Bakı 13°C
“İdmançılarımızın mütləq əksəriyyəti ləyaqət nümunəsi göstərir”
"Azərbaycan iqtisadi sahədə
bütün vəzifələri uğurla icra edir. İqtisadiyyatımız
artır, sosial məsələlər öz həllini tapır. 2018-ci ildə bir çox önəmli
infrastruktur layihəsi uğurla icra olunmuşdur, nəqliyyat və neft-qaz
sahələrində tarixi nailiyyətlər əldə edilmişdir. Bütün bunları biz etmişik,
Azərbaycan xalqının böyük dəstəyi ilə buna nail olmuşuq”.
Bu barədə Prezident İlham
Əliyev 2018-ci ilin idman yekunlarına həsr olunan mərasimdə bildirib. Dövlət
başçısı ilə yekun vuraraq qeyd edib ki, bu il də çox uğurlu olub, o cümlədən
idman sahəsində. O, idmançılarımızın bizi hər il sevindirdiyini diqqətə
çatdıraraq vurğulayıb ki, Azərbaycan cəmiyyəti artıq buna öyrəşib: "Bu il
idmançılarımız tərəfindən dünya, Avropa çempionatlarında və digər beynəlxalq
yarışlarda 800-ə yaxın medal, o cümlədən 263 qızıl medal əldə edilmişdir. Bu, böyük nəticədir, böyük qələbədir. Bu qələbə
münasibətilə idmançılarımızı təbrik edirəm. Bu
qələbələr, sadəcə olaraq, idman qələbələri deyil. Çünki hər bir belə möhtəşəm
qələbə cəmiyyətimizin vətənpərvərlik ruhunu artırır, Azərbaycanı dünyada güclü
idman ölkəsi kimi tanıtdırır, Azərbaycanı təbliğ edir. Bu qələbələr gəncləri
idman bölmələrinə aparır, idmanın kütləviliyini təmin edir. Yəni, idman
qələbələri, idmançılarımızın uğurları çox böyük məna daşıyır. Buna görə biz
idmançılarımıza minnətdarıq. Eyni zamanda, onu da böyük məmnunluq hissi ilə elə
qeyd etməliyəm ki, bizim idmançılarımızın mütləq əksəriyyəti həyatda da,
məişətdə də gözəl nümunə göstərir, vətənpərvərlik, ləyaqət nümunəsi göstərir.
Əlbəttə ki, idmançılara cəmiyyətdə olan hörmət çox yüksək səviyyədədir.
Uşaqlar, yeniyetmələr bizim çempionlarımıza oxşamaq istəyirlər. Bu da təbiidir.
Mən əminəm ki, bundan sonra da idmançılarımız bizi, xalqımızı sevindirəcəklər”.
