İki dünya: İslam və Hindistan
Təlatümlü bir həyat yaşamış türk düşünəri Cəmil
Meriçin gözləri 1950-ci illərin ortalarında tutulsa da, onun ümman yaradıcılığı
Şərq və Qərb mədəniyyətlərinin çulğaşmasının doğurduğu daha çox ziddiyyətli
məqamlara aydınlıq gətirən və xüsusilə bu məqamların sapıntılı ideoloji
yönlərinin bilərəyini bəsirətlə açıb göstərən bir gerçəkçinin irsidir. Əlli
yaşlarına qədər – gözləri görüncə, o, Qərb düşüncəsi ilə əsərlərində fikir
daşıyan bir yazar idi. Bu yaşdan sonra – gözləri görməyincə, Şərq dünyasının
dərin mahiyyətinə varıb onu üzə çıxarmağın yanğılı axtarışlarında bulunan bir
mücahid. Cəmil Meriç bu çağdan Qərb sivilizasiyasından nə qədər bəhs etsə, onun
dəyərlərini tanıtsa da, yazdığı və söylədiklərində Şərq müdrikliyinə tapınma,
meyar səviyyəsində söykənc önə çıxır. Onun əsərlərində köklərindən qopmuş,
Qərbin məfhum, ideologiya və şüarlarını şüursuzca mənimsəmiş şərqlinin və eyni
zamanda türkün mənəviyyatını sümürən girdabın faciələri izlənilir.
...Avropa İslam dünyasını tanımaz. Tanımaz, çünki İslamı
tanımaq – öz-özünü inkar deməkdir. Keşişlərin tiryəkləndirdiyi insan sürüləri
İslam mədəniyyətini yox etmək üçün canlarını təhlükəyə atarkən, Avropanın
İslamiyyətlə anlayışlı davranması gözlənilirdimi?! Xaç yürüşlərini qızışdıranlar
öncə İslamiyyəti qaralamaq istəyəcəkdilər. Bütpərəst Avropa İslamiyyət
kəlməsini tələffüz etməkdən belə incə-incə qaçar. Avropalı üçün, yaxın
zamanlara qədər, İslam yoxdur, Məhəmmədilər vardır: "Quran” – Allahın kəlamı
deyil, Məhəmmədin əsəridir. Bu inancın izlərini yaxın zamanlara qədər izləmək
mümkündür...
Yenilən Xaçın müzəffər Ay-Ulduz qarşısında qisasını
Volter belə etiraf etmək zorunda qalır: "Quran”da heç bir zaman mövcud olmayan
hədyanları ona yapışdırmışıq. Şükürlər olsun ki, keşişlərimiz yeniçəridən daha
çox. Məhəmməd dinini qəbul edən türklərə qarşı kitab dalınca kitab döşəmişlər.
Nə etsinlər? İstanbulun fatehlərinə qarşı başqa bir şey qoymaq əllərindən
gəlməmişdir”.
Əlbəttə, Xristian dünyasının İslamiyyətə baxışı həmişə
düşməncə olmuşdur. Avropalının elmi və cahanşümul tədqiqatları İslamiyyətin
sərhədlərində durur. Xaçlılardan bu yana avropalının amacı İslamiyyəti tanımaq
deyil, onu yıxmaqdır.
..."Quran” həm bir ibadət kitabı, həm də bir anayasa.
İslamiyyətin təməl məfhumu – bərabərlik. Bu bir amac
deyil, bir haqdır. Azadlıq – bərabərliyin bir başqa adı və ya görünüşü. Sinif
qəbul etməyən, imtiyaz tanımayan bir dində kimin azadlığı kimə qarşıdır? Qərb –
azadlığı bir xəta işləmə haqqı olaraq anladır. Müsəlmanın belə bir haqqı yoxdur.
Çünki o, əbədi həqiqətin, yeganə həqiqətin, cahanşümul həqiqətin əmrindədir.
Şübhəsiz,
İslamiyyət bir qanun və nizam hakimiyyətidir (nomokratiyadır). O, Qərbin
gerçəkləşdirməyə çalışdığı bərabərliyi çoxdan fəth etmişdir. Demokratiyanın ta
özüdür İslamiyyət.
İslamiyyət –
bütün insanlığa xitab edən tək dünyagörüşü. Təməli – vəhdət, sevgi, ədalət.
Bütün insanlar doğuluşundan bərabər. Bir şəxs islamı qəbul etdikdən sonra
gerçək bir bərabərlik olur bu. O, insanı –
insan olduğu üçün Tanrının xəlifəsi qəbul edər. Avropanın xəyallarını
aşan bir röyadır İslam, bir fikir memarlığıdır... Həqiqətən də, "hürriyyət”
kəlməsi çox gec çağlarda dilimizə girmişdir. Çünki Türk-İslam – azaddır. Bu
etibarla, bizim dünyagörüşümüz ən azı üç millətin əl-ələ verərək hazırladığı
bir sistemdir... Ərəblər, türklər, iranlılar bu əzəli həqiqətin formalaşmasında
fiqh elmi, sənətləri ilə əl-ələ vermişdir. İslamiyyət dərinin rənginə, doğuluş
məkanına fərq qoymaz. Avropanın tolerantlığını İslam son dərəcə təbii qəbul
edər. O, atəşpərəstləri belə qorumaqda tərəddüd göstərməmişdir. Həm dünyanı,
həm axirəti qucaqlayan gerçək bir dünyagörüşüdür o. İslamiyyətdə sinif fərqi
yoxdur. Türkü maddiyyətdə və mənəviyyatda dünyanın əfəndisi yapan bu
dünyagörüşü çevrəsi ilə bərabər tərəqqi edər. Biz ciddi və fədakar bir insan
cəmiyyəti ikən, Avropada səhnəyə çıxan burjuaziya bizi çökürtmək üçün əlindən
gələni edəcəkdi. Dünyanın üçdə ikisini üçdə biri üçün yaxmış, yıxmış,
siyasətdən əxlaqı qovmuş bir tülkü sivilizasiyasıdır o. Bir aslan mədəniyyəti
bir tülkü mədəniyyətinə yenildi. Uşaqların və qadınların zəfəri. Burjuaziya
bizim içimizə mürəbbiyələri ilə, aktrisaları
və elçiləri ilə soxuldu, yaltaqlandı. Gəmirdi və yıxdı. Tənzimatdan
sonra öz qınına çəkilən üləmalar bu Yəcuc-Məcuc tayfasının zəfəri qarşısında
əfəllədi. Və tarix səhnəsindən çəkildi. Zatən təbii müttəfiqləri də yoxdu
artıq.
Ərəblər doqquzuncu yüzillikdə Hindistana vaizlər
göndərirlər, Həllac Qucerataya, Malik bin Dinarın müridləri Maldivə gedir. Amma
iki dünyanı bir-birinə tanıdan Qəznəli Mahmudun fütuhatıdır. Səbuk Təkinin oğlu
Qanq vadisini ələ keçirirkən, Əl-Biruni də Hind düşüncəsini fəth edir. "Təhrir ma lil Hind” Hindistan haqqında
yazılmış ən dəyərli əsərlərdən biridir. Biruni kitabında İslam mütəsəvvifləri
ilə hind bilgələrini tutuşdurur, bənzərliklərə diqqəti çəkir, sufilərin Hüvəsi
ilə Atman və Puruşanı müqayisə edir.
Amma ustad bununla da yetinmir, "Qita” və "Patancali” doktrinalaı ilə Xristian
və yunan əqidələri arasındakı yaxınlıqları göstərir. Ustada görə, hər iki
düşüncədə hərəkətsizlik bir ətalət deyil, ruhun heç bir mükafat gözləmədən
mütləq varlığa yönəlişidir. "Vasuveda”da deyilir: "İnsanların ən yaxşısı
bilgədir. Tanrı onun sevgilisidir”. "Quran” da buyurmurmu: "Allah onları, onlar
da Allahı sevər”?!
Təqdimat və
tərcümə:
Rahid Ulusel