daxil edilib. Əlbəttə ki, yatırım edən
şirkətlərlə birgə çalışmalar olacaq”.
Layihə
rəhbəri hamıya eyni formada xidmət göstərməyin tərəfdarıdır: "Mərkəzi ofisimiz
Dubayda, əsas əməliyyat ofisimiz isə Bakıdadır. İndi üçüncü ofisimizi İstanbulda
qururuq. Hazırda 7 ölkədə fəaliyyət göstərən 26 nəfərlik komandamız var. Mərkəzi
ofisin Dubayda olmağının bir çox üstünlüklərinin olmasına baxmayaraq,
çətinlikləri də təbii ki, var. Orada qiymətlər çox bahadır. Həmçinin, isti
aylarda hava şəraiti bəzən dözülməz olur. Amma mərkəzi ofisimizə dünyanın
fərqli ölkələrindən iş təklifləri gəlir və biz onları dəyərləndirməyə
çalışırıq. Hazırda bizim müştərilər brendlər, agentliklər, startaplar, ictimai
qurumlar və bəzi dövlət müəssisələridir. Biz əməkdaşlıq üçün şirkətlərə fərq
qoymuruq. Hamıya eyni formada xidmət göstərməyə çalışırıq və platformamızı da
buna uyğun inkişaf etdiririk. Kiçik büdcəli şirkətlər belə bizim platformaya
daxil olub, istədikləri xidməti ala biləcəklər”.
Deyir ki,
hər bir komandada olduğu kimi, onlarda da bəzən fikir ayrılıqları olur: "Bu tamamilə təbii haldır.
Hətta, mən bunun olmasını müsbət qiymətləndirirəm. Komanda 23 nəfərdən
ibarətdir. Fikir ayrılıqları o dəməkdir ki, komanda üzvləri iş haqqında
düşünürlər və bu məni sevindirir. İş prosesində çoxlu problemlər yaranır. Amma
startaplarda problemin həlli artıq yenilik sayılır. Ona görə də problemi həll
etmək mənə zövq verir. Çünki hər həll edilmiş problem şirkətin dəyərini
artırır. Komandadan da əsas gözləntimiz məhz problemləri həll etmə bacarığıdır.
Qərarvermə komandamız isə üç nəfərdən ibarətdir. Yaranmış müzakirələrdə hər kəs
öz fikrini qarşı tərəfə inandırmağa çalışır. Çox vaxt razılıq belə əldə olunur.
Əks təqdirdə isə səsvermə edib, qərar qəbul edirik. Yəni, tam demokratik
kollektiv formalaşdırmışıq”.
Sonda
gələcək planları haqqında danışan startapçı, öz komandası ilə birgə yeni
bazarları fəth etmək istəyir: "Hazırda 7 ölkədə fəaliyyət göstəririk və ilin
sonuna 15 ölkədə olmağı planlaşdırmışıq. Biz Şimali Afrika və Ərəb ölkələri
(MENA), Türkiyə, İran, Qafqaz, Ukrayna, Rusiya və Mərkəzi Asiya ölkələrində
influencer marketinq xidməti verən dominant şirkət olmağı hədəfləmişik. Bir il
sonra növbəti A seriya investisiya mərhələsini elan edəcəyik və bununla, Avropa
və Amerika qitələrində maraqlı bazarlara açılmağı düşünürük. Bu işə yeni
başlayan gənclərə tövsiyəm isə çox sadədir. Çünki bu elə bir sahədir ki, heç
bir bəhanə göstərmədən ideyalarını məhsula çevirməyi bacarmalısan. Daha sonra
bunu hədəf müştərilərə təqdim etmək, məhsulu inkişaf etdirmək lazım olacaq.
Buna uyğun da komanda qurmaq ən önəmli faktordur. Bunları uğurlu edən startaplar
isə hədəflərə doğru şəkildə irəliləyə biləcək. Çünki investorlar da yatırım
etmək üçün belə startaplar axtarışındadır”.
Şəbnəm Mehdizadə