İki nəfərdən biri kitab oxumur
Türkiyədə sosial sorğular üzrə ixtisaslaşmış "Kadir
Has” Araşdırma və Sosial İş mərkəzi 2017-ci il ərzində apardığı "Türkiyə
Sosial-Siyasi Meyllər üzrə Araşdırma”-nın nəticələrini nəhayət ki, açıqlayıb.
"BBC Türkiye”də geniş şəkildə əks olunmuş infoqrafik araşdırmada yer alan
məlumatlara görə, 26 əyalətdən yüz min nəfər arasında təkbətək keçirilən
sorğunun nəticələri ədəbiyyat adamları üçün qırmızı işıq yandırıb. Belə ki,
sorğu nəticələrindən əldə olunan rəqəmlərə görə, Türkiyədə hər iki nəfərdən
biri, ümumiyyətlə mütaliə ilə məşğul olmur. Bu isə orta hesabla ölkə əhalisinin
53%-i deməkdir.
Sorğuda iştirak edənlərin 37%-i ölkədə və dünyada
baş verənləri izləmədiyini etiraf edib. Xəbərləri hər gün izləyənlər isə yerdə
qalan iştirakçıların cəmi 20%-ni təşkil edir. Gündəlik məlumatları izləyənlərin
39%-i internetdən, 29%-i isə çap mətbuatdan yararlanır. Sorğu iştirakçılarının
70%-i ümumiyyətlə, teatra getməyənlərdir.
Sosial bir mövzunun da maraqlı olacağını düşünüb,
bunu da oxucularla paylaşaq ki, Türkiyədə əhalinin 70%-i homoseksual qonşu
istəmir. Arzuolunmaz qonşular arasında ikinci sırada suriyalı qaçqınlar gəlir.
Üçüncü yerdə isə alkoqoliklər.
Əhali mədəni və sosial məsələlərin yanında bəzi
siyasi sualları da cavablandırıb. Sorğu iştirakçılarının 53%-i ölkədə ən çox
söz və insan hüquqlarının pozulduğundan şikayətçidir. Türkiyə üçün böyük
təhlükə hesab edilən ölkələr siyahısının ilk üçlüyünü isə ABŞ, İngiltərə və
İsrail təşkil edib. "Türkiyənin birmənalı müttəfiqi və ya dostu” sorğusuna isə
respondentlərin 67%-i "Azərbaycan” deyə cavab verib. Bu sorğuda ikinci yerdə
Şimali Kipr Türk Cümhuriyyəti gəlir.