İdman jurnalistikasına qəbulla bağlı yeni şərtlər
Azərbaycan Dövlət Bədən Tərbiyəsi və İdman
Akademiyası (ADBTİA) üç yeni magistr ixtisasları - İdman tibbi və reabilitasiya,
İdman menecmenti və İdman jurnalistikası üzrə sənəd qəbulunu elan edib. Mədəniyyət
və Turizm Nazirliyindən verilən məlumata görə, ADBTİA-da tədrisi ingilis
dilində olacaq bu ixtisaslar üzrə təhsil almaq istəyən bakalavrlar, Dövlət
İmtahan Mərkəzinin magistr imtahanının birinci mərhələsini keçməlidirlər. Bununla
yanaşı, bu ixtisasları seçən bakalavrlar TOEFL IBT (minimum 83 bal) və ya IELTS
(minimum 6.5 bal) test nəticələrini təqdim etməlidirlər.
Xarici dil sertifikatı tələbinin nə üçün
imtahana az bir vaxt qalmış zamanda açıqlandığını, bundan sonrakı mərhələdə
tələbələri nə gözlədiyini aydınlaşdırmağa çalışdıq.
Tələbə
üçün əlavə xərc
Təhsil
üzrə ekspert Kamran Əsədov bildirir ki, ümumən təcrübəyə və qanunvericiliyə əsasən,
qəbul ilində olan yeniliklər imtahandan minimum altı ay əvvəl ictimaiyyətə
açıqlanmalıdır: "Bu il magisturaturaya qəbul imtahanları ilə bağlı yeniliklərdən,
təzə ixtisasların olacağından danışılmışdı. Amma sənəd qəbulu ilə bağlı
dəyişiklik isə yalnız "Magistr” jurnalının birinci nömrəsindən sonra açıqlandı.
Bu da heç yaxşı hal deyil. Çünki Azərbaycanda İELTS imtahanları ay ərzində bir
dəfə keçirilir və bura müəyyən hazırlıq tələb olunur. Həmin imtahanın
nəticələri isə on üç gündən sonra açıqlanır. Yenə də vurğulayıram ki, qəbulda
olan hər hansı bir yenilik haqqında tələbələrə altı ay əvvəldən məlumat
verilməliydi ki, bu ixtisası seçmək istəyənlər xarici dil sertifikatı almaq
üçün əvvəlcədən hazırlaşsınlar. Azərbaycan Respublikasının "Təhsil haqqında”
qanununa əsasən deyə bilərəm ki, heç kim təhsil müddətində keçmədiyi fəndən
imtahan verə bilməz. Yəni bakalavr pilləsində onu mənimsəməyibsə, ondan necə
imtahan verəcək? Magistraturaya qəbul
zamanı bakalavrlara məntiqdən, informatikadan və xarici dil fənnindən imtahan
keçirilir. Tələbələr magistr pilləsinə qəbul üçün riyazi məntiqdən imtahan
verirlər. Amma ali məktəblərdə bakalavra o səviyyədə məntiq dərsləri keçirilmir.
Buna görə də tələbələr mütləq şəkildə hazırlığa gedirlər. Həmçinin informatika
və xarici dil fənni də bakalavr pilləsində dərinləşmiş şəkildə keçirilmir. Lakin
qəbul zamanı akademik səviyyədə xarici dil tələb olunur. Bu da tələbəni əlavə
xərcə yönəldir”.
"Nazirlər
Kabinetinin qərarını gözləyirdik”
Gənclər
və İdman Nazirliyinin mətbuat katibi Səmayə Məmmədovanın sözlərinə görə, bu
barədə məlumat ictimaiyyətə çoxdan verilib: "Biz Bədən Tərbiyəsi və İdman Akademiyası
ilə bu məsələyə təxminən bir ildən çox idi ki, hazırlaşırdıq. Bununla bağlı
proqram hazırlayıb, Nazirlər Kabinetinə təhvil vermişdik. Biz sadəcə, Nazirlər Kabinetinin
qərarını gözləyirdik ki, proqram qüvvəyə minsin. Qərar qüvvəyə minən kimi,
media nümayəndələri ilə konfrans keçirib, bununla bağlı açıqlama verdik. Yəni əvvəldən
bu haqda məlumat yaymışdıq ki, ADBTİA-da yeni
ixtisasların yaranması nəzərdə tutulub. O ki qaldı ingilis dil biliyinə, bunun
üçün hazırlıq qrupları yaradılacaq və dili müəyyən qədər bilənlərin bu kursu
keçərək dil səviyyəsini daha da təkmilləşdirmək imkanı olacaq. Dərslər ingilis
dilində olacaq deyə, müəllimlərin çoxu xaricdən gələcək”.
Abituriyentlər üçün dil kursu təşkil olunacaq
Bədən Tərbiyəsi və İdman Akademiyası, Strateji
İnkişaf Komitəsinin sədri Şəms Mustafayeva deyir
ki, sertifikatı əldə etmək üçün tələbələrin may, iyun, iyul ayları da daxil
olmaqla, vaxtları var. Hətta İELTS nəticəsi 5.5 olanlar da ərizə verə bilər: "Bizim
yayda intensiv ingilis dili dərslərimiz olacaq. Amma kursların ödənişi hələ müəyyənləşməyib.
Əgər tələbənin sertifikatı yoxdursa, bu halda, yayda təşkil olunacaq dil
kursumuza gəlməyi vacibdir. Bu zaman kursu bitirdikdən sonra onu biz imtahan
edəcəyik. Tələbə birinci turda imtahandan keçdikdən sonra, ikinci turdan əvvəl
bizə müsahibəyə gələcək. Əgər bizdə müsahibədən keçməsə,
o, başqa ixtisasa yönələ bilər. Müsahibədən müvəffəqiyyətlə keçməyənlər, şərti
olaraq keçənlər də ola bilər. Şərti olaraq keçmək o deməkdir ki, yəni tələbənin
müəyyən dil biliyi var, amma bu bizim üçün yetərli deyil. Bu zaman həmin
tələbələr yayda kursa gələrək dil səviyyələrini yaxşılaşdıra bilərlər. İntervyuda
isə ingilis dili səviyyəsi, ünsiyyət qurmaq bacarığı və jurnalistika bilikləri
yoxlanılacaqdır. İdmanla yaxından tanış olması mütləq deyil, təbii ki. Amma
niyə idman jurnalisti olmaq istəyir - bunu izah edə bilməlidir. Bakalavr
təhsili jurnalistika üzrə olmalıdır deyə bir tələbimiz yoxdur. Başqa fakültələrin
də məzunları ola bilər”.
4500 manat təhsil haqqı
Ş.Mustafayeva qeyd edir ki, dövlət sifarişli yer yoxdur, amma
ola bilsin ki, tələbələrə güzəştlər olsun. Yuxarı balla qəbul olan, müsahibədə
özünü yaxşı ifadə edənlərə güzəştlər olacaq: "Bizim sertifikat tələbini
qoymağımıza səbəb tərəfdaşlarımızdır. Çünki biz İngiltərə universitetləri ilə
tərəfdaşlıq edirik. Proqramı da onlarla birgə işləyib hazırlamışıq. Və
dərslərin bəzisini İngiltərədən gəlmiş müəllimlər tədris edəcək. Həmin
müəllimlərin də çox yüksək tələbləri var . Həm də təhsil ingiliscə olduğu üçün
ingilis dili səviyyəsi əsas götürülür. İlk turda verilən ingilis dili imtahanı
ilə bu eyni deyil. Çünki tədris zamanı akademik səviyyədə ingilis dili tələb
olunacaq. On nəfər tələbə qəbulu nəzərdə tutulub. Və biz bu on nəfər üçün artıq
studiya da qurmuşuq. Texniki baxımdan təchiz olunmuş studiyamız var. Tələbələr
praktik işləyə biləcəklər. Təhsil haqqı isə dörd min beş yüz manat nəzərdə
tutulub. Amma əvvəldə vurğuladığım kimi, güzəştlər də olacaq”.
İmkanlı şəxslərin oxuya
biləcəyi fakültə...
Məsələ ilə bağlı tələbələrin də düşüncələrini öyrəndik.
Fikirlər birmənalı deyil. Bəzi tələbələr bu ixtisasa qoyulan şərtlərə görə
sənədlərini idman jurnalistikasına verməkdən vaz keçdiyini, digər
universitetlərin jurnalistika fakültəsinə yönəldiyini bildirdilər. Başqa bir
qisim isə xaric dil səviyyəsi yaxşı olsa da, təhsil haqqının yüksək olması
səbəbindən bu ixtisası seçə bilmədiyini dedi.
Bakı Dövlət Universitetinin Jurnalistika fakültəsinin
dördüncü kurs tələbəsi Qoşqar Bəylərov qeyd edir ki, əslində idman jurnalistikası idmanın yox, jurnalistikanın bir
bölməsidir. Ona görə də belə bir bölmənin İdman Akademiyasında yox,
Jurnalistika fakültəsində təşkil olunması daha məqsədəuyğun olardı: "Lakin hər halda belə alınıb. Nəzərə alsaq ki
İngiltərədən sırf buna görə mütəxəssislər dəvət olunur, onda, təhsil haqqının
yüksək olması normaldır. Lakin idman jurnalisti kimi formalaşmaq istəyən və
buna maddi imkanı çatmayanların da olduğunu unutmaq olmaz. Dörd min beş yüz
manat Azərbaycan reallığında vətəndaş üçün yüksək
məbləğdir. Belə çıxır ki, biz o fakültəyə sadəcə imkanlı şəxslərin oxuya
biləcəyi bir fakültə kimi baxmalıyıq. Bu gün həqiqətən də Azərbaycanın peşəkar
idman jurnalistlərinə ehtiyacı var. Hər halda, hadisəyə daha geniş aspektdən
baxsaq, müsbət addım kimi qiymətləndirə bilərik”.
Günel Azadə